डॉ. डी. वाय. पाटील विद्यापीठाचा १६ वा पदवीप्रदान सोहळा उत्साहात! १२ हजारांहून अधिक विद्यार्थ्यांना पदवी प्रदान!
(मॅक्स मंथन डेली न्यूज, पिंपरी): पिंपरी येथील डॉ. डी. वाय. पाटील विद्यापीठ (डीपीयू), अभिमत विद्यापीठाचा १६ वा पदवीप्रदान समारंभ आज, २६ मे २०२५ रोजी विद्यापीठाच्या प्रांगणात मोठ्या थाटामाटात संपन्न झाला. विद्यापीठाचे कुलपती आदरणीय डॉ. पी. डी. पाटील यांनी या सोहळ्याचे अध्यक्षस्थान भूषवले.
या प्रतिष्ठित समारंभाला तेलंगणा राज्याचे अतिरिक्त पोलीस महासंचालक (कायदा व सुव्यवस्था) मा. श्री. महेश मुरलीधर भागवत प्रमुख पाहुणे म्हणून उपस्थित होते. त्यांच्यासोबत विद्यापीठाचे प्र-कुलपती मा. डॉ. भाग्यश्री पी. पाटील, कुलगुरू मा. डॉ. एन. जे. पवार, डॉ. डी. वाय. पाटील ज्ञान प्रसाद विद्यापीठाचे प्र-कुलपती मा. डॉ. सोमनाथ पाटील, डॉ. डी. वाय. पाटील विद्यापीठ (डीपीयू) पिंपरीच्या प्र-कुलगुरू मा. डॉ. स्मिता जाधव आणि डॉ. डी. वाय. पाटील विद्यापीठ सोसायटी, पुणेचे विश्वस्त व खजिनदार मा. डॉ. यशराज पाटील यांनीही आपली महत्त्वपूर्ण उपस्थिती दर्शवली.
कुलपती मा. डॉ. पी. डी. पाटील यांनी आपल्या अध्यक्षीय भाषणात सांगितले की, “पदवीप्रदान समारंभ हा केवळ पदवी मिळवण्याचा क्षण नसून, तो आत्मपरीक्षण करण्याचा आणि नवीन ऊर्जेने पुढील वाटचालीस सज्ज होण्याचा क्षण आहे. डॉ. डी. वाय. पाटील विद्यापीठाची स्थापना शिक्षणाच्या महत्त्वपूर्ण भूमिकेवर विश्वास ठेवून झाली आहे. आमच्या विद्यार्थी, प्राध्यापक आणि शैक्षणिक नेतृत्वाच्या अथक प्रयत्नांमुळे हे स्वप्न प्रत्यक्षात उतरत आहे. आमचा उद्देश आजही तोच आहे – असे ज्ञानसंपन्न नागरिक घडवणे, जे प्रत्येक क्षेत्रात ज्ञान आणि सामाजिक हिताला प्राधान्य देतील.”
या समारंभाचा एक महत्त्वाचा भाग म्हणजे श्री. महेश मुरलीधर भागवत यांना त्यांच्या पोलीस प्रशासनातील उल्लेखनीय योगदानाबद्दल ‘डॉक्टर ऑफ सायन्स’ (ऑनोरिस कौसा) ही मानद पदवी प्रदान करण्यात आली. मानद पदवी स्वीकारल्यानंतर त्यांनी विद्यार्थ्यांना प्रेरणादायी मार्गदर्शन केले. ते म्हणाले, “तुमच्या जीवनातील खरी वाटचाल आता सुरू होत आहे. सतत शिकण्याची वृत्ती ठेवा आणि ज्यांनी तुम्हाला घडवले, त्या नात्यांना कधीही विसरू नका. चारित्र्य, धैर्य, विनय, बांधिलकी आणि श्रद्धा या पाच तत्वांवर विश्वास ठेवा. मला खात्री आहे की तुम्हाला तुमच्या जीवनाचा उद्देश गवसेल आणि तुम्ही तो उत्कृष्टतेने पूर्ण कराल.”
प्र-कुलपती मा. डॉ. (सौ.) भाग्यश्री पाटील यांनी पदवी प्राप्त करणारे विद्यार्थी आणि त्यांच्या पालकांना संबोधित करताना शिक्षणाचे महत्त्व विशद केले. त्या म्हणाल्या, “शिक्षण म्हणजे केवळ पदवी मिळवणे नव्हे, तर ते जीवन, समाज आणि राष्ट्रात सकारात्मक बदल घडवणारी प्रक्रिया आहे. डॉ. डी. वाय. पाटील विद्यापीठात आम्ही केवळ पुस्तकी ज्ञान देत नाही, तर विद्यार्थ्यांमध्ये चांगले संस्कार रुजवत, त्यांना आवश्यक कौशल्ये शिकवतो आणि त्यांच्या स्वप्नांना आकार देतो. आज जेव्हा हे विद्यार्थी जगात पदार्पण करत आहेत, तेव्हा मी त्यांना एवढेच सांगेन की, सहानुभूती, धैर्य आणि चांगल्या गुणांचा वारसा पुढे घेऊन जा. तुमचे यश केवळ तुमच्यासाठी नसेल, तर ते सेवा, सन्मान आणि समाजकल्याणासाठी असावे. आजचा हा पदवीप्रदान सोहळा केवळ एक औपचारिकता नसून, एका मोठ्या जबाबदारीची सुरुवात आहे आणि तुमचे नेतृत्व भविष्यातील पिढ्यांसाठी एक आदर्श ठरेल.”
या गौरवशाली सोहळ्यात विद्यापीठाच्या विविध विद्याशाखांमधील उत्कृष्ट कामगिरी करणाऱ्या ३१ गुणवंत विद्यार्थ्यांना कुलपती डॉ. पी. डी. पाटील यांच्या हस्ते सुवर्णपदके देऊन गौरविण्यात आले. यावर्षी विविध आठ विद्याशाखांमधील तब्बल १२,२४४ स्नातकांना पदवी प्रदान करण्यात आली. यामध्ये ७३ विद्यावाचस्पती (पीएच.डी.), १०,८८४ पदव्युत्तर पदवी, १२७६ पदवी आणि ११ पदविका प्राप्त विद्यार्थ्यांचा समावेश आहे.
कार्यक्रमाची सुरुवात राष्ट्रगीत आणि विद्यापीठ गीताने झाली. त्यानंतर विद्यापीठाचे कुलपती डॉ. पी. डी. पाटील यांच्या शुभहस्ते दीपप्रज्वलन करण्यात आले आणि औपचारिकरीत्या समारंभाचे उद्घाटन झाले. कुलगुरू मा. डॉ. एन. जे. पवार यांनी विद्यापीठाचा विस्तृत प्रगती अहवाल सादर केला, ज्यात विद्यापीठाने शिक्षण आणि संशोधन क्षेत्रात केलेल्या उल्लेखनीय कार्याचा आढावा घेण्यात आला.
