पिंपरी चिंचवड: आपल्या चिमुकल्यांना विश्वासाने शाळेच्या बसमध्ये बसवून देणाऱ्या पालकांच्या काळजाचा ठोका चुकवणारी एक अत्यंत धक्कादायक घटना वाकड येथील काळाखडक परिसरात घडली आहे. ‘इंदिरा स्कूल’च्या विद्यार्थ्यांना शाळेत सोडून परत येणाऱ्या एका शालेय बसने अचानक रस्त्यातच पेट घेतला आणि काही क्षणांतच बस आगीच्या भक्ष्यस्थानी पडली. सुदैवाने, आगीची ही भीषण घटना घडण्यापूर्वीच सर्व विद्यार्थ्यांना सुरक्षितपणे शाळेत उतरवण्यात आले होते. केवळ नियतीची कृपा आणि दैवबळ बलवत्तर म्हणून एका मोठ्या आणि हृदयद्रावक दुर्घटनेतून शेकडो निष्पाप विद्यार्थ्यांचे प्राण वाचले आहेत.

मिळालेल्या माहितीनुसार, विद्यार्थ्यांना सुरक्षितपणे शाळेत सोडल्यानंतर बस परतत असताना अचानक बसच्या बोनेटमधून दाट धूर निघू लागला. चालकाच्या ही बाब लक्षात येताच त्याने प्रसंगावधान राखून बस तातडीने जवळच्या गॅरेजमध्ये नेण्याचा प्रयत्न केला. मात्र, गॅरेजमध्ये पोहोचण्यापूर्वीच बसने अचानक पेट घेतला आणि काही वेळातच आगीच्या प्रचंड ज्वाळांनी संपूर्ण बसला वेढले.

विचार करा, जर हीच भयानक आग विद्यार्थ्यांना घेऊन जात असताना किंवा परत आणताना लागली असती, तर काय घडले असते? या कल्पनेनेच प्रत्येक पालकाच्या अंगावर काटा येत आहे.

शहरात दररोज हजारो चिमुकले विद्यार्थी शालेय बस आणि व्हॅनने प्रवास करतात. त्यामुळे शाळा व्यवस्थापन, बस कंत्राटदार आणि उपप्रादेशिक परिवहन विभागाने (RTO) या घटनेतून कडक धडा घेणे अत्यंत गरजेचे आहे. भविष्यात अशा प्रकारची कोणतीही दुर्दैवी दुर्घटना पुन्हा घडू नये, यासाठी शहरातील प्रत्येक शालेय वाहनाची आरटीओ व पोलिसांनी तात्काळ कडक तपासणी करावी आणि नियमांचे उल्लंघन करणाऱ्यांवर कठोर कारवाई करावी, अशी तीव्र मागणी आज पिंपरी-चिंचवडमधील सर्वसामान्य नागरिक व चिंताग्रस्त पालकांकडून केली जात आहे.