मूर्तिजापूर (विलास सावळे, मॅक्स मंथन विशेष): महिलांसाठी स्वच्छतागृहाचा अभाव! मूलभूत सुविधेसाठी महिलांची प्रतीक्षा; नगर परिषदेची उदासीनता!
मूर्तिजापूर शहरातील महिलांसाठी एक अत्यंत महत्त्वाची आणि मूलभूत गरज दुर्लक्षित आहे. शहराच्या मध्यवर्ती ठिकाणी, जिथे दररोज हजारो महिला खरेदीसाठी आणि इतर कामांसाठी येतात, तिथे महिलांसाठी एकही सार्वजनिक स्वच्छतागृह उपलब्ध नाही!
शहरातील बाजारपेठ आणि शॉपिंग सेंटर्समध्ये पंचक्रोशीतून महिलांची मोठी गर्दी असते. भाजीपाला विक्रेत्या महिलांपासून ते खरेदीसाठी आलेल्यांपर्यंत, प्रत्येकाला स्वच्छतागृहाची गरज भासते. मात्र, खेदाची बाब म्हणजे, शहरातील प्रमुख गल्ल्या आणि बोळ्यांमध्ये महिलांसाठी एकही प्रसाधनगृह नाही. अनेक महिला भाजीपाला विक्रीचा व्यवसाय करतात, परंतु स्वच्छतागृहाअभावी त्यांची मोठी कुचंबना होते.
गेली १५ ते २० वर्षे उलटून गेली, तरी नगर परिषद प्रशासनाने या गंभीर समस्येकडे लक्ष दिलेले नाही, असा आरोप महिलांनी केला आहे. बसस्थानकाव्यतिरिक्त शहरात इतरत्र कुठेही महिलांसाठी स्वच्छतागृहाची व्यवस्था नाही. काही सार्वजनिक शौचालये शहराच्या बाहेरच्या बाजूला आहेत, जिथे महिलांना जाणे सोयीचे नसते.
बाहेरगावाहून व्यवसाय करण्यासाठी येणाऱ्या महिलांना तर याचा अधिक त्रास सहन करावा लागतो. महिलांसाठी स्वच्छतागृह ही त्यांची मूलभूत गरज आहे आणि त्यापासून त्यांना वंचित ठेवणे हा त्यांच्यावर अन्याय आहे, असे मत महिलांनी व्यक्त केले आहे. संबंधित अधिकाऱ्यांनी या समस्येची गांभीर्याने दखल घेऊन तातडीने उपाययोजना करण्याची मागणी महिलांकडून होत आहे. शॉपिंग सेंटर्समध्ये पुन्हा अद्ययावत प्रसाधनगृहे उभारण्याची गरज महिलांनी जोरकसपणे मांडली आहे.
मूर्तिजापूर शहरातील या गंभीर समस्येबद्दल आपले काय विचार आहेत? कमेंटमध्ये नक्की कळवा!
