पिंपरी-चिंचवड महापालिका स्वीकृत नगरसेवक पदासाठी अभ्यासू कायदेतज्ज्ञ ॲड. विद्या शिंदे (भुजबळ) यांच्या नावाची जोरदार चर्चा! समता परिषदेचे सुनेत्राताई पवार व योगेश बहल यांना साकडे

पिंपरी चिंचवड प्रतिनिधी बालाजी नवले, ०४ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेच्या रिक्त असलेल्या ‘स्वीकृत नगरसेवक’ पदासाठीच्या राजकीय हालचालींनी आता वेग घेतला आहे. या महत्त्वाच्या पदासाठी अखिल भारतीय महात्मा फुले समता परिषदेच्या वतीने प्रगल्भ कायदेतज्ज्ञ ॲड. सौ. विद्या जयप्रकाश शिंदे (भुजबळ) यांचे नाव अग्रक्रमाने समोर आले आहे. समता परिषदेने या निवडीसाठी राष्ट्रवादी काँग्रेस पक्षाच्या राष्ट्रीय अध्यक्षा सुनेत्राताई पवार, शहराध्यक्ष योगेश बहल आणि विरोधी पक्षनेते भाऊसाहेब भोईर यांच्याकडे अधिकृत ठराव सादर करत या अभ्यासू चेहऱ्याला संधी देण्याची मागणी केली आहे.

सन १९९९ पासून पिंपरी-चिंचवड शहरात राष्ट्रवादी काँग्रेस पक्ष आणि महात्मा फुले समता परिषद यांची अभेद्य युती राहिली आहे. उपमुख्यमंत्री अजितदादा पवार आणि नामदार छगनजी भुजबळ यांच्या मार्गदर्शनाखाली समता परिषदेने शहरात बहुजन समाजाच्या हितासाठी नेहमीच कणा म्हणून काम केले आहे. महापालिकेत समता परिषदेच्या प्रतिनिधीला स्वीकृत नगरसेवक म्हणून संधी देण्याची २५ वर्षांची परंपरा आहे. हीच परंपरा कायम राखत, यंदा ॲड. विद्या शिंदे यांच्यासारख्या सुशिक्षित आणि निष्ठावान महिला नेतृत्वाला संधी मिळावी, अशी आग्रही मागणी समता परिषदेचे शहराध्यक्ष प्रदीप खंडू आहेर यांनी केली आहे.

ॲड. विद्या शिंदे (भुजबळ) या केवळ राजकीय कार्यकर्त्या नसून एक उच्चविद्याविभूषित कायदेतज्ज्ञ आहेत. त्यांच्या निवडीसाठी खालील जमेच्या बाजू प्रभावी ठरत आहेत:

• न्यायालयीन अनुभव: त्या ३ सप्टेंबर २०१६ पासून ‘बार कौन्सिल ऑफ महाराष्ट्र अँड गोवा’ मध्ये नोंदणीकृत वकील असून, त्यांना ८ वर्षांहून अधिक काळ न्यायालयीन कामकाजाचा अनुभव आहे.

• व्यावसायिक शिफारस: ‘अतिरिक्त जिल्हा व सत्र न्यायालय ॲडव्होकेट बार असोसिएशन, पिंपरी-चिंचवड’ कडूनही त्यांच्या नावाची अधिकृत शिफारस करण्यात आली आहे.

• वैचारिक वारसा: महात्मा फुले आणि सावित्रीबाई फुले यांच्या विचारांचा वारसा जपत त्यांनी सामाजिक क्षेत्रात मोठे योगदान दिले आहे.

महानगरपालिकेच्या धोरणात्मक निर्णयांमध्ये आणि कायद्याच्या चौकटीत राहून जनहिताची कामे मार्गी लावण्यासाठी ॲड. विद्या शिंदे यांच्यासारख्या अभ्यासू व्यक्तिमत्त्वाची गरज असल्याचे बोलले जात आहे. सुशिक्षित आणि कायदेतज्ज्ञ महिला प्रतिनिधीला महापालिकेत स्थान दिल्यास प्रशासकीय कामकाजात गुणात्मक सुधारणा होईल, असा विश्वास शहरातील विविध सामाजिक संस्थांनी व्यक्त केला आहे.

आता राष्ट्रवादी काँग्रेस पक्षाचे वरिष्ठ नेतृत्व या अभ्यासू आणि निष्ठावान महिला चेहऱ्याला संधी देऊन २५ वर्षांची परंपरा कायम राखणार का? याकडे संपूर्ण शहराचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव।