पुणे: काँग्रेस खासदार तथा लोकसभेतील विरोधी पक्षनेते राहुल गांधी यांनी शनिवारी पुण्यात आयोजित ‘छात्रों की गूंज’ (महिलांसाठीच्या विशेष आवृत्तीत) कार्यक्रमात पंतप्रधान नरेंद्र मोदी आणि राष्ट्रीय स्वयंसेवक संघावर (RSS) सडकून टीका केली. जंतर-मंतर येथील आंदोलनादरम्यान वापरलेल्या भाषेवरून केवळ मुलींनाच लक्ष्य करणे हे ‘मनुस्मृती’च्या मानसिकतेतून आलेले आहे, असा गंभीर आरोप राहुल गांधी यांनी केला.

दुसरीकडे, राहुल गांधींच्या या कार्यक्रमावर भाजपचे महाराष्ट्र प्रवक्ते नवनाथ बाण यांनी जोरदार पलटवार करत कार्यक्रमाच्या निधीच्या स्रोतावरून ५ प्रश्न उपस्थित केले आहेत.

पुण्यात तरुणी आणि विद्यार्थिनींसोबत झालेल्या संवाद सत्रात बोलताना राहुल गांधी यांनी मुलींच्या हक्कांवर भाष्य केले, “जर मुले शिवीगाळ करत असतील तर ते चालते, मात्र मुली बोलल्या तर तो ‘सांस्कृतिक धक्का’ (Cultural Shock) वाटतो. हा कोणता न्याय आहे?” असा सवाल राहुल गांधी यांनी ३१ जुलै रोजी पंतप्रधान मोदींनी केलेल्या इन्स्टाग्राम पोस्टचा हवाला देत विचारला.  मुलींना एका चौकटीत किंवा पिंजऱ्यात बंदिस्त ठेवणे आणि पुरुषांना पूर्ण स्वातंत्र्य देणे हीच मनुस्मृतीची खरी मानसिकता आहे. या पितृसत्ताक व्यवस्थेला आपल्याला मुळापासून उखडून टाकायचे आहे, असे ते म्हणाले.  मुलींनी कोणाच्याही दबावाला बळी न पडता स्वतःचे अस्तित्व, सर्जनशीलता आणि वैयक्तिक स्वातंत्र्य जपले पाहिजे, असे आवाहन त्यांनी केले.

राहुल गांधी यांच्या कार्यक्रमापूर्वी भाजप प्रवक्ते नवनाथ बाण यांनी पत्रकार परिषद घेऊन काँग्रेसवर गंभीर आरोप केले.  या कार्यक्रमासाठी ३,००० विद्यार्थ्यांना उपस्थित राहण्यासाठी प्रत्येकी ३०,००० ते ३५,००० रुपये दिले जात असल्याचा आरोप भाजपने केला. या संपूर्ण कार्यक्रमावर सुमारे ९ ते १० कोटी रुपये खर्च होत असून, हा निधी काँग्रेसशासित कर्नाटक किंवा केरळमधील कंत्राटदारांच्या कमिशनमधून अथवा परदेशी निधीतून आला आहे का, असा सवाल भाजपने विचारला.

यावर काँग्रेस प्रवक्त्याने प्रतिक्रिया देताना सांगितले की, “राहुल गांधी यांच्या कार्यक्रमाला मिळणारा अभूतपूर्व प्रतिसाद पाहून भाजपच्या पायाखालची वाळू घसरली आहे. त्यामुळेच ते असे बालिश आणि बिनबुडाचे आरोप करत आहेत.”

राहुल गांधी यांच्या पुणे दौऱ्यापूर्वी शुक्रवारी ‘सीओईपी’ (COEP Technological University) हॉस्टेल कॅम्पसमध्ये काँग्रेसची विद्यार्थी संघटना NSUI आणि संघ परिवाराची ABVP यांच्यात जोरदार हाणामारी झाली.

या घटनेनंतर पोलिसांनी युवक काँग्रेसच्या सुमारे ५० कार्यकर्त्यांवर गुन्हा दाखल केला. या कारवाईवर शिवसेना (UBT) खासदार संजय राऊत यांनी तीव्र शब्दांत नाराजी व्यक्त केली. “विरोधकांच्या कार्यक्रमांवर पोलीस प्रशासन कडक अटी लादत असून, हुल्लडबाजी करणाऱ्या ABVP वर कारवाई करण्याऐवजी उलट तक्रारदारांवरच गुन्हे दाखल केले जात आहेत,” असा आरोप त्यांनी केला.