पिंपरी चिंचवड महापालिकेच्या स्थायी समिती सभेत विविध विकासकामांना मंजुरी

पिंपरी चिंचवड प्रतिनिधी लक्ष्मण प्रधान, ३० एप्रिल २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेची स्थायी समिती सभा बुधवारी (दि. २९ एप्रिल) सभापती अभिषेक बारणे यांच्या अध्यक्षतेखाली पार पडली. महापालिकेच्या मुख्य प्रशासकीय इमारतीतील दिवंगत महापौर मधूकर पवळे सभागृहात झालेल्या या सभेत शहराच्या विविध भागांतील विकासकामांना प्रशासकीय मंजुरी देण्यात आली.

यावेळी स्थायी समिती सदस्यांसह तृप्ती सांडभोर, विक्रांत बगाडे, नगरसचिव मुकेश कोळप व विविध विभागांचे अधिकारी उपस्थित होते.

सभेमध्ये शहराच्या पायाभूत सुविधांशी संबंधित अनेक विषयांवर शिक्कामोर्तब करण्यात आले:

• स्वच्छता व आरोग्य: कचरा संकलन करणाऱ्या वाहनांवर ‘व्हीटीएम’ (VTM) यंत्रणा बसवणे व त्यांच्या देखभालीच्या कामास मंजुरी देण्यात आली. तसेच भारत/महाराष्ट्र स्वच्छता अभियानांतर्गत शहरात प्रभावी स्वच्छता मोहीम राबवण्यास मान्यता मिळाली.

• पाणीपुरवठा: ताथवडे, पुनावळे, किवळे आणि रावेत परिसरातील वाढत्या नागरीकरणाचा विचार करून नवीन जलवाहिन्या टाकणे आणि वॉल्व बसवण्याच्या कामांना मंजुरी देण्यात आली. मौजे ताथवडे जीवननगर येथील पाण्याच्या टाकीवरून पाणीपुरवठा करण्यासाठी नवीन जलवाहिनी टाकली जाणार आहे.

• रस्ते व ड्रेनेज: वाकड, पुनावळे आणि ताथवडे भागात पावसाळी पाण्याच्या लाईनची दुरुस्ती व नवीन लाईन टाकण्याच्या कामास मंजुरी मिळाली. पिंपळेगुरव, थेरगाव, पिंपरी आणि नवी सांगवी परिसरातील पेव्हिंग ब्लॉक, फुटपाथ आणि ड्रेनेज लाईनच्या कामांनाही मान्यता देण्यात आली.

• इतर कामे: महापालिकेच्या ताळेबंदपत्रकाचे लेखापरीक्षण करण्यासाठी सनदी लेखापाल नियुक्त करण्यास आणि आकुर्डी माध्यमिक विद्यालयातील ‘MS-CIT’ केंद्रासाठी फर्निचर खरेदी करण्यास मंजुरी देण्यात आली.

पिंपरी येथे नुकत्याच संपन्न झालेल्या त्यागमूर्ती माता रमाई भीमराव आंबेडकर सृष्टीच्या भूमिपूजन कार्यक्रमासाठी येणाऱ्या खर्चास स्थायी समितीने अधिकृत मंजुरी दिली आहे.

एप्रिल २०२६ मध्ये सेवानिवृत्त होणारे कार्यकारी अभियंता सतिश वाघमारे आणि राजेंद्र मोराणकर यांचा सभापती अभिषेक बारणे यांच्या हस्ते विशेष सन्मान करण्यात आला. त्यांच्या उल्लेखनीय सेवेबद्दल कृतज्ञता व्यक्त करून पुढील वाटचालीस शुभेच्छा देण्यात आल्या.

“शहराचा वेगाने होत असलेला विस्तार लक्षात घेऊन पायाभूत सुविधा अधिक सक्षम करण्यावर आमचा भर आहे. पावसाळ्याच्या पार्श्वभूमीवर ड्रेनेज आणि स्टॉर्म वॉटर लाईनच्या कामांना प्राधान्याने मंजुरी देण्यात आली आहे.”

— अभिषेक बारणे, सभापती, स्थायी समिती

© २०२६ मॅक्स मंथन डेली न्यूज. सर्व हक्क राखीव.