शहराची तहान भागवण्यासाठी महापौर मैदानात! निगडी अन् चिखली जलशुद्धीकरण केंद्रांची केली पाहणी; पाणीपुरवठा यंत्रणा अधिक सक्षम करण्याचे निर्देश

पिंपरी चिंचवड प्रतिनिधी बालाजी नवले, ७ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : “स्वच्छ आणि नियमित पाणीपुरवठा हा प्रत्येक नागरिकाचा हक्क आहे, आणि तो मिळवून देणे ही माझी जबाबदारी आहे,” अशा स्पष्ट शब्दांत महापौर रवि लांडगे यांनी आपल्या कामाचा संकल्प व्यक्त केला. पिंपरी-चिंचवड शहराच्या वाढत्या लोकसंख्येचा विचार करून पाणीपुरवठा यंत्रणा अधिक सक्षम करण्यासाठी महापौरांनी आज निगडी आणि चिखली येथील जलशुद्धीकरण केंद्रांना भेट देऊन पाहणी केली.

या दौऱ्यात अतिरिक्त आयुक्त विक्रांत बगाडे, मुख्य अभियंता प्रमोद ओंभासे, सहशहर अभियंता अजय सुर्यवंशी, चीफ केमिस्ट डॉ. प्रशांत जगताप यांच्यासह पाणीपुरवठा विभागाचे वरिष्ठ अधिकारी उपस्थित होते. महापौरांनी प्रत्यक्ष प्रकल्पावर जाऊन पाण्याची गरज, शुद्धीकरणाची प्रक्रिया आणि भविष्यातील प्रस्तावित योजनांची माहिती घेतली.

चिखली परिसरासाठी सध्या इंद्रायणी नदीवरील निगोजे बंधाऱ्यातून दररोज ९० एमएलडी पाणी घेतले जाते. वाढती मागणी पाहता, भामा आसखेड धरणातून येणाऱ्या पाण्यासाठी २०० एमएलडी क्षमतेचा स्वतंत्र जलशुद्धीकरण प्रकल्प उभारण्याचे काम वेगाने सुरू आहे. हा प्रकल्प पूर्ण झाल्यावर चिखली आणि परिसरातील पाणीप्रश्न कायमचा सुटण्यास मदत होईल, अशी माहिती महापौरांनी घेतली.

निगडी येथील सेक्टर २३ मधील जलशुद्धीकरण केंद्राची पाहणी करताना महापौरांना संगणकीय सादरीकरणाद्वारे माहिती देण्यात आली.

• विस्तार: सुरुवातीला केवळ ११४ एमएलडी क्षमतेचे असलेले हे केंद्र आता ५५० एमएलडी क्षमतेने कार्यरत आहे.

• व्याप्ती: पवना नदीतील पाण्यावर प्रक्रिया करून या केंद्राद्वारे महापालिका हद्दीतील सुमारे ७५ टक्के क्षेत्राला पाणीपुरवठा केला जातो.

• गुणवत्ता: पाणी शुद्धीकरणाचे निकष आणि गुणवत्ता तपासणीबाबत महापौरांनी समाधान व्यक्त केले.

यावेळी महापौरांनी भामा आसखेड जलवाहिनी, पवना बंद जलवाहिनी आणि शहरातील पाण्याच्या टाक्यांची स्थिती याबाबत सविस्तर चर्चा केली. “नागरिकांना भविष्यातही पुरेशा दाबाने पाणी मिळण्यासाठी पायाभूत सुविधा अधिक मजबूत करा,” अशा सूचना त्यांनी प्रशासनाला दिल्या.

या पाहणी दौऱ्यात कार्यकारी अभियंता विजयसिंग भोसले, महेश बरीदे, आणि जनता संपर्क अधिकारी प्रफुल्ल पुराणिक यांचीही उपस्थिती होती.

© २०२६ मॅक्स मंथन डेली न्यूज. सर्व हक्क राखीव.