वाल्हेकरवाडीत चार्जिंगला लावलेल्या इलेक्ट्रिक दुचाकींना भीषण आग! ३ गाड्या खाक; अग्निशमन दलाने प्राणांची बाजी लावत दोन महिलांना वाचवले
पिंपरी चिंचवड प्रतिनिधी लक्षण प्रधान ,२० जुलै २०२६ मॅक्स मंथन डेली न्यूज:
पिंपरी-चिंचवड: पिंपरी-चिंचवड शहरातील वाल्हेकरवाडी येथील दगडोबा चौक परिसरात सोमवारी सकाळी एका निवासी इमारतीच्या पार्किंगमध्ये उभ्या असलेल्या इलेक्ट्रिक दुचाकींना अचानक भीषण आग लागली. चार्जिंगदरम्यान लागलेल्या या आगीने अवघ्या काही मिनिटांतच रौद्ररूप धारण केले. मात्र, घटनेची माहिती मिळताच पिंपरी-चिंचवड महापालिकेच्या अग्निशमन दलाने अत्यंत वेगाने धाव घेत ३ अग्निशमन वाहनांच्या मदतीने युद्धपातळीवर बचाव कार्य राबवले आणि इमारतीच्या वरच्या मजल्यावर अडकलेल्या दोन महिलांचे प्राण सुरक्षितपणे वाचवले.
प्राथमिक माहितीनुसार, दगडोबा चौकातील एका निवासी इमारतीमध्ये इलेक्ट्रिक दुचाकी चार्जिंगसाठी लावण्यात आल्या होत्या. सकाळी अचानक एका दुचाकीमधून आगीच्या ज्वाळा निघाल्या आणि पाहता पाहता बाजूला उभ्या असलेल्या इतर गाड्यांनीही पेट घेतला.
या दुर्दैवी दुर्घटनेत तीन इलेक्ट्रिक दुचाकी पूर्णपणे जळून खाक झाल्या आहेत. आगीची तीव्रता इतकी प्रचंड होती की, धुराचे लोट आणि ज्वालांनी शेजारील दोन मजली इमारतीलाही वेढा घातला. यामुळे परिसरात काही काळ प्रचंड घबराट व गोंधळाचे वातावरण निर्माण झाले होते.
आग लागल्याचे समजताच इमारतीमधील नागरिकांची पळापळ झाली. मात्र, आगीच्या ज्वाळा आणि प्रचंड धुरामुळे पहिल्या व दुसऱ्या मजल्यावर दोन महिला अडकून पडल्या. घटनेची माहिती मिळताच अग्निशमन दलाचे जवान तातडीने घटनास्थळी दाखल झाले. परिस्थितीचे गांभीर्य ओळखून जवानांनी आगीवर पाण्याचा मारा करत थेट इमारतीत प्रवेश केला आणि प्राणांची बाजी लावून पहिल्या व दुसऱ्या मजल्यावर अडकलेल्या दोन्ही महिलांची सुखरूप सुटका केली. अग्निशमन दलाच्या या नियोजनबद्ध व तत्पर कारवाईमुळे मोठी जीवितहानी टळली आहे.
उप अग्निशमन अधिकारी गौतम इंगवले यांच्या कुशल मार्गदर्शनाखाली अग्निशमन दलाच्या पथकाने आगीवर पूर्ण नियंत्रण मिळवले. उप अग्निशमन अधिकारी गौतम इंगवले, लीड फायरमन विनायक नाळे, शहाजी कोपनर, फायरमन व कर्मचारी प्रल्हाद कोरडे, पंकज रसाळ, अमोल कुऱ्हाडे, इरफान बेलदार, एकनाथ ढगे, सखाराम चिमटे, भूषण येवले, तुषार बिरहाडे, सोहन तुकदेव, प्रकाश गव्हाणे, तेजस्वी पाटील, एकनाथ बुधवंत, सागर लावंडे, सागर गुरव, राहुल धुमाळ, महेश गरड आणि बालाजी सानप. या संपूर्ण बचाव आणि अग्निशमन कार्यातसर्व अधिकारी व कर्मचाऱ्यांनी अत्यंत कौतुकास्पद कामगिरी बजावली.
निवासी इमारतींच्या पार्किंगमध्ये किंवा घरात इलेक्ट्रिक वाहने चार्ज करताना नागरिकांनी विशेष दक्षता घेणे गरजेचे आहे. वायरिंगची योग्य तपासणी, दर्जात्मक सॉकेट्सचा वापर आणि ओव्हरचार्जिंग टाळल्यास अशा दुर्दैवी दुर्घटना रोखता येऊ शकतात.
आपत्कालीन प्रसंगी घाबरू नका!
पिंपरी-चिंचवड महापालिकेचे अग्निशमन दल नागरिकांच्या सेवेसाठी सदैव तत्पर आहे. कोणत्याही आपत्कालीन परिस्थितीत नागरिकांनी अजिबात न घाबरता तात्काळ १०१ या टोल-फ्री क्रमांकावर संपर्क साधावा, असे आवाहन अग्निशमन विभागातर्फे करण्यात आले आहे.
© २०२६ मॅक्स मंथन डेली न्यूज. सर्व हक्क राखीव.
