शालेय विद्यार्थ्यांसाठी अमरावतीत रंगणार विभागीय प्रश्नमंजुषा स्पर्धा; ऊर्जा बचतीचा संदेश देण्यासाठी ‘महाऊर्जा’चा पुढाकार

अमरावती , ६ फेब्रुवारी २०२६ | मॅक्स मंथन डेली न्यूज:

अमरावती : शालेय विद्यार्थ्यांमध्ये ऊर्जा बचत आणि अपारंपरिक ऊर्जेबाबत जागरूकता निर्माण करण्यासाठी राज्य शासन व महाऊर्जा विभागाच्या वतीने विभागीयस्तरीय प्रश्नमंजुषा स्पर्धेचे आयोजन करण्यात आले आहे. ही स्पर्धा २० फेब्रुवारी २०२६ रोजी सकाळी ११ वाजता विभागीय क्रीडा संकुल, अमरावती येथे पार पडणार आहे.

विद्यार्थ्यांमध्ये ऊर्जा बचतीचे महत्त्व रुजवून तो संदेश त्यांच्या पालकांपर्यंत आणि पर्यायाने समाजापर्यंत पोहोचवणे, हा या स्पर्धेचा मुख्य उद्देश आहे. अमरावती विभागातील सर्व जिल्हा परिषद शाळा, नगरपरिषद/नगरपालिका शाळा, समाजकल्याण शाळा आणि आदिवासी विकास विभागाच्या शाळांमधील इयत्ता ८ वी व ९ वीच्या विद्यार्थ्यांसाठी ही संधी उपलब्ध करून देण्यात आली आहे.

• विषय: ऊर्जा संवर्धन व अपारंपरिक ऊर्जा.

• सहभाग: प्रत्येक शाळेतून एक किंवा दोन गटांची नोंदणी करता येईल. प्रत्येक गटात जास्तीत जास्त दोन विद्यार्थी असतील.

• नोंदणी: ‘प्रथम येणाऱ्यास प्रथम प्राधान्य’ या तत्त्वावर जास्तीत जास्त २०० विद्यार्थ्यांची नोंदणी स्वीकारली जाणार आहे.

स्पर्धेतील विजेत्यांना रोख रक्कमेसह प्रशस्तीपत्रक देऊन गौरविण्यात येणार आहे:

• प्रथम क्रमांक: १५,००० रुपये.

• द्वितीय क्रमांक: १०,००० रुपये.

• तृतीय क्रमांक: ५,००० रुपये.

नोंदणी व अधिक माहितीसाठी महाऊर्जा विभागाने जिल्ह्यानुसार समन्वय अधिकाऱ्यांची नियुक्ती केली आहे:

१) अकोला व बुलढाणा: शैलेश मुळे.

२) यवतमाळ व वाशिम: विजय काळे.

३) अमरावती: हर्षल काकडे.

महाऊर्जा विभागाचे विभागीय महाव्यवस्थापक सारंग महाजन यांनी सर्व संबंधित शाळांना या अभिनव उपक्रमात मोठ्या संख्येने सहभागी होण्याचे आवाहन केले आहे. ऊर्जा संवर्धनाच्या या चळवळीत विद्यार्थ्यांचा सहभाग मोलाचा ठरणार आहे.

© २०२६ मॅक्स मंथन डेली न्यूज. सर्व हक्क राखीव.