दिव्यांग लाभार्थ्यांनो लक्ष द्या! वाढीव अनुदानासाठी ‘हयातीचे प्रमाणपत्र’ अनिवार्य; जानेवारीअखेरपर्यंत मुदत

अमरावती, २​३ जानेवारी २०२६ | मॅक्स मंथन डेली न्यूज:

अमरावती : केंद्र व राज्य सरकारच्या विविध कल्याणकारी योजनांतर्गत लाभ घेणाऱ्या दिव्यांग बांधवांच्या अनुदानात १ हजार रुपयांची वाढ करण्यात आली असून, आता एकूण २ हजार ५०० रुपये अनुदान थेट लाभ हस्तांतरणाद्वारे (DBT) दिले जात आहे. मात्र, ज्या लाभार्थ्यांना अद्याप हे वाढीव अनुदान मिळालेले नाही, त्यांनी तातडीने आपले ‘हयातीचे प्रमाणपत्र’ (Life Certificate) काढून पोर्टलवर अपडेट करावे, असे आवाहन निवासी उपजिल्हाधिकारी संतोष काकडे यांनी केले आहे.

शासनाच्या नवीन निर्णयानुसार, दिव्यांग लाभार्थ्यांचे ऑनलाईन यूडीआयडी (UDID) कार्ड पोर्टलवर अपडेट असणे अनिवार्य आहे. ज्यांना वाढीव रक्कम मिळाली नाही, त्यांनी खालील कागदपत्रे तहसील कार्यालयातील संजय गांधी योजना शाखेत जमा करावीत:

• यूडीआयडी (UDID) कार्ड.

• आधार कार्ड.

• आधार लिंक असलेल्या बँक पासबुकची प्रत.

योजनेचा लाभ खंडित होऊ नये यासाठी शासनाने ‘आधार आधारित जीवन प्रमाणपत्र प्रणाली’ विकसित केली आहे.

१. मोबाईल ॲप: लाभार्थी आपल्या अँड्रॉइड मोबाईलमधील ॲपद्वारे विनामूल्य ‘डिजीटल लाईफ सर्टिफिकेट’ जनरेट करू शकतात.

२. तहसील कार्यालय: तहसील कार्यालयातील संजय गांधी योजना विभागातही ऑनलाईन हयातीचे प्रमाणपत्र काढून देण्याची सोय उपलब्ध आहे.

हे प्रमाणपत्र आपोआप NSAP पोर्टलवर अपडेट होणार आहे.

केंद्र पुरस्कृत इंदिरा गांधी राष्ट्रीय वृद्धापकाळ योजना, वीर पत्नी व दिव्यांग योजनांच्या सर्व लाभार्थ्यांनी जानेवारी २०२६ पर्यंत आपले हयातीचे प्रमाणपत्र ऑनलाईन पद्धतीने सादर करावे. हयातीच्या प्रमाणपत्राअभावी शासनाकडून मिळणाऱ्या लाभामध्ये तांत्रिक अडचणी येऊ शकतात, त्यामुळे ही प्रक्रिया वेळेत पूर्ण करण्याचे आवाहन प्रशासनामार्फत करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.

आमझरी बनणार ‘मधाचे गाव’; आदिवासी महिलांना शास्त्रोक्त मधमाशा पालनाचे प्रशिक्षण सुरू

अमरावती,चिखलदरा, २२ जानेवारी २०२६ | मॅक्स मंथन डेली न्यूज:

अमरावती, चिखलदरा : महाराष्ट्र राज्य खादी व ग्रामोद्योग मंडळाच्या महत्त्वाकांक्षी ‘मधाचे गाव’ योजनेअंतर्गत चिखलदरा तालुक्यातील आमझरी या गावाची निवड करण्यात आली आहे. या योजनेद्वारे मेळघाटातील मुबलक नैसर्गिक साधनसंपत्तीचा वापर करून स्थानिक आदिवासी महिलांना ‘सातेरी’ मधमाशा पालनाचे विशेष प्रशिक्षण देण्यात येत आहे. यामुळे आदिवासी बांधवांना रोजगाराची नवीन संधी उपलब्ध झाली आहे.

राज्यात पहिल्या टप्प्यात निवडण्यात आलेल्या १० गावांमध्ये आमझरीचा समावेश करण्यात आला आहे. निसर्गाचे रक्षण करणे, दर्जेदार मध उत्पादन आणि त्यापासून तयार होणाऱ्या उप-उत्पादनांची विक्री व्यवस्था करणे, हा या योजनेचा मुख्य उद्देश आहे. या उपक्रमामुळे आमझरी हे गाव ‘मधुपर्यटना’चे प्रमुख केंद्र म्हणून नावारूपास येणार आहे.

जिल्हाधिकारी आशिष येरेकर यांच्या मार्गदर्शनाखाली सध्या गावातील २१ महिलांना हे प्रशिक्षण दिले जात आहे. भविष्यात गावातील प्रत्येक घरातील किमान एका सदस्याला प्रशिक्षित करण्याचे उद्दिष्ट ठेवण्यात आले आहे. या प्रशिक्षणामध्ये महिलांना खालील तांत्रिक ज्ञान दिले जात आहे:

• मधमाशांच्या जाती: मधमाशांच्या विविध जाती आणि त्यांचे गुणधर्म.

• शास्त्रोक्त संकलन: आग्या मधमाशांच्या वसाहतींमधून मध काढण्याची तांत्रिक पद्धत.

• उप-उत्पादने: मेण आणि रॉयल्टी जेली यांसारख्या उप-उत्पादनांची निर्मिती.

केवळ प्रशिक्षणच नव्हे, तर गावाचा सर्वांगीण विकास करण्यासाठी येथे मधपेट्यांचे वाटप, ‘मधुबना’ची स्थापना आणि सामुहिक सुविधा केंद्राची निर्मिती करण्यात येत आहे. तसेच पर्यटकांच्या माहितीसाठी एक भव्य माहिती दालनही उभारले जाणार आहे. या सर्व उपक्रमांमुळे आमझरीच्या आर्थिक उत्पन्नात मोठी भर पडणार असल्याची माहिती जिल्हा ग्रामोद्योग अधिकाऱ्यांनी दिली आहे.

© २०२६ मॅक्स मंथन डेली न्यूज. सर्व हक्क राखीव.

नैसर्गिक वाळूला ‘एम-सॅण्ड’चा पर्याय; कृत्रिम वाळू निर्मितीसाठी परवाना प्रक्रिया सुरू, जिल्हाधिकाऱ्यांचे आवाहन

अमरावती, २२ जानेवारी २०२६ | मॅक्स मंथन डेली न्यूज:

अमरावती : नैसर्गिक वाळूच्या टंचाईवर मात करण्यासाठी आणि पर्यावरणाचे रक्षण करण्यासाठी राज्य सरकारने ‘कृत्रिम वाळू धोरण’ जाहीर केले आहे. या धोरणांतर्गत एम-सॅण्ड (M-Sand) निर्मिती युनिट स्थापन करू इच्छिणाऱ्या व्यक्ती आणि संस्थांनी जिल्हाधिकारी कार्यालयाकडे अर्ज करावेत, असे आवाहन अमरावतीचे जिल्हाधिकारी आशिष येरेकर यांनी केले आहे. या उपक्रमामुळे बांधकाम क्षेत्राला मोठा दिलासा मिळण्याची शक्यता आहे.

• मंजूर खाणपट्टाधारक आणि तात्पुरते परवानाधारक.

• ज्यांच्याकडे सध्या कोणताही खाणपट्टा नाही, मात्र नवीन एम-सॅण्ड युनिट सुरू करण्याची इच्छा असणाऱ्या व्यक्ती किंवा संस्था.

• यापूर्वी ‘महाखनिज’ प्रणालीवर अर्ज केलेल्या युनिटधारकांनीही आता नव्याने जिल्हाधिकाऱ्यांकडे अर्ज करणे आवश्यक आहे.

शासकीय धोरणानुसार कृत्रिम वाळू उत्पादकांना विविध सवलती जाहीर करण्यात आल्या आहेत:

• रॉयल्टीमध्ये सूट: प्रतिब्रास ४०० रुपये रॉयल्टीऐवजी २०० रुपये सवलत मिळून केवळ २०० रुपये दराची तरतूद आहे.

• आर्थिक लाभ: औद्योगिक प्रोत्साहन अनुदान, व्याज अनुदान आणि गुंतवणूक प्रोत्साहन सवलत.

• विद्युत सवलत: वीज शुल्कातून सूट आणि वीज दर अनुदानाचा लाभ घेता येणार आहे.

अर्जदारांनी अर्जासोबत ५०० रुपये फी, गट नंबर, नकाशा, सातबारा उतारा, आधार व पॅन कार्ड जोडणे अनिवार्य आहे. याशिवाय:

१. प्रदूषण नियंत्रण मंडळाचे प्रमाणपत्र: ‘कॉन्सेंट टू एस्टॅब्लिश’ आणि ‘कॉन्सेंट टू ऑपरेट’ प्रमाणपत्र आवश्यक.

२. हमीपत्र: १०० टक्के एम-सॅण्ड उत्पादन करण्याबाबत १०० रुपयांच्या स्टॅम्प पेपरवर हमीपत्र.

३. कच्च्या मालाचा तपशील: दगड कोणत्या खाणपट्टातून आणला जाणार आहे, त्याची माहिती.

४. इतर परवाने: अकृषिक (NA) परवानगी, उद्योग आधार नोंदणी आणि व्यापारी परवाना असणे बंधनकारक आहे.

इच्छुक उमेदवारांनी अधिक माहितीसाठी किंवा शंका निरसनासाठी गौण खनिज शाखा, जिल्हाधिकारी कार्यालय, अमरावती येथे संपर्क साधावा, असे प्रशासनाकडून स्पष्ट करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.

मराठी भाषेच्या इतिहासात सुवर्णक्षण! देशातील पहिल्या मराठी भाषा विद्यापीठाच्या परीक्षेला प्रारंभ

अमरावती, २१ जानेवारी २०२६ | मॅक्स मंथन डेली न्यूज

अमरावती : मराठी भाषेचे जतन आणि संवर्धन करण्यासाठी अमरावती येथे स्थापन झालेल्या देशातील पहिल्या ‘मराठी भाषा विद्यापीठा’च्या प्रवासातील एक महत्त्वाचा टप्पा गाठला गेला आहे. विद्यापीठाच्या प्रथम सत्राच्या पहिल्या ऐतिहासिक परीक्षेला सोमवार, १९ जानेवारीपासून यशस्वी सुरुवात झाली असून, यामुळे विद्यार्थी आणि विद्यापीठ व्यवस्थापनामध्ये उत्साहाचे वातावरण आहे.

विद्यापीठाच्या स्थापनेनंतरच्या पहिल्याच वर्षात ४९ विद्यार्थ्यांनी विविध अभ्यासक्रमांसाठी प्रवेश घेतला आहे. सध्या विद्यापीठात खालील चार महत्त्वाचे अभ्यासक्रम सुरू आहेत:

१. कला स्नातक (बी.ए.) – भाषा व लिपीशास्त्र

२. प्रादर्शिक कला स्नातक (बी.पी.ए.) – नाटक

३. स्नातकोत्तर मराठी (एम.ए.) – अभिजात भाषा

४. स्नातकोत्तर मानसशास्त्र

विद्यापीठाचे पहिलेच वर्ष असल्याने अनेक आव्हाने समोर होती. मात्र, विद्यापीठ प्रशासनाने तज्ज्ञ अभ्यागत प्राध्यापकांना निमंत्रित करून विद्यार्थ्यांचा अभ्यासक्रम वेळेत पूर्ण करून घेतला. त्यामुळे विद्यार्थ्यांमध्ये परीक्षेबाबतचा आत्मविश्वास वाढला असून, पहिल्या सत्राची ही परीक्षा अत्यंत सुरळीतपणे पार पडत आहे.

विद्यापीठाच्या कला व साहित्य प्रशालेचे अधिष्ठाता आणि प्रभारी परीक्षा नियंत्रक डॉ. कोमल ठाकरे यांनी माहिती दिली की, पहिल्या वर्षातील विद्यार्थ्यांचा प्रतिसाद सकारात्मक आहे. विद्यापीठाला एक वर्ष पूर्ण होण्याआधीच ही प्रवेश प्रक्रिया आणि परीक्षा राबवणे, हे मोठे यश आहे. आगामी शैक्षणिक वर्षात विद्यार्थ्यांसाठी आणखी नवीन आणि रोजगाराभिमुख अभ्यासक्रम सुरू करण्याचे नियोजन विद्यापीठ प्रशासनाकडून करण्यात येत आहे.

या विद्यापीठामुळे मराठी भाषेच्या शास्त्रीय अभ्यासाला नवी दिशा मिळणार असून, ही परीक्षा म्हणजे मराठी अस्मितेच्या जडणघडणीतील एक ऐतिहासिक पाऊल मानले जात आहे.

© २०२६ मॅक्स मंथन डेली न्यूज. सर्व हक्क राखीव.

माई सिंधुताई सपकाळ माझ्यासाठी आदर्श होत्या; माजी लेडी गव्हर्नर डॉ. कमलताई गवई यांचे चिखलदरात प्रतिपादन

चिखलदरा, दि . १७ जानेवारी २०२६ मॅक्स मंथन डेली न्यूज :

“सिंधुताई माझ्यासाठी केवळ समाजसेविका नव्हत्या, तर त्या माझ्या आयुष्याचा आदर्श होत्या. समाजातील निराधार लेकरांसाठी त्यांनी स्वतःचे आयुष्य झिजवले. त्यांच्या डोळ्यांत माणुसकी आणि हृदयात अमाप करुणा होती. त्या आज आपल्यात नाहीत, पण त्यांच्या विचारांनी मला आजही समाजकार्यासाठी प्रेरित केले आहे,” असे भावनिक उद्गार माजी लेडी गव्हर्नर आचार्य डॉ. कमलताई गवई यांनी काढले.

क्रांतीज्योती सावित्रीबाई फुले जयंती आणि पद्मश्री सिंधुताई सपकाळ यांच्या चौथ्या पुण्यतिथीनिमित्त चिखलदरा येथे ‘करुणेचा जागर’ या विशेष कार्यक्रमाचे आयोजन करण्यात आले होते. पद्मश्री सौ. सिंधुताई सपकाळ जनविकास सामाजिक बहुउद्देशीय फाउंडेशन (पुणे शाखा चिखलदरा) यांच्या वतीने आयोजित या सोहळ्याच्या अध्यक्षस्थानावरून डॉ. कमलताई गवई बोलत होत्या.

चिखलदरा ही माईंची कर्मभूमी राहिली आहे. इथूनच त्यांनी आदिवासी मुलींसाठी पहिली आश्रमशाळा सुरू केली होती. या आठवणींना उजाळा देताना डॉ. कमलताई गवई यांचा स्वर दाटून आला. माईंचे चिरंजीव अरुणभाऊ सपकाळ यांनीही यावेळी आपली भावना व्यक्त केली. “आई शारीरिक स्वरूपात नसली तरी, तिचे स्वप्न पूर्ण करणे हीच माझी श्वासाच्या शेवटच्या क्षणापर्यंतची जबाबदारी आहे,” असे त्यांनी सांगितले.

या कार्यक्रमाला माजी सरन्यायाधीश भूषण गवई यांच्या मातोश्री डॉ. कमलताई गवई यांच्यासह अनेक दिग्गज उपस्थित होते. व्यासपीठावर जिल्हा सत्र न्यायाधीश प्रभाकर मोडक, माजी आयकर आयुक्त पियुष कोल्हे, आमदार केवलराम काळे, माजी आमदार प्रभूदास भिलावेकर, उपवनसंरक्षक कीर्ती जमदाडे-कोकाटे, सुनील मानकर, नगराध्यक्ष शेख अब्दुल शेख हैदर, अभिमान डोईजड, धर्मराज खडके, राजू करंडे, मार्तंड नेवासकर, ज्येष्ठ पत्रकार मोहम्मद अश्रफभाई, अधीक्षिका सरिता सपकाळ, प्रसाद सपकाळ आणि सौ. जान्हवी सपकाळ यांची प्रमुख उपस्थिती होती.

दोन दिवसीय या सोहळ्यात वक्तृत्व, कविता वाचन, गीत गायन आणि अनुभव कथन अशा विविध उपक्रमांतून सावित्रीबाई फुले आणि सिंधुताई सपकाळ यांच्या कार्याला उजाळा देण्यात आला. उपस्थितांनी माईंच्या समाजसेवेची नवी शपथ घेऊन त्यांना श्रद्धांजली अर्पण केली.

चिखलदरातून सिंधुताईंच्या विचारांचा अखंड प्रवास…

माई गेल्या, पण त्यांची माया अजूनही चिखलदराच्या मातीत जिवंत आहे. ज्या हातांनी त्यांनी अनाथांच्या डोळ्यांतील अश्रू पुसले, ते कार्य आजही त्यांच्या विचारांच्या माध्यमातून सुरू आहे. हजारो लेकरांच्या हसण्यात आणि शिक्षणात माई आजही जिवंत आहेत, अशी भावना यावेळी व्यक्त करण्यात आली.

© २०२६ मॅक्स मंथन डेली न्यूज. सर्व हक्क राखीव.

स्नेहसंमेलनातून विद्यार्थ्यांच्या सुप्त गुणांना वाव-दिलीपबाबू इंगाेले; चंद्रभानजी विद्यालयात स्नेहसंमेलन उत्साहात संपन्न

अमरावती, दि . १७ जानेवारी २०२६, मॅक्स मंथन डेली न्यूज :

“लहान वयात विद्यार्थ्यांच्या आंतरिक सुप्त गुणांना वाव देण्यासाठी स्नेहसंमेलन हे एक प्रभावी व्यासपीठ आहे. शालेय जीवनातील अशा कार्यक्रमांमधूनच विद्यार्थ्यांची खरी प्रतिभा पुढे येत असते,” असे प्रतिपादन श्रीराम मंदिर ट्रस्ट, कुंड सर्जापूरचे अध्यक्ष तथा श्री शिवाजी शिक्षण संस्थेचे कोषाध्यक्ष दिलीपबाबू इंगाेले यांनी केले.

अमरावती जवळील कुंड सर्जापूर येथील चंद्रभानजी विद्यालयाचे दोन दिवसीय स्नेहसंमेलन नुकतेच उत्साहात पार पडले. या स्नेहसंमेलनाच्या उद्घाटन प्रसंगी अध्यक्षस्थानावरून ते बोलत होते.

कार्यक्रमाचे उद्घाटन प्रभू श्रीराम, शिक्षणमहर्षी डॉ. पंजाबराव देशमुख, दानदाते स्व. चंद्रभानजी मानकर व विद्यालयाचे संस्थापक स्व. रावसाहेब इंगोले यांच्या प्रतिमा पूजनाने झाले. मंचावर प्रमुख पाहुणे म्हणून श्रीराम मंदिर ट्रस्टचे सदस्य प्राचार्य गजाननराव इंगोले, रमेशपंत बहाळे, वसंतराव मानकर, सुधीरराव कुकडे, संजयराव मानकर, चंद्रशेखरराव मानकर, अशोकराव मानकर उपस्थित होते. तसेच सत्कारमूर्ती अक्षय इंगोले, माजी मुख्याध्यापक आर. एस. गावंडे, रमेशपंत किटूकले व मुख्याध्यापक एन. टी. चव्हाण यांची प्रमुख उपस्थिती होती.

या सोहळ्यात डॉ. पंजाबराव देशमुख बँकेच्या संचालकपदी निवड झाल्याबद्दल अक्षय दिलीप इंगोले आणि महाराष्ट्र शासनाचा ‘क्रांतीज्योती सावित्रीमाई फुले आदर्श शिक्षक पुरस्कार’ प्राप्त झाल्याबद्दल क्रीडा शिक्षक शरद वसंतराव गढीकर यांचा शाल, श्रीफळ व स्मृतीचिन्ह देऊन विशेष सत्कार करण्यात आला.

दोन दिवसीय स्नेहसंमेलनात क्रीडा स्पर्धा, रांगोळी, हस्तकला, चित्रकला, गणित मॉडेल आणि प्रश्नमंजुषा अशा विविध स्पर्धांचे आयोजन करण्यात आले होते. सांस्कृतिक कार्यक्रमात सन २०२५-२६ मधील राष्ट्रीय स्तरावरील ३ आणि राज्यस्तरावरील ६४ खेळाडूंचा गौरव करण्यात आला. यावेळी प्रमुख पाहुणे म्हणून महिला महाविद्यालयाच्या प्राचार्य डॉ. अरुणा वाडेकर उपस्थित होत्या.

मुख्याध्यापक एन. टी. चव्हाण यांच्या मार्गदर्शनात स्नेहसंमेलन प्रभारी एस. पी. लाजूरकर, व्ही. के. राठोड, के. एस. लाजूकर, ए. पी. मांगे, आर. एस. मानकर, ए. व्ही. राजगुरे, सी. ए. शेंडे, आर. आर. मडावी व विद्यार्थी प्रतिनिधींनी कार्यक्रमाच्या यशस्वितेसाठी परिश्रम घेतले. कार्यक्रमाचे संचालन आर. एस. मानकर यांनी केले तर आभार एस. पी. लाजूरकर यांनी मानले.

या सोहळ्याला कुंड सर्जापूरचे सरपंच निलेश मानकर, वनारसीच्या सरपंच ज्योत्स्ना मोहोड, हातुर्णाचे सरपंच भरतरीनाथ गौरकर आणि भूषण वाणे यांच्यासह ग्रामस्थ व पालक मोठ्या संख्येने उपस्थित होते.

© २०२६ मॅक्स मंथन डेली न्यूज. सर्व हक्क राखीव.

‘राजीव गांधी प्रशासकीय गतिमानता अभियाना’साठी ऑनलाईन प्रस्ताव सादर करण्यास १२ जानेवारीपर्यंत मुदतवाढ

निवडणुका आणि अधिवेशनामुळे मुदत वाढवली; ऑनलाईन पोर्टलवर अर्ज करण्याचे प्रशासनाचे आवाहन

अमरावती, दि. १ जानेवारी २०२६, मॅक्स मंथन डेली न्यूज:

अमरावती (दि. १ जानेवारी २०२६): महाराष्ट्र शासनाच्या महत्त्वाकांक्षी ‘राजीव गांधी प्रशासकीय गतिमानता (प्रगती) अभियान व स्पर्धा’ सन २०२५-२६ या उपक्रमात सहभागी होण्यासाठी प्रशासकीय विभागांना आता अधिक वेळ मिळणार आहे. या स्पर्धेसाठी ऑनलाईन पद्धतीने प्रस्ताव स्वीकारण्याच्या मुदतीत १२ जानेवारी २०२६ पर्यंत मुदतवाढ देण्यात आली असल्याची माहिती अपर आयुक्त संजय जाधव यांनी दिली आहे.

३ फेब्रुवारी २०२१ च्या शासन निर्णयानुसार, या स्पर्धेसाठी प्रस्ताव सादर करण्याची मूळ मुदत ३१ ऑक्टोबर २०२५ रोजी संपली होती. मात्र, राज्याचे विधिमंडळ अधिवेशन आणि राज्यातील विविध स्थानिक स्वराज्य संस्थांच्या निवडणुकांच्या कामात प्रशासकीय यंत्रणा व्यस्त असल्याने ही मुदत वाढवण्याचा निर्णय घेण्यात आला आहे. विभागीय आयुक्तालयाने आपल्या अधिनस्त असलेल्या सर्व कार्यालयांना या संदर्भात आवश्यक त्या सूचना दिल्या आहेत.

‘राजीव गांधी प्रशासकीय गतिमानता अभियाना’शी संबंधित सर्व प्रक्रिया सुलभ करण्यासाठी शासनाने विशेष ऑनलाईन पोर्टल विकसित केले आहे.

• अधिकृत संकेतस्थळ: pragatiabhiyan.maharashtra.gov.in

• प्रक्रिया: सर्व स्तरावरील शासकीय कार्यालयांना त्यांचे कल्पक उपक्रम आणि प्रशासकीय सुधारणांचे प्रस्ताव याच पोर्टलवर १२ जानेवारीपर्यंत अपलोड करावे लागणार आहेत.

प्रशासकीय कामात गती आणणे, नाविन्यपूर्ण संकल्पना राबवणे आणि शासकीय सेवा अधिक लोकाभिमुख करणे हे या अभियानाचे मुख्य उद्दिष्ट आहे. उत्कृष्ट कामगिरी करणाऱ्या कार्यालयांना आणि विभागांना शासन स्तरावर गौरवण्यात येते.

विभागीय आयुक्तालयाने स्पष्ट केले आहे की, मुदतवाढीचा लाभ घेऊन सर्व पात्र विभागांनी आपले प्रस्ताव विहित मुदतीत ऑनलाईन सादर करावेत.

© २०२५ मॅक्स मंथन डेली न्यूज. सर्व हक्क राखीव.

शाळांना व्यसनमुक्त करण्यासाठी अमरावती जिल्हा प्रशासनाचा पुढाकार; ‘तंबाखूमुक्त शैक्षणिक संस्था’ कार्यशाळा संपन्न

शाळेच्या १०० मीटर परिसरात तंबाखू विक्रीवर बंदी; नियमांचे उल्लंघन केल्यास कठोर शिक्षेचा इशारा

अमरावती, दि. ३१ डिसेंबर २०२५, मॅक्स मंथन डेली न्यूज:

अमरावती (दि. ३१ डिसेंबर २०२५): भावी पिढीला व्यसनाधीनतेच्या विळख्यातून वाचवण्यासाठी आणि संपूर्ण जिल्हा तंबाखूमुक्त करण्यासाठी अमरावती शिक्षण विभागाने कंबर कसली आहे. या मोहिमेचा एक भाग म्हणून जिल्ह्यातील शिक्षण विभागाच्या तालुकास्तरीय पर्यवेक्षीय अधिकाऱ्यांसाठी ‘तंबाखूमुक्त शैक्षणिक संस्था’ या विषयावर विशेष कार्यशाळा नुकतीच पार पडली.

भारत सरकारच्या शिक्षण मंत्रालयांतर्गत ‘राष्ट्रीय शैक्षणिक संशोधन व प्रशिक्षण परिषदेने’ (NCERT) या कार्यशाळेचे आयोजन केले होते. यामध्ये महानगरपालिका शिक्षणाधिकारी, गट शिक्षणाधिकारी, विस्तार अधिकारी आणि केंद्र प्रमुख मोठ्या संख्येने उपस्थित होते.

• शालेय उपक्रम: शाळांमध्ये रॅली, पोस्टर्स, घोषवाक्ये आणि पथनाट्यांच्या माध्यमातून मुलांमध्ये तंबाखूच्या दुष्परिणामांबाबत जागरूकता निर्माण केली जाणार आहे.

• साहित्य वाटप: ‘राष्ट्रीय तंबाखू नियंत्रण कार्यक्रमांतर्गत’ प्रत्येक तालुक्यातील शाळांना विशेष पोस्टर्स, बॅनर्स आणि माहिती फलकांचे वाटप करण्यात येत आहे.

कार्यशाळेत ‘तंबाखू नियंत्रण कायदा २००३’ (COTPA) बाबत सविस्तर मार्गदर्शन करण्यात आले. प्रशासनाने खालील नियम कडकपणे लागू करण्याचे आदेश दिले आहेत:

१. विक्रीवर बंदी: शाळेच्या १०० मीटर परिसरात तंबाखू किंवा तंबाखूजन्य पदार्थांची विक्री करणे हा दंडात्मक गुन्हा आहे.

२. अल्पवयीन मुलांसाठी कडक नियम: १८ वर्षांखालील मुलांना तंबाखू विकणे किंवा त्यांना तसे करण्यास भाग पाडणे हा कठोर शिक्षेस पात्र गुन्हा मानला जाईल.

ही कार्यशाळा जिल्हा शिक्षण व प्रशिक्षण संस्थेचे प्राचार्य मिलिंद कुबडे यांच्या मार्गदर्शनाखाली पार पडली. प्रशिक्षक डॉ. मंगेश गुजर यांनी केंद्र शासनाच्या निकषांची माहिती दिली, तर मंगेश गायकवाड यांनी कायद्याच्या तांत्रिक बाजू समजावून सांगितल्या. या मोहिमेत शिक्षण विभाग, जिल्हा सामान्य रुग्णालय आणि मराठवाडा ग्रामीण विकास संस्था यांनी संयुक्त सहभाग नोंदवला आहे.

आता हे प्रशिक्षित अधिकारी आपापल्या तालुक्यातील मुख्याध्यापक आणि शिक्षकांना मार्गदर्शन करून जिल्ह्यातील प्रत्येक शाळा तंबाखूमुक्त करण्यासाठी प्रयत्न करणार आहेत.

© २०२५ मॅक्स मंथन डेली न्यूज. सर्व हक्क राखीव.

महानगरपालिका निवडणुकीच्या पार्श्वभूमीवर अमरावतीत पोलीस अधिनियम कलम ३६ लागू

उमेदवारी अर्ज भरण्याच्या शेवटच्या दिवशी खबरदारी; १० जानेवारीपर्यंत पोलीस आयुक्तांचे कडक आदेश

अमरावती, दि. ३० डिसेंबर २०२५, मॅक्स मंथन डेली न्यूज:

अमरावती (दि. ३० डिसेंबर २०२५): महानगरपालिका निवडणुकीच्या धामधुमीत कायदा व सुव्यवस्था अबाधित राखण्यासाठी अमरावती पोलीस आयुक्तालयाने कडक पावले उचलली आहेत. ३० डिसेंबर हा उमेदवारी अर्ज (नामांकन पत्र) दाखल करण्याचा शेवटचा दिवस असल्याने होणारी संभाव्य गर्दी आणि मिरवणुका लक्षात घेता, पोलीस आयुक्त राकेश ओला यांनी संपूर्ण आयुक्तालय परिसरात महाराष्ट्र पोलीस अधिनियम कलम ३६ अन्वये प्रतिबंधात्मक आदेश जारी केले आहेत.

निवडणुकीच्या पार्श्वभूमीवर आचारसंहिता लागू असून, या कालावधीत कोणताही अनुचित प्रकार घडू नये यासाठी हे आदेश १० जानेवारी २०२६ च्या मध्यरात्रीपर्यंत लागू राहतील. या आदेशाद्वारे पोलीस आयुक्तालयातील सर्व पोलीस ठाणेदार, अंमलदार आणि वरिष्ठ अधिकाऱ्यांना प्रतिबंधात्मक कारवाई करण्याचे विशेष अधिकार प्रदान करण्यात आले आहेत.

पोलीस आयुक्तांनी निर्गमित केलेल्या आदेशानुसार खालील बाबींवर नियंत्रण ठेवले जाणार आहे:

१. मिरवणुकांचे नियंत्रण: रस्त्यावरून जाणाऱ्या राजकीय मिरवणुका सुरळीत ठेवणे आणि वाहतुकीला अडथळा होणार नाही याची दक्षता घेणे.

२. गर्दीचे व्यवस्थापन: प्रार्थनास्थळे, सार्वजनिक ठिकाणे किंवा अडथळा संभवणाऱ्या ठिकाणी गर्दी होऊ न देणे.

३. ध्वनिक्षेपक व वाद्ये: सार्वजनिक ठिकाणी वाद्ये वाजवणे आणि ध्वनिक्षेपकाचा (Loudspeakers) वापर यावर कडक नियम व नियंत्रण असेल.

४. सार्वजनिक शिस्त: सर्व रस्ते, धाबे आणि सार्वजनिक ठिकाणी शांतता राखण्यासाठी पोलीस बंदोबस्त तैनात असेल.

पोलीस आयुक्तांनी स्पष्ट केले आहे की, सक्षम अधिकाऱ्यांनी या अधिनियमाच्या कलम ३३, ३५, ३७ ते ४०, ४४ आणि ४५ अन्वये आवश्यक ती कायदेशीर कार्यवाही करावी. उमेदवारी अर्ज भरताना होणारे शक्तीप्रदर्शन आचारसंहितेच्या चौकटीतच असावे, यासाठी पोलिसांची करडी नजर राहणार आहे.

उमेदवारांनी आणि राजकीय पक्षांनी मिरवणुका किंवा सभांचे आयोजन करताना स्थानिक पोलीस स्टेशनची रीतसर परवानगी घेणे आवश्यक असून, नियमांचे उल्लंघन करणाऱ्यांवर कडक कारवाईचा इशारा प्रशासनाने दिला आहे.

© २०२५ मॅक्स मंथन डेली न्यूज. सर्व हक्क राखीव.

नायलॉन मांजा वापरल्यास पालकांना ५० हजार, तर विक्रेत्यांना अडीच लाखांचा दंड; हायकोर्टाचा कडक इशारा

मकर संक्रांतीपूर्वी नागपूर खंडपीठाचा मोठा निर्णय; नायलॉन मांजाच्या वापरावर आणि विक्रीवर बसणार आर्थिक चाप

अमरावती/नागपूर, दि. २८ डिसेंबर २०२५, मॅक्स मंथन डेली न्यूज:

अमरावती/नागपूर (दि. २८ डिसेंबर २०२५): मकर संक्रांतीच्या तोंडावर पतंग उडवण्यासाठी नायलॉन मांजा वापरणाऱ्यांची आता खैर नाही. मुंबई उच्च न्यायालयाच्या नागपूर खंडपीठाने या घातक मांजा विरोधात अत्यंत कठोर पवित्रा घेतला असून, वापरकर्ते आणि विक्रेत्यांवर ५० हजार ते अडीच लाख रुपयांपर्यंतचा दंड प्रस्तावित केला आहे. या संदर्भात जिल्हा प्रशासनाने जाहीर सूचना प्रसिद्ध केली असून नियमांचे उल्लंघन करणाऱ्यांना आता मोठा खिसा रिकामा करावा लागणार आहे.

न्यायालयाने दिलेल्या निर्देशांनुसार, नायलॉन मांजाचा वापर रोखण्यासाठी केवळ गुन्हे दाखल न करता आता आर्थिक दंडही ठोठावण्यात येणार आहे:

• अल्पवयीन मुलांसाठी पालकांना दंड: जर एखादा लहान मुलगा नायलॉन मांजाने पतंग उडवताना आढळला, तर त्याच्या पालकांना ५० हजार रुपये दंड का ठोठावू नये, अशी विचारणा न्यायालयाने केली आहे.

• प्रौढ वापरकर्ते: प्रौढ व्यक्ती नायलॉन मांजा वापरताना सापडल्यास त्यांनाही ५० हजार रुपये दंड भरावा लागेल.

• विक्रेत्यांना मोठा फटका: ज्या विक्रेत्यांकडे नायलॉन मांजाचा साठा सापडेल किंवा जे विक्री करताना आढळतील, त्यांना प्रत्येक उल्लंघनासाठी २ लाख ५० हजार रुपये दंड आकारण्याची सूचना न्यायालयाने दिली आहे.

जिल्हाधिकारी आशिष येरेकर यांनी दिलेल्या माहितीनुसार, ज्यांना या प्रस्तावित दंडात्मक कारवाईविरुद्ध आपले म्हणणे मांडायचे आहे, त्यांना ५ जानेवारी २०२६ रोजी नागपूर खंडपीठासमोर हजर राहून आपले निवेदन सादर करता येईल. जर कोणीही हजर राहिले नाही, तर जनतेचा या दंडाच्या रकमेला आक्षेप नाही असे गृहीत धरून ही कठोर कारवाई अधिकृतपणे अंमलात आणली जाणार आहे.

सन २०२१ पासून नायलॉन मांजावर बंदी असूनही त्याचा छुप्या पद्धतीने वापर सुरू आहे. या मांजामुळे:

१. दुचाकीस्वारांचे गळे कापले जाऊन निष्पाप नागरिकांचे प्राण जातात.

२. हजारो पक्षी जखमी होतात किंवा त्यांचा मृत्यू होतो.

३. हा मांजा अविघटनशील असल्याने पर्यावरणाचेही नुकसान होते.

या गंभीर समस्येवर नियंत्रण मिळवण्यासाठी न्यायालयाने आता ‘जेल’सोबतच ‘मोठ्या आर्थिक दंडाचा’ बडगा उगारण्याचे ठरवले आहे. प्रशासनाने नागरिकांना केवळ सुती मांजा वापरण्याचे आवाहन केले आहे.

© २०२५ मॅक्स मंथन डेली न्यूज. सर्व हक्क राखीव.