पिंपरी-चिंचवडमध्ये अतिक्रमणांचा ‘करेक्ट कार्यक्रम’! निवडणूक कालावधीत १४३ अनधिकृत बांधकामे भुईसपाट; महापालिकेची आठही क्षेत्रीय कार्यालयांत धडक कारवाई

पिंपरी प्रतिनिधी आकाश कांबळे, ९ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : महापालिका सार्वत्रिक निवडणूक २०२५-२६ च्या पार्श्वभूमीवर पिंपरी-चिंचवड महानगरपालिका प्रशासनाने शहरात अतिक्रमणांविरुद्ध मोहिमेचा धडाका लावला आहे. निवडणूक कालावधीत आचारसंहितेचे उल्लंघन टाळण्यासाठी आणि शहराचे विद्रुपीकरण रोखण्यासाठी आठही क्षेत्रीय कार्यालयांतर्गत व्यापक कारवाई करण्यात आली आहे. यात १४३ अनधिकृत बांधकामांसह हजारो फ्लेक्स आणि टपऱ्यांवर हातोडा मारण्यात आला आहे.

आयुक्त तथा निवडणूक अधिकारी श्रावण हर्डीकर यांच्या मार्गदर्शनानुसार आणि अतिरिक्त आयुक्त तृप्ती सांडभोर यांच्या नियंत्रणाखाली ही कारवाई करण्यात आली. अतिक्रमण विभागाचे सहाय्यक आयुक्त अतुल पाटील यांनी दिलेल्या माहितीनुसार, या कारवाईत अतिक्रमण निरीक्षक, महाराष्ट्र राज्य सुरक्षा दलाचे जवान आणि पोलीस प्रशासनाचे संयुक्त पथक सहभागी होते.

शहरात आतापर्यंत खालीलप्रमाणे कारवाई करण्यात आली आहे:

• अनधिकृत बांधकामे: १४३

• फ्लेक्स: १,२६०

• केऑक्स (विज्ञापने): १३,०९७

• हातगाड्या व टपऱ्या: १७५

• इतर साहित्य (टेबल, खुर्च्या, बाकडे): २,९९५ नग जप्त.

१) ‘ह’ क्षेत्रीय कार्यालय: सर्वाधिक ५२ अनधिकृत बांधकामे हटवली.

२) ‘फ’ क्षेत्रीय कार्यालय: ३५ अनधिकृत बांधकामांवर हातोडा.

३) ‘ब’ क्षेत्रीय कार्यालय: २९ बांधकामे पाडली आणि ५५७ फ्लेक्स हटवले.

४) ‘अ’ क्षेत्रीय कार्यालय: १३ बांधकामे आणि ३,१२१ केऑक्सवर कारवाई.

५) ‘ग’ क्षेत्रीय कार्यालय: ११ बांधकामे आणि २३ हातगाड्या जप्त.

शहरातील सार्वजनिक रस्ते, पदपथ आणि मोकळ्या जागांवर अनधिकृतपणे अतिक्रमण करणाऱ्यांची गय केली जाणार नाही. भविष्यातही नियमभंग करणाऱ्यांविरोधात अशीच कठोर कारवाई सुरू राहणार असल्याचे महापालिका प्रशासनाने स्पष्ट केले आहे. निवडणूक कालावधीत शहराचे स्वरूप बिघडू नये, यासाठी प्रशासन सतर्क आहे.

© २०२६ मॅक्स मंथन डेली न्यूज. सर्व हक्क राखीव.