महापालिका कर्जमुक्त करणार आणि प्रदूषण रोखणार! स्थायी समिती सभापती अभिषेक बारणे यांचा ‘ॲक्शन प्लॅन’; पहिल्याच सभेत खर्चात कपातीचे संकेत

पिंपरी चिंचवड प्रतिनिधी बालाजी नवले, ०५ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेची आर्थिक स्थिती भक्कम करण्यासोबतच शहराच्या शाश्वत विकासासाठी ‘इन्कम जनरेशन’ (उत्पन्न वाढ) आणि ‘प्रदूषण नियंत्रण’ या दोन सूत्रांवर भर दिला जाणार असल्याची घोषणा स्थायी समिती सभापती अभिषेक बारणे यांनी आज केली. पदभार स्वीकारल्यानंतर पार पडलेल्या पहिल्याच स्थायी समितीच्या सभेत त्यांनी महापालिकेच्या उधळपट्टीला लगाम लावण्याचे आणि पारदर्शक कारभाराचे स्पष्ट संकेत दिले आहेत.

मुख्य प्रशासकीय भवनात झालेल्या या बैठकीस आयुक्त श्रावण हर्डीकर, अतिरिक्त आयुक्त विजयकुमार खोराटे, तृप्ती सांडभोर आणि समिती सदस्य उपस्थित होते.

शहरात सुरू असलेल्या बांधकामांच्या ठिकाणी सुरक्षेचे नियम धाब्यावर बसवले जात असल्याच्या तक्रारींची दखल घेत सभापतींनी कडक पावले उचलली आहेत. “शहरात धुळीचे प्रमाण वाढू नये आणि नागरिकांचे आरोग्य धोक्यात येऊ नये, यासाठी बांधकाम सुरक्षा तपासण्यासाठी दोन विशेष पथके तैनात करण्याचे आदेश दिले आहेत,” असे बारणे यांनी सांगितले. क्षेत्रीय कार्यालयांना मोठ्या प्रकल्पांच्या सुरक्षिततेची नियमित देखरेख करण्याचे निर्देशही देण्यात आले आहेत.

महापालिकेच्या आर्थिक नियोजनाबाबत बोलताना अभिषेक बारणे यांनी स्पष्ट केले की, सध्या पालिकेवर दायित्व (Liability) अधिक आहे. त्यामुळे:

• नवीन कामांपेक्षा प्रलंबित प्रकल्प पूर्ण करण्याला प्राधान्य दिले जाईल.

• वाकडसह उपनगरांतील कर संकलन वाढवणे आणि होर्डिंग्जच्या माध्यमातून महसूल मिळवण्यावर भर दिला जाईल.

• महापालिकेवर असलेले कर्ज कमी करून शहर कर्जमुक्त करण्याच्या दिशेने प्रयत्न केले जातील.

पदाधिकाऱ्यांच्या वाहन भाड्यावर होणाऱ्या खर्चाबाबत सभापतींनी कठोर भूमिका घेतली आहे. “सव्वा लाख रुपये महिना यांसारख्या मोठ्या बिलांची आम्ही शहानिशा करणार आहोत. इंधन आणि चालकासह वाजवी दरात सेवा मिळावी, यासाठी खर्चात कपात केली जाईल,” असे त्यांनी स्पष्ट केले. पदाधिकाऱ्यांना स्वेच्छेनुसार दरमहा ५० हजार रुपये खर्च देण्याबाबत विचारविनिमय सुरू असल्याचेही त्यांनी नमूद केले.

• मराठी भाषा गौरव दिन: २७ फेब्रुवारी रोजी आयोजित कार्यक्रमांच्या ७.५० लाख रुपयांच्या खर्चास मान्यता देण्यात आली.

• ठेवी सुरक्षित: महापालिकेच्या ठेवींमध्ये कोणतीही घट झालेली नाही, त्या पूर्णपणे सुरक्षित असल्याचे त्यांनी स्पष्ट केले.

• कामाचा हिशोब: कोणत्या विभागाने किती कामे केली आणि कोणती प्रलंबित ठेवली, याचा ‘प्रोग्रेस रिपोर्ट’ संबंधित अधिकाऱ्यांकडून मागवण्यात आला आहे.

अत्यावश्यक नसलेली नवीन कामे तूर्तास थांबवून केवळ गरजेच्या कामांनाच प्राधान्य देण्याचा निर्धार अभिषेक बारणे यांनी व्यक्त केला आहे.

© २०२६ मॅक्स मंथन डेली न्यूज. सर्व हक्क राखीव।