पिंपरी-चिंचवडमध्ये जिल्हास्तरीय कॅरम स्पर्धेचा जल्लोष!
तंत्रज्ञानाच्या युगात खेळाचे महत्त्व अधोरेखित, युवा आणि ज्येष्ठ खेळाडूंचा उत्स्फूर्त सहभाग!
पिंपरी, दि. ३० जुलै २०२५ , मॅक्स मंथन डेली न्यूज: आजच्या तंत्रज्ञान-केंद्रित युगात, जिथे मोबाईल फोन प्रत्येकाच्या हातात २४ तास दिसतो आणि त्याचा वापर लहान मुलांमध्येही वाढताना दिसतो, तिथे मैदानी आणि बौद्धिक खेळांचे महत्त्व अधोरेखित करणे अत्यंत आवश्यक आहे. मोबाईलच्या अतिवापरामुळे मुलांची विचार करण्याची क्षमता खुंटत आहे आणि आरोग्याकडे दुर्लक्ष होत आहे, असे मत पिंपरी चिंचवड महानगरपालिकेच्या क्रीडा व सांस्कृतिक विभागाच्या उप आयुक्तांनी व्यक्त केले. पालकांनी पुढाकार घेऊन मुलांना खेळाकडे प्रवृत्त केल्यास त्यांचे आरोग्य उत्तम राहील, असेही ते म्हणाले.
उत्साहात उद्घाटन आणि मान्यवरांची उपस्थिती
चिंचवड परिसरातील प्रेमलोक पार्क येथील कै. मनीषा भोईर विरंगुळा केंद्र येथे पिंपरी चिंचवड महानगरपालिका आणि कॅरम असोसिएशन ऑफ पुणे यांच्या संयुक्त विद्यमाने आयोजित जिल्हास्तरीय कॅरम स्पर्धेच्या उद्घाटन प्रसंगी ते बोलत होते. याप्रसंगी माजी नगरसदस्य भाऊसाहेब भोईर, महापालिकेचे जनता संपर्क अधिकारी प्रफुल्ल पुराणिक, सामाजिक कार्यकर्ते हर्षवर्धन भोईर, अविनाश कदम, नंदकुमार साने, विनोद देसाई, पुणे जिल्हा कॅरम असोसिएशनचे सचिव सुशील गुजर, कोषाध्यक्ष सुदाम दाभाडे, मंदार कुलकर्णी, शशिकांत रहाटे, भूषण पाटील, अनंत भूटे, विष्णू भुते, मुकेश इंगळकर यांच्यासह इतर पदाधिकारी आणि कॅरम खेळावर प्रेम करणारे खेळाडू व नागरिक मोठ्या संख्येने उपस्थित होते.
खेळाचे महत्त्व आणि आयोजनाचा उद्देश
पिंपरी चिंचवड महानगरपालिकेच्या वतीने नागरिकांमध्ये खेळाची आवड निर्माण व्हावी, तसेच शिस्त, संघभावना, कलात्मकता आणि सांघिक समन्वय वाढावा या हेतूने दरवर्षी या स्पर्धेचे आयोजन करण्यात येते. यावर्षीच्या स्पर्धेला स्थानिक नागरिकांनी आणि पालकांनी देखील मोठ्या संख्येने उपस्थित राहून भरभरून प्रतिसाद दिला. या स्पर्धेचे मुख्य पंच म्हणून संदीप अडागळे यांनी, तर सहायक पंच म्हणून गौरव गार्डे आणि प्रतिक सोमकुवर यांनी उत्कृष्ट काम पाहिले.
अंतिम निकाल: पुरुष एकेरी आणि ज्येष्ठ नागरिक गट
पुरुष एकेरी
- प्रभाकर भालेराव वि. वि. जावेद जावली (२३-०८, २५-०२)
- विकी कांगणे वि. वि. रुपेश शिंदे (२५-०२, २५-०५)
- दीपक नागतीळक वि. वि. सूरज जाधव (१९-२४, २५-००, २३-०६)
- शादाब अन्सारी वि. वि. सौरभ मेढेकर (२१-१४, १०-२५, १३-१२)
ज्येष्ठ नागरिक गट
- संतोष निमकर वि. वि. पंकज कुलकर्णी (१४-१३, २४-०२)
- रज्जाक शेख वि. वि. सुहास पाटील (१५-०९, १९-०६)
- विजय कोठेकर वि. वि. सुरेश सोंडकर (१८-१२, १६-०५)
- गणेश जंगम वि. वि. नितीन गायकवाड (२५-००, २३-००)
- संजय मांजरेकर वि. वि. डी. स. मोरे (१९-०१, ०९-१२, १९-०७)
- रईस शेख वि. वि. यशवंत बोंधरे (२३-०४, २५-०२)
महिलांसाठीच्या कॅरम स्पर्धा अजूनही सुरू असून, त्यांचे निकाल लवकरच जाहीर केले जातील. या स्पर्धेमुळे पिंपरी-चिंचवडमध्ये कॅरम खेळाला एक नवी ऊर्जा मिळाली आहे!
© २०२५ मॅक्स मंथन डेली न्यूज. सर्व हक्क राखीव.
