अर्थसंकल्प वाचायचा कसा? मुख्यमंत्री देवेंद्र फडणवीस यांचे ‘ते’ पुस्तक ठरणार मार्गदर्शक; ६ मार्चच्या बजेटपूर्वी सर्वसामान्यांसाठी डिजिटल आवृत्ती उपलब्ध

पिंपरी प्रतिनिधी आकाश कांबळे, ०५ मार्च २०२६ | मॅक्स मंथन डेली न्यूज:

पिंपरी : येत्या ६ फेब्रुवारी रोजी राज्याचे मुख्यमंत्री तथा वित्त व नियोजन मंत्री देवेंद्र फडणवीस वर्ष २०२६-२७ या आर्थिक वर्षाचा अर्थसंकल्प विधानसभेत मांडणार आहेत. अर्थसंकल्प म्हटलं की क्लिष्ट आकडेवारी आणि तांत्रिक शब्द डोळ्यासमोर येतात. मात्र, हाच अर्थसंकल्प सर्वसामान्यांना सहज समजावा, यासाठी मुख्यमंत्री फडणवीस यांनी लिहिलेले “अर्थसंकल्प सोप्या भाषेत” हे पुस्तक अत्यंत उपयुक्त ठरणार आहे. विशेष म्हणजे, आज ४ मार्च रोजी या पुस्तकाच्या प्रकाशनाला सहा वर्षे पूर्ण होत आहेत.

४ मार्च २०२० रोजी नागपूर येथील लाखे प्रकाशनाने हे पुस्तक प्रसिद्ध केले होते. अर्थसंकल्पाची तांत्रिक बाजू सामान्य नागरिकांपर्यंत पोहोचवणे हा यामागचा मुख्य उद्देश आहे. या पुस्तकात प्रामुख्याने खालील विषयांचे सविस्तर विवेचन करण्यात आले आहे:

• शब्दाची उत्पत्ती: ‘बजेट’ या शब्दाची सुरुवात कशी झाली?

• संविधानातील तरतुदी: भारतीय संविधानानुसार अर्थसंकल्पाची रचना आणि कायदेशीर प्रक्रिया.

• व्हाईट बुक आणि ग्रीन बुक: अर्थसंकल्पीय अंदाज (White Book) आणि तरतुदींचे विस्तृत विवरण (Green Book) सोप्या भाषेत कसे वाचावे.

• निधी वाटप: विविध विभाग आणि विकास मंडळनिहाय होणारा खर्च आणि प्रादेशिक अनुशेष निर्मूलनासाठीच्या तरतुदी.

अर्थसंकल्प तयार करण्यापासून तो मंजूर होण्यापर्यंतचे सर्व टप्पे (उदा. राज्याच्या एकत्रित निधीतून खर्च करण्याची परवानगी मिळवणे) मुख्यमंत्र्यांनी या पुस्तकात अत्यंत ओघवत्या भाषेत मांडले आहेत. मराठी आणि इंग्रजी संज्ञांचे अर्थ स्पष्ट केल्यामुळे विद्यार्थी, व्यावसायिक आणि अभ्यासकांसाठी हे पुस्तक संग्रही ठेवण्यासारखे आहे.

माहिती व जनसंपर्क महासंचालनालयाने दिलेल्या माहितीनुसार, हे पुस्तक सर्व नागरिकांसाठी डिजिटल स्वरूपात उपलब्ध करून देण्यात आले आहे. आगामी अर्थसंकल्प समजून घेण्यासाठी नागरिक https://www.devendrafadnavis.in/budget_2020 या संकेतस्थळावर जाऊन हे पुस्तक वाचू शकतात.

शहरातील सुशिक्षित तरुण आणि अर्थशास्त्राच्या विद्यार्थ्यांनी या पुस्तकाचा लाभ घेऊन राज्याच्या प्रगतीचे धोरण समजून घ्यावे, असे आवाहन करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.