वडापाव जागतिक क्रमवारीत ५ व्या स्थानावर; हे यश ‘स्ट्रीट फूड’ विक्रेत्यांच्या श्रमाचे – काशिनाथ नखाते
जगातील सर्वोत्तम १०० खाद्यपदार्थांत वडापावला मानाचे स्थान; पथ विक्रेत्यांच्या सन्मानासाठी कामगार नेत्यांकडून कौतुक.
पिंपरी प्रतिनिधी शाम सोनवणे, दि.१८ डिसेंबर २०२५, मॅक्स मंथन डेली न्यूज:
सर्वसामान्यांचे ‘बर्गर’ म्हणून ओळखला जाणारा आणि महाराष्ट्राच्या खाद्यसंस्कृतीचा अविभाज्य भाग असलेला वडापाव आता जागतिक स्तरावर झळकला आहे. लोकप्रिय खाद्य मार्गदर्शक ‘टेस्ट ॲटलस’ (TasteAtlas) ने जाहीर केलेल्या जगातील सर्वोत्तम १०० खाद्यपदार्थांच्या क्रमवारीत मुंबईच्या वडापावने ५ वे स्थान पटकावले आहे. या यशाचे खरे श्रेय रस्त्यावरील हातगाडी, स्टॉल आणि पथ विक्रेत्यांना जाते, अशा शब्दांत कामगार नेते काशिनाथ नखाते यांनी विक्रेत्यांचे कौतुक केले.
‘बेस्ट फूड सिटीज इन द वर्ल्ड’ आणि जगातील सर्वोत्तम सँडविचच्या यादीत वडापावने आपले स्थान निश्चित केले आहे. या मानांकनात स्थान मिळवणारा वडापाव हा महत्त्वाचा भारतीय पदार्थ ठरला आहे. यामुळे मुंबई आणि महाराष्ट्राची ओळख जागतिक स्तरावर एक ‘खाद्यपदार्थांचे शहर’ म्हणून अधिक गडद झाली आहे.
काशिनाथ नखाते यावेळी म्हणाले की, “बेताची आर्थिक स्थिती असलेल्या नागरिकांपासून ते श्रीमंतांपर्यंत सर्वांच्या आवडीचा हा पदार्थ चविष्ट बनवण्याचे काम पिढ्यानपिढ्या रस्त्यावरील विक्रेते करत आहेत. वडापावसोबतच मिसळपाव, भेळ, पाणीपुरी आणि चहा हे पदार्थ सर्वसामान्यांचे जीवन सुसह्य करतात. या विक्रेत्यांना अधिक संधी आणि सन्मान मिळवून देण्यासाठी ‘पथ विक्रेता कायद्या’ची (Street Vendors Act) अंमलबजावणी होणे आवश्यक आहे.”
नॅशनल हॉकर फेडरेशन, महाराष्ट्र हॉकर फेडरेशन आणि महाराष्ट्र फेरीवाला क्रांती महासंघाच्या माध्यमातून राज्यातील सर्व महानगरपालिकांमध्ये या कायद्याच्या प्रभावी अंमलबजावणीसाठी प्रयत्न सुरू आहेत. हा कायदा पूर्णतः लागू झाल्यास वडापाव विक्रेत्यांसह सर्व पथ विक्रेत्यांना अधिकृत दर्जा मिळेल आणि त्यांना जागतिक स्तरावर आपल्या पदार्थांचे ब्रँडिंग करण्याची मोठी संधी प्राप्त होईल, असा विश्वास काशिनाथ नखाते यांनी व्यक्त केला.
पिंपरी-चिंचवड आणि परिसरातील वडापाव विक्रेत्यांनी या यशाबद्दल आनंद व्यक्त केला असून, जागतिक मानांकनामुळे वडापावची क्रेझ आता अधिक वाढणार आहे.
© २०२५ मॅक्स मंथन डेली न्यूज. सर्व हक्क राखीव.
