मोशीतील प्लास्टिक अन् टायर जाळणाऱ्यांवर कठोर कारवाई करा; महापौर रवि लांडगे यांच्या निवेदनानंतर आयुक्तांचे चौकशीचे निर्देश!
पिंपरी चिंचवड प्रतिनिधी बालाजी नवले, २० जुलै २०२६ मॅक्स मंथन डेली न्यूज:
पिंपरी-चिंचवड: पिंपरी-चिंचवड शहरातील मोशी परिसरातील विष्णू ग्रीन्स सहकारी गृहरचना संस्थेच्या परिसरात वारंवार प्लास्टिक, जुने टायर आणि इतर भंगार जाळल्यामुळे उद्भवलेल्या गंभीर वायू प्रदूषणाची महापौर रवि लांडगे यांनी तातडीने दखल घेतली आहे. या प्रदूषणामुळे हैराण झालेल्या नागरिकांनी महापौरांची भेट घेऊन निवेदन सादर केले होते. नागरिकांच्या आरोग्याशी निगडित या संवेदनशील प्रश्नाचे गांभीर्य ओळखून महापौरांनी थेट महापालिका आयुक्त डॉ. विजय सूर्यवंशी यांची भेट घेऊन दोषींवर तात्काळ व कठोर कारवाईची मागणी केली आहे.
मोशी परिसरातील उघड्यावर भंगार आणि प्लास्टिक जाळण्याच्या प्रकारांमुळे प्रचंड धूर व दुर्गंधी पसरत आहे. याचा थेट परिणाम लहान मुले, गरोदर महिला आणि ज्येष्ठ नागरिकांच्या आरोग्यावर होत असून श्वसनाचा त्रास वाढत आहे. या समस्येकडे लक्ष वेधत महापौर रवि लांडगे यांनी महापालिका प्रशासनाने यात तात्काळ हस्तक्षेप करून प्रदूषण रोखावे, अशी आक्रमक भूमिका घेतली.
यावेळी प्रशासनाला स्पष्ट इशारा देताना महापौर रवि लांडगे म्हणाले,
“नागरिकांचे आरोग्य आणि पर्यावरणाचे रक्षण करणे ही पिंपरी-चिंचवड महापालिकेची सर्वोच्च प्राथमिकता आहे. शहरात किंवा उपनगरांत प्रदूषण करणाऱ्या कोणत्याही बेकायदेशीर आणि असामाजिक कृत्यांना कदापि पाठीशी घातले जाणार नाही. स्वच्छ हवा, प्रदूषणमुक्त पर्यावरण आणि सुरक्षित जीवनमान हा प्रत्येक मोशीकराचा आणि पिंपरी-चिंचवडकरांचा मूलभूत अधिकार आहे. हा अधिकार अबाधित राखण्यासाठी प्रशासनाकडून कठोर पावले उचलली जातील.”
महापौरांच्या मागणीनंतर महापालिका आयुक्त डॉ. विजय सूर्यवंशी यांनी या प्रकरणाची तातडीने दखल घेतली. त्यांनी संबंधित विभागांच्या अधिकाऱ्यांना घटनास्थळाची संयुक्त पाहणी (Joint Inspection) करून तात्काळ अहवाल सादर करण्याचे निर्देश दिले आहेत.
आयुक्तांनी दिलेले प्रमुख आदेश 1.परिसरातील अनधिकृत भंगार दुकाने व कचऱ्याचे साठे तातडीने हटवण्यात यावेत. 2. उघड्यावर प्लास्टिक व टायर जाळणाऱ्या समाजकंटकांवर कठोर कायदेशीर व फौजदारी कारवाई करण्यात यावी. 3. भविष्यात असे प्रकार पुन्हा घडू नयेत यासाठी परिसरात कायमस्वरूपी गस्त व प्रतिबंधात्मक उपाययोजना राबवण्यात याव्यात.
या प्रसंगी स्थायी समिती सभापती अभिषेक बारणे तसेच कविता आल्हाट उपस्थित होत्या. महापौरांच्या या वेगाने केलेल्या पाठपुराव्यामुळे मोशी परिसरातील वायू प्रदूषणाच्या समस्येवर प्रशासकीय हालचालींना वेग आला असून, स्थानिक नागरिकांना मोठा दिलासा मिळण्याची शक्यता आहे.
© २०२६ मॅक्स मंथन डेली न्यूज. सर्व हक्क राखीव.
