घरेलू कामगारांच्या प्रश्नांवर लवकरच बैठक; विधानसभेचे उपाध्यक्ष अण्णा बनसोडे यांचे मुंबईत चर्चा करण्याचे आश्वासन

कल्याणकारी मंडळाकडून न्याय आणि लाभांसाठी प्रयत्नशील राहण्याचे आश्वासन; शिष्टमंडळाने नागपूर अधिवेशनात केली भेट

पिंपरी प्रतिनिधी शाम सोनवणे, दि.१० डिसेंबर २०२५, मॅक्स मंथन डेली न्यूज: 

महाराष्ट्र राज्यातील लाखो घरेलू कामगारांच्या प्रश्नांवर लवकरच मुंबई येथे बैठक आयोजित केली जाईल, असे आश्वासन महाराष्ट्र विधानसभेचे उपाध्यक्ष अण्णा बनसोडे यांनी दिले आहे. कष्टकरी महिलांना घरेलू कामगार कल्याणकारी मंडळाच्या (Domestic Workers Welfare Board) माध्यमातून न्याय आणि लाभ मिळवून देण्यासाठी आपण प्रयत्नशील राहू, असे ते म्हणाले.

बुधवारी (दि. १० डिसेंबर २०२५) नागपूर येथील हिवाळी अधिवेशनादरम्यान महाराष्ट्र राज्य घरेलू कामगार समन्वय समिती, कष्टकरी संघर्ष महासंघ महाराष्ट्र आणि सहभागी संघटनांच्या शिष्टमंडळाने अण्णा बनसोडे यांची भेट घेऊन निवेदन सादर केले आणि त्यांच्याशी सविस्तर चर्चा केली.

शिष्टमंडळाने अण्णा बनसोडे यांचे लक्ष खालील प्रमुख मागण्यांकडे वेधले:

• घरेलू कामगारांना सामाजिक सुरक्षा (Social Security)

• ईएसआयसी (ESIC) योजना लागू करणे

• कल्याणकारी महामंडळाला निधीची उपलब्धता

• नोंदणी प्रक्रिया जलद गतीने करणे

• पेन्शन (Pension) योजना लागू करणे

अण्णा बनसोडे यांनी घरेलू कामगारांच्या कामाबाबत आणि त्यांच्या सामाजिक सुरक्षिततेबाबत आपुलकी दाखवली. हा वर्ग चिकाटीने आणि मेहनत करणारा असून, शासनाकडून त्यांना लाभ देणे आवश्यक आहे. त्यासाठी आपण प्रयत्नशील राहू आणि संबंधित अधिकारी, विभाग व संघटनेचे पदाधिकारी यांचेसमवेत लवकरच मुंबईत बैठक आयोजित करू, असे आश्वासन त्यांनी दिले.

यावेळी कामगार नेते काशिनाथ नखाते, समितीचे राजू वंजारे, नागपूरच्या सुजाता भोंगाडे, मुंबई उपनगरचे संतोष थोरात, कसमच्या माधुरी जलमूलवार, अमरावतीच्या भाग्यश्री खडेकर, सांगलीच्या किरण कांबळे, धुळेचे शहाजी शिंदे, पुष्कराज शिरधनकर, मीरा सपकाळे, लातूरचे दशरथ जाधव, पुण्याच्या अनिता गोरे, नवी मुंबईच्या शांता खोत, निखत सय्यद, पालघरचे नितीन कुबल, विदर्भातील नितीन मेश्राम, पुष्कराज शिरधनकर, किरण साडेकर, राजू बिराजदार, राजेश माने, लाला राठोड, सुनील भोसले आदी पदाधिकारी उपस्थित होते.

© २०२५ मॅक्स मंथन डेली न्यूज. सर्व हक्क राखीव.