ऑनलाइन प्रेमाचं महागडं जाळं: पिंपरी चिंचवड सायबर पोलिसांनी ३.१६ कोटींच्या फसवणुकीचा छडा लावला!

लग्नाचे आमिष दाखवून ३.१६ कोटींची फसवणूक: पिंपरी चिंचवड सायबर पोलिसांची दिल्लीत धडक कारवाई! मॅक्स मंथन डेली न्यूज

Shaadi.com वरून फसवणूक करणाऱ्या टोळीला दिल्ली-हरियाणा सीमेवरून अटक; गुंतागुंतीच्या बँक व्यवहारांचा छडा लावला.

पिंपरी चिंचवड, दि. ११ जून २०२५: पिंपरी चिंचवड सायबर पोलिसांनी एका मोठ्या आर्थिक फसवणुकीचा छडा लावत, Shaadi.com या मॅट्रिमोनिअल वेबसाईटवरून एका महिलेची ३ कोटी १६ लाख रुपयांची फसवणूक करणाऱ्या तीन आरोपींना दिल्ली-हरियाणा सीमेवरून अटक केली आहे. हा गुन्हा केवळ आर्थिक फसवणुकीचा नसून, सायबर गुन्हेगारांनी किती पद्धतशीरपणे जाळे फेकले होते, हे यातून स्पष्ट होते.

फसवणुकीची कार्यपद्धती आणि गुन्ह्याचा तपशील

सायबर पोलीस ठाण्यात दाखल झालेल्या गुन्ह्यानुसार, आरोपींनी फिर्यादी महिलेशी Shaadi.com या वेबसाईटवरून ओळख करून घेतली. लग्नाचे आमिष दाखवून, त्यांनी महिलेचा विश्वास संपादन केला. मुख्य आरोपीने स्वतःला Duckpro Mining LLC कंपनीचा CEO/Managing Director असल्याचे भासवले. त्याने फिर्यादी महिलेला आपल्या गोल्ड माइनिंग व्यवसायात अडचण आल्याचे आणि नवीन बिझनेससाठी रॉ मटेरियलसाठी पैशांची गरज असल्याचे सांगितले. फिर्यादी महिलेने त्याच्या बोलण्यावर विश्वास ठेवून त्याला पैसे दिले.

त्यानंतर आरोपीने विविध कारणे सांगून महिलेकडून पैसे उकळण्यास सुरुवात केली. दुबईतील बँकेचे खाते रेग्युलराईज करणे, स्वतःच्या आजारपणाचा उपचार खर्च, पूर्वी घेतलेले कर्ज फेडणे, कस्टम क्लिअरन्सची रक्कम, दुबई ते दिल्ली प्रवासाचा खर्च, प्रतिनिधी म्हणून काम केल्याचे पैसे, व्हेनेझुएला ते दुबई प्रवासाचा खर्च, तसेच टर्की-इस्तंबूल विमानतळावर त्याला ताब्यात घेतल्यावर सोडवण्यासाठी लागणारे पैसे अशी अनेक कारणे देत, आरोपींनी दि. १०/०७/२०२३ ते दि. ०९/०९/२०२४ या कालावधीत तब्बल ३,१६,७८,११३/- रुपये विविध बँक खात्यांवर स्वीकारले. हे पैसे परत न करता फिर्यादीची आर्थिक फसवणूक केल्याचे निष्पन्न झाले. याप्रकरणी सायबर पोलीस ठाण्यात भारतीय न्याय संहिता कलम ३१८(४), ३१६(२), ३(५) सह माहिती तंत्रज्ञान अधिनियम (सुधारित) कायदा २००८ चे कलम ६६ (सी), ६६ (डी) अन्वये गुन्हा दाखल करण्यात आला होता.

गुंतागुंतीचा तपास आणि यशस्वी अटकसत्र

मा. पोलीस आयुक्त विनय कुमार चौबे यांनी आरोपींचा शोध घेऊन तात्काळ अटक करण्याचे आदेश दिले होते. त्यानुसार पोनि. रविकिरण नाळे यांनी सपोनि. प्रवीण स्वामी आणि पोलीस उपनिरीक्षक सागर पोमण यांची दोन विशेष पथके तयार केली.

या गुन्ह्यातील तब्बल ३,१६,७८,११३/- रुपये ८१ वेगवेगळ्या बँक खात्यांवर हस्तांतरित करण्यात आले होते. धक्कादायक बाब म्हणजे, आरोपींनी हे पैसे ८१ खात्यांवरून पुढे ३०० ते ४०० अन्य खात्यांमध्ये वळवले होते. सायबर पोलिसांनी सुमारे ४००-५०० बँक खात्यांची पडताळणी केली असता, यातील जास्तीत जास्त खाती दिल्लीतील असल्याचे समोर आले.

पोलीस उपनिरीक्षक सागर पोमण यांच्या नेतृत्वाखालील पथक दिल्लीला रवाना झाले. तेथे केलेल्या तपासात, आरोपींनी वेगवेगळ्या बँकांमध्ये एकाच पत्त्यावर एकूण ११ बँक खाती उघडल्याचे आढळले. विशेष म्हणजे, आरोपी संबंधित पत्त्यावर दोन वर्षांपूर्वी भाडेतत्त्वावर राहत होते आणि त्यांनी त्यांचे मोबाईल नंबरही बदलले होते. बँक खात्यांवरील व्यवहारांना दोन वर्षांपेक्षा अधिक कालावधी झाल्याने आरोपींचा शोध घेणे अत्यंत अवघड झाले होते.

मात्र, तांत्रिक विश्लेषणाच्या आधारे पोलिसांनी आरोपी सिकंदर मुन्ना खान (वय २१, रा. मांडी व्हिलेज, दिल्ली) याला दिल्ली-हरियाणा सीमेवरील मांडी व्हिलेज, दक्षिण दिल्ली येथून ताब्यात घेतले. त्याच्याकडून मिळालेल्या माहितीनुसार, त्याला बँक खाती उघडण्यास लावणारे आणि ती खाती मुख्य आरोपीला पुरवणारे त्याचे सख्खे भाऊ रणजीत मुन्नालाल यादव (वय २७) आणि बबलु रघुवीर यादव (वय २५) या दोघांनाही त्याच गावातून ताब्यात घेण्यात आले.

गुन्हेगारांची कार्यपद्धती आणि पोलिसांचे आव्हान

अटक आरोपी हे पोलिसांपासून लपण्यासाठी इन्स्टाग्राम कॉलचा वापर करत होते. बँक खाती उघडण्यासाठी त्यांनी तात्पुरते भाडेकरार केले होते. आरोपी बबलू यादव हा मुख्य आरोपीच्या सांगण्यावरून वेगवेगळ्या एटीएममधून पैसे काढून त्याला देत असे. तसेच, आरोपी रणजीत मुन्नालाल यादव याच्या पंजाब नॅशनल बँक खात्यावर गुन्ह्यातील ३६,९६,६७२/- रु आले असल्याचे तपासात निष्पन्न झाले आहे.

या गुन्ह्याचा अधिक तपास पोलीस निरीक्षक रविकिरण नाळे (सायबर पोलीस ठाणे, पिंपरी चिंचवड) करीत आहेत.

यशस्वी कारवाई करणारे पथक आणि नागरिकांना आवाहन

ही यशस्वी कारवाई मा. विनयकुमार चौबे (पोलीस आयुक्त, पिंपरी चिंचवड), मा. डॉ. शशिकांत महावरकर (सह पोलीस आयुक्त), मा. सारंग आव्हाड (अपर पोलीस आयुक्त), मा. संदिप डोईफोडे (पोलीस उपआयुक्त, गुन्हे), मा. डॉ. शिवाजी पवार (पोलीस उपआयुक्त, परिमंडळ -०३ अति. कार्य. गुन्हे), मा. डॉ. विशाल हिरे (सहायक पोलीस आयुक्त, गुन्हे १) यांच्या मार्गदर्शनाखाली पोलीस निरीक्षक रविकिरण नाळे, सपोनि. प्रवीण स्वामी, पोउपनि. सागर पोमण, पोउपनि. वैभव पाटील, पोलीस अंमलदार सुभाष पाटील, दिपक माने, कृष्णा गवळी, अभिजीत उकिरडे, संतोष सपकाळ, दिपक भोसले, नितेश बिचेवार, श्रिकांत कबुले, अतुल लोखंडे, माधव आरुटे, ज्योती साळे (सर्व नेमणुक सायबर पोलीस ठाणे) यांच्या पथकाने केली.

सायबर पोलिसांचे आवाहन:

पिंपरी चिंचवड शहरातील सर्व नागरिकांना आवाहन करण्यात येते की, मॅट्रिमोनिअल वेबसाईटवरून संपर्क साधणाऱ्या व्यक्ती परदेशी नागरिक असल्यास, प्रत्यक्ष भेटून आणि पूर्ण चौकशी करूनच आपली वैयक्तिक माहिती शेअर करावी. तसेच, मॅट्रिमोनिअल वेबसाईटवरून संपर्क साधून कोणी पैशांची मागणी करत असेल, तर त्या व्यक्तीबाबत सायबर पोलीस स्टेशन पिंपरी चिंचवड येथे तातडीने तक्रार नोंद करावी.

© २०२५ मॅक्स मंथन डेली न्यूज. सर्व हक्क राखीव.