पोलीस भरतीतील ‘धाव’ ठरली जीवघेणी! छत्रपती संभाजीनगरमध्ये २४ वर्षीय उमेदवाराचा मृत्यू; फिनिशिंग लाईन गाठण्यापूर्वीच कोसळला

छत्रपती संभाजीनगर, २३ फेब्रुवारी २०२६ | मॅक्स मंथन डेली न्यूज:

छत्रपती संभाजीनगर : पोलीस दलात भरती होऊन खाकी वर्दी घालण्याचे स्वप्न पाहणाऱ्या एका तरुण उमेदवाराचा शारीरिक चाचणी दरम्यान दुर्दैवी मृत्यू झाला. संग्राम शिंदे (वय २४, रा. सांगली) असे या मयत तरुणाचे नाव आहे. शनिवारी सकाळी पोलीस परेड मैदानावर १६०० मीटर धावण्याच्या चाचणी दरम्यान ही हृदयद्रावक घटना घडली.

मिळालेल्या माहितीनुसार, रेल्वे पोलीस (GRP) दलातील ९३ जागांच्या भरतीसाठी प्रक्रिया सुरू होती. शनिवारी सकाळी ८:३० च्या सुमारास संग्राम १६०० मीटर धावण्याच्या चाचणीत सहभागी झाला होता.

• धावताना कोसळला: तीन फेऱ्या यशस्वीपणे पूर्ण केल्यानंतर, शेवटची फिनिशिंग लाईन गाठण्यासाठी अवघ्या काही अंतरावर असताना संग्राम अचानक मैदानावर कोसळला.

• उपचार: मैदानावरील आरोग्य पथकाने त्याला तातडीने प्रथमोपचार देऊन घाटी रुग्णालयात (GMCH) दाखल केले. मात्र, उपचारादरम्यान त्याची प्राणज्योत मालवली.

रेल्वे पोलीस अधीक्षक (SP) स्वाती भोर यांनी दिलेल्या माहितीनुसार, भरती मैदानावर रुग्णवाहिका, पाण्याचे स्टॉल्स आणि वैद्यकीय सुविधा तैनात होत्या. उमेदवारांना पुरेशा अन्नाचे आणि पाण्याचे सेवन करण्याच्या सूचनाही देण्यात आल्या होत्या. या घटनेनंतर सिडको पोलीस ठाण्यात आकस्मिक मृत्यूची नोंद करण्यात आली असून, शवविच्छेदन अहवालानंतर मृत्यूचे नेमके कारण स्पष्ट होईल.

संग्राम शिंदे हा सांगली जिल्ह्यातील पलूस तालुक्यातील मोराळे गावचा रहिवासी होता. यापूर्वी ११ फेब्रुवारी रोजी बीडमध्येही अशाच प्रकारे २६ वर्षीय दीपक व्यवहारे या तरुणाचा १६०० मीटर धावल्यानंतर मृत्यू झाला होता. लागोपाठ घडणाऱ्या या घटनांमुळे पोलीस भरतीसाठी तयारी करणाऱ्या तरुणांच्या आरोग्याचा आणि अतिश्रमाचा मुद्दा पुन्हा एकदा ऐरणीवर आला आहे.

© २०२६ मॅक्स मंथन डेली न्यूज. सर्व हक्क राखीव.