गुन्हेगारी मोडीत काढण्यासाठी पोलिसांचे ‘मिशन क्लिन’! परिमंडळ १ मधील १० गुंडांना दाखवला बाहेरचा रस्ता

पिंपरी-चिंचवड पोलिसांचा दणका! परिमंडळ १ मधील १० सराईत गुन्हेगार तडीपार; शहर स्वच्छतेसाठी आयुक्त विनय कुमार चौबे यांची मोठी कारवाई

पिंपरी प्रतिनिधी आकाश कांबळे,७ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : शहरातील गुन्हेगारी मोडीत काढण्यासाठी आणि सराईत गुन्हेगारांवर वचक बसवण्यासाठी पिंपरी-चिंचवड पोलीस आयुक्तालयाने प्रतिबंधात्मक कारवाईचा धडाका लावला आहे. पोलीस आयुक्त विनय कुमार चौबे यांच्या आदेशानुसार, परिमंडळ १ मधील एकूण १० सराईत गुन्हेगारांना महाराष्ट्र पोलीस अधिनियम १९५१ च्या कलम ५५, ५६ आणि ५७ नुसार शहरातून तडीपार करण्यात आले आहे.

तडीपार करण्यात आलेल्या गुन्हेगारांची यादी:

या कारवाईमध्ये निगडी परिसरातील संतोष उर्फ बंट्या सिद्धू पवार आणि त्याच्या टोळीतील सदस्य करण उर्फ राजू ज्ञानदेव तिरकर व रामा नंदू कुहाडे यांचा समावेश आहे. सार्वजनिक शांतता भंग करणाऱ्या आणि वारंवार गंभीर गुन्हे करणाऱ्या या गुन्हेगारांना पुणे जिल्ह्यातून हद्दपार करण्यात आले आहे.

पोलीस उप-आयुक्त (परिमंडल १) संदीप आटोळे यांनी नागरिकांना आवाहन केले आहे की, “तडीपार केलेले हे गुन्हेगार जर त्यांच्या हद्दपारीच्या कालावधीत पुणे जिल्ह्यात कोठेही आढळून आले, तर तात्काळ नियंत्रण कक्ष क्रमांक ११२ वर किंवा जवळच्या पोलीस ठाण्यात माहिती द्यावी.”

ही कारवाई पोलीस आयुक्त विनय कुमार चौबे, सह-पोलीस आयुक्त डॉ. शशिकांत महावरकर, अपर पोलीस आयुक्त बसवराज तेली यांच्या मार्गदर्शनाखाली करण्यात आली आहे. “परिमंडळ १ हद्दीतील १०० हून अधिक गुन्हेगारांच्या हालचालींवर पोलिसांचे बारीक लक्ष असून, गुन्हेगारीला आळा घालण्यासाठी भविष्यातही अशाच प्रकारची ठोस प्रतिबंधात्मक कारवाई केली जाईल,” असे प्रशासनातर्फे स्पष्ट करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.