‘दिव्य सदन’च्या वतीने कामूंजा येथे मोफत आरोग्य शिबिर; ४०० हून अधिक नागरिकांची तपासणी अन् औषधोपचार

अमरावती, २४ जानेवारी २०२६ | मॅक्स मंथन डेली न्यूज:

अमरावती : ‘रुग्ण सेवा हीच ईश्वर सेवा’ या ब्रीदवाक्याला प्रमाण मानून गेल्या ५० वर्षांपासून अविरत समाजसेवा करणाऱ्या दिव्य सदन सोशल सेंटर या सेवाभावी संस्थेच्या वतीने कामूंजा (ता. जि. अमरावती) येथे भव्य आरोग्य तपासणी व उपचार शिबिर उत्साहात पार पडले. या शिबिरामध्ये कामूंजासह सावरखेड, ओझरखेड, कुंड सर्जापूर, वारवाढ आणि परिसरातील ४०० पेक्षा जास्त गरजूंनी लाभ घेतला.

शिबिरामध्ये दयासागर दवाखान्यातील नामांकित डॉक्टरांनी रुग्णांची तपासणी केली. यामध्ये:

• डॉ. सोनाक्षी मॅडम (स्त्रीरोग तज्ज्ञ): यांनी महिलांच्या आरोग्याबाबत मार्गदर्शन व तपासणी केली.

• डॉ. तबस्सुम मॅडम (बालरोग तज्ज्ञ व जनरल फिजिशियन): यांनी बालकांचे आणि वृद्ध रुग्णांचे आरोग्य तपासून उपचारांचा सल्ला दिला.

• विशेष तपासण्या: शिबिरामध्ये रक्तदाब (BP), शुगर, थायरॉईड, CBC, LFT यांसारख्या महत्त्वाच्या रक्त तपासण्या मोफत करण्यात आल्या.

सिस्टर नमिता व सिस्टर ऑल्विना यांच्या मार्गदर्शनाखाली सर्व लाभार्थ्यांना मोफत औषधांचे वाटप करण्यात आले. प्रामुख्याने महिला, बालके आणि वृद्धांना पोषक आहार व टॉनिक्सचे वितरण करण्यात आले, जेणेकरून त्यांचे आरोग्य सुधारण्यास मदत होईल.

शिबिराचे संपूर्ण नियोजन दिव्य सदनच्या संचालिका सिस्टर जोसना यांनी केले. आपल्या मनोगतात त्या म्हणाल्या, “समाजाच्या शेवटच्या घटकापर्यंत आरोग्य सुविधा पोहोचवण्यासाठी दिव्य सदन नेहमीच तत्पर राहील. जनसामान्यांच्या सेवेचा हा वारसा असाच सुरू राहील.”

हे शिबिर यशस्वी करण्यासाठी सिस्टर अल्बिना, सिस्टर अलकारानी, प्रकल्प समन्वयक अक्षय आठवले, आशिष राखोंडे, अनिरुद्ध गेडाम, सौरव अवसरमोल, भूषण टेकाडे, रवी मोरे, विद्या काकडे, अम्रपाली बडगे, रमा वाकोडे, कविता गणवीर, स्थानिक आशा सेविका आणि सर्व ॲनिमेटर्सनी अथक परिश्रम घेतले. कामूंजा ग्रामस्थांनी या उपक्रमाला उत्स्फूर्त प्रतिसाद देत संस्थेचे आभार मानले.

© २०२६ मॅक्स मंथन डेली न्यूज. सर्व हक्क राखीव.