‘भगतसिंग अमर रहे’च्या घोषणांनी दुमदुमले गुरुकुंज मोझरी! ‘मेरा युवा भारत’तर्फे शहीदांना स्वच्छांजली; पदयात्रा आणि स्वच्छता मोहिमेतून युवकांचा जागर
अमरावती प्रतिनिधी : विलास सावळे, २३ मार्च २०२६ | मॅक्स मंथन विशेष:
अमरावती : भारतीय स्वातंत्र्यलढ्यातील क्रांतीकारक शहीद भगतसिंग, सुखदेव आणि राजगुरू यांच्या सर्वोच्च बलिदानाच्या स्मृतीनिमित्त आज गुरुकुंज मोझरी येथे ‘शहीद दिन’ उत्साहात साजरा करण्यात आला. भारत सरकारच्या युवा कार्यक्रम व क्रीडा मंत्रालयांतर्गत असलेल्या ‘मेरा युवा भारत’ (MY Bharat) अमरावती कार्यालयाच्या वतीने श्रीगुरुदेव अध्यात्म केंद्रात विविध उपक्रमांचे आयोजन करण्यात आले होते.
केवळ भाषणांतून नव्हे, तर कृतीतून शहीदांना आदरांजली वाहण्यासाठी विद्यार्थ्यांनी परिसरात स्वच्छता अभियान राबवून राष्ट्रसंतांच्या भूमीत स्वच्छतेचा संदेश दिला.
कार्यक्रमाची सुरुवात ‘भगतसिंग अमर रहे’, ‘भारत माता की जय’ अशा गगनभेदी घोषणांनी झाली. विद्यार्थ्यांनी हातात फलक घेऊन संपूर्ण परिसरात पदयात्रा काढली. या पदयात्रेद्वारे युवकांनी क्रांतीकारकांचे विचार आणि देशप्रेमाची भावना नागरिकांपर्यंत पोहोचवली.
याप्रसंगी श्रीगुरुदेव अध्यात्म केंद्र गुरुकुलचे संचालक रविदादा मानव यांनी उपस्थित विद्यार्थ्यांना संबोधित केले. “क्रांतीकारकांचे बलिदान हे केवळ इतिहासातील पान नसून, ती आपल्यासाठी जगण्याची प्रेरणा आहे. देशासाठी छोटे-छोटे सकारात्मक बदल घडवणे, हीच खरी देशसेवा आहे,” असे विचार त्यांनी मांडले.
कार्यक्रमाचे प्रास्ताविक प्रा. अंकुश मानकर यांनी केले. यावेळी अनेक विद्यार्थ्यांनी शहीद दिनाचे औचित्य साधून ओजस्वी भाषणे दिली आणि वीर शहीदांच्या स्मृतीस विनम्र अभिवादन करून श्रद्धांजली अर्पण केली.
© २०२६ मॅक्स मंथन डेली न्यूज. सर्व हक्क राखीव।
