युरोपसोबत पिंपरी-चिंचवडची नवी भरारी! शाश्वत विकासासाठी महापालिका ‘IURC’ कार्यक्रमात सहभागी
हरित शहर निर्मितीसाठी आंतरराष्ट्रीय सहकार्य; अतिरिक्त आयुक्त विजयकुमार खोराटे आणि मुख्य अभियंता संजय कुलकर्णी यांनी मांडली शहराची भूमिका!
पिंपरी प्रतिनिधी शाम सोनवणे, दि. ३१ ऑक्टोबर २०२५, मॅक्स मंथन डेली न्यूज:
पिंपरी-चिंचवड महापालिका आता आंतरराष्ट्रीय पातळीवर आपले स्थान मजबूत करत आहे. नवी दिल्ली येथे नुकत्याच पार पडलेल्या ‘अर्बन इन्फ्रास्ट्रक्चर फायनान्स फेस्टिव्हल २०२५’ दरम्यान “समावेशक, सक्षम व शाश्वत शहरे” या महत्त्वाकांक्षी संकल्पनेखाली ‘इंटरनॅशनल अर्बन अँड रिजनल को-ऑपरेशन (IURC) आशिया आणि ऑस्ट्रेलाशिया कार्यक्रमाचा’ भारतात अधिकृत शुभारंभ झाला. या प्रतिष्ठित कार्यक्रमासाठी पिंपरी चिंचवड महापालिकेला विशेष निमंत्रण मिळाले होते.
यावेळी आयोजित ‘आययूआरसी इंडिया किक-ऑफ मिटिंग’ सत्रात युरोपियन युनियनचे प्रतिनिधी आणि राष्ट्रीय भागीदारांसह भारतातील सहा ‘पायलट शहरे’ सहभागी झाली होती. या सहा शहरांमध्ये चेन्नई, पिंपरी चिंचवड, जबलपूर, कटक, गँगटोक आणि लेह यांचा समावेश होता. या सत्रात शाश्वत शहरी विकासासाठी आंतरराष्ट्रीय सहकार्याच्या संधींवर सखोल चर्चा झाली.
पिंपरी चिंचवड महापालिकेचे प्रतिनिधित्व करताना मुख्य अभियंता संजय कुलकर्णी यांनी शहराच्या शाश्वत विकासासाठी राबविल्या जाणाऱ्या विविध योजनांची माहिती दिली. त्यांनी शहरी नवोपक्रम, सार्वजनिक वाहतूक सुधारणा, हवामान लवचिकता आणि पर्यावरण संरक्षण यांसारख्या क्षेत्रांतील महापालिकेचे प्रयत्न प्रभावीपणे अधोरेखित केले.
संजय कुलकर्णी यांनी सांगितले की, पिंपरी चिंचवड महापालिका सध्या हवामान अनुकूल विकास, हरित गतिशीलता, कचरा व्यवस्थापन आणि ऊर्जा कार्यक्षमतेसाठी नाविन्यपूर्ण उपाययोजना राबवित आहे. वाढत्या नागरीकरणामुळे निर्माण होणाऱ्या पायाभूत आव्हानांवर मात करण्यासाठी बहुस्तरीय समन्वयाची गरज असल्याचेही त्यांनी नमूद केले.
विजयकुमार खोराटे, अतिरिक्त आयुक्त, पिंपरी चिंचवड महापालिका यांनी या समावेशाबद्दल बोलताना सांगितले, “आंतरराष्ट्रीय पातळीवर शहरांदरम्यान सहकार्य वाढविण्यासाठी पिंपरी चिंचवड महापालिका सातत्याने प्रयत्नशील आहे. ‘आययूआरसी आशिया आणि ऑस्ट्रेलाशिया कार्यक्रम’ अंतर्गत भारत–युरोप शहर भागीदारीत आमच्या शहराचा समावेश होणे ही अभिमानाची बाब आहे. यामुळे शाश्वत शहरी विकासासाठी नवनवीन कल्पना, तंत्रज्ञान आणि गुंतवणुकीच्या संधी निर्माण होतील.”
संजय कुलकर्णी, मुख्य अभियंता, पिंपरी चिंचवड महापालिका यांच्या मते, “पिंपरी चिंचवड हे वेगाने वाढणारे आणि नवकल्पनांना प्रोत्साहन देणारे शहर आहे. ‘अर्बन इनोव्हेशन, मोबिलिटी आणि क्लायमेट रेसिलियन्स’ या क्षेत्रांत युरोपियन शहरांसोबत सहकार्य करण्याची मोठी संधी ‘आययूआरसी इंडिया’च्या माध्यमातून मिळाली आहे. बहुउद्देशीय संस्थांमधील समन्वय आणि वेगवान शहरीकरण ही आमची आव्हाने असली तरी, या भागीदारीतून त्यावर सक्षम उपाय शोधता येतील असा आम्हाला विश्वास आहे.”
या सत्रादरम्यान हवामान अनुकूलता, सर्क्युलर इकॉनॉमी, डिजिटल नवोपक्रम आणि शाश्वत वित्तपुरवठा यांसारख्या सामाईक प्राधान्य क्षेत्रांवर सविस्तर विचारमंथन झाले. युरोप आणि भारतीय प्रतिनिधींनी या भागीदारीला स्मार्ट सिटीज मिशन आणि नॅशनल अर्बन पॉलिसी फ्रेमवर्कशी सुसंगत ठेवण्याचे महत्त्व अधोरेखित केले.
या महत्त्वपूर्ण सत्राचा समारोप संयुक्त कृती आराखडे, क्षमता-वृद्धी उपक्रम आणि तांत्रिक देवाणघेवाण सुरू करण्याच्या वचनबद्धतेने झाला. या उपक्रमाने युरोप आणि भारत यांच्यातील सहकार्याच्या एका नव्या पर्वाची सुरुवात केली आहे. यावेळी व्हिक्टोरिया कैडालोवा, लुट्झ कोप्पेन, पाब्लो गांदारा आणि स्मिता सिंग आदी मान्यवर उपस्थित होते.
© 2025 मॅक्स मंथन डेली न्यूज. सर्व हक्क राखीव.
