प्रशासनाचा अनाकलनीय कारभार! खासगी समितीला १ कोटींची खैरात, पण पालिकेच्या स्वतःच्या स्मारकाची मात्र दैना

पिंपरी चिंचवड प्रतिनिधी लक्ष्मण प्रधान , १५ मे २०२६ मॅक्स मंथन डेली न्यूज:

पिंपरी-चिंचवड: पिंपरी चिंचवड महानगरपालिकेच्या स्मारकांबाबतच्या दुटप्पी धोरणामुळे शहरात संतापाची लाट उसळली आहे. एका बाजूला पालिकेने एका ‘खासगी’ स्मारक समितीला (यशवंतराव चव्हाण स्मारक समिती) १ कोटी रुपयांचा भरघोस निधी बहाल केला आहे, तर दुसऱ्या बाजूला पालिकेने स्वतः उभारलेल्या महापुरुषांच्या स्मारकांकडे मात्र जाणीवपूर्वक दुर्लक्ष करून जनतेच्या डोळ्यात धूळफेक केली जात असल्याचे उघड झाले आहे.

महापौर रवी लांडगे यांच्या हस्ते ‘यशवंतराव चव्हाण स्मारक समिती’ या खासगी संस्थेला १ कोटी रुपयांचा धनादेश सुपूर्द करण्यात आला. मात्र, हेच औदार्य पालिकेने स्वतः उभारलेल्या पिंपरीतील संत तुकाराम नगर येथील यशवंतराव चव्हाण यांच्या स्मारकाबाबत का दाखवले नाही, असा प्रश्न आता उपस्थित केला जात आहे. पालिकेच्या स्वतःच्या मालकीचे हे स्मारक सध्या कमालीच्या दुरवस्थेच्या गर्तेत असून, प्रशासनासाठी ही बाब अत्यंत लाजीरवाणी ठरत आहे.

राष्ट्रवादी काँग्रेस पार्टी (अजित पवार गट) अर्बन सेलचे शहराध्यक्ष प्रदीप गायकवाड यांनी पुराव्यासह या स्मारकाची भीषण वास्तवता मांडली आहे. ज्या स्मारकाची जबाबदारी पूर्णपणे महानगरपालिकेची आहे, त्या ठिकाणी स्वच्छतेचा पूर्ण बोजवारा उडाला आहे. महिनाभर पुतळ्याच्या गळ्यातील हार तसेच सडत राहतात, पण ते काढण्याची साधी तसदीही आरोग्य विभाग घेत नाही. स्मारकावर चढण्यासाठी असलेला लोखंडी जिना इतका निकृष्ट दर्जाचा झाला आहे की तो कोणत्याही क्षणी कोसळून मोठा अपघात होऊ शकतो. स्मारकाच्या मागील सीमा भिंतीवर देखणे मुरल्स बसवण्याचे महापालिकेचे आश्वासन केवळ कागदावरच राहिले आहे.

“निधी खासगी समित्यांना द्यायचा आणि स्वतःची जबाबदारी असलेल्या स्मारकांना वाऱ्यावर सोडायचे, हा जनतेच्या पैशांचा अपव्यय आणि महापुरुषांचा अपमान आहे. प्रशासनाने १ कोटींचा निधी देऊन स्वतःची पाठ थोपटून घेतली असली, तरी जमिनीवरची परिस्थिती अत्यंत बिकट आहे. पालिकेच्या स्मारकाची ही दुरवस्था म्हणजे शुद्ध धूळफेक आहे. जर तात्काळ या स्मारकाचा कायापालट झाला नाही, तर हा अन्याय सहन केला जाणार नाही.”

– प्रदीप गायकवाड, शहराध्यक्ष, राष्ट्रवादी काँग्रेस पार्टी (अजित पवार गट) अर्बन सेल

प्रदीप गायकवाड यांनी या संदर्भात महापालिका आयुक्त डॉ. विजय सूर्यवंशी यांना ठणकावून जाब विचारला असून स्मारकाचे सुशोभीकरण करण्याची मागणी केली आहे. आता प्रश्न असा उरतो की, पालिकेचा हा १ कोटींचा निधी नक्की कोणाच्या हितासाठी वापरला जात आहे? खासगी समितीच्या की महापुरुषांच्या खऱ्या सन्मानासाठी?

© २०२६ मॅक्स मंथन डेली न्यूज. सर्व हक्क राखीव.

‘महाटीईटी’ परीक्षेच्या वेळापत्रकात बदल; आता २१ ऐवजी २८ जून रोजी होणार परीक्षा

पिंपरी चिंचवड प्रतिनिधी बालाजी नवले, १५ मे २०२६ मॅक्स मंथन डेली न्यूज:

पुणे: महाराष्ट्र राज्य परीक्षा परिषदेमार्फत रविवार, २१ जून २०२६ रोजी आयोजित करण्यात आलेली ‘महाराष्ट्र शिक्षक पात्रता परीक्षा (महाटीईटी) – २०२६’ आता पुढे ढकलण्यात आली असून ती २८ जून २०२६ रोजी घेतली जाणार आहे. नॅशनल टेस्टिंग एजन्सीमार्फत (NTA) २१ जून रोजीच देशभरात ‘नीट’ (NEET) परीक्षेचे आयोजन करण्यात आले आहे. या दोन्ही परीक्षांसाठी अनेक परीक्षा केंद्रे सामायिक (सारखीच) असल्यामुळे ही परीक्षा सुरळीत पार पडावी आणि परीक्षार्थींची गैरसोय टाळावी, या उद्देशाने परिषदेने हा महत्त्वपूर्ण बदल केला आहे, अशी माहिती परिषदेच्या आयुक्त अनुराधा ओक यांनी प्रसिद्धी पत्रकाद्वारे दिली आहे.

                   परीक्षेचे सुधारित वेळापत्रक (२८ जून २०२६):

पेपर क्रमांक १ : सकाळी १०:३० ते दुपारी १:०० या वेळेत पार पडेल.

पेपर क्रमांक २ : दुपारी २:३० ते सायंकाळी ५:०० या वेळेत पार पडेल.

या परीक्षेसाठी अर्ज केलेल्या उमेदवारांना १६ जून ते २८ जून २०२६ या कालावधीत परीक्षा परिषदेच्या अधिकृत संकेतस्थळावरून आपली प्रवेशपत्रे (Hall Tickets) ऑनलाईन डाऊनलोड करता येतील.

भविष्यात प्रशासकीय कारणास्तव वेळापत्रकात पुन्हा काही बदल झाल्यास, त्याची अधिकृत माहिती https://mahatet.in या संकेतस्थळावर प्रसिद्ध केली जाईल. त्यामुळे उमेदवारांनी इतर कोणत्याही अफवांवर विश्वास न ठेवता अधिकृत संकेतस्थळाला भेट द्यावी, असे आवाहन महाराष्ट्र राज्य परीक्षा परिषदेद्वारे करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.

पंतप्रधान नरेंद्र मोदी यांच्या आवाहनाला प्रतिसाद; महापौर रवि लांडगे यांचा सायकलने प्रवास

पिंपरी चिंचवड प्रतिनिधी आकाश कांबळे, १५ मे २०२६ मॅक्स मंथन डेली न्यूज:

पिंपरी: देशाचे पंतप्रधान नरेंद्र मोदी यांनी इंधन बचत आणि पर्यावरणपूरक जीवनशैलीबाबत केलेल्या आवाहनाला उत्स्फूर्त प्रतिसाद देत पिंपरी चिंचवड महानगरपालिकेचे महापौर रवि लांडगे यांनी आज एका अनोख्या उपक्रमाचे आयोजन केले. महापौरांनी आज सकाळी आपल्या निवासस्थानापासून ते महापालिकेच्या मुख्य प्रशासकीय इमारतीपर्यंत थेट सायकलने प्रवास केला. या माध्यमातून त्यांनी पिंपरी चिंचवडमधील नागरिकांना इंधन बचत आणि निरोगी जीवनशैलीचा मोलाचा संदेश दिला.

आज सकाळी महापौर रवि लांडगे हे निवासस्थानातून सायकलवरून महापालिकेकडे रवाना झाले. शहरातील प्रमुख मार्गांवरून सायकलने प्रवास करत असताना त्यांच्यासोबत महापालिकेचे सह शहर अभियंता बापू गायकवाड, उप अभियंता अमित दीक्षित, महापौरांचे स्वीय सहाय्यक अभय चौगुले आणि संदीप पालांडे हे देखील सायकलवरून सहभागी झाले होते.

याप्रसंगी बोलताना महापौर रवि लांडगे म्हणाले, “देशाचे पंतप्रधान नरेंद्र मोदी यांनी दिलेल्या इंधन बचत आणि पर्यावरणपूरक जीवनशैलीच्या संदेशातून प्रेरणा घेत आजचा हा सायकल प्रवास करण्यात आला आहे. मी स्वतः येथून पुढे आठवड्यातून एक दिवस सायकलनेच प्रवास करण्याचे नियोजन केले आहे. तसेच राज्याचे मुख्यमंत्री देवेंद्र फडणवीस यांच्या नेतृत्वाखाली राज्यात पर्यावरण संवर्धन आणि शाश्वत विकासासाठी विविध उपक्रम राबविले जात आहेत. या पार्श्वभूमीवर नागरिकांनीही दैनंदिन जीवनात शक्य तिथे सायकलचा वापर करावा, सार्वजनिक वाहतूक व्यवस्थेचा लाभ घ्यावा आणि इंधन बचतीच्या सवयी अंगीकाराव्यात.”

महापौरांनी पुढे नमूद केले की, सायकलचा वापर हा केवळ इंधन बचतीसाठी मर्यादित नसून, निरोगी जीवनशैली, स्वच्छ हवा आणि पर्यावरण संवर्धनासाठी अत्यंत महत्त्वाचा आहे. इंधन बचत हीच खरी राष्ट्रसेवा असून, पर्यावरणाचे संरक्षण आणि पुढील पिढ्यांसाठी सुरक्षित भविष्य घडवण्यासाठी प्रत्येकाने आपल्या दैनंदिन जीवनात छोटे-छोटे सकारात्मक बदल करणे आवश्यक आहे.

पर्यावरणपूरक पिंपरी चिंचवड घडविण्यासाठी प्रत्येकाने छोट्या-छोट्या सवयींमधून योगदान देण्याची गरज आहे. महानगरपालिका हरित उपक्रम, पर्यावरण संवर्धन आणि शाश्वत विकासासाठी कटिबद्ध असून नागरिकांनीही या मोहिमांमध्ये सक्रिय सहभाग घ्यावा, असे आवाहन महापौर रवि लांडगे यांनी केले.

© २०२६ मॅक्स मंथन डेली न्यूज. सर्व हक्क राखीव.

ज्येष्ठ तबलावादक धोंडीराम सायकर यांचा महापालिकेकडून मानपत्र देऊन सन्मान

पिंपरी चिंचवड प्रतिनिधी बालाजी नवले, १५ मे २०२६ मॅक्स मंथन डेली न्यूज:

पिंपरी: पिंपरी चिंचवड शहराच्या नावलौकिकात आपल्या कार्यकर्तृत्वाने मोलाची भर घालणाऱ्या तसेच कला, क्रीडा, सांस्कृतिक आणि साहित्य क्षेत्रात उल्लेखनीय कामगिरी करणाऱ्या व्यक्तिमत्त्वांचा महापालिकेच्या सर्वसाधारण सभेत सन्मान करण्याचे धोरण निश्चित करण्यात आले आहे. या धोरणानुसार पिंपरी चिंचवड महानगरपालिकेच्या वतीने आज पार पडलेल्या सर्वसाधारण सभेत ज्येष्ठ तबलावादक धोंडीराम सायकर यांचा महापौर रवि लांडगे यांच्या हस्ते मानपत्र देऊन विशेष सन्मान करण्यात आला.

यावेळी मानपत्राचे वाचन जनता संपर्क अधिकारी प्रफुल्ल पुराणिक यांनी केले.

पिंपरी चिंचवड शहराच्या सांस्कृतिक जडणघडणीत तबलावादक धोंडीराम सायकर यांचे योगदान अत्यंत उल्लेखनीय राहिले आहे. बालवयापासून संगीत साधनेशी जुळलेले त्यांचे नाते आजही अखंडपणे सुरू असून, आपल्या भावपूर्ण आणि नेमक्या तबलावादनातून त्यांनी अनेक नामवंत गायक व कलावंतांच्या मैफिली संस्मरणीय केल्या आहेत. विविध सांगीतिक व्यासपीठांवर तबल्याची प्रभावी साथसंगत करताना त्यांनी भारतीय शास्त्रीय संगीताची परंपरा जपली आहे. नवोदित कलाकारांना मार्गदर्शन, स्पर्धांमध्ये परीक्षक म्हणून दिलेले योगदान आणि सांस्कृतिक क्षेत्रातील सातत्यपूर्ण कार्यामुळे शहराच्या सांस्कृतिक वातावरणाला त्यांनी समृद्ध केले आहे. त्यांच्या या उल्लेखनीय कार्याची दखल घेत त्यांना विविध प्रतिष्ठित पुरस्कारांनी यापूर्वी गौरविण्यात आले आहे.

या सोहळ्याप्रसंगी उपमहापौर शर्मिला बाबर, स्थायी समिती सभापती अभिषेक बारणे, सत्तारूढ पक्षनेते प्रशांत शितोळे, विरोधी पक्षनेते भाऊसाहेब भोईर, आयुक्त डॉ. विजय सूर्यवंशी, क्रीडा, कला, साहित्य व सांस्कृतिक समिती सभापती कैलास कुटे, शिवसेना गटनेते विश्वजीत बारणे उपस्थित होते.

तसेच माजी महापौर तथा नगरसदस्या अपर्णा डोके, नगरसदस्या मनिषा चिंचवडे, नगरसदस्य अनंत कोऱ्हाळे, सुरेश भोईर, उपआयुक्त अण्णा बोदडे, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक यांच्यासह ज्येष्ठ तबलावादक धोंडीराम सायकर यांची मुले नरेंद्र सायकर, निलेश सायकर आणि नातू साहिल सायकर हे देखील उपस्थित होते.

© २०२६ मॅक्स मंथन डेली न्यूज. सर्व हक्क राखीव.

पिंपरीच्या ‘वायसीएम’ रुग्णालयाचा कायापालट होणार! स्थायी समिती सभापती अभिषेक बारणे ॲक्शन मोडवर; केली थेट पाहणी

पिंपरी चिंचवड प्रतिनिधी लक्ष्मण प्रधान, १५ मे २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेचे सर्वात मोठे आणि महत्त्वाचे असलेल्या यशवंतराव चव्हाण स्मृती (वायसीएम) रुग्णालयातील रुग्णसेवेचा दर्जा उंचावण्यासाठी स्थायी समितीचे सभापती अभिषेक बारणे यांनी आज रुग्णालयाचा सविस्तर पाहणी दौरा केला. या दौऱ्यात त्यांनी रुग्णालयातील विविध विभागांची प्रत्यक्ष पाहणी करत त्रुटी दूर करून सामान्य रुग्णांना अत्याधुनिक सुविधा उपलब्ध करून देण्याचे कडक निर्देश प्रशासकीय अधिकाऱ्यांना दिले.

अभिषेक बारणे यांनी रुग्णालयातील सर्व संबंधित विभाग प्रमुख आणि अधिकाऱ्यांच्या समवेत चौथ्या मजल्यावरील वॉर्डची सविस्तर पाहणी केली. यावेळी रुग्णांना मिळणाऱ्या आरोग्य सुविधांचा आढावा घेताना त्यांनी वॉर्डातील अत्यावश्यक सोयी, वैद्यकीय उपकरणांची स्थिती आणि लिफ्टच्या वारंवार उद्भवणाऱ्या समस्यांची गंभीर दखल घेतली.

 लिफ्ट दुरुस्तीबाबत नागरिकांकडून येणाऱ्या तक्रारी लक्षात घेता, तातडीने कार्यवाही करून रुग्ण आणि त्यांच्या नातेवाईकांची गैरसोय टाळण्याचे आदेश त्यांनी दिले. रुग्णालयावर वाढणारा रुग्णांचा भार विचारात घेता, परिसरातील मोकळ्या जागेचा प्रभावी वापर करून इमारतींचा विस्तार करण्याच्या शक्यता त्यांनी पडताळून पाहिल्या. रुग्णालयातील टॉयलेट स्वच्छता, बेडची उत्तम व्यवस्था आणि सुरळीत पाणीपुरवठा यांवर विशेष लक्ष देण्याच्या सूचना देण्यात आल्या. विद्युत विभाग आणि अग्निशमन यंत्रणेची सुरक्षाविषयक मानके तपासून त्याची काटेकोर अंमलबजावणी करण्याचे निर्देशही त्यांनी यावेळी दिले.

रुग्णालयातील औषध साठा आणि वैद्यकीय उपकरणांच्या साठवणूक (स्टोरेज) विभागाची पाहणी करताना सभापती बारणे यांनी औषधांच्या उपलब्धतेचा आढावा घेतला. सामान्य रुग्णांना वेळेवर औषधे मिळतील आणि कोणत्याही उपकरणाच्या अभावी उपचार थांबणार नाहीत, यासाठी योग्य नियोजन व व्यवस्थापन करण्याचे स्पष्ट निर्देश त्यांनी संबंधित अधिकाऱ्यांना दिले.

“सामान्य नागरिकांना सुरक्षित, स्वच्छ आणि अत्याधुनिक आरोग्य सुविधा उपलब्ध करून देणे हीच आमची प्राथमिक जबाबदारी आहे. वायसीएम हे शहरातील महत्त्वाचे रुग्णालय असून येथील सेवा दर्जेदार राखण्यासाठी प्रशासन कटीबद्ध आहे. या पाहणी दौऱ्यात आढळलेल्या त्रुटी तातडीने दूर करून प्रलंबित विकासकामांना गती दिली जाईल.”

— अभिषेक बारणे, सभापती, स्थायी समिती, पिंपरी चिंचवड महापालिका

© २०२६ मॅक्स मंथन डेली न्यूज. सर्व हक्क राखीव.

पिंपरी चिंचवडमध्ये आरपीआय (आठवले) गटाचे प्रदेशाध्यक्ष अनिल मोरे यांची निर्घृण हत्या

पिंपरी चिंचवड प्रतिनिधी बालाजी नवले, १५ मे २०२६ मॅक्स मंथन डेली न्यूज:

पिंपरी: रिपब्लिकन पार्टी ऑफ इंडिया (आठवले) पक्षाचे कामगार आघाडीचे प्रदेशाध्यक्ष अनिल मारुती मोरे (वय ४६, रा. कुरुळी, ता. खेड, जि. पुणे) यांची पिंपरी चिंचवडमधील मोशी परिसरात धारदार शस्त्राने वार करून निर्घृण हत्या करण्यात आली आहे. मोशी येथील एका नामांकित हॉटेलमध्ये बुधवारी रात्री हा प्रकार घडला. गंभीर जखमी झालेल्या मोरे यांचा गुरुवारी उपचारादरम्यान मृत्यू झाला. या घटनेमुळे संपूर्ण परिसरात प्रचंड खळबळ उडाली आहे.

अनिल मोरे हे पक्षाच्या कामासोबतच रिअल इस्टेटच्या व्यवसायात कार्यरत होते. याप्रकरणी मोरे यांचे चालक नागनाथ पुंडलिक चाटे यांनी भोसरी एमआयडीसी पोलीस ठाण्यात फिर्याद दिली असून संशयित आरोपींविरुद्ध गुन्हा दाखल करण्यात आला आहे.

बुधवारी चालक चाटे हे सुट्टीवर असल्याने अनिल मोरे स्वतः आपली एसयूव्ही (SUV) गाडी चालवत मोशी येथील ‘युवराज रेस्टॉरंट अँड बार’ येथे गेले होते. रात्री ९:३० वाजण्याच्या सुमारास हॉटेलमध्ये दोन अज्ञात हल्खोरांनी मोरे यांच्यावर धारदार शस्त्राने सपासप वार केले. रक्ताच्या थारोळ्यात पडलेल्या मोरे यांना तातडीने जवळच्या रुग्णालयात दाखल करण्यात आले, मात्र गुरुवारी उपचारादरम्यान त्यांची प्राणज्योत मालवली.

घटनेची माहिती मिळताच भोसरी एमआयडीसी पोलिसांनी घटनास्थळी धाव घेतली. “या प्रकरणी अद्याप कोणालाही अटक करण्यात आलेली नाही. जुन्या वादातून हा हल्ला झाला असावा असा संशय असून हल्खोरांचा शोध घेण्यासाठी पोलिसांची पथके रवाना करण्यात आली आहेत,” अशी माहिती भोसरी एमआयडीसी पोलीस ठाण्याचे वरिष्ठ पोलीस निरीक्षक गणेश जामदार यांनी दिली. पोलीस सध्या हॉटेल आणि परिसरातील सीसीटीव्ही (CCTV) फुटेज तपासून आरोपींचा सुगावा लावत आहेत.

केंद्रीय मंत्री रामदास आठवले यांच्या पक्षाचे प्रदेश पातळीवरील नेते असलेल्या अनिल मोरे यांच्या हत्येचे वृत्त समजताच मावळ आणि खेड तालुक्यासह पिंपरी चिंचवडमधील आरपीआय कार्यकर्त्यांमध्ये तीव्र असंतोष पसरला आहे. आरोपींना तात्काळ अटक करण्यात यावी, अशी मागणी पक्षाच्या वतीने करण्यात आली असून शहरात तणावपूर्ण शांतता आहे.

© २०२६ मॅक्स मंथन डेली न्यूज. सर्व हक्क राखीव.

पवना धरण वाचवा! मुरूम माफियांवर मकोका (MCOCA) लावा!

पिंपरी चिंचवड प्रतिनिधी लक्ष्मण प्रधान , १४ मे २०२६ मॅक्स मंथन डेली न्यूज:

पिंपरी-चिंचवड: मावळ तालुक्यातील लाखो नागरिकांची जीवनवाहिनी असलेल्या पवना धरणाच्या पाणलोट क्षेत्रातून रात्रीच्या अंधारात ५० पेक्षा अधिक हायवा डंपरद्वारे अवैध मुरूम आणि मातीचे उत्खनन सुरू असल्याचा धक्कादायक प्रकार समोर आला आहे. या प्रकरणी मुख्यमंत्री देवेंद्र फडणवीस आणि महसूल मंत्री चंद्रशेखर बावनकुळे यांनी तात्काळ हस्तक्षेप करावा, अशी मागणी शिवशाही व्यापारी संघाचे संस्थापक अध्यक्ष युवराज दाखले यांनी केली आहे.

“पवना धरणाच्या काठावरून जेसीबी आणि पोकलेन मशीन लावून २० ते ३० फूट खोल खड्डे खणून मुरूम चोरला जात आहे. विना नंबर प्लेटचे हे हायवा ट्रक गेव्हाण खडक, चांदेवाडी, ठाकूरसाई, ब्राह्मोली, कोथुर्णे, शिवली मार्गे चांदखेडकडे जातात. स्थानिक महसूल अधिकाऱ्यांच्या संगनमताशिवाय हा प्रकार शक्य नाही,” असा गंभीर आरोप युवराज दाखले यांनी केला आहे.

 बेकायदेशीर उत्खननामुळे धरणाची साठवण क्षमता घटत असून भिंतीलाही धोका निर्माण झाला आहे. परिसरातील पाण्याची पातळी खालावल्याने स्थानिक शेतकरी देशोधडीला लागला आहे. मुरूम माफियांनी १९६६ चा महसूल कायदा आणि १९८६ चा पर्यावरण कायदा पूर्णपणे पायदळी तुडवला आहे. शेतकऱ्यांच्या सुपीक जमिनी उत्खननामुळे नापीक बनवल्या जात आहेत.

१. मुख्यमंत्र्यांनी विशेष भरारी पथक नेमून धरण परिसरात २४x७ गस्त सुरू करावी.

२. मुरूम माफिया आणि त्यांना पाठबळ देणाऱ्या भ्रष्ट अधिकाऱ्यांवर मकोका (MCOCA) अंतर्गत गुन्हे दाखल करावेत.

३. पवना धरण परिसरापासून ५ किलोमीटरचा परिसर तातडीने “No Mining Zone” घोषित करावा.

४. संपूर्ण परिसराचा ड्रोन सर्व्हे करून दोषींवर कडक दंडात्मक वसुली करावी.

५. पुणे जिल्हाधिकाऱ्यांकडून या संपूर्ण प्रकरणाचा ७ दिवसांत अहवाल मागवावा.

६. उत्खननात वापरले जाणारे सर्व हायवा आणि डंपर जप्त करून ही अवैध वाहतूक थांबवावी.

“मुख्यमंत्री देवेंद्रजी आणि महसूल मंत्री बावनकुळे साहेब, पवना धरण वाचवा. जर पुढील ७ दिवसांत या मुरूम माफियांवर कडक कारवाई झाली नाही, तर शिवशाही व्यापारी संघ आणि स्थानिक शेतकरी मिळून मंत्रालयासमोर तीव्र ठिय्या आंदोलन करतील. मुरूम माफियांना मावळातून हद्दपार केल्याशिवाय आम्ही स्वस्थ बसणार नाही.”

– युवराज दाखले, संस्थापक अध्यक्ष, शिवशाही व्यापारी संघ

© २०२६ मॅक्स मंथन डेली न्यूज. सर्व हक्क राखीव.

विधी समिती सभेत पावसाळा कालावधीत आपदा मित्र स्वयंसेवकांची प्रायोगिक तत्वावर नेमणूक करण्यास मंजुरी

पिंपरी चिंचवड प्रतिनिधी आकाश कांबळे, १४ मे २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेच्या आपत्ती व्यवस्थापन विभागाचे कामकाज अधिक गतिमान आणि सक्षम करण्यासाठी विधी समितीने एक महत्त्वाचा निर्णय घेतला आहे. पावसाळा कालावधीत निर्माण होणाऱ्या संभाव्य आपत्कालीन परिस्थितीचा सामना करण्यासाठी प्रशिक्षित आणि अनुभवी “आपदा मित्र” स्वयंसेवकांची प्रायोगिक तत्त्वावर नियुक्ती करण्याच्या विषयास आज मंजुरी देण्यात आली.

महापालिकेच्या मुख्य प्रशासकीय भवनातील दिवंगत महापौर मधुकरराव पवळे सभागृहात ही बैठक विधी समिती सभापती सुजाता बोराटे यांच्या अध्यक्षतेखाली पार पडली.

मान्सूनपूर्व तयारी २०२६ अंतर्गत पावसाळ्यातील पूरस्थिती, पाणी साचणे, झाडे पडणे किंवा इतर कोणत्याही दुर्घटनांमध्ये नागरिकांच्या सुरक्षेसाठी ही यंत्रणा अत्यंत महत्त्वाची ठरणार आहे. या योजनेची प्रमुख वैशिष्ट्ये खालीलप्रमाणे आहेत:

शासनमान्य संस्थांकडून आपत्ती व्यवस्थापनाचे प्रशिक्षण घेतलेले “आपदा मित्र”, राज्य अग्निशमन दल तसेच नागरी संरक्षण दलातील (Civil Defence) प्रशिक्षित स्वयंसेवकांची यात नियुक्ती केली जाईल. नियुक्ती आदेशाच्या दिनांकापासून पुढील ५ महिन्यांच्या कालावधीसाठी किमान ५० अनुभवी स्वयंसेवक तैनात केले जातील. या स्वयंसेवकांना कामगार कल्याण विभागाकडील कंत्राटी कामगारांच्या किमान वेतन दरानुसार मानधन अदा करण्यात येणार आहे.

हे स्वयंसेवक महापालिकेच्या आपत्ती व्यवस्थापन विभागाच्या समन्वयाने काम करणार आहेत. विविध आपत्कालीन घटनांमध्ये तातडीने प्रतिसाद देणे, बचावकार्यामध्ये मदत करणे, पूरपरिस्थितीमध्ये नागरिकांना सुरक्षित स्थळी हलविणे आणि मुख्य आपत्कालीन यंत्रणांना सहकार्य करणे अशी महत्त्वाची जबाबदारी हे आपदा मित्र पार पाडतील. या निर्णयामुळे महानगरपालिकेच्या आपत्ती प्रतिसाद क्षमतेत मोठी वाढ होणार आहे.

या बैठकीस विधी समिती सदस्य ज्ञानेश्वर जगताप, विनायक गायकवाड, कुंदा भिसे, श्रुती डोळस, कुशाग्र कदम, शेखर चिंचवडे, वर्षा जगताप, तुषार सहाणे यांच्यासह नगरसचिव मुकेश कोळप, उप आयुक्त संदीप खोत, राजेश आगळे, सहाय्यक आयुक्त तानाजी नरळे, कार्यकारी अभियंता शिरीष पोरेड्डी, विशेष अधिकारी किरण गायकवाड आणि मुख्य आपत्ती व्यवस्थापन अधिकारी ओमप्रकाश बहिवाल आदी उपस्थित होते.

© २०२६ मॅक्स मंथन डेली न्यूज. सर्व हक्क राखीव.

स्वर्गीय प्रमोदजी महाजन स्वच्छ व हरित पिंपरी चिंचवड शहर योजना सुरू करणार – महापौर रवि लांडगे यांची घोषणा

पिंपरी चिंचवड प्रतिनिधी लक्ष्मण प्रधान, १४ मे २०२६ मॅक्स मंथन डेली न्यूज:

पिंपरी: “शहरातील वाढते शहरीकरण आणि बदलते हवामान पाहता पर्यावरण संतुलन राखणे ही काळाची गरज आहे. या पार्श्वभूमीवर स्वर्गीय प्रमोदजी महाजन यांच्या स्मृतिप्रीत्यर्थ ‘स्वच्छ व हरित पिंपरी चिंचवड शहर योजना’ लवकरच सुरू करण्यात येईल. ही योजना महापालिका आणि नागरिकांच्या सक्रिय लोकसहभागातून यशस्वी केली जाईल,” अशी घोषणा महापौर रवि लांडगे यांनी केली.

पिंपरी चिंचवड महानगरपालिकेच्या वतीने पर्यावरण संवर्धन, शहरातील हरित क्षेत्र वाढविणे आणि नागरिकांमध्ये वृक्षसंवर्धनाबाबत जनजागृती करण्यासाठी निगडी प्राधिकरण येथील गणेश तलाव, सेक्टर २६ आणि स्वातंत्र्यवीर सावरकर उद्यान येथे एका विशेष नियोजन बैठकीचे आयोजन करण्यात आले होते. याप्रसंगी महापौरांच्या हस्ते वृक्षारोपण करण्यात आले, त्यावेळी ते बोलत होते.

महापौर रवि लांडगे पुढे म्हणाले की, “प्रत्येक नागरिकाने आपल्या परिसरात किमान एक तरी वृक्ष लावून त्याचे संगोपन करण्याची जबाबदारी स्वीकारली पाहिजे. यासाठी महापालिका नागरिकांना रोपे, खत तसेच आवश्यक तांत्रिक सहकार्य उपलब्ध करून देणार आहे. शहरात पुढील काळात तब्बल २ लाख वृक्षारोपण करण्याचा आमचा मानस असून, त्यासाठी विविध सामाजिक संस्था, पर्यावरणप्रेमी आणि नागरिकांचा सक्रिय सहभाग घेतला जाईल.”

यावेळी बोलताना आयुक्त डॉ. विजय सूर्यवंशी यांनी महापालिकेच्या नियोजित प्रकल्पांची माहिती दिली. “महापालिकेच्या राखीव भूखंडांच्या परिसरात मोठ्या प्रमाणावर वृक्षारोपण करण्याचे नियोजन आहे. शहरातील निवडक ठिकाणी ‘डेन्स फॉरेस्ट’ (घणदाट जंगले) विकसित करण्याची संकल्पना राबविण्यात येणार असून, त्यामुळे शहरातील हरित क्षेत्रात मोठी वाढ तर उन्हाळ्यातील तापमानात घट होईल. पर्यावरणपूरक आणि शाश्वत शहर उभारण्यासाठी महापालिका कटिबद्ध आहे,” असे त्यांनी नमूद केले.

या बैठकीला व वृक्षारोपण कार्यक्रमास उपमहापौर शर्मिला बाबर, आयुक्त डॉ. विजय सूर्यवंशी, नगरसदस्या शैलजा मोरे, नगरसदस्य अमित गावडे, अतिरिक्त आयुक्त कुलदीप जंगम, विक्रांत बगाडे, मुख्य उद्यान अधीक्षक महेश गारगोटे, सह शहर अभियंता बापू गायकवाड, उपायुक्त अण्णा बोदडे, कार्यकारी अभियंता सुनील पवार, जनता संपर्क अधिकारी प्रफुल्ल पुराणिक उपस्थित होते.

तसेच सामाजिक कार्यकर्ते प्रा. नामदेव जाधव, निलेश शिंदे, सूर्यकांत मुथियान, विजय नाईक यांसह निगडी प्राधिकरण रेसिडेंट फोरमचे पदाधिकारी, पर्यावरणप्रेमी व नागरिक मोठ्या संख्येने उपस्थित होते.

कार्यक्रमाचे सूत्रसंचालन प्रफुल्ल पुराणिक यांनी केले, तर अतिरिक्त आयुक्त विक्रांत बगाडे यांनी उपस्थितांचे आभार मानले.

© २०२६ मॅक्स मंथन डेली न्यूज. सर्व हक्क राखीव.

छत्रपती संभाजी महाराज यांनी स्वराज्याच्या रक्षणासाठी दिलेले बलिदान आजच्या पिढीसाठी प्रेरणादायी – महापौर रवि लांडगे

पिंपरी चिंचवड प्रतिनिधी बालाजी नवले, १४ मे २०२६ मॅक्स मंथन दिली न्यूज:

पिंपरी: “छत्रपती संभाजी महाराज हे अद्वितीय शौर्य आणि राष्ट्रनिष्ठेचे साक्षात प्रतीक होते. अत्यंत प्रतिकूल परिस्थितीतही त्यांनी स्वराज्याच्या रक्षणासाठी दिलेले अभूतपूर्व बलिदान हे आजच्या युवा पिढीसाठी अत्यंत प्रेरणादायी आहे. संभाजी महाराजांच्या विचारांमधून आपल्याला राष्ट्रप्रेम, कर्तव्यनिष्ठा आणि अन्यायाविरोधात लढण्याची ताकद मिळते. त्यांच्या जयंतीनिमित्त आपण सर्वांनी त्यांच्या महान कार्याचा आदर्श डोळ्यासमोर ठेवून राष्ट्रहितासाठी योगदान देण्याचा संकल्प करावा,” असे प्रतिपादन महापौर रवि लांडगे यांनी केले.

पिंपरी चिंचवड महानगरपालिकेच्या वतीने स्वराज्यरक्षक छत्रपती संभाजी महाराज यांची जयंती आज अत्यंत उत्साहात आणि भक्तीमय वातावरणात साजरी करण्यात आली. या निमित्ताने आयोजित मुख्य शासकीय कार्यक्रमात ते बोलत होते.

जयंती दिनाचे औचित्य साधून पिंपरी येथील महापालिकेच्या मुख्य प्रशासकीय भवनामध्ये छत्रपती संभाजी महाराज यांच्या प्रतिमेस महापौर रवि लांडगे यांच्या हस्ते पुष्पहार अर्पण करून अभिवादन करण्यात आले. त्यानंतर चिंचवड येथील बर्ड व्हॅली उद्यानातील छत्रपती संभाजी महाराजांच्या भव्य पाषाण शिल्पास महापौरांच्या हस्ते पुष्पहार अर्पण करून त्रिवार मुजरा करण्यात आला.

या गरिमामयी सोहळ्याप्रसंगी उपमहापौर शर्मिला बाबर, नगरसदस्य तुषार हिंगे, कुशाग्र कदम, अनुराधा गोरखे, सुप्रिया चांदगुडे, रिटा सानप, अतिरिक्त आयुक्त विक्रांत बगाडे, उप आयुक्त अण्णा बोदडे, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक, माजी नगरसदस्य मारुती भापकर, सामाजिक कार्यकर्ते काशिनाथ नखाते, आबासाहेब ढवळे, वैभव जाधव, जीवन बोऱ्हाडे, सागर तापकीर, जितेंद्र छाबडा, संजय कुरबट्टी, हेमा पारिसकर, हेमलता वाडेकर यांच्यासह महापालिकेचे विविध विभागांचे प्रमुख, कर्मचारी आणि नागरिक मोठ्या संख्येने उपस्थित होते.

या संपूर्ण कार्यक्रमाचे नेटके सूत्रसंचालन जनता संपर्क अधिकारी प्रफुल्ल पुराणिक यांनी केले. छत्रपती संभाजी महाराजांच्या जयघोषाने महापालिका भवन आणि बर्ड व्हॅली परिसर दुमदुमून गेला होता.

© २०२६ मॅक्स मंथन डेली न्यूज. सर्व हक्क राखीव.