मोशीतील ‘कल्चर क्रेस्ट’ सोसायटीची कार्यकारणी बरखास्त! उपनिबंधकांचा मोठा निर्णय; मनमानी कारभारामुळे प्रशासकाची नियुक्ती

पिंपरी प्रतिनिधी शाम सोनवणे, ७ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : मोशी स्पाईन सिटी रोड लगत असलेल्या ‘कल्चर क्रेस्ट’ सहकारी गृहनिर्माण संस्थेतील पदाधिकाऱ्यांचा मनमानी कारभार आणि अंतर्गत वादाचा फटका अखेर विद्यमान कार्यकारणीला बसला आहे. रहिवाशांनी केलेल्या तक्रारीची दखल घेत सहकारी संस्था उपनिबंधकांनी ही कार्यकारणी बरखास्त केली असून, संस्थेवर प्रशासकाची नियुक्ती केली आहे.

संस्थेचे अध्यक्ष डॉ. सुहास जोशी, सचिव राजेश घुंगार्डे आणि खजिनदार कुणाल तोडकर यांच्यासह इतर पदाधिकाऱ्यांच्या कारभाराविरुद्ध रहिवासी अनिल सौंदाडे आणि विजय तोडकर यांनी उपनिबंधक (दापोडी) यांच्याकडे तक्रार केली होती. या तक्रारीची गंभीर दखल घेऊन उपनिबंधक मुकुंद पवार यांनी ही कारवाई केली. आता संस्थेचे कामकाज पाहण्यासाठी प्रशासक म्हणून बाळकृष्ण घुगे यांची प्राधिकृत अधिकारी म्हणून नियुक्ती करण्यात आली आहे.

संस्थेची व्यवस्थापन समिती बरखास्त होण्यामागे अनेक कारणे ठरली:

• सदस्यत्व रद्द: प्रशांत महेंद्रकर, जयेश ढमाले, दिगंबर वाडेकर, अजिंक्य मारूडवार आणि डॉ. शैलजा माने या पाच सदस्यांना नियमित सभांना हजर न राहणे आणि कामकाजात दुर्लक्ष केल्यामुळे यापूर्वीच पदच्युत करण्यात आले होते.

• राजीनामे: संस्थेतील त्रुटी आणि मनमानी कारभाराला कंटाळून डॉ. दत्तात्रय खुणे आणि धनंजय गावडे यांनी सप्टेंबर २०२५ मध्ये आपल्या सदस्यत्वाचा राजीनामा दिला होता.

अनेक सदस्यांनी पदे सोडल्यामुळे समितीची आवश्यक गणसंख्या (कोरम) ७ इतकी उरली नव्हती. गणसंख्या पूर्ण नसल्याने संस्था कायदा, नियम आणि उपविधीनुसार कोणताही अधिकृत निर्णय घेणे शक्य नव्हते. व्यवस्थापन समितीमध्ये निर्माण झालेली ही कायदेशीर पोकळी लक्षात घेता, कलम ७७ अ (फ) (दोन) मधील तरतुदीनुसार उपनिबंधकांनी तातडीने प्रशासक नेमण्याचे आदेश दिले.

या कारवाईमुळे कल्चर क्रेस्ट सोसायटीतील रहिवाशांमध्ये चर्चांना उधाण आले असून, आता नवनियुक्त प्रशासक बाळकृष्ण घुगे हे संस्थेचा कारभार कसा सुरळीत करतात, याकडे सर्वांचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव.