पिंपरी-चिंचवडमध्ये महिला शक्तीचा जागर! उत्कृष्ट बचत गटांचा गौरव आणि महिलांसाठी ‘स्वतंत्र आधुनिक स्वच्छतागृहे’ उभारण्याची मोठी घोषणा

पिंपरी चिंचवड प्रतिनिधी: बालाजी नवले, १७ मार्च २०२६ | मॅक्स मंथन विशेष:

पिंपरी : “एक महिला सक्षम झाली की तिचे संपूर्ण कुटुंब सक्षम होते. महिलांचे समाजासाठीचे योगदान अमूल्य असून, त्यांना स्वावलंबी बनवण्यासाठी महापालिका प्रशासन सदैव तत्पर आहे,” असे प्रतिपादन उपमहापौर शर्मिला बाबर यांनी केले.

जागतिक महिला दिनानिमित्त पिंपरी-चिंचवड महानगरपालिकेच्या समाज विकास विभागाच्या वतीने चिंचवड येथील प्रा. रामकृष्ण मोरे प्रेक्षागृहात विशेष कार्यक्रमाचे आयोजन करण्यात आले होते. यावेळी शहरातील उत्कृष्ट कामगिरी करणाऱ्या महिला बचत गटांचा आणि फेडरेशनचा विशेष सन्मान करण्यात आला.

महिला व बालकल्याण समितीच्या सभापती राणी पठारे यांनी यावेळी एक महत्त्वाची घोषणा केली. शहरातील बसस्थानके, बाजारपेठा आणि गर्दीच्या ठिकाणी महिला व दिव्यांगांसाठी सर्व सुविधायुक्त आधुनिक स्वच्छतागृहे उभारण्यात येणार आहेत. महिलांच्या आरोग्याचा विचार करून असा उपक्रम राबवणारी पिंपरी-चिंचवड ही राज्यातील पहिली महापालिका ठरणार असल्याचे त्यांनी अभिमानाने सांगितले.

या कार्यक्रमाला माजी आमदार अश्विनी जगताप, विधी समिती सभापती सुजाता बोराटे, डॉ. श्रद्धा रवि लांडगे, प्रिया आण्णा बनसोडे यांच्यासह महापालिकेच्या बहुसंख्य महिला नगरसदस्या, महिला अधिकारी आणि बचत गटांतील महिला मोठ्या संख्येने उपस्थित होत्या.

• अश्विनी जगताप यांनी महिलांना “निरोगी राहा, आनंदी राहा” असा संदेश देत स्वतःच्या पायावर उभे राहण्याचे आवाहन केले.

• उपायुक्त ममता शिंदे यांनी प्रास्ताविकातून समाज विकास विभागाच्या विविध योजनांची माहिती दिली.

कार्यक्रमात केवळ भाषणेच नव्हे तर महापालिकेच्या महिला कर्मचाऱ्यांनी गीतगायन आणि पारंपरिक नृत्यांचे बहारदार सादरीकरण केले. महिलांसाठी विविध खेळांचेही आयोजन करण्यात आले होते.

सन्मानित झालेले प्रमुख बचत गट व संस्था:

कार्यक्रमात निसर्ग, स्वामी समर्थ, नवक्षितिज, मैत्री दिव्यांग, राजमाता, क्रांतीज्योती यांसारख्या अनेक बचत गटांचा सन्मान झाला. तसेच संजीवनी, उड्डाण, आरंभ, झेप, गरुडझेप यांसारख्या स्वयंरोजगार सहकारी संस्थांचा (फेडरेशन) विशेष गौरव करण्यात आला.

कार्यक्रमाचे सूत्रसंचालन जनसंपर्क अधिकारी प्रफुल्ल पुराणिक यांनी केले, तर आभार समाज विकास अधिकारी संतोषी चोरगे यांनी मानले.

© २०२६ मॅक्स मंथन डेली न्यूज. सर्व हक्क राखीव।