महाराष्ट्राची मान उंचावली! पिंपरी-चिंचवड महापालिकेचा ऐतिहासिक ‘ग्रीन बाँड’ पराक्रम

पिंपरी-चिंचवड महापालिकेचा ऐतिहासिक टेंडा: देशातील पहिली ‘ग्रीन बाँड’ महानगरपालिका! (मॅक्स मंथन डेली न्यूज)

मुंबई, १० जून २०२५: पिंपरी-चिंचवड शहराने आज एक नवा इतिहास घडवला आहे! पर्यावरणपूरक आणि शाश्वत शहरी विकास प्रकल्पांसाठी हरित कर्जरोख्यांच्या (Green Bonds) माध्यमातून निधी उभारणारी पिंपरी-चिंचवड महानगरपालिका ही देशातील पहिली महानगरपालिका ठरली आहे. मुंबई शेअर बाजारात (BSE) या ऐतिहासिक हरित कर्जरोख्यांच्या लिस्टिंगनिमित्त आयोजित बेल रिंगिंग समारंभात राज्याचे मुख्यमंत्री देवेंद्र फडणवीस यांनी पिंपरी-चिंचवडच्या या कामगिरीचे तोंडभरून कौतुक केले. उपमुख्यमंत्री एकनाथ शिंदे आणि अजित पवार यांच्या प्रमुख उपस्थितीत हा सोहळा उत्साहात संपन्न झाला.

मुख्यमंत्र्यांकडून गौरवपर उद्गार: “अभिमानास्पद पाऊल!”

मुख्यमंत्री देवेंद्र फडणवीस म्हणाले, “पिंपरी-चिंचवड महापालिकेने हरित कर्जरोखे इश्यू करताच पहिल्या मिनिटातच १०० कोटी रुपयांचा मूळ भाग भरला गेला. ही केवळ पिंपरी-चिंचवडसाठीच नव्हे, तर संपूर्ण राज्य सरकारसाठी अभिमानास्पद बाब आहे. यावरून महाराष्ट्र सरकार आणि पिंपरी-चिंचवड महापालिका यावर गुंतवणूकदारांचा असलेला प्रचंड विश्वास दिसून येतो.”

पंतप्रधान नरेंद्र मोदी यांच्या स्थानिक स्वराज्य संस्थांनी म्युनिसिपल बाँडद्वारे जास्तीत जास्त निधी उभारावा या आग्रहाचा उल्लेख करत मुख्यमंत्री म्हणाले की, यामध्ये पिंपरी-चिंचवड महापालिकेने आघाडी घेतली आहे. त्यांनी या जटिल प्रक्रियेत सहकार्य केलेल्या प्रत्येक संस्थेचे आणि व्यक्तीचे अभिनंदन केले. तसेच, या निधीचा वापर हरित सेतूसह विविध पर्यावरणपूरक प्रकल्पांसाठी केला जाणार असल्याने, केंद्र सरकारकडून पिंपरी-चिंचवड महापालिकेला २० कोटींचे अनुदान देखील प्राप्त होणार असल्याचे त्यांनी जाहीर केले.

मान्यवरांचे कौतुक आणि भविष्यातील दिशा

याप्रसंगी आमदार उमा खापरे, अमित गोरखे, महेश लांडगे, शंकर जगताप, राज्याच्या मुख्य सचिव सुजाता सौनिक, आणि इतर अनेक वरिष्ठ अधिकारी व मान्यवर उपस्थित होते.

आमदार शंकर जगताप यांनी या उपक्रमाचे कौतुक करत सांगितले की, यामुळे पिंपरी-चिंचवड शहरात पर्यावरणपूरक विकास साधण्यास मदत होईल. आगामी काळात अशाच पद्धतीने सामाजिक आणि इतर विकास कामांसाठीही कर्जरोख्यांच्या माध्यमातून निधी उभारता येऊ शकतो का, यादृष्टीने प्रयत्न करण्याची गरज त्यांनी व्यक्त केली.

राज्याच्या मुख्य सचिव सुजाता सौनिक म्हणाल्या, “शहरीकरण झपाट्याने वाढत असताना पर्यावरणपूरक आणि शाश्वत शहरी विकास साधणे गरजेचे आहे. त्यासाठी हरित कर्जरोख्याच्या माध्यमातून पिंपरी-चिंचवड महापालिकेने निधी उभारण्याचे उत्तम उदाहरण इतरांसमोर ठेवले आहे.”

महापालिका आयुक्त शेखर सिंह यांनी या ऐतिहासिक टप्प्यावर आनंद व्यक्त करत सांगितले की, ही कामगिरी केवळ आर्थिकदृष्ट्या नव्हे, तर पर्यावरणपूरक व हवामानानुकूल नागरी विकासासाठी एक महत्त्वपूर्ण पाऊल आहे. गुंतवणूकदारांनी दाखवलेला विश्वास पिंपरी-चिंचवडच्या शाश्वत भविष्याची पावती असल्याचे ते म्हणाले.

‘ग्रीन बाँड्स’ एक दृष्टिक्षेपात:

• उभारलेला निधी: २०० कोटी रुपये.
• प्रतिसाद: केवळ एका मिनिटात १०० कोटी रुपयांचा मूळ भाग भरला गेला; एकूण ५१३ कोटी रुपयांच्या निविदा प्राप्त, म्हणजेच ५.१३ पट अधिक मागणी.
• वापर: निगडी प्राधिकरणातील हरित सेतू प्रकल्प आणि गवळीमाथा ते इंद्रायणी नगर चौक टेल्को रस्ता विकास प्रकल्पासाठी.
• पतमानांकन: क्रिसिल आणि केअर या संस्थांकडून एए+ (AA+) पतमानांकन.
• व्याजदर: ७.८५ टक्के स्पर्धात्मक व्याजदर.

या ऐतिहासिक यशाबद्दल मुख्यमंत्री देवेंद्र फडणवीस यांच्या हस्ते पिंपरी-चिंचवड महापालिका आयुक्त तथा प्रशासक शेखर सिंह यांचा ‘लिस्टिंग सन्मानचिन्ह’ देऊन गौरव करण्यात आला. ‘बॉम्बे स्टॉक एक्सचेंज’ने हे सन्मानचिन्ह प्रदान केले.

पिंपरी-चिंचवड महापालिकेने टाकलेले हे पाऊल केवळ शहरासाठीच नव्हे, तर देशातील इतर स्थानिक स्वराज्य संस्थांसाठीही प्रेरणादायी ठरणार आहे.

© २०२५ मॅक्स मंथन डेली न्यूज. सर्व हक्क राखीव.