पिंपरी-चिंचवडकरांनो, ‘हरित प्रतिज्ञा’ घ्या! महापालिकेचे नागरिकांना ‘माझी वसुंधरा’ अभियानात सहभागी होण्याचे आवाहन

https://majhivasundhara.in संकेतस्थळावर ‘ई-प्लेज’ घेऊन पर्यावरणपूरक जीवनशैलीचा संकल्प करा; सहभागाचा फोटो सोशल मीडियावर करा टॅग

पिंपरी चिंचवड, प्रतिनिधी बालाजी नवले, दि. ३० ऑक्टोबर २०२५, मॅक्स मंथन डेली न्यूज:

पर्यावरण संवर्धन, हवामान बदल नियंत्रण आणि हरित जीवनशैलीचा प्रसार करण्याच्या उद्देशाने राज्य शासनाने सुरू केलेल्या “माझी वसुंधरा” या महत्त्वपूर्ण उपक्रमात ‘हरित प्रतिज्ञा’ घेऊन सहभागी व्हावे, असे आवाहन पिंपरी चिंचवड महापालिकेच्या (PCMC) वतीने नागरिकांना करण्यात आले आहे.

पिंपरी चिंचवड महापालिकेचा आरोग्य विभाग नागरिकांमध्ये वसुंधरा संवर्धन, हरित सवयी आणि जबाबदार नागरी सहभाग वाढवण्यासाठी विविध उपक्रम राबवत आहे. आता या मोहिमेचा भाग म्हणून शहरातील नागरिकांनी ऑनलाईन पद्धतीने ‘हरित प्रतिज्ञा’ (E-Pledge) घेऊन पर्यावरणपूरक जीवनशैलीचा संकल्प करावा आणि कृतीतून निसर्गसंवर्धनाची जबाबदारी स्वीकारावी, असे आवाहन महापालिकेने केले आहे.

माझी वसुंधरा अभियानात सहभागी होण्यासाठी नागरिकांनी खालील सोप्या टप्प्यांचे अनुसरण करावे:

• संकेतस्थळ: सर्वप्रथम https://majhivasundhara.in या संकेतस्थळाला भेट द्या.
• भाषा निवड: मराठी / इंग्रजी यापैकी मराठी भाषा निवडा.
• पर्याय निवडा: तुमच्या स्क्रीनवर दिसणारा ‘हरित शपथ’ हा पर्याय क्लिक करा.
• ई-प्लेज: त्यानंतर ‘त्वरित तुमची ई-प्लेज घ्या’ या पर्यायावर क्लिक करा.
• माहिती: ‘पुढे जा’ या पर्यायावर क्लिक करून, ‘वैयक्तिक / सामूहिक’ यापैकी एक पर्याय निवडून ‘सादर करा’ या पर्यायावर क्लिक करा.
• फॉर्म भरा: तुमच्या स्क्रीनवर दिसणारा प्रतिज्ञा अर्ज भरून ‘सादर करा’ या पर्यायावर क्लिक करा.

 सहभागाचे आवाहन: या अभियानांतर्गत नागरिकांनी झाड लावताना, वृक्षारोपण करताना किंवा हरित उपक्रमात सहभागी होताना एक फोटो घेऊन तो सोशल मीडियावर अपलोड करावा आणि पिंपरी चिंचवड महापालिकेच्या अधिकृत सोशल मीडिया पेजेसना टॅग करावे, असे आवाहन आरोग्य विभागाने केले आहे.

अतिरिक्त आयुक्त विजयकुमार खोराटे यांनी सांगितले:

“पिंपरी चिंचवड शहराने ‘हरित जीवनशैली’ अंगीकारण्यासाठी पुढाकार घेतला आहे. ‘माझी वसुंधरा ६.०’ अभियानामुळे नागरिकांना पर्यावरणपूरक विचार आणि कृतींचे प्रात्यक्षिक देण्याची उत्तम संधी मिळते. सर्व घटकांनी एकत्रित प्रयत्न केल्यास पिंपरी चिंचवड शहर राज्यातील आदर्श, सुंदर आणि हरित शहर ठरू शकेल.”

उपायुक्त डॉ. प्रदीप ठेंगल यांनी पर्यावरणाप्रती बांधिलकी व्यक्त केली:

“माझी वसुंधरा ही केवळ एक हरित मोहीम नसून, ती प्रत्येक नागरिकाची पर्यावरणाशी असलेली बांधिलकी आहे. प्रत्येकाने एक झाड लावून त्याची निगा राखली, प्लास्टिकचा वापर कमी केला आणि पाणी व उर्जेची बचत केली, तर आपण सर्व मिळून हरित व प्रदूषणमुक्त शहर घडवू शकतो. भविष्यातील पिढ्यांसाठी हीच खरी भेट ठरेल.”

© २०२५ मॅक्स मंथन डेली न्यूज. सर्व हक्क राखीव.