पिंपरी: कारमधून ५० लाख रुपयांची रोकड लंपास करणाऱ्या दोन आरोपींना पिंपरी-चिंचवड गुन्हे शाखा (युनिट-२), मालमत्ता विरोधी पथक आणि रावेत पोलीस ठाण्याच्या संयुक्त पथकाने अवघ्या ८ तासांच्या आत शिताफीने अटक केली आहे. चोरीस गेलेली ५० लाख रुपयांची संपूर्ण रोकड हस्तगत करण्यात पोलिसांना यश आले आहे.अटक करण्यात आलेले आरोपी चारुदत्त शिवाजी बेंडाले (वय ३०, रा. निघोजे, बेंडाले वस्ती, ता. खेड, जि. पुणे – व्यवसाय: बांधकाम), प्रसाद शिवाजी बनकर (वय २९, रा. चिंबळी, ता. खेड, जि. पुणे – व्यवसाय: सुपरवायझर).

गुरुवारी (०९ ऑक्टोबर २०२६) रात्री १०:५० ते १२:१५ वाजेदरम्यान पुनावळे येथील ‘संदीप हॉटेल’समोरील सिमेंटच्या सर्व्हिस रोडवर पार्क केलेल्या एका कारचे लॉक बनावट चावीने उघडून कारमधील ५० लाख रुपयांची रोकड असलेली बॅग चोरट्यांनी लंपास केली होती. या प्रकरणी रावेत पोलीस ठाण्यात भारतीय न्याय संहिता (BNS) २०२३ चे कलम ३०५(क) अन्वये गुन्हा नोंदवण्यात आला होता (गु.र.नं. ४७६/२०२६). घटनेचे गांभीर्य लक्षात घेऊन पोलीस आयुक्त विनय कुमार चौबे यांनी तात्काळ तपासाचे आदेश दिले.

अप्पर पोलीस आयुक्त सारंग आव्हाड, पोलीस उपायुक्त (परिमंडळ-२) प्रदीप जाधव, आणि सहायक पोलीस आयुक्त (गुन्हे-१) सुदर्शन राठोड यांच्या मार्गदर्शनाखाली पथकांनी घटनास्थळाची पाहणी करून सीसीटीव्ही फुटेजची बारीक तपासणी केली. फुटेजमध्ये एक इसम बनावट चावीने कार उघडून बॅग घेऊन जाताना स्पष्ट दिसला.

पोलीस पथकाने अधिक कौशल्याने तपास केला असता, फिर्यादीसोबत मुंबई येथून पैसे आणण्यासाठी गेलेला त्याचा साथीदार चारुदत्त बेंडाले याच्यावर पोलिसांचा संशय बळावला. त्याला ताब्यात घेऊन विचारपूस केली असता, त्यानेच आपल्या कारची बनावट चावी त्याचा मित्र प्रसाद बनकर याला देऊन कारमध्ये ५० लाख रुपये असल्याचे सांगत चोरी करायला लावल्याचे उघड झाले.

पोलिसांनी तत्काळ चिंबळी येथून प्रसाद बनकर याला ताब्यात घेतले. दोन्ही आरोपींकडून चोरीला गेलेली ५० लाख रुपयांची सर्व रक्कम हस्तगत करण्यात आली असून दोघांनाही अटक करण्यात आली आहे.

सदरची कारवाई पिंपरी चिंचवडचे पोलीस आयुक्त मा. श्री. विनय कुमार चौबे साो, सह पोलीस आयुक्त मा. श्री. डॉ. शशिकांत महावरकर अपर पोलीस आयुक्त मा. श्री. सारंग आवाड सो, अपर पोलीस आयुक्त मा. श्री. बसवराज तेली, पोलीस उप-आयुक्त, गुन्हे, मा. श्री. रोहिदास पवार, पोउपआ परिमंडळ-०२, श्री प्रदिप जाधय, सपोआ, गुन्हे-१ मा. श्री. सुदर्शन राठोड, सपोआ, वाकड विभाग, सुनिल कुन्हाडे यांचे मार्गदर्शनाखालील गुन्हे शाखा, युनिट-२ चे वपोनि संदिप सावंत, मालमत्ता विरोधी पथकाचे वपोनि संजय चव्हाण, रावेत पोलीस ठाण्याचे वपोनि रुषिकेश घाडगे, पोउपनि मयुरेश साळुंखे, पोउपनि राहुल खिळे, पोहया/विक्रम कुदळ, कृष्णा शितोळे, गोविंद चव्हाण, आशिष बोटके, पोशि/गणेश सावंत, विनोद विर, शामसुंदर गुट्टे आणि तांत्रिक विश्लेषण विभागाचे पोशि/रमेश कारके यांनी केली आहे

पिंपरी: ‘जागतिक बेघर दिना’चे औचित्य साधून पिंपरी विधानसभा कार्यालयाने (२०६ अ.जा.) लोकशाहीच्या सक्षमीकरणासाठी एक अत्यंत कौतुकास्पद आणि अनोखा उपक्रम राबवला आहे. पिंपरी येथील ‘सावली बेघर निवारा केंद्रात’ राहणाऱ्या सुमारे ७५ बेघर व्यक्तींमध्ये व्यापक मतदार जनजागृती करण्यात आली. या वेळी आधार कार्ड असलेल्या अनेक बेघर बांधवांची जागेवरच मतदार म्हणून नोंदणी करून घेण्यात आली असून, आगामी निवडणुकीत हे बांधव आयुष्यात पहिल्यांदाच आपला मतदानाचा हक्क बजावणार आहेत.

भारत निवडणूक आयोग आणि राज्य निवडणूक अधिकाऱ्यांच्या निर्देशानुसार सध्या विशेष सखोल पुनरीक्षण मोहीम (SIR 2026) सुरू आहे. पिंपरी विधानसभा कार्यालयाचे नोडल अधिकारी प्रफुल्ल पुराणिक यांनी सावली निवारा केंद्रात उपस्थित बेघर बांधवांना मतदार नोंदणीचे महत्त्व समजावून सांगितले.

“समाजातील अनाथ, निराधार आणि बेघर व्यक्तींना मुख्य प्रवाहात आणण्यासाठी त्यांचा मतदानाचा घटनात्मक अधिकार अबाधित राहणे गरजेचे आहे,” असे प्रतिपादन त्यांनी केले. या प्रसंगी रियल लाईफ रियल पीपल संचालित सावली निवारा केंद्राचे अध्यक्ष एम. ए. हुसेन, पिंपरी विधानसभा कार्यालयाचे पर्यवेक्षक दिनेश जगताप, आणि महालिंग मुळे उपस्थित होते.

पिंपरी (अ.जा.) विधानसभा मतदारसंघाच्या मतदार नोंदणी अधिकारी अर्चना यादव यांनी पिंपरी-चिंचवड शहरातील सर्व नागरिकांना मतदार यादीत आपले नाव तपासण्याचे आवाहन केले आहे. निवडणूक आयोगाने नवीन मतदार नोंदणी, दुरुस्ती व हरकती दाखल करण्यासाठी १२ ऑक्टोबर २०२६ पर्यंत मुदतवाढ दिली आहे.

 १८ वर्षे पूर्ण झालेल्या नवयुवकांनी आणि ज्यांचे नाव मतदार यादीत नाही अशा पात्र नागरिकांनी फॉर्म ६ (Form 6) भरून ऑनलाईन किंवा प्रत्यक्ष अर्ज सादर करावा. नाव, पत्ता किंवा अन्य तपशीलात त्रुटी असल्यास १२ ऑक्टोबरपूर्वी आवश्यक दुरुस्ती करून घ्यावी.

पिंपरी चिंचवड महानगरपालिकेच्या अंतर्गत ‘रियल लाईफ रियल पीपल’ संस्थेमार्फत संचलित सावली बेघर निवारा केंद्र गेल्या ६ वर्षांपासून अनाथ, बेघर आणि असाह्य लोकांसाठी कार्यरत आहे.

अध्यक्ष एम. ए. हुसेन, गौतम थोरात, अग्नेस फ्रान्सिस, शाहनवाज हुसैन, आणि सचिन बोधनकर यांच्या नेतृत्वाखाली आतापर्यंत ९०० हून अधिक निराधार व्यक्तींची सेवा करण्यात आली आहे. सध्या केंद्रात ७५ लाभार्थी राहत असून त्यांना मोफत अन्न, निवारा, कपडे आणि वैद्यकीय उपचार दिले जातात. उत्कृष्ट कामगिरीबद्दल सावली निवारा केंद्राला महाराष्ट्र शासनाचा ‘डॉ. बाबासाहेब आंबेडकर समाजभूषण पुरस्कार’ मिळाला असून, निवारा केंद्र व्यवस्थापनात या केंद्राने राज्यात प्रथम क्रमांक पटकावला आहे.

पिंपरी: रहाटणी येथील स्पा सेंटर चालवण्यास परवानगी देण्यासाठी आणि वृत्तपत्रात बातम्या न छापण्यासाठी ५० हजार रुपयांची खंडणी मागून जीवे मारण्याची धमकी देणाऱ्या एका पत्रकाराला पिंपरी-चिंचवड गुन्हे शाखेच्या खंडणी विरोधी पथकाने रंगेहात पकडले. १० हजार रुपयांचा पहिला हप्ता स्वीकारताना आरोपीला जगताप डेअरी चौकात सापळा रचून ताब्यात घेण्यात आले. अक्षय अरुण वाघमारे (वय ३५, रा. ३८ औंध रोड, भाऊ पाटील, पाडळेवस्ती, खडकी, पुणे) असे अटक करण्यात आलेल्या पत्रकाराचे नाव असून, तो ‘साप्ताहिक वंचित सामना’चा पत्रकार आहे.

पोलीस सूत्रांनी दिलेल्या माहितीनुसार, साजिद मन्सुर पेंढारी (वय २७, सध्या रा. साखरेवस्ती, हिंजवडी) यांचे रहाटणी येथे ‘अर्थ स्पा सेंटर’ आहे. आरोपी पत्रकार अक्षय वाघमारे याने या स्पा सेंटरबद्दल पोलिसांच्या डायल ११२ क्रमांकावर खोटी माहिती देऊन पोलिसांना बोलावून स्पा चालकाला मानसिक त्रास दिला.

त्यानंतर, स्पा सेंटर सुरळीत चालवायचे असल्यास ५० हजार रुपयांची खंडणी द्यावी लागेल; अन्यथा वृत्तपत्रात खोट्या बातम्या छापून व्यवसाय बंद पाडण्याची आणि जास्त नाटक केल्यास “खल्लास करून टाकीन” अशी थेट धमकी दिली होती.

स्पा चालक साजिद पेंढारी यांनी खंडणी विरोधी पथकाकडे तक्रार दिल्यानंतर पोलिसांनी प्रकरणाची पडताळणी केली. खंडणीची मागणी सिद्ध झाल्यानंतर शुक्रवारी (९ ऑक्टोबर २०२६) रहाटणी येथील साई कॉर्नर, जगताप डेअरी चौक येथे दोन पंचांसमक्ष सापळा रचण्यात आला. तक्रारदाराकडून १० हजार रुपयांची रोख रक्कम स्वीकारताना आरोपी अक्षय वाघमारे याला शिताफीने ताब्यात घेण्यात आले.

जप्त केलेला मुद्देमाल रोख रक्कम १०,००० रुपये, एक आयफोन/मोबाईल, ‘वंचित सामना’चे पत्रकार ओळखपत्र (ID Card), गुन्ह्यात वापरलेली होंडा कंपनीची कार (एकूण किंमत: ₹२,७७,५००)

आरोपीविरुद्ध काळेवाडी पोलीस ठाण्यात गुन्हा रजि. नं. ६२२/२०२६ नुसार भारतीय न्याय संहिता (BNS) २०२३ चे कलम ३०८(२) आणि ३०८(५) अन्वये गुन्हा दाखल करून आरोपी व जप्त मुद्देमाल पुढील कारवाईसाठी पोलिसांच्या स्वाधीन करण्यात आला आहे.

ही कारवाई पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अप्पर पोलीस आयुक्त सारंग आव्हाड, पोलीस उपायुक्त (गुन्हे) रोहिदास पवार, आणि सहायक पोलीस आयुक्त सचिन कदम यांच्या मार्गदर्शनाखाली वरिष्ठ पोलीस निरीक्षक राजेंद्र पाटील, श्रेणी पो.उ.नि. रमेश गायकवाड, पोलीस अमलबार अभिमन्यू बनसोडे, सुनील कानगुडे, प्रदीप पोटे, किरण जाधव, प्रदीप गोडाबे, रमेश मावसकर, किशोर कांबळे व दादाभाऊ साबळे यांच्या पथकाने केली.

पुणे: इलेक्ट्रिक हॉट वॉटर बॅग माने खाली ठेवून झोपल्यामुळे विजेचा तीव्र झटका (Electric Shock) बसून ३० वर्षीय तरुण आयटी अभियंत्यांचा जागीच दुर्दैवी मृत्यू झाल्याची धक्कादायक घटना पुण्यात घडली आहे. वडगाव शेरी परिसरातील सोमनाथ नगर भागात ही घटना घडली.

रोहन कुबाडी (वय ३०) असे मृत पावलेल्या तरुणाचे नाव आहे. रोहन हा अविवाहित असून पेशाने सॉफ्टवेअर इंजिनिअर होता. तो गेल्या तीन महिन्यांपासून सोमनाथ नगर येथील एका भाड्याच्या खोलीत एकटाच राहत होता.

चंदननगर पोलिसांनी दिलेल्या माहितीनुसार, ही घटना मंगळवारी रात्री घडल्याचा संशय आहे. रोहन याच्या मोबाईलवर नातेवाईक व मित्रांकडून वारंवार फोन करूनही तो प्रतिसाद देत नव्हता. गुरुवारी (८ ऑक्टोबर) त्याच्या बंद खोलीतून अचानक तीव्र दुर्गंधी येऊ लागल्याने घरमालकाने संशय व्यक्त केला.

घरमालकाने तातडीने दुसऱ्या चावीने दरवाजा उघडला असता, रोहनचा मृतदेह खाटेवर फुगलेल्या व कुजलेल्या अवस्थेत आढळला. तसेच मृतदेहाजवळ रक्ताचे थारोळे पसरले होते.

घटनेची माहिती मिळताच चंदननगर पोलीस ठाण्याचे पथक घटनास्थळी दाखल झाले. पोलिसांनी केलेल्या प्राथमिक तपासानुसार, रोहन हा मान दुखापतीवर उपचारासाठी किंवा शेकण्यासाठी ‘इलेक्ट्रिक हॉट वॉटर बॅग’चा वापर करत होता. झोपेत असताना ही बॅग चालूच राहिली असावी किंवा त्यात शॉटसर्किट होऊन अचानक शॉक लागल्याने त्याचा मृत्यू झाला असावा, असा प्राथमिक निष्कर्ष पोलिसांनी काढला आहे.

या प्रकरणी चंदननगर पोलिसांनी अकस्मात मृत्यूची नोंद केली असून, मृतदेह उत्तरीय तपासणीसाठी (Post-Mortem) ससून रुग्णालयात पाठवण्यात आला आहे. पुढील तपास पोलीस करत आहेत. इलेक्ट्रिक उपकरणांचा वापर करताना नागरिकांनी खबरदारी बाळगावी, असे आवाहन प्रशासनाने केले आहे.

पिंपरी: कौटुंबिक आणि व्यावसायिक जबाबदाऱ्या पार पाडत असताना वैयक्तिक आयुष्यात योग्य समतोल राखण्यासाठी महिलांना अनेक आव्हानांचा सामना करावा लागतो. या सर्व प्रवासावर आणि विविध क्षेत्रांत कार्यरत असणाऱ्या महिलांच्या अनुभवांवर प्रकाश टाकण्यासाठी पिंपरी चिंचवड एज्युकेशन ट्रस्टच्या (PCET) आकुर्डी येथील पिंपरी चिंचवड कॉलेज ऑफ इंजीनियरिंग (PCCOE) मधील अंतर्गत तक्रार समितीच्या वतीने ‘मी… माझा प्रवास, अनेक भूमिका आणि सुवर्णमध्य’ या विशेष चर्चासत्राचे आयोजन करण्यात आले आहे.

आगामी मंगळवारी (दि. १३ ऑक्टोबर २०२६) सकाळी १०:३० वाजता महाविद्यालयाच्या मेकॅनिकल सेमिनार हॉलमध्ये या चर्चासत्राचे उद्घाटन होणार आहे.

या चर्चासत्रात समाजातील विविध क्षेत्रांमधील कर्तबगार महिला आपले अनुभव व विचार मांडणार आहेत. यामध्ये प्रामुख्याने डॉ. कांचन देशपांडे (प्राचार्य, सिटी प्राईड स्कूल), ॲड. परिक्रमा खोत (कायद्या सल्लागार), डॉ. क्षमा उपलेंचवार (स्त्रीरोग तज्ज्ञ), सुजल शाह (संचालक, न्यू एज फायर फायटिंग कंपनी) हे सर्व तज्ज्ञ व व्यावसायिक महिला विविध क्षेत्रातील त्यांचे अनुभव, येणारी आव्हाने आणि दैनंदिन जबाबदाऱ्या प्रभावीपणे सांभाळण्याचे व्यावहारिक उपाय यावर संवाद साधणार आहेत.

या कार्यक्रमाबाबत माहिती देताना अंतर्गत तक्रार समितीच्या उपाध्यक्ष सहा. प्रा. वृषाली भालेराव यांनी सांगितले की, “विविध क्षेत्रांत कार्यरत असणाऱ्या महिलांना त्यांचा व्यावसायिक प्रवास, संघर्ष आणि यश यावर खुली चर्चा करण्यासाठी एक हक्काचे व्यासपीठ उपलब्ध करून देणे हा यामागचा मुख्य उद्देश आहे.”

या चर्चासत्राचे आयोजन पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई, पीसीसीओईचे संचालक डॉ. गोविंद कुलकर्णी, उपसंचालक निळकंठ चोपडे, आणि अधिष्ठाता डॉ. एस. यू. भंडारी यांच्या मार्गदर्शनाखाली केले जात आहे.

पिंपरी: कधी शब्दांतून फुलणारे प्रेम, कधी मिश्कील ओळींतून उमटणारा हास्याचा खळखळाट, तर कधी आईच्या आठवणीने मनाच्या कोपऱ्यात दाटून येणारी हुरहूर… कवितेच्या अशा विविध भावछटांनी सजलेली मैफल म्हणजे ‘द मनमौजी’. प्रसिद्ध कवी आणि गीतकार वैभव जोशी यांच्या शब्दांनी, सादरीकरणाने आणि मनमोकळ्या संवादाने चिंचवड येथील प्रा. रामकृष्ण मोरे प्रेक्षागृहात रंगलेल्या या कार्यक्रमाने रसिकांना कधी हसवले, कधी प्रेमाच्या तरल भावविश्वात रमवले, तर कधी भावुक केले. पिंपरी-चिंचवड महानगरपालिकेच्या वतीने आयोजित ‘अभिजात मराठी भाषा सप्ताहा’च्या सहाव्या दिवशी या बहारदार कार्यक्रमाचे आयोजन करण्यात आले होते.

वैभव जोशी यांनी आपल्या विविध रचनांमधून प्रेम, सौंदर्य, निसर्ग, मानवी स्वभाव, आयुष्यातील गमतीजमती आणि आईविषयीचे प्रेम अशा विविध विषयांना स्पर्श केला. त्यांच्या सादरीकरणातील सहजता, शब्दांमधील लय आणि आशयातील विविधता यामुळे संपूर्ण मैफल उत्तरोत्तर रंगत गेली.

कार्यक्रमात काही रचनांनी आपल्या मिश्कील शैलीतून रसिकांना खळखळून हसवले. “एक पेग म्हणता म्हणता दोन-चार झाले, सशासारखे जिने एकदम पाणीदार झाले” अशा ओळींमधून त्यांनी मानवी स्वभावातील गमतीशीर पैलू प्रभावीपणे उलगडले.

त्याचप्रमाणे, “तिला पाहून सळसळत्या वनाची आठवण येते…” आणि “तिच्या गंधाळण्याने चंदनाची आठवण येते…” अशा निसर्गप्रतिमांनी नटलेल्या ओळींमधून प्रिय व्यक्तीच्या सौंदर्याचे सुरेख चित्र उभे राहिले. वैभव जोशी यांची अत्यंत लोकप्रिय रचना ‘मन तुझे जलतरंग, लहरी तुझा साज’ या कवितेला प्रेक्षकांनी टाळ्यांच्या गजर करत उत्स्फूर्त दाद दिली.

मैफलीतील सर्वाधिक भावस्पर्शी क्षण ठरला तो म्हणजे आईविषयीच्या कवितेचा. “आयुष्याला घाबरण्याचा स्वभाव नाही आई, तुझ्याविना जगण्याचा सराव नाही आई…” या ओळींमधून आईचे आयुष्यातील महत्त्व आणि तिच्या सहवासातून मिळणारे बळ अत्यंत हळव्या शब्दांत व्यक्त झाले. या कवितेने उपस्थित रसिकांच्या डोळ्यांच्या कडा अतिशय भावुकतेने विनाविलंब ओलावल्या.

‘चांगभलं’ या सांगीतिक कार्यक्रमातून मराठी संगीत, लोकसंस्कृती आणि परंपरेचे विविध रंग उलगडले. महाराष्ट्राच्या सांस्कृतिक जीवनाशी नाते सांगणाऱ्या या कार्यक्रमाने रसिकांना मराठीपणाचा सुरेल आनंद दिला. गझलेचे साहित्यिक सौंदर्य आणि तिची रचनापद्धती समजून घेण्याची संधी या विशेष वर्गातून मिळाली. शब्दांच्या अर्थछटा आणि त्यातून व्यक्त होणाऱ्या भावनांचा आस्वाद गझलप्रेमींनी घेतला.  दिग्गज गायकांच्या सुरेल आवाजात मराठी संगीताचे विविध पैलू आणि लोकप्रिय गीतांचा ठेवा रसिकांसमोर सादर झाला.’सूर नवा ध्यास नवा’ फेम विनल देशमुख, वर्षा एखंडे आणि ‘इंडियन आयडल मराठी’ फेम अश्विनी मिटे यांच्या सुमधुर स्वरांनी तसेच महिला वाद्यवृंदाच्या दमदार सादरीकरणाने नवपिढीची ऊर्जा प्रेक्षकांपर्यंत पोहोचवली.

अभिजात मराठी भाषा सप्ताहाच्या निमित्ताने आयोजित या सर्व उपक्रमांमुळे पिंपरी-चिंचवडमधील रसिकांना मराठी भाषेच्या समृद्ध शब्दवैभवाची आणि संगीताची अप्रतिम पर्वणी अनुभवायला मिळाली.

पिंपरी: पिंपरी-चिंचवड शहरातील चिखली-कुदळवाडी परिसरातील मुस्लिम समाजासाठी मंजूर असलेली कब्रस्तानाची जागा महापालिकेच्या विकास आराखड्यात (D.P. Plan) पूर्णपणे समाविष्ट करण्यात यावी, या मागणीवरून आयोजित डी.पी. सुनावणीदरम्यान मोठा गदारोळ झाला. सुनावणीवेळी महापालिका अधिकाऱ्याने केलेल्या वादग्रस्त वक्तव्यावर उपस्थित नागरिकांनी तीव्र नाराजी व्यक्त केली. या प्रकरणी पिंपरी-चिंचवड शहर काँग्रेसचे अध्यक्ष नरेंद्र बनसोडे यांनी आक्रमक भूमिका घेत संबंधित अधिकाऱ्यांना जाब विचारला.

सुनावणीदरम्यान पिंपरी-चिंचवड महापालिकेचे अधिकारी उत्तरेश्वर नामदेव लोंढे यांनी “मुस्लिम समाजातील दानशूर व्यक्ती, जमीनमालक अथवा अन्य व्यक्तींची खासगी जागा कब्रस्तानासाठी वापरावी,” असा अजब सल्ला/पर्याय सुचवल्याचे समोर आले. या वक्तव्यामुळे उपस्थित मुस्लिम बांधवांच्या भावना दुखावल्या असून प्रशासनाच्या या बेजबाबदार भूमिकेचा तीव्र निषेध करण्यात आला.

कब्रस्तानावरासारख्या अत्यंत धार्मिक आणि सामाजिकदृष्ट्या संवेदनशील विषयावर प्रशासनातील अधिकाऱ्यांनी संयम आणि जबाबदारीने भूमिका मांडायला हवी होती, अशी संतप्त प्रतिक्रिया उपस्थितांनी व्यक्त केली.

नागरिकांनी स्पष्ट केले की, मुस्लिम समाजाकडून कोणत्याही व्यक्तीच्या खासगी मालमत्तेची मागणी करण्यात आलेली नाही. महापालिकेच्या मालकीची आणि नागरिकांच्या मूलभूत नागरी सुविधांशी संबंधित असलेल्या कब्रस्तानाच्या जागेचा विकास आराखड्यात (DP Plan) अधिकृतरीत्या समावेश करावा, हीच प्रमुख मागणी आहे.

चिखली-कुदळवाडी परिसरातील वाढत्या लोकसंख्येचा विचार करता दफनभूमीसारख्या अत्यावश्यक सुविधेचे योग्य नियोजन करणे महापालिकेचे कर्तव्य आहे. त्यामुळे या जागेचा विकास आराखड्यात कायमस्वरूपी समावेश करून प्रश्नावर मार्ग काढावा, अशी मागणी करण्यात आली.

या घटनेची माहिती मिळताच काँग्रेस शहराध्यक्ष नरेंद्र बनसोडे यांनी घटनास्थळी ठाम भूमिका घेत महापालिका अधिकाऱ्यांच्या वक्तव्यावर कडक शब्दांत आक्षेप नोंदवला. “नागरिकांच्या मूलभूत हक्कांवर आणि नागरी सुविधांच्या प्रश्नांवर प्रशासन अशी टोलवाटोलवी करू शकत नाही. संवेदनशील विषयांवर सन्मानपूर्वक संवाद साधणे ही प्रशासनाची जबाबदारी आहे,” असे सांगत त्यांनी प्रशासनाला जाब विचारला.

नरेंद्र बनसोडे यांनी दाखवलेल्या या तत्परतेचे नागरिक व समाजबांधवांकडून कौतुक करण्यात आले. चिखली-कुदळवाडी कब्रस्तानाचा प्रश्न तडीस जाईपर्यंत महापालिका प्रशासनाकडे सतत पाठपुरावा केला जाईल, असा निर्धार या वेळी व्यक्त करण्यात आला.

पिंपरी: “इंटेरियर डिझायनर म्हणून काम करताना पारंपरिक कल्पनांच्या पलीकडे जाऊन सर्जनशील दृष्टिकोन ठेवून स्वतःचे व्यावसायिक कौशल्य विकसित करण्यासाठी सातत्याने प्रयत्न करणे अत्यंत आवश्यक आहे. या क्षेत्रात नव्या पिढीतील होतकरू युवकांना आपल्या कल्पनाशक्ती सादर करण्यासाठी मुबलक संधी उपलब्ध आहेत. अनेक डिझायनर जेव्हा एकत्र येऊन महत्त्वपूर्ण योगदान देतात, तेव्हाच उत्कृष्ट कलाकृती निर्माण होते,” असे प्रतिपादन प्रख्यात आर्किटेक्ट वासवी मुळे यांनी केले.

पिंपरी चिंचवड एज्युकेशन ट्रस्टच्या (PCET) आकुर्डी येथील एस. बी. पाटील कॉलेज ऑफ आर्किटेक्चर अँड डिझाईन येथे प्रथम वर्ष ‘डिप्लोमा इन इंटिरिअर डिझाईन’च्या विद्यार्थ्यांसाठी आयोजित स्वागत समारंभात त्या मार्गदर्शक म्हणून बोलत होत्या. या प्रसंगी महाविद्यालयाच्या प्राचार्य डॉ. स्मिता सूर्यवंशी, लक्ष्मण तोरगले आदी मान्यवर उपस्थित होते.

कार्यक्रम प्रसंगी महाविद्यालयाच्या प्राचार्य डॉ. स्मिता सूर्यवंशी यांनी विद्यार्थ्यांना महाविद्यालयातील शैक्षणिक वातावरण, अभ्यासक्रमाची रचना, शैक्षणिक अपेक्षा, विविध अध्ययनाच्या संधी तसेच इंटिरिअर डिझाईनच्या व्यापक क्षेत्राची माहिती दिली. विद्यार्थ्यांनी कुतूहल, कल्पनाशक्ती आणि आत्मविश्वासाने डिझाईन क्षेत्रामध्ये आपले उज्ज्वल करिअर घडवावे, असे आवाहन त्यांनी केले.

या कार्यक्रमादरम्यान आर्किटेक्ट वासवी मुळे यांनी स्वतःचे व्यावसायिक अनुभव विद्यार्थ्यांशी शेअर करत त्यांना डिझायनिंग क्षेत्रातील बारकावे समजावून सांगितले.

या प्रसंगी पिंपरी चिंचवड एज्युकेशन ट्रस्टचे (PCET) अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर आणि कार्यकारी संचालक डॉ. गिरीश देसाई यांनी सर्व नवागत विद्यार्थ्यांचे स्वागत करत त्यांना पुढील शैक्षणिक प्रवासासाठी शुभेच्छा दिल्या.

पिंपरी: “तंत्रज्ञान बदलले, संवादाची साधने बदलली; पण टपाल कर्मचाऱ्यांची सेवाभावना आणि कर्तव्यनिष्ठा आजही कायम आहे. आजच्या डिजिटल युगात व्हॉट्सॲप, ई-मेलच्या माध्यमातून अवघ्या काही सेकंदांत निरोप पोहोचत असले, तरी टपाल खात्याची विश्वासार्हता आणि पोस्टमनचे नागरिकांशी असलेले जिव्हाळ्याचे नाते आजही अढळ आहे,” असे प्रतिपादन प्रसिद्ध कामगार नेते काशिनाथ नखाते यांनी केले.

‘जागतिक टपाल दिना’चे औचित्य साधून पिंपरी-चिंचवड परिसरातील प्रामाणिक आणि कष्टाळू टपाल कर्मचारी तसेच पोस्टमन बांधवांचा निगडी प्राधिकरणात महासंघाच्या वतीने शाल, श्रीफळ आणि मिठाई देऊन विशेष गौरव करण्यात आला. त्या वेळी नखाते बोलत होते.

कामगार नेते काशिनाथ नखाते पुढे म्हणाले की, “लाल रंगाची टपालपेटी आणि खाकी वर्दीतील पोस्टमन यांचे नाते भारतीय समाजजीवनात विसरणे अशक्य आहे. ऊन, वारा आणि पावसाची तमा न बाळगता प्रत्येक घरापर्यंत पत्रे, पार्सल आणि महत्त्वाच्या शासकीय सेवांशी संबंधित कागदपत्रे पोहोचविण्याचे काम पोस्टमन बांधव अत्यंत निष्ठेने करत आहेत. अगदी कोरोनाच्या अत्यंत कठीण काळातही स्वतःच्या आरोग्याची पर्वा न करता त्यांनी जनतेला अविरत सेवा दिली. या समर्पित कार्याचा सन्मान करणे ही समाजाची मोठी नैतिक जबाबदारी आहे.”

या सन्मान सोहळ्याबद्दल टपाल कर्मचाऱ्यांनी कष्टकरी कामगार महासंघाचे मनापासून आभार मानले. या प्रसंगी उप पोस्ट मास्तर कृष्णकुमार केंगार, टपाल सहाय्यक रूपाली वाडेकर, महासंघाचे सहदेव होनमाने, इरफान चौधरी, मनोज यादव, तसेच पोस्टमन शीतल नागवे, अश्विनी जाधव, वर्षा सुभे, अनंत जाधव, सर्जेराव ठोंबरे, संतोष चव्हाण, संदेश गायकवाड, अमृत वाघमारे, घनश्याम पाटील, वैशाली कोल्हे, दत्तात्रय जाधव, बापू डोळसे व लीना बेगमपुरे आदी पदाधिकारी व पोस्ट कर्मचारी मोठ्या संख्येने उपस्थित होते.

पिंपरी: पंतप्रधान श्री. नरेंद्रजी मोदी यांच्या समृद्ध, सशक्त आणि ‘आत्मनिर्भर भारता’च्या संकल्पनेला नवी गती देण्यासाठी भोसरी येथे भव्य-दिव्य वातावरणात ‘सेवा ज्योती यात्रा’ आणि ‘विकसित भारत संकल्प सभा’ अत्यंत उत्साहात व दिमाखात पार पडली. ‘२५ वर्षे जनसेवेतून राष्ट्रसेवा’ या उदात्त ध्येयाने प्रेरित होऊन आयोजित या ऐतिहासिक सोहळ्यात भारतीय जनता पार्टी पिंपरी-चिंचवड शहराध्यक्ष शत्रुघ्न (बापू) काटे यांची विशेष उपस्थिती होती.

या महासभेचे मुख्य आकर्षण म्हणजे पंतप्रधान श्री. नरेंद्रजी मोदी आणि पक्षाचे राष्ट्रीय अध्यक्ष श्री. नितीनजी नबीन यांचे डिजिटल माध्यमातून मिळालेले थेट मार्गदर्शन. लाईव्ह स्क्रीनद्वारे संवाद साधत दोन्ही नेत्यांनी उपस्थित पदाधिकारी व कार्यकर्त्यांना जनसेवा, राष्ट्रनिर्माण आणि विकसित भारताच्या ध्येयासाठी कटिबद्ध राहण्याचा मोलाचा संदेश दिला.

सभेत मार्गदर्शन करताना भाजप शहराध्यक्ष शत्रुघ्न (बापू) काटे म्हणाले, “आदरणीय पंतप्रधान श्री. नरेंद्रजी मोदी साहेबांचा सार्वजनिक सेवेतील २५ वर्षांचा कार्यकाळ हा केवळ राजकीय प्रवास नसून, तो देशाच्या पुनरुत्थानाचा आणि जनसेवेचा महायज्ञ आहे. ‘सेवा ज्योती यात्रे’च्या माध्यमातून पेटवलेली ही सेवेची ज्योत पिंपरी-चिंचवडच्या घराघरांत पोहोचवून ‘विकसित भारत’चे स्वप्न साकार करण्यासाठी पिंपरी-चिंचवड भाजपचा प्रत्येक कार्यकर्ता कटिबद्ध आहे. मोदीजी आणि राष्ट्रीय अध्यक्षांच्या मार्गदर्शनाने सर्व कार्यकर्त्यांमध्ये नवचैतन्य संचारले आहे.”

या राज्यस्तरीय स्वरूपाच्या महासभेला शहरातील २५०० हून अधिक कार्यकर्ते, महिला व नागरिक उत्स्फूर्तपणे उपस्थित होते. संपूर्ण सभा परिसर ‘भारत माता की जय’ आणि ‘वंदे मातरम्’च्या जयघोषाने दुमदुमून गेला होता.

या प्रसंगी भाजप प्रदेश उपाध्यक्ष केशवजी उपाध्ये, आमदार महेशदादा लांडगे, आमदार शंकरशेठ जगताप, आमदार अमितभाऊ गोरखे, आमदार सौ. उमाताई खापरे, महापौर रवीभाऊ लांडगे, सत्तारूढ पक्षनेते प्रशांतभाऊ शितोळे, उपमहापौर सौ. शर्मिलाताई बाबर, संघटन सरचिटणीस मोरेश्वरभाऊ शेडगे, सरचिटणीस विकासदादा डोळस, मधुकरभाऊ बच्चे, वैशालीताई खाड्ये, संजयभाऊ पटणी, माजी प्राधिकरणाध्यक्ष सदाशिवराव खाडे, दक्षिण भारतीय आघाडी प्रभारी राजेश अण्णा पिल्ले, युवा मोर्चा अध्यक्ष दिनेशभाऊ यादव, महिला मोर्चा अध्यक्षा सुजाताताई पालांडे यांच्यासह शहरातील सर्व आजी-माजी नगरसेवक व वरिष्ठ पदाधिकारी उपस्थित होते.