युवा खेळाडूंना दर्जेदार व्यासपीठ उपलब्ध करून देण्यासाठी महापालिका कटिबद्ध — महापौर रवि लांडगे

पिंपरी चिंचवड प्रतिनिधी बालाजी नवले, ७ मे २०२६ मॅक्स मंथन डेली न्यूज:

पिंपरी: “कबड्डी हा आपल्या मातीतला आणि महाराष्ट्राच्या संस्कृतीशी जोडलेला खेळ आहे. ग्रामीण भागातील प्रतिभेला संधी देणे आणि युवा खेळाडूंना दर्जेदार व्यासपीठ उपलब्ध करून देणे हाच महापौर चषक स्पर्धेचा मुख्य उद्देश आहे. क्रीडा क्षेत्रात पिंपरी-चिंचवड शहराचा दबदबा निर्माण करण्यासाठी महानगरपालिका कटिबद्ध आहे,” असे प्रतिपादन महापौर रवि लांडगे यांनी केले.

पिंपरी-चिंचवड महानगरपालिकेच्या वतीने भोसरी येथील गावजत्रा मैदानात आयोजित ‘महापौर चषक राज्यस्तरीय कबड्डी स्पर्धा २०२६’ चे उद्घाटन महापौर लांडगे यांच्या हस्ते झाले, त्यावेळी ते बोलत होते.

या सोहळ्याला आमदार महेश लांडगे, आमदार शंकर जगताप, स्थायी समिती सभापती अभिषेक बारणे, सत्तारूढ पक्षनेते प्रशांत शितोळे, पीएमपीएल अध्यक्ष डॉ. महेश आव्हाड, क्रीडा समिती सभापती कैलास कुटे, नगरसदस्य योगेश लांडगे, कुंदन गायकवाड, उपायुक्त पंकज पाटील आणि जनता संपर्क अधिकारी प्रफुल्ल पुराणिक यांच्यासह क्रीडा क्षेत्रातील अनेक मान्यवर उपस्थित होते.

 ही स्पर्धा १० मे २०२६ पर्यंत चालणार आहे. राज्यभरातील ३६ पुरुष आणि २४ महिला संघांतील एकूण ८१२ खेळाडूंचा सहभाग. सामने शिस्तबद्ध पद्धतीने पार पाडण्यासाठी ५५ अनुभवी सामनाधिकारी कार्यरत आहेत. या स्पर्धेतील बक्षिसांची रक्कम एकूण १७ लाख ५० हजार रुपये इतकी असून, ती खालीलप्रमाणे विभागली आहे:

• प्रथम क्रमांक: २ लाख रुपये (पुरुष व महिला गट स्वतंत्र).

• द्वितीय क्रमांक: १ लाख ५० हजार रुपये.

• तृतीय व चतुर्थ क्रमांक: प्रत्येकी १ लाख रुपये.

• वैयक्तिक पुरस्कार: उत्कृष्ट चढाई, उत्कृष्ट पकड आणि अष्टपैलू खेळाडूंना रोख पारितोषिके दिली जाणार आहेत.

आमदार महेश लांडगे यांनी नमूद केले की, अशा स्पर्धांमुळे शहरातील क्रीडा संस्कृती अधिक बळकट होईल, तर आमदार शंकर जगताप यांनी तरुणांना खेळाकडे करिअर म्हणून पाहण्याचे आवाहन केले. या राज्यस्तरीय स्पर्धेमुळे शहरात सध्या क्रीडामय वातावरण निर्माण झाले आहे.

© २०२६ मॅक्स मंथन डेली न्यूज. सर्व हक्क राखीव.

विकसित भारताच्या स्वप्नपूर्तीसाठी तंत्रज्ञानाधारित उद्योगांची गरज; पद्मश्री मिलिंद कांबळे यांचे प्रतिपादन

पिंपरी चिंचवड प्रतिनिधी आकाश कांबळे , ७ मे २०२६ मॅक्स मंथन डेली न्यूज:

चिंचवड: “२०४७ पर्यंत भारताला विकसित देश म्हणून ओळख मिळवून देण्यासाठी सूक्ष्म, लघु व मध्यम (एमएसएमई) उद्योगांना अत्याधुनिक तंत्रज्ञानाची जोड देणे आवश्यक आहे. एआय (AI), डिजिटायझेशन आणि ईआरपी तंत्रज्ञानामुळे उद्योगांची उत्पादकता वाढून मोठी रोजगारनिर्मिती होईल,” असे प्रतिपादन दलित इंडियन चेंबर ऑफ कॉमर्स अँड इंडस्ट्रीजचे (डिक्की) संस्थापक पद्मश्री मिलिंद कांबळे यांनी केले.

चिंचवड येथील ऑटो क्लस्टर एक्झिबिशन सेंटरमध्ये ‘एक्स्पोनॉमिक्स इव्हेंट्स’च्या वतीने आयोजित भारतातील पहिल्या ‘ईआरपी’ औद्योगिक प्रदर्शनाचे उद्घाटन त्यांच्या हस्ते झाले, यावेळी ते बोलत होते.

मिलिंद कांबळे यांनी नमूद केले की, महाराष्ट्राचे धोरण गुंतवणुकीला पूरक असून भारतात येणाऱ्या परकीय गुंतवणुकीपैकी सर्वाधिक ४० टक्के गुंतवणूक महाराष्ट्रात, त्यातही पुण्यात येते. कोरोना काळात भारताने मोठी डिजिटल क्रांती केली असून आता एआय, डेटा सायन्स आणि मशीन लर्निंग स्वीकारणे ही उद्योगांची गरज बनली आहे.

 उत्पादन, वित्त, लॉजिस्टिक्स, रिटेल, हेल्थकेअर आणि कन्स्ट्रक्शन क्षेत्रातील अत्याधुनिक डिजिटल सोल्युशन्स येथे सादर करण्यात आले आहेत. देशभरातील १०० हून अधिक ईआरपी कंपन्या, तंत्रज्ञान पुरवठादार आणि स्टार्टअप्स यात सहभागी झाले आहेत. तज्ज्ञांची सत्रे, कार्यशाळा आणि प्रात्यक्षिकांचा अनुभव घेता येणार आहे. हे प्रदर्शन शनिवार, ९ मे पर्यंत सकाळी १० ते ६ या वेळेत सर्वांसाठी विनामूल्य खुले आहे.

कार्यक्रमाला संयोजक सागर अहिवळे, मिलिंद हडप, आरती भोसले-अहिवळे, श्रद्धा कुलकर्णी, रॉड अल्बुकर्क, दीपान रामलिंगम, महेंद्र फणसे, दिलीप बटवाल आदी मान्यवर उपस्थित होते. मुख्यमंत्री एकनाथ शिंदे यांनी ध्वनिचित्रफितीद्वारे या उपक्रमाचे कौतुक केले.

“पुणे हे आता केवळ विद्येचे माहेरघर नसून आयटी आणि इंडस्ट्रियल हब बनले आहे. उद्योगांना पारंपरिक पद्धतीतून बाहेर काढून डेटा-आधारित बनवण्यासाठी हे प्रदर्शन मैलाचा दगड ठरेल,” असा विश्वास यावेळी विविध वक्त्यांनी व्यक्त केला.

© २०२६ मॅक्स मंथन डेली न्यूज. सर्व हक्क राखीव.

“माझ्या नावाचा गैरवापर करून ठराव मंजूर, संबंधितांवर कारवाई करा”; राष्ट्रवादीचे नगरसेवक संदीप वाघेरे यांचे आयुक्त व सभापतींना निवेदन

पिंपरी चिंचवड प्रतिनिधी लक्ष्मण प्रधान , ७ मे २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या स्थायी समितीमध्ये आपल्या संमतीशिवाय नावाचा वापर करून ठराव मंजूर केल्याचा खळबळजनक आरोप राष्ट्रवादी काँग्रेसचे नगरसेवक संदीप वाघेरे यांनी केला आहे. या प्रकरणाची गंभीर दखल घेऊन संबंधित ठराव तात्काळ रद्द करावा आणि जबाबदार अधिकाऱ्यांवर कठोर कारवाई करावी, अशी मागणी वाघेरे यांनी महापालिका आयुक्त आणि स्थायी समिती सभापतींकडे निवेदनाद्वारे केली आहे.

संदीप वाघेरे यांनी दिलेल्या माहितीनुसार, २२ एप्रिल २०२६ रोजी स्थायी समितीची सभा पार पडली. या सभेमध्ये शिक्षण समितीचा एक ठराव (क्र. ७, दिनांक ०२/०४/२०२६) मंजुरीसाठी आला होता. नगरसचिव कार्यालयामार्फत सादर करण्यात आलेल्या डॉकेटमध्ये या ठरावासाठी संदीप वाघेरे यांचे नाव “सूचक” म्हणून, तर विकास साने यांचे नाव “अनुमोदक” म्हणून नोंदवण्यात आले होते.

मात्र, संदीप वाघेरे यांनी स्पष्ट केले की, आपण अशा कोणत्याही विषयाला संमती दिलेली नाही किंवा तसा ठराव सुचवलेलाही नाही. नगरसचिव कार्यालयाने जाणीवपूर्वक किंवा चुकीच्या पद्धतीने आपल्या नावाचा वापर करून प्रशासनाची दिशाभूल केल्याचा आरोप त्यांनी केला आहे.

वाघेरे यांनी केवळ नावाच्या गैरवापराचा मुद्दाच मांडला नाही, तर या ठरावातील आर्थिक बाबींवरही बोट ठेवले आहे. संबंधित विषयात ‘यंत्रमाग’ आणि ‘जगदंब’ या दोन्ही संस्था शासकीय असतानाही, जगदंब संस्थेच्या दरामध्ये मोठी तफावत आहे. या निर्णयामुळे महापालिकेच्या तिजोरीवर प्रति विद्यार्थी आणि प्रतिवर्षी मोठ्या प्रमाणात विनाकारण आर्थिक बोजा वाढणार असल्याचे वाघेरे यांनी निदर्शनास आणून दिले आहे.

स्थायी समिती ठराव क्रमांक ३६६ (विषय क्रमांक ७) तात्काळ रद्द करण्यात यावा, ठरावावरून संदीप वाघेरे यांचे नाव तातडीने हटवण्यात यावे,

चुकीची नोंद करणाऱ्या संबंधित नगरसचिव आणि कर्मचाऱ्यांवर प्रशासकीय कारवाई करावी.

या प्रकरणामुळे महापालिकेच्या नगरसचिव विभागाच्या कामकाजावर प्रश्नचिन्ह उपस्थित झाले असून, सत्ताधारी आणि प्रशासकीय अधिकारी यावर काय भूमिका घेतात, याकडे सर्वांचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव.

दक्षिण महाळुंगे MIDC पोलिसांची मोठी कारवाई; आंतरजिल्हा दुचाकी चोरांच्या मुसक्या आवळल्या, ३६ लाखांचा मुद्देमाल हस्तगत

पिंपरी चिंचवड प्रतिनिधी बालाजी नवले, ७ मे २०२६ मॅक्स मंथन डेली न्यूज:

चाकण-महाळुंगे: महाळुंगे औद्योगिक वसाहतीतील कंपन्यांच्या पार्किंगमधून दुचाकी चोरी करणाऱ्या सराईत टोळीचा दक्षिण महाळुंगे एमआयडीसी पोलिसांनी पर्दाफाश केला आहे. या कारवाईत पोलिसांनी ३६ लाख रुपये किमतीच्या एकूण २४ मोटार सायकली हस्तगत केल्या असून जुन्नर तालुक्यातील दोन अट्टल चोरांना अटक केली आहे.

दिनांक १४ एप्रिल २०२६ रोजी महाळुंगे येथील ‘पानसे ऑटो प्रा. लि.’ कंपनीच्या पार्किंगमधून एक स्प्लेंडर मोटार सायकल चोरीला गेली होती. याप्रकरणी संदीपकुमार निसाद यांनी फिर्याद दिली होती. या गुन्ह्याचा तपास करताना तपास पथकाने महाळुंगे ते जुन्नर या दरम्यानच्या सुमारे ८० किलोमीटर अंतरातील सीसीटीव्ही फुटेजची अतिशय बारकाईने पाहणी केली. तांत्रिक विश्लेषणाद्वारे पोलिसांनी संशयितांचा माग काढला आणि यश सुनील हांडे (वय १९, रा. पिंपळगाव सौदा, जुन्नर) व किरण संभाजी जाधव (वय २६, रा. टिकेकरवाडी, जुन्नर) या दोघांना ताब्यात घेतले.

आरोपींची कसून चौकशी केली असता त्यांनी केवळ पिंपरी-चिंचवडच नव्हे, तर पुणे, नवी मुंबई, बृहन्मुंबई, ठाणे, नाशिक आणि अहिल्यानगर (अहमदनगर) या जिल्ह्यांमधूनही मोठ्या प्रमाणात दुचाकी चोरल्याची कबुली दिली.

जप्त केलेल्या २४ वाहनांमध्ये प्रामुख्याने खालील गाड्यांचा समावेश आहे:

• रॉयल इनफिल्ड (बुलेट): १२ गाड्या

• यमाहा आर वन फाईव्ह (R15): ३ गाड्या

• होन्डा शाईन, स्प्लेंडर, पल्सर, यूनिकॉर्न व स्कूटी.

या कारवाईमुळे चिखली, चाकण, आळंदी, जुन्नर (पुणे), मुलुंड, सायन, नवघर, कांजुरमार्ग (मुंबई), नवपाडा, कोळसेवाडी, अंबरनाथ (ठाणे), सानपाडा (नवी मुंबई), नाशिक आणि अहिल्यानगरमधील एकूण २४ गुन्हे उघडकीस आले आहेत.

ही कारवाई पोलीस आयुक्त विनयकुमार चौबे, सह पोलीस आयुक्त शशिकांत महावरकर, अपर पोलीस आयुक्त सारंग आवाड, पोलीस उप-आयुक्त श्वेता खेडकर, सहाय्यक पोलीस आयुक्त सचिन कदम यांच्या मार्गदर्शनाखाली वरिष्ठ पोलीस निरीक्षक विजय ढमाळ, पोलीस निरीक्षक (गुन्हे) अनिल देवडे, सपोनि भास्कर पुल्ली आणि पोलीस अंमलदार चेतन सावंत, युवराज बिराजदार, विश्वास नाणेकर, किशोर सांगळे, शरद खैरे, राजेंद्र खेडकर व पथकाने केली. या प्रकरणाचा पुढील तपास पोलीस हवालदार चेतन सावंत करत आहेत.

© २०२६ मॅक्स मंथन डेली न्यूज. सर्व हक्क राखीव.

प्रफुल्ल पुराणिक यांच्या शिरपेचात मानाचा तुरा; टिळक महाराष्ट्र विद्यापीठाकडून ‘बॅचलर ऑफ जर्नलिज्म’ पदवी प्रदान

पिंपरी चिंचवड प्रतिनिधी लक्ष्मण प्रधान, ७ मे २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेचे जनता संपर्क अधिकारी (PRO) प्रफुल्ल पुराणिक यांनी आपल्या शैक्षणिक वाटचालीत आणखी एक महत्त्वपूर्ण टप्पा गाठला आहे. पुणे येथील टिळक महाराष्ट्र विद्यापीठाच्या कुलगुरू डॉ. श्रीमती गीताली टिळक यांच्या हस्ते प्रफुल्ल पुराणिक यांना ‘बॅचलर ऑफ जर्नलिज्म अँड मास कम्युनिकेशन’ (B.J. in Print Media – PG) ही पदवी प्रदान करण्यात आली. विशेष म्हणजे, त्यांनी ही पदवी प्रथम श्रेणीत (First Class) संपादन केली आहे.

प्रफुल्ल पुराणिक हे पिंपरी-चिंचवड महानगरपालिकेतील एक उमदे आणि कर्तव्यदक्ष अधिकारी म्हणून ओळखले जातात. महापालिकेच्या प्रत्येक मीटिंगमध्ये स्वतः प्रस्तावना मांडण्यापासून ते प्रोटोकॉलचे काटेकोर पालन करण्यापर्यंत त्यांचा कामाचा आवाका मोठा आहे. त्यांना महानगरपालिकेच्या सर्व विभागांची आणि शहरातील सामाजिक-राजकीय घडामोडींची खडान् खडा माहिती तोंडपाठ आहे. त्यांच्या याच कार्यपद्धतीमुळे प्रशासकीय वर्तुळात तसेच शहरातील सामाजिक आणि राजकीय क्षेत्रात त्यांच्याबद्दल आदराची भावना आहे.

केवळ कामापुरते मर्यादित न राहता, प्रत्येक भेटणाऱ्या व्यक्तीला योग्य मान-सन्मान देऊन बोलणे आणि प्रत्येकाच्या अडचणी समजून घेणे ही पुराणिक यांची खासियत आहे. शहरातील कोणताही सामाजिक किंवा शैक्षणिक कार्यकर्ता असो, त्यांच्याशी त्यांचे जिव्हाळ्याचे संबंध आहेत. कोणत्याही सरकारी कामात हिरीरीने सहभाग घेऊन ते काम तडीस नेण्यात त्यांचा हातखंडा आहे.

प्रफुल्ल पुराणिक यांनी वयाचा किंवा पदाचा विचार न करता सातत्याने आपले ज्ञान अद्ययावत ठेवण्यासाठी ही पदवी मिळवली आहे. या यशाबद्दल महानगरपालिकेचे वरिष्ठ अधिकारी, कर्मचारी आणि शहरातील विविध क्षेत्रांतील मान्यवरांनी त्यांचे अभिनंदन केले आहे. “शिक्षण ही निरंतर चालणारी प्रक्रिया आहे,” हेच त्यांनी या पदवीच्या माध्यमातून पुन्हा एकदा सिद्ध करून दाखवले आहे.

© २०२६ मॅक्स मंथन डेली न्यूज. सर्व हक्क राखीव.

व्यावसायिक गॅस दरवाढ नव्हे, ही तर खाद्यपदार्थांच्या दरवाढीची सुरुवात; काशिनाथ नखाते यांचा सरकारवर प्रहार

पिंपरी चिंचवड प्रतिनिधी लक्ष्मण प्रधान , ७ मे २०२६ मॅक्स मंथन डेली न्यूज:

पिंपरी: “केंद्र आणि राज्य सरकारच्या चुकीच्या धोरणांमुळे सर्वसामान्य नागरिक महागाईच्या खाईत लोटला गेला आहे. व्यावसायिक गॅस सिलिंडरच्या दरात ९९३ रुपयांनी झालेली मोठी वाढ ही केवळ गॅस दरवाढ नसून, ती सामान्य जनतेच्या ताटातील खाद्यपदार्थांच्या दरवाढीची सुरुवात आहे,” अशी घणाघाती टीका कामगार नेते काशिनाथ नखाते यांनी केली आहे.

व्यावसायिक गॅसच्या या अवाढव्य दरवाढीचा निषेध करण्यासाठी ‘कष्टकरी संघर्ष महासंघ महाराष्ट्र’च्या वतीने चिखली येथील थरमॅक्स चौकात कामगारांनी एकत्र येत सरकारला जाब विचारला.

यावेळी बोलताना काशिनाथ नखाते म्हणाले की, देशभरात महागाईचा भडका उडालेला असताना सरकार वारंवार दरवाढ करून जखमेवर मीठ चोळत आहे. अवघ्या तीन महिन्यांच्या कालावधीत तब्बल ८१% दरवाढ करण्यात आली असून, फेब्रुवारी महिन्यापासून आतापर्यंत १३८० रुपयांनी दर वाढले आहेत. या दरवाढीचा थेट फटका विद्यार्थी, कामगार, छोटे दुकानदार आणि मध्यमवर्गीयांना बसत आहे.

दरवाढीमुळे छोटे हॉटेल व्यावसायिक, कॅन्टीन चालक आणि स्टॉल धारक मोठ्या अडचणीत सापडले आहेत. नखाते यांनी मांडलेल्या काही महत्त्वाच्या बाबी:

 खाद्यपदार्थांचे दर वाढवले तर ग्राहक कमी होण्याची भीती आहे आणि न वाढवल्यास व्यवसाय तोट्यात जाऊन बंद पडण्याची वेळ येईल. एकीकडे जीएसटीचा जाच आणि दुसरीकडे गॅसची महागाई अशा दुहेरी संकटात छोटे व्यावसायिक भरडले जात आहेत. महागाईने सामान्य कष्टकऱ्यांचे कंबरडे मोडले असून कुटुंबाचा गाडा चालवणे कठीण झाले आहे.

सामान्य नागरिकांना आणि छोट्या व्यावसायिकांना या संकटातून बाहेर काढण्यासाठी सरकारने तातडीने हस्तक्षेप करावा. महागाई नियंत्रणासाठी ठोस उपाययोजना करून गॅस दरवाढ त्वरित मागे घ्यावी, अशी मागणी कष्टकरी संघर्ष महासंघाच्या वतीने करण्यात आली आहे.

© २०२६ मॅक्स मंथन डेली न्यूज. सर्व हक्क राखीव.

धक्कादायक! लाचखोर पोलिसाने तक्रारदाराचा घेतला चावा; एसीबीच्या पथकावरही हल्ला

पुणे/पिंपरी चिंचवड प्रतिनिधी लक्ष्मण प्रधान, ७ मे २०२६ मॅक्स मंथन डेली न्यूज:

पुणे: पुणे लाचलुचपत प्रतिबंधक विभागाने (ACB) बुधवारी दुपारी बोट क्लब रोड परिसरात टाकलेल्या जाळ्यात एक अत्यंत धक्कादायक प्रकार समोर आला आहे. लाचेची रक्कम स्वीकारल्यानंतर कारवाईसाठी पुढे सरसावलेल्या एसीबीच्या पथकावर लाचखोर पोलीस शिपायाने हल्ला चढवला, इतकेच नव्हे तर त्याने तक्रारदार व्यावसायिकाच्या छातीचा चावा घेऊन त्यांना जखमी केले.

पुण्यातील कोरेगाव पार्क पोलीस ठाण्यात कार्यरत असलेला पोलीस शिपाई गणेश कस्पटे याला याप्रकरणी अटक करण्यात आली आहे. बोट क्लब रोड येथील एका व्यावसायिकाविरुद्ध हैदराबादमधील न्यायालयात ‘नेगोशिएबल इन्स्ट्रुमेंट ॲक्ट’ (चेक बाऊन्स) अंतर्गत अजामीनपात्र वॉरंट (NBW) जारी करण्यात आले होते. या वॉरंटची अंमलबजावणी करण्याची जबाबदारी कस्पटे याच्यावर होती.

मिळालेल्या माहितीनुसार, कस्पटे याने मार्च महिन्यात संबंधित व्यावसायिकाला अटक न करण्यासाठी आधीच ५ लाख रुपये घेतले होते. मात्र, १ मे रोजी त्याने पुन्हा व्यावसायिकाशी संपर्क साधला आणि नवीन वॉरंट निघाल्याचे सांगून २ लाख रुपयांची मागणी केली. तडजोडीअंती १.५ लाख रुपये देण्याचे ठरले.

वारंवार होणाऱ्या त्रासाला कंटाळून व्यावसायिकाने एसीबीकडे तक्रार नोंदवली. बुधवारी दुपारी बोट क्लब रोडवरील एका हौसिंग सोसायटीमध्ये एसीबीने सापळा लावला. कस्पटे याने जशी लाचेची रक्कम स्वीकारली, तसा एसीबीच्या पथकाने त्याला पकडण्याचा प्रयत्न केला.

यावेळी चिडलेल्या कस्पटे याने:

• तक्रारदार व्यावसायिकाच्या छातीचा जोरात चावा घेतला, ज्यामुळे व्यावसायिक जखमी झाले असून त्यांना रुग्णालयात दाखल करावे लागले आहे.

• एसीबीच्या तीन कर्मचाऱ्यांना धक्काबुक्की आणि मारहाण केली. यामध्ये एक अधिकारी जमिनीवर पडले, ज्याचा फायदा घेऊन कस्पटेने पळून जाण्याचा प्रयत्न केला.

मात्र, एसीबीच्या पथकाने शिताफीने पाठलाग करून त्याला जागीच बेड्या ठोकल्या.

पोलीस अधीक्षक शिरीष सरदेशपांडे यांनी दिलेल्या माहितीनुसार, आरोपी गणेश कस्पटे विरुद्ध कोरेगाव पार्क पोलीस ठाण्यात लाचलुचपत प्रतिबंधक कायद्यान्वये तसेच सरकारी कामात अडथळा आणल्याप्रकरणी गुन्हा दाखल करण्यात आला आहे. जखमी एसीबी कर्मचाऱ्यांना किरकोळ दुखापत झाली असून तक्रारदारावर उपचार सुरू आहेत.

© २०२६ मॅक्स मंथन डेली न्यूज. सर्व हक्क राखीव.

विरोधी पक्ष ही भाजपची “बी” टीम; शिवसेना (उद्धव बाळासाहेब ठाकरे) शहराध्यक्ष चेतन पवार यांची घणाघाती टीका

पिंपरी चिंचवड प्रतिनिधी बालाजी नवले, ७ मे २०२६ मॅक्स मंथन डेली न्यूज:

पिंपरी: “पिंपरी-चिंचवड महानगरपालिकेत विरोधी पक्ष आपली सक्षम भूमिका बजावण्यात अपयशी ठरला आहे. राज्यातील सत्तेत हे पक्ष भाजपसोबत सहभागी असल्याने स्थानिक पातळीवर ते भाजपची ‘बी’ टीम म्हणून काम करत आहेत,” अशी कडक टीका शिवसेना (उद्धव बाळासाहेब ठाकरे) पक्षाचे नवनियुक्त शहराध्यक्ष चेतन पवार यांनी केली.

बुधवारी पिंपरी येथे आयोजित पत्रकार परिषदेत ते बोलत होते. यावेळी उपजिल्हाप्रमुख रोमी संधू, कैलास नेवासकर, तुषार नवले, अमोल निकम, ज्ञानेश्वर शिंदे, राजाराम कुदळे, अनिता तुतारे, वैभवी घोडके यांच्यासह अनेक पदाधिकारी उपस्थित होते.

चेतन पवार यांनी महानगरपालिकेच्या कारभारावर बोट ठेवताना सांगितले की, “तत्कालीन आयुक्त शेखर सिंह यांच्या कार्यकाळात महापालिकेला कर्जबाजारी करण्याचे काम झाले आहे. नुकत्याच समोर आलेल्या ५२ कोटी रुपयांच्या कथित भ्रष्टाचाराची सखोल माहिती घेऊन शिवसेना न्यायालयात दाद मागेल. महापालिकेत शिवसेनेचे प्रतिनिधित्व नसले तरी, भ्रष्टाचारावर लक्ष ठेवण्यासाठी पक्षाचे एक स्वतंत्र प्रतिनिधी मंडळ नेमण्यात येईल.”

पत्रकार परिषदेपूर्वी, चेतन पवार यांच्या नेतृत्वाखाली पिंपरीतील डॉ. बाबासाहेब आंबेडकर पुतळा चौकात निदर्शने करण्यात आली. पुणे येथील नसरापूर आणि सहकारनगरमधील अल्पवयीन मुलींवरील अत्याचार घटनेचा शिवसेनेने तीव्र निषेध केला. या घटनांची नैतिक जबाबदारी घेऊन गृहमंत्री देवेंद्र फडणवीस यांनी राजीनामा द्यावा, अशी मागणी यावेळी करण्यात आली. तसेच भाजप आमदार चित्रा वाघ यांच्या वक्तव्याचाही निषेध करण्यात आला.

“पक्षाने माझ्यावर जो विश्वास टाकला आहे, तो मी सार्थ ठरवेन. आगामी काळात पिंपरी, चिंचवड आणि भोसरी या तिन्ही विधानसभा मतदारसंघातील जुन्या-नव्या शिवसैनिकांना एकत्र घेऊन समन्वय साधला जाईल. लवकरच समाजातील सर्व घटकांना प्रतिनिधित्व देणारी नवीन शहर कार्यकारणी जाहीर केली जाईल,” असेही पवार यांनी स्पष्ट केले.

शहरातील पाणी, वाहतूक, आरोग्य, शिक्षण आणि कायदा सुव्यवस्थेच्या प्रश्नांवर शिवसेना आता रस्त्यावर उतरून आंदोलन करणार असून भाजप आणि विरोधी पक्षांचा खरा चेहरा जनतेसमोर आणणार असल्याचे त्यांनी यावेळी सांगितले.

© २०२६ मॅक्स मंथन डेली न्यूज. सर्व हक्क राखीव.

सफाई कर्मचाऱ्यांचे प्रश्न संवेदनशीलतेने सोडवणे ही प्रशासनाची जबाबदारी; राज्य सफाई कर्मचारी आयोगाचे अध्यक्ष शेरसिंग डागोर यांचे प्रतिपादन

पिंपरी चिंचवड प्रतिनिधी लक्ष्मण प्रधान, ६ मे २०२६ मॅक्स मंथन डेली न्यूज:

पिंपरी: शहराचे सार्वजनिक आरोग्य आणि स्वच्छता टिकवून ठेवण्यात सफाई कर्मचाऱ्यांचा वाटा अत्यंत मोलाचा आहे. मात्र, काम करताना त्यांना अनेक प्रशासकीय अडचणी आणि आरोग्यविषयक धोक्यांना सामोरे जावे लागते. या कर्मचाऱ्यांच्या समस्या केवळ नोंदवून न ठेवता त्या तातडीने आणि संवेदनशीलतेने सोडवणे ही प्रशासनाची नैतिक जबाबदारी आहे, असे ठाम प्रतिपादन राज्य सफाई कर्मचारी आयोगाचे अध्यक्ष शेरसिंग डागोर यांनी केले.

पिंपरी चिंचवड महानगरपालिकेच्या मुख्य प्रशासकीय भवनातील दिवंगत महापौर मधुकरराव पवळे सभागृहात सफाई कर्मचाऱ्यांच्या समस्यांबाबत आयोजित विशेष बैठकीत ते बोलत होते. यावेळी महापौर रवि लांडगे यांनी त्यांचे स्वागत केले.

• नोडल अधिकाऱ्याची नियुक्ती: सफाई कर्मचाऱ्यांच्या तक्रारींचे जलद आणि परिणामकारक निवारण करण्यासाठी एका स्वतंत्र नोडल अधिकाऱ्याची नियुक्ती करण्याचे निर्देश डागोर यांनी दिले.

• आरोग्य आणि विमा: कर्मचाऱ्यांना कामाच्या स्वरूपामुळे विविध आजारांचा धोका असतो, त्यामुळे त्यांना ‘धन्वंतरी’ सारख्या वैद्यकीय विमा योजनांचा लाभ कोणताही आर्थिक ताण न पडता मिळणे आवश्यक आहे.

• वारसांना संधी: कर्मचाऱ्यांच्या वारसांना त्यांच्या शैक्षणिक पात्रतेनुसार रोजगाराच्या संधी उपलब्ध करून देणे ही प्रशासनाची जबाबदारी असल्याचे त्यांनी स्पष्ट केले.

• समितीची स्थापना: सफाई कर्मचाऱ्यांच्या सर्वांगीण प्रश्नांचा नियमित आढावा घेण्यासाठी आयुक्तांच्या अध्यक्षतेखाली स्वतंत्र समिती गठीत करण्याचे निर्देश देण्यात आले.

• प्रलंबित प्रकरणे: पदोन्नती, अनुकंपा तत्त्वावरील नियुक्त्या आणि लाड-पागे समितीच्या शिफारशींची अंमलबजावणी तातडीने पूर्ण करण्याच्या सूचना त्यांनी दिल्या.

आयुक्त डॉ. विजय सूर्यवंशी यांनी स्पष्ट केले की, महानगरपालिका सफाई कर्मचाऱ्यांच्या कल्याणासाठी विविध योजना प्रभावीपणे राबवत आहे. तांत्रिक आणि प्रक्रियात्मक अडचणी दूर करून प्रलंबित प्रश्न सोडवण्यासाठी प्रशासन गतीने काम करत असून, शासन निर्णयानुसार निर्णय प्रक्रिया अधिक गतिमान केली जात आहे.

या बैठकीस अतिरिक्त आयुक्त कुलदीप जंगम, विक्रांत बगाडे, सह आयुक्त मनोज लोणकर, आरोग्य वैद्यकीय अधिकारी डॉ. लक्ष्मण गोफणे, उप आयुक्त डॉ. प्रदीप ठेंगल, अण्णा बोदडे यांच्यासह विविध विभागांचे अधिकारी उपस्थित होते. तसेच सफाई कर्मचारी संघटनेचे प्रतिनिधी सागर चरण, गणेश भोसले, किशन आरडे, अनिल चावरे यांच्यासह अन्य पदाधिकारी मोठ्या संख्येने उपस्थित होते.

बैठकीच्या शेवटी, शेरसिंग डागोर यांच्या हस्ते काही कर्मचाऱ्यांना नियुक्तीपत्रे वितरित करण्यात आली.

© २०२६ मॅक्स मंथन डेली न्यूज. सर्व हक्क राखीव.

काळेवाडीतील चिमुरडीवर अत्याचार; गुन्हेगाराला काही तासांत बेड्या, तरीही पोलिसांची प्रतिमा मलिन करण्याचा लोकप्रतिनिधींचा प्रयत्न

पिंपरी चिंचवड प्रतिनिधी बालाजी नवले, ६ मे २०२६ मॅक्स मंथन डेली न्यूज:

पिंपरी: काळेवाडी परिसरात एका अल्पवयीन मुलीवर झालेल्या अत्याचाराच्या घटनेत पोलिसांनी तत्परता दाखवत आरोपीला काही तासांतच अटक केली आहे. मात्र, या प्रकरणाचे भांडवल करत काही लोकप्रतिनिधींनी पोलिसांची प्रतिमा मलिन करण्यासाठी सोशल मीडियावर चुकीची माहिती पसरवल्याचा प्रकार समोर आला आहे. या पार्श्वभूमीवर काळेवाडी पोलिसांनी अधिकृत माहिती देऊन वस्तुस्थिती मांडली आहे.

             १४ एप्रिल २०२६ रोजी पिंपरीतील वायसीएम रुग्णालयाकडून काळेवाडी पोलिसांना एमएलसी क्र. २७८१/२०२६ अन्वये माहिती प्राप्त झाली. एका चिमुरडीला आंबा देण्याचे आमिष दाखवून शेजारी राहणाऱ्या आरोपीने तिच्यावर लैंगिक अत्याचार केला होता. घटनेचे गांभीर्य ओळखून पोलिसांनी तातडीने पीडित मुलीच्या आईचा जबाब नोंदवला आणि सकाळी १०:३१ वाजता भा.न्या.सं. कलम ६४(२)(m), ६५(२) सह पोक्सो कायदा कलम ४, ६ प्रमाणे गुन्हा (रजि. नं. १५९/२०२४) दाखल केला.वरिष्ठ पोलीस अधिकाऱ्यांच्या मार्गदर्शनाखाली तपास पथकाने अवघ्या काही तासांतच आरोपी विजय पोपट भोसले (वय ४७, रा. नढेनगर, काळेवाडी) याला शोधून काढले. भोसरी उड्डाणपुलाखालून त्याला सायंकाळी १७:०२ वाजता अटक करण्यात आली.

             घटनेच्या दिवशीच आरोपी जेरबंद झालेला असताना आणि ही बातमी वर्तमानपत्रात प्रसिद्ध झाल्यानंतर तीन दिवसांनी काळेवाडीतील एका लोकप्रतिनिधींनी वरिष्ठ पोलीस निरीक्षकांची भेट घेऊन निवेदन दिले होते. मात्र, काल ५ मे २०२६ रोजी सोशल मीडियावर एक व्हिडिओ क्लिप प्रसारित करण्यात आली. यामध्ये वरिष्ठ पोलीस निरीक्षक बहिराट यांनी गुन्हा दाखल करताना ‘साक्षीदार आणा’ अशी मागणी केली आणि अरेरावीची भाषा वापरली, असा दावा करण्यात आला आहे.

               पोलिस प्रशासनाने हा दावा पूर्णपणे फेटाळून लावला आहे. “आरोपीला घटनेच्या दिवशीच अटक केलेली असताना, केवळ स्वतःची प्रसिद्धी मिळवण्यासाठी आणि पोलीस दलासह गृहविभागाची प्रतिमा मलिन करण्याच्या आकस बुद्धीने ही क्लिप प्रसारित करण्यात आली आहे,” असे स्पष्ट करण्यात आले आहे. या प्रकरणात आरोपीविरुद्ध सबळ पुरावे गोळा करून दोषारोपपत्र पाठवण्याची कार्यवाही सुरू आहे.

© २०२६ मॅक्स मंथन डेली न्यूज. सर्व हक्क राखीव.