शिर्डीच्या साईबाबा संस्थानचा जागतिक गौरव

‘ग्लोबल बुक ऑफ एक्सलन्स’मध्ये नोंद; धार्मिक कार्यासोबत मानवसेवेचीही दखल

३१ ऑगस्ट २०२५, मॅक्स मंथन डेली न्यूज:

पिंपरी, प्रतिनिधी शाम सोनवणे – शिर्डी येथील श्री साईबाबा संस्थानच्या धार्मिक, सामाजिक आणि मानवसेवेतील योगदानाला आता जागतिक स्तरावर मोठा सन्मान प्राप्त झाला आहे. या संस्थेची नोंद प्रतिष्ठेच्या ‘ग्लोबल बुक ऑफ एक्सलन्स, इंग्लंड वर्ल्ड रेकॉर्ड’ मध्ये करण्यात आली आहे. या जागतिक मान्यतेमुळे कोट्यवधी भाविकांचे श्रद्धास्थान असलेल्या या संस्थेच्या कार्यावर आंतरराष्ट्रीय स्तरावर शिक्कामोर्तब झाले आहे.

कार्य आणि जागतिक ओळख

श्री साईबाबांच्या कृपेने लाखो भाविकांच्या आयुष्याला स्पर्श करणाऱ्या या संस्थेच्या निःस्वार्थ कार्याची दखल घेत हा गौरव करण्यात आला आहे. साईबाबा संस्थान हे केवळ धार्मिक केंद्र नसून ते एक मोठे सामाजिक आणि मानवतावादी कार्य करणारे केंद्र आहे. इथे भाविकांना मोफत भोजन (प्रसादालय), आरोग्य सुविधा आणि राहण्याची सोय पुरवली जाते. या सर्व कार्याची नोंद घेऊनच वर्ल्ड रेकॉर्डचे प्रमाणपत्र ‘ग्लोबल बुक ऑफ एक्सलन्स, इंग्लंड’ चे अध्यक्ष डॉ. मनीष कुमार, उपाध्यक्ष डॉ. दीपक हरके आणि कार्यकारी संचालक जितेंद्र मित्तल यांनी संस्थानचे मुख्य कार्यकारी अधिकारी गोरक्ष गाडीलकर (भा.प्र.से.) यांच्याकडे प्रदान केले.

यावेळी संस्थानचे प्रभारी उपमुख्य कार्यकारी अधिकारी संदीपकुमार भोसले, प्रशासकीय अधिकारी विश्वनाथ बजाज, आणि मुख्य कार्यकारी अभियंता भिकन दाभाडे हे देखील उपस्थित होते.

आंतरराष्ट्रीय स्तरावर नवा गौरव

संस्थानचे कार्यकारी अधिकारी गोरक्ष गाडीलकर यांनी या प्रसंगी सांगितले की, “या जागतिक मान्यतेमुळे साईबाबा संस्थान भाविकांच्या सेवेसाठी करत असलेल्या कार्याला आंतरराष्ट्रीय स्तरावर नवा गौरव लाभला आहे.” या सन्मानामुळे देशभरातूनच नव्हे, तर परदेशातून येणाऱ्या भाविकांच्या श्रद्धेचे महत्त्व अधोरेखित झाले आहे. हा पुरस्कार साईबाबांच्या शिकवणीचा आणि सर्व धर्म समभावाच्या संदेशाचा विजय असल्याचे मत अनेकांनी व्यक्त केले. हा उपक्रम शिर्डी नगरी आणि महाराष्ट्राच्या शिरपेचात मानाचा तुरा खोवणारा ठरला आहे.

© 2025 मॅक्स मंथन डेली न्यूज. सर्व हक्क राखीव.