शिक्षणातून रोजगाराकडे! परदेशातील शिक्षण स्वस्त होणार तर पाच ‘विद्यापीठ टाउनशिप’ उभारल्या जाणार

केंद्रीय अर्थसंकल्प २०२६: युवाशक्ती आणि आधुनिक शिक्षणावर भर; १५ हजार शाळांत ‘कंटेंट क्रिएटर लॅब’ तर प्रत्येक जिल्ह्यात मुलींसाठी वसतीगृह!

नवी दिल्ली , १ फेब्रुवारी २०२६ | मॅक्स मंथन डेली न्यूज:

नवी दिल्ली : केंद्रीय अर्थमंत्री निर्मला सीतारामन यांनी आज संसदेत २०२६-२७ या आर्थिक वर्षाचा अर्थसंकल्प सादर केला. स्वतंत्र भारताच्या इतिहासात पहिल्यांदाच रविवारी सादर करण्यात आलेला हा अर्थसंकल्प ‘युवाशक्ती’ (Yuva Shakti) आणि तंत्रज्ञानावर आधारित विकासावर केंद्रित आहे. यामध्ये शिक्षण क्षेत्रासाठी अनेक क्रांतिकारी घोषणा करण्यात आल्या आहेत.

• कंटेंट क्रिएटर लॅब (Content Creator Labs): देशातील १५,००० माध्यमिक शाळा आणि ५०० महाविद्यालयांमध्ये ‘कंटेंट क्रिएटर लॅब’ स्थापन केल्या जाणार आहेत. याद्वारे विद्यार्थ्यांना डिजिटल युगातील आधुनिक कौशल्यांचे शिक्षण दिले जाईल.

• प्रत्येक जिल्ह्यात मुलींसाठी वसतीगृह: महिलांच्या उच्च शिक्षणातील सहभाग वाढवण्यासाठी देशातील प्रत्येक जिल्ह्यात मुलींसाठी स्वतंत्र वसतीगृह बांधण्याची घोषणा करण्यात आली आहे.

• STEM मध्ये महिलांचा टक्का वाढवणार: विज्ञान, तंत्रज्ञान, अभियांत्रिकी आणि गणित (STEM) या क्षेत्रांत महिलांचा सहभाग वाढवण्यासाठी विशेष प्रोत्साहनपर कार्यक्रम राबवले जाणार आहेत.

• नॅशनल इन्स्टिट्युट ऑफ डिझाईन (NID): पूर्व भारताच्या विकासासाठी या भागात नवीन ‘नॅशनल इन्स्टिट्युट ऑफ डिझाईन’ सुरू केले जाईल.

• पाच विद्यापीठ टाउनशिप: प्रमुख औद्योगिक कॉरिडॉरच्या जवळ ‘पाच विद्यापीठ टाउनशिप’ उभारल्या जाणार आहेत, ज्यामुळे उद्योगांना स्थानिक स्तरावरच कुशल मनुष्यबळ उपलब्ध होईल.

• Education to Employment (EEE) समिती: शिक्षण आणि रोजगार यांच्यातील दरी कमी करण्यासाठी एक उच्चस्तरीय समिती स्थापन केली जाणार आहे. ही समिती प्रामुख्याने आर्टिफिशियल इंटेलिजन्स (AI) आणि नवीन तंत्रज्ञानाचा रोजगारावर होणाऱ्या परिणामांचा अभ्यास करेल.

• आरोग्य क्षेत्रातील कौशल्य: पुढील पाच वर्षांत रेडिओलॉजी, ऑप्टोमेट्री आणि अ‍ॅनेस्थेशिया यांसारख्या १० विविध शाखांमध्ये १ लाख ‘लाईड हेल्थ प्रोफेशनल्स’ तयार करण्याचे उद्दिष्ट ठेवण्यात आले आहे.

• परदेशातील शिक्षण स्वस्त: परदेशात शिक्षणासाठी पैसे पाठवण्यावर लागणारा TCS दर ५ टक्क्यांवरून २ टक्क्यांपर्यंत कमी करण्यात आला आहे, ज्यामुळे विद्यार्थ्यांना मोठा दिलासा मिळणार आहे.

यंदाच्या अर्थसंकल्पात गेल्या वर्षीच्या तुलनेत आयआयटी (IIT) किंवा आयआयएम (IIM) साठी कोणतीही नवीन मोठी घोषणा किंवा विस्ताराची योजना जाहीर केलेली नाही. त्याऐवजी अस्तित्वात असलेल्या संस्थांच्या संशोधनावर आणि गुणवत्तावाढीवर भर दिला जाणार असल्याचे अर्थमंत्र्यांनी स्पष्ट केले.

© २०२६ मॅक्स मंथन डेली न्यूज. सर्व हक्क राखीव.