वाकडमध्ये ज्येष्ठ नागरिक महिलांचा उत्साह! स्त्रीशक्तीला वंदन करत साजरा झाला जागतिक महिला दिन; ‘आनंद’ संघाच्या ९० महिलांची उपस्थिती

पिंपरी प्रतिनिधी आकाश कांबळे, १० मार्च २०२६ | मॅक्स मंथन डेली न्यूज:

वाकड : “संघर्ष आणि जिद्द हीच तिची ओळख आहे. ती आई, ताई, मैत्रीण, पत्नी आणि मुलगी अशा अनेक भूमिका पार पाडत समाजाच्या प्रगतीत मोलाचे योगदान देते.” अशा शब्दांत स्त्रीशक्तीचा गौरव करत वाकड येथील आनंद ज्येष्ठ नागरिक संघामध्ये जागतिक महिला दिन मोठ्या उत्साहात साजरा करण्यात आला.

रविवार, ८ मार्च २०२६ रोजी आयोजित या छोटेखानी परंतु प्रेरणादायी कार्यक्रमात परिसरातील सुमारे ९० ज्येष्ठ महिला एकत्रित आल्या होत्या.

कार्यक्रमाची सुरुवात महिला दिनाचे महत्त्व आणि महिलांच्या कर्तृत्वावर आधारित विशेष माहितीने झाली. यावेळी वक्त्यांनी “स्त्री हाच विश्वाचा जन्म आणि सुरुवात आहे, तिच्याशिवाय सर्व व्यर्थ आहे,” असे सांगत समाजाच्या जडणघडणीत महिलांच्या योगदानाचा आढावा घेतला. केवळ एक दिवस नव्हे तर आयुष्यभर स्त्रीचा सन्मान राखण्याची शपथ यावेळी घेण्यात आली.

महिला दिनानिमित्त विविध सांस्कृतिक कार्यक्रमांचेही आयोजन करण्यात आले होते. हा सोहळा यशस्वी करण्यासाठी ज्येष्ठ नागरिक संघाच्या महिला मंडळ प्रमुख अलकाताई कळमकर यांच्या मार्गदर्शनाखाली खालील सदस्यांनी विशेष परिश्रम घेतले:

• मीरा बोरकर, पुष्पा ढवळे, चित्रा बराटे, संगीता साठे.

• प्रतिभा गावळे, हेमांगी बोंडे, निर्मला झोपे, विजया चौधरी.

• विभा दरेकर, सुनिता सफाई आणि हर्षली देसाई.

वैचारिक आणि सांस्कृतिक मेजवानीनंतर सर्व उपस्थित महिलांसाठी ‘श्रीराम वडापाव’ येथे चहापान आणि अल्पोपहाराची व्यवस्था करण्यात आली होती. तृप्त मनाने आणि नव्या ऊर्जेने महिलांनी या कार्यक्रमाचा आनंद लुटला.

© २०२६ मॅक्स मंथन डेली न्यूज. सर्व हक्क राखीव।