माजी पोलीस उपनिरीक्षक प्रमोद चिंतामणींवर ९३ लाखांची फसवणूक केल्याप्रकरणी गुन्हा दाखल

२० महिन्यांत पैसे दुप्पट करण्याचे आमिष दाखवून गुंतवणूकदारांना गंडा; भोसरी पोलीस स्टेशनमध्ये संतोष तरटे यांच्या तक्रारीवरून गुन्हा नोंद, आरोपी अटक नाहीत

पिंपरी चिंचवड प्रतिनिधी बालाजी नवले, दि. २७ नोव्हेंबर २०२५, मॅक्स मंथन डेली न्यूज:

पिंपरी चिंचवड शहरात एक धक्कादायक घटना उघडकीस आली आहे. आर्थिक गुन्हे शाखेतील निलंबित पोलीस उपनिरीक्षक (PSI) प्रमोद चिंतामणी यांच्याविरुद्ध अनेक नागरिकांची फसवणूक केल्याप्रकरणी भोसरी पोलीस स्टेशनमध्ये गुन्हा दाखल करण्यात आला आहे. पैसे दुप्पट करून देण्याचे आमिष दाखवून प्रमोद चिंतामणी आणि त्यांच्या दोन साथीदारांनी गुंतवणूकदारांचे ९३ लाख रुपये घेऊन फसवणूक केल्याचे तपासात निष्पन्न झाले आहे.

या प्रकरणी माध्यम प्रतिनिधींकडून विचारणा होत असल्याने भोसरी पोलिसांनी प्राथमिक माहिती दिली आहे.

• फिर्यादी: संतोष बालकृष्ण तरटे, वय ४३ वर्षे, राहणार- रहाटणी पुणे.

• आरोपींची नावे:

  1. प्रमोद चिंतामणी (पोलीस उप निरीक्षक, सध्या निलंबित, नेमणूक – आर्थिक गुन्हे शाखा, पिंपरी चिंचवड).

  2. गोरक्ष प्रकाश मेड (व्यवसाय- रिक्षा चालक, राहणार- सांगावी, पुणे).

  3. संदीप अहिर (व्यवसाय- रिअल इस्टेट एजंट, राहणार- भोसरी पुणे).

• गुन्हा नोंद: भोसरी पोलीस ठाणे अप नं. 687/2025

• कलमे: भारतीय न्याय संहिता कलम 316(2), 318(4), 336(2), 338, 336(3), 3(5) कलमान्वये.

• आरोपी अटक: निरंक (गुन्हा दाखल झाला असून, अजून अटक झालेली नाही.)

• फसवणूक रक्कम: फिर्यादी व साक्षीदार यांचे एकत्रित गुंतवणूक रक्कम ९३,००,०००/- रुपये व त्यावरील परतावा.

फिर्यादी संतोष बालकृष्ण तरटे यांनी दिलेल्या तक्रारीनुसार, निलंबित पोलीस उपनिरीक्षक प्रमोद चिंतामणी यांनी त्यांना “तुम्ही माझ्याकडे पैसे गुंतवणूक करा, मी तुम्हाला २० महिन्यांत तुमचे पैसे दुप्पट करून देतो,” असे सांगितले होते.

• यावर विश्वास ठेवून संतोष तरटे यांनी सन २०२३ मध्ये एकूण १८ लाख रुपयांची गुंतवणूक केली.

• या गुंतवणुकीचे ३६ लाख रुपये करून देण्याचे आश्वासन प्रमोद चिंतामणी यांनी दिले होते.

• परंतु, आजपर्यंत आरोपी प्रमोद चिंतामणी यांनी फिर्यादीला गुंतवलेल्या १८ लाख रकमेपैकी फक्त १५ लाख ४० हजार रुपये परत केले आहेत, तर उर्वरित २० लाख ६० हजार रुपये परत न करता फसवणूक केली आहे.

तक्रारीच्या चौकशीदरम्यान असे निष्पन्न झाले आहे की, निलंबित पोलीस उपनिरीक्षक प्रमोद चिंतामणी यांनी याच पद्धतीने इतर नागरिकांचीही फसवणूक केली आहे. साक्षीदारांनी दिलेल्या जबाबानुसार त्यांची एकूण गुंतवणूक खालीलप्रमाणे आहे:

1. आनंद पिंगळे: ४० लाख रुपये.

2. शांताराम भोंडवे: ५ लाख रुपये.

3. गणेश खारगे: ५ लाख रुपये.

4. बिस्मिल्ला शेख: १० लाख रुपये.

5. शीतल पाटील: ५ लाख रुपये.

6. बापूसाहेब खेंगरे: ५ लाख रुपये.

प्रमोद चिंतामणी यांनी ‘पैसे डबल करून देतो’ किंवा ‘४ टक्के नफा देतो’ असे आमिष दाखवून फिर्यादी संतोष बालकृष्ण तरटे आणि वरील सहा साक्षीदारांकडून एकूण ९३ लाख रुपये स्वीकारून त्यांची फसवणूक केली आहे.

गुन्ह्याच्या पुढील तपासादरम्यान आणखी नागरिकांची फसवणूक झाली असल्याची दाट शक्यता असल्याने, फसवणुकीच्या रकमेत वाढ होण्याची शक्यता आहे. भोसरी पोलीस या गुन्ह्याचा पुढील तपास वरिष्ठांच्या मार्गदर्शनाखाली करत आहेत.

© २०२५ मॅक्स मंथन डेली न्यूज. सर्व हक्क राखीव.