पिंपरी-चिंचवड पोलिसांचा ‘मुळशी पॅटर्न’ला दणका! खंडणीसाठी अपहरण आणि जबरी चोरी करणारे दोन सराईत जेरबंद; २ रिक्षांसह ५ लाखांचा मुद्देमाल जप्त

पिंपरी प्रतिनिधी आकाश कांबळे, १७ मार्च २०२६ | मॅक्स मंथन क्राईम रिपोर्ट:

पिंपरी : खंडणीसाठी तरुणाचे अपहरण करणाऱ्या आणि कोयत्याचा धाक दाखवून लुटमार करणाऱ्या दोन सराईत गुन्हेगारांना पिंपरी-चिंचवड गुन्हे शाखेच्या खंडणी विरोधी पथकाने बेड्या ठोकल्या आहेत. पोलिसांनी या कारवाईत दोन रिक्षा, कोयते आणि मोबाईल असा एकूण ५ लाख १६ हजार ९० रुपयांचा मुद्देमाल जप्त केला असून, भोसरी आणि सांगवी पोलीस ठाण्यातील दोन गंभीर गुन्हे उघडकीस आणले आहेत.

दिनांक १६ मार्च रोजी भोसरी येथील सूरज ज्ञानेश्वर शेलार (वय ३२) याचे ‘पवन उजगरे’ आणि ‘सुमित कराड’ या दोघांनी पैशांच्या मागणीसाठी रिक्षामधून अपहरण केले होते. या प्रकरणाचा तपास सुरू असतानाच, सांगवी परिसरातही अशाच पद्धतीने एका प्रवाशाला लुटल्याची घटना समोर आली.

नितीन महाजन नावाचे तरुण नाशिक फाटा येथून रिक्षामध्ये बसले असता, आरोपींनी त्यांना पिंपळे गुरव येथील एका मोकळ्या मैदानात नेऊन मानेला कोयता लावला. त्यांच्याकडून रोख रक्कम, मोबाईल आणि फोन पे (PhonePe) द्वारे जबरदस्तीने पैसे ट्रान्सफर करून घेतले होते.

गुन्ह्याचे गांभीर्य ओळखून पोलीस आयुक्त विनय कुमार चौबे यांनी तात्काळ तपासाचे आदेश दिले. खंडणी विरोधी पथकाने तांत्रिक विश्लेषण आणि खबऱ्यांच्या माहितीवरून आरोपींचा शोध सुरू केला. आरोपी भोसरी एमआयडीसी परिसरातील ‘जी ब्लॉक’ येथील एका मैदानात दोन रिक्षांसह थांबल्याची माहिती मिळताच पोलिसांनी तिथे सापळा रचला. पोलिसांना पाहताच आरोपींनी पळ काढण्याचा प्रयत्न केला, मात्र पथकाने मोठ्या शिताफीने त्यांचा पाठलाग करून त्यांना ताब्यात घेतले.

अटक करण्यात आलेले आरोपी:

१) पवन छगन उजगरे (वय २६, रा. काळेवाडी, पुणे)

२) सुमित हनुमंत कराड (वय २८, रा. भोसरी, पुणे)

जप्त केलेला मुद्देमाल:

• गुन्ह्यात वापरलेल्या २ रिक्षा (MH-14-GC-6404 सह अन्य एक)

• २ धारदार कोयते

• २ मोबाईल फोन आणि रोख रक्कम

• एकूण किंमत: ५,१६,०९०/- रुपये

ही कारवाई पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त शारंग आव्हाड, पोलीस उप-आयुक्त (गुन्हे) डॉ. शिवाजी पवार यांच्या मार्गदर्शनाखाली वरिष्ठ पोलीस निरीक्षक राजेंद्र पाटील, उपनिरीक्षक सुनील भदाणे, अमर राऊत, सुनील कानगुडे आणि त्यांच्या टीमने केली.

© २०२६ मॅक्स मंथन डेली न्यूज. सर्व हक्क राखीव।