‘विसर्जन’ नव्हे, आता ‘पुनर्जनन’! गणेश मूर्तींना मिळतेय नवी ओळख

गणपती मूर्तींपासून कुंड्या! पिंपरीत पर्यावरणपूरक विसर्जनाचा अनोखा उपक्रम

आसवानी असोसिएट्स आणि ॲस्पिरिफाय एन्व्हायर्नमेंटच्या मोहिमेला उत्स्फूर्त प्रतिसाद; पवना नदीचे प्रदूषण टाळण्याचा प्रयत्न

पिंपरी प्रतिनिधी शाम सोनवणे, ०६ सप्टेंबर २०२५:

गणेशोत्सव हा केवळ भक्तीचा नव्हे, तर पर्यावरण संरक्षणाचा संदेश देणारा उत्सव ठरावा यासाठी पिंपरीमध्ये एक अनोखा आणि कौतुकास्पद उपक्रम राबविण्यात येत आहे. आसवानी असोसिएट्स आणि ॲस्पिरिफाय एन्व्हायर्नमेंट प्रायव्हेट लिमिटेड यांच्या पुढाकाराने प्लॅस्टर ऑफ पॅरिस (पीओपी) मूर्तींवर रासायनिक प्रक्रिया करून त्यापासून कुंड्या बनवल्या जात आहेत. या उपक्रमाला गणेशभक्तांकडून मोठ्या प्रमाणात प्रतिसाद मिळत आहे.

मूर्तींचे रूपांतर कुंड्यांमध्ये

गेल्या सहा वर्षांपासून सामूहिक गणेश विसर्जनाची मोहीम राबवणारी ‘ॲस्पिरिफाय एन्व्हायर्नमेंट’ ही संस्था पीओपी मूर्तींवर प्रक्रिया करून त्यांना पुन्हा उपयुक्त बनवत आहे. आतापर्यंत तब्बल २,७०० मूर्तींचे विसर्जन झाले असून, यावर्षी किमान ६० हजार मूर्तींचे विसर्जन करण्याचा अंदाज आहे. गेल्या वर्षी ४४ हजार मूर्तींचे विसर्जन झाले होते. या अभिनव प्रक्रियेवर श्रीचंद शामनदास आसवानी स्वतः लक्ष ठेवून आहेत. या तयार झालेल्या कुंड्या शाळा आणि सामाजिक संस्थांना मोफत वितरित केल्या जातात.

कृत्रिम तलावाचे उद्घाटन आणि मान्यवरांची उपस्थिती

या उपक्रमांतर्गत गणेशभक्तांसाठी खास कृत्रिम तलावाची सोय करण्यात आली आहे, ज्याचे उद्घाटन खासदार श्रीरंग बारणे यांच्या हस्ते पार पडले. यावेळी खासदार बारणे म्हणाले, “पवना नदीचे प्रदूषण टाळण्यासाठी गणेशभक्तांनी या सुविधेचा मोठ्या प्रमाणावर लाभ घ्यावा. हा उपक्रम खरोखरच कौतुकास्पद आहे.”

या वेळी आमदार शंकर जगताप, माजी नगरसेवक भाऊसाहेब भोईर, माजी उपमहापौर हीराबाई घुले, डब्बू आसवानी, माजी विरोधी पक्षनेते विठ्ठल काटे, माजी नगरसेवक शत्रुघ्न काटे, शीतल शिंदे, प्रसाद शेट्टी, मनपा उपायुक्त संजय कुलकर्णी, पोलीस उपायुक्त आनंद भोईटे यांच्यासह संयोजक विजय आसवानी, उद्योजक राजू आसवानी, श्रीचंद आसवानी, सतीश आसवानी, अनिल आसवानी उपस्थित होते.

या उपक्रमामुळे गणेशोत्सवाच्या पारंपरिक भक्तीला धक्का न लावता पर्यावरण संरक्षणाचा संदेश दिला जात आहे. पिंपरीतील नागरिकांनी या संधीचा लाभ घेऊन गणेश विसर्जनाला पर्यावरणपूरक दिशा द्यावी, अशी अपेक्षा व्यक्त केली जात आहे.

© 2025 मॅक्स मंथन डेली न्यूज. सर्व हक्क राखीव.