पिंपरीत घुमला फेरीवाला कायद्याच्या अंमलबजावणीचा नारा! ‘चाय पे चर्चा’ मध्ये नागरिक आणि फेरीवाल्यांचा एकमुखी आग्रह!
(मॅक्स मंथन डेली न्यूज, पिंपरी): आज, २६ मे २०२५ रोजी आंतरराष्ट्रीय फेरीवाला दिनाचे औचित्य साधून पिंपरी शहरात एक महत्त्वपूर्ण ‘चाय पे चर्चा’ आयोजित करण्यात आली. या बैठकीत नागरिक आणि फेरीवाले यांनी एकत्र येत फेरीवाला कायद्याच्या अंमलबजावणीसाठी जोरदार मागणी केली. ऊन, वारा, पाऊस याची पर्वा न करता कुटुंबाचा उदरनिर्वाह करणाऱ्या फेरीवाला घटकाला सरकारी धोरणांमुळे अनेक अडचणींचा सामना करावा लागत आहे, याबद्दल उपस्थितांनी तीव्र नाराजी व्यक्त केली.
यावेळी नागरिकांनी स्पष्टपणे सांगितले की, फेरीवाला हा समाजाचा एक अविभाज्य आणि महत्त्वाचा भाग आहे. जीवनावश्यक वस्तू आणि सेवा अगदी सहज उपलब्ध करून देणारा हा घटक अनेकदा प्रशासनाच्या दुर्लक्षामुळे वंचित राहतो. महानगरपालिका श्रीमंतांसाठी विविध योजना राबवते, मात्र गरीब फेरीवाल्यांकडे जाणीवपूर्वक दुर्लक्ष करते, असा आरोप यावेळी करण्यात आला.
‘पथ विक्रेता अधिनियम’ या कायद्याची अंमलबजावणी झाल्यास शहरातील सर्व फेरीवाल्यांना न्याय मिळेल आणि पर्यायाने नागरिकांचीही मोठी सोय होईल, असा विश्वास ‘चाय पे चर्चा’ मध्ये सहभागी झालेल्या प्रत्येकाने व्यक्त केला. त्यामुळे या कायद्याची त्वरित अंमलबजावणी करावी, असा एकमुखी सूर यावेळी निघाला. विशेष म्हणजे, भर पावसातही असंख्य नागरिकांनी या चर्चेत उत्स्फूर्तपणे सहभाग घेतला आणि फेरीवाला घटकाला आपला पाठिंबा दर्शवत ‘हॉकर डे’ च्या हार्दिक शुभेच्छा दिल्या.
आज, नॅशनल हॉकर फेडरेशन, महाराष्ट्र हॉकर फेडरेशन आणि महाराष्ट्र फेरीवाला क्रांती महासंघातर्फे शहरातील निगडी चौक, डांगे चौक, थरमॅक्स चौक, चिखली चौक, पिंपरी, काळेवाडी, भोसरी चौक, मोरवाडी अशा तब्बल १९ प्रमुख चौकांमध्ये चहा विक्रेत्यांनी ग्राहकांना आणि नागरिकांना मोफत चहा देऊन ‘फेरीवाला कायदा आणि सामाजिक सुरक्षा’ या महत्त्वाच्या विषयावर ‘चाय पे चर्चा’ आयोजित केली होती.
या उपक्रमाला नागरिकांनी भर पावसातही प्रचंड प्रतिसाद दिला. फेरीवाला घटकाला जलद गतीने न्याय मिळायला हवा, यावर यावेळी जोरदार चर्चा झाली. अनेक नागरिकांनी आपले मत व्यक्त करताना सांगितले की, फेरीवाला आवश्यक वेळी आणि आवश्यक ठिकाणी जीवनावश्यक वस्तू व सेवा उपलब्ध करून देत असल्याने नागरिकांचा वेळ आणि श्रम वाचतात. तसेच, अत्यंत स्वस्त दरात दर्जेदार वस्तू आणि सेवा मिळत असल्याने फेरीवाला घटक हा खऱ्या अर्थाने समाजासाठी गरजेचा आहे.
या महत्वपूर्ण ‘चाय पे चर्चा’ मध्ये कामगार नेते काशिनाथ नखाते, मनपा समिती सदस्य किरण साडेकर, किसन भोसले, सलीम डांगे यांच्यासह लाला राठोड, अंकुश पवार, संदीप भोसले, मनोज पाटील, इरफान चौधरी, सुनील भोसले, राजेश माने, सलीम इनामदार, अनिल सूर्यवंशी, इक्बाल शेख, मारुती सोनटक्के, चंद्रकांत चंपावत, जाधव, सुरेश देडे, सलीम शेख, रज्जाक शेख, राजू पठाण, आत्माराम पुलावळे, इस्माईल चौधरी, हुसेन खान, सत्यम स्वामी, अंबालाल सुखवाल यांसारख्या अनेक मान्यवरांची उपस्थिती होती. दिवसभर पिंपरी-चिंचवड शहरातील सर्व फेरीवाल्यांनी अत्यंत उत्साहात फेरीवाला दिवस साजरा केला आणि या उपक्रमात सक्रिय सहभाग नोंदवला. भर पावसातही नागरिकांचा लक्षणीय सहभाग हे या मागणीची तीव्रता दर्शवते.
