Category:

पिंपरी चिंचवड

देवीच्या मूर्तीवरील सोन्याच्या दागिन्यांवर डल्ला मारणारी मोलकरीण जेरबंद; शिरगाव-परंदवडी पोलिसांची धडक कारवाई!

by maxmanthannews@gmail.com October 1, 2026

written by maxmanthannews@gmail.com

शिरगाव-परंदवडी पोलिसांची उल्लेखनीय कामगिरी: गौरी-गणपती उत्सवात देवीच्या मूर्तीवरून चोरीस गेलेले सोन्याचे मंगळसूत्र हस्तगत; मोलकरणीला अटक!

पिंपरी चिंचवड प्रतिनिधी लक्ष्मण प्रधान, दि. ०१ ऑक्टोबर २०२६ मॅक्स मंथन डेली न्यूज:

शिरगाव: गौरी-गणपती सणोत्सवादरम्यान घरातील एकविरा देवीच्या मूर्तीस चढवलेले तब्बल ३०.५४६ ग्रॅम वजनाचे सोन्याचे मंगळसूत्र पेंडंटसह चोरी करणाऱ्या घरकामाच्या महिलेला शिरगाव-परंदवडी पोलिसांनी अवघ्या काही दिवसांत बेड्या ठोकल्या आहेत. पोलिसांच्या गुन्हे प्रकटीकरण पथकाने कौशल्याने तपास करत चोरीस गेलेला २ लाख ८४ हजार ८४७ रुपये किमतीचा संपूर्ण मुद्देमाल हस्तगत केला आहे. या प्रकरणी गजरा सातप्पा कांबळे (वय ४५ वर्षे, रा. जिजामाता चौकाजवळ, आकुर्डी रेल्वे स्टेशनजवळ, आकुर्डी, पुणे) असे अटक करण्यात आलेल्या आरोपी महिलेचे नाव आहे.

शिरगाव-परंदवडी पोलीस ठाण्यात दि. २६ सप्टेंबर २०२६ रोजी तक्रारदाराने उपस्थित राहून फिर्याद दिली होती की, गौरी-गणपती सणाच्या निमित्ताने घरातील एकविरा देवीच्या मूर्तीस घातलेले सोन्याचे मंगळसूत्र पेंडंटसह चोरीस गेले आहे. प्राप्त तक्रारीवरून शिरगाव-परंदवडी पोलीस ठाण्यात गु.र.नं. २८०/२०२६ भारतीय न्याय संहिता (BNS) कलम ३०५ अन्वये तत्काळ गुन्हा दाखल करण्यात आला होता.

गुन्ह्याचे गांभीर्य लक्षात घेऊन शिरगाव-परंदवडी पोलीस ठाण्याचे वरिष्ठ पोलीस निरीक्षक देवेंद्र चव्हाण यांच्या सूचना व मार्गदर्शनानुसार गुन्हे प्रकटीकरण पथकाने तपास सुरू केला. फिर्यादीच्या घरी घरकामासाठी येणाऱ्या महिलेवर संशय आल्याने पोलिसांनी तिच्या मानसिकतेचा अचूक अंदाज घेत कौशल्यपूर्ण पद्धतीने चौकशी केली. पोलिसांच्या खाकीचा खाक्या दाखवताच सदर महिलेनेच सोन्याचे मंगळसूत्र चोरी केल्याची कबुली दिली.

पोलिसांनी तात्काळ आरोपी महिला गजरा कांबळे हिला अटक करून न्यायालयात हजर केले असता, माननीय न्यायालयाने तिला ३० सप्टेंबर २०२६ पर्यंत पोलीस कोठडी सुनावली होती. पोलीस कोठडीदरम्यानच्या तपासात आरोपीकडून २,८४,८४७ रुपये किमतीचे ३०.५४६ ग्रॅम वजनाचे सोन्याचे मंगळसूत्र पेंडंटसह हस्तगत करण्यात आले आहे.

सदर कौतुकास्पद कारवाई पिंपरी-चिंचवडचे पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आवाड, अपर पोलीस आयुक्त (प्रादेशिक विभाग) बसवराज तेली, पोलीस उपायुक्त परिमंडळ ०४ श्रीमती श्वेता खेडकर व सहाय्यक पोलीस आयुक्त देहूरोड विभाग प्रवीण मोरे यांच्या मार्गदर्शनाखाली पार पडली.

तसेच वरिष्ठ पोलीस निरीक्षक देवेंद्र चव्हाण, पोलीस उपनिरीक्षक प्रकाश पारखे, पोलीस हवालदार किशोर गिरीगोसावी, सचिन काचोळे, पोलीस अंमलदार प्रसाद जंगीलवाड, दिलीप राठोड आणि सागर कोळी यांच्या पथकाने ही कामगिरी केली.

© २०२६ मॅक्स मंथन डेली न्यूज. सर्व हक्क राखीव.

October 1, 2026 0 comments

‘स्वीकार, समाधान अन् संयम…’; प्रा. पद्माकर पुंडे यांनी सांगवीत मांडली आनंदी जीवनाची ‘पंचसूत्री’!

by maxmanthannews@gmail.com October 1, 2026

written by maxmanthannews@gmail.com

ज्येष्ठांनी सायबर गुन्हेगारीपासून सावध राहावे: सांगवीत जागतिक ज्येष्ठ नागरिक दिनानिमित्त विशेष कार्यक्रम संपन्न!

सांगवी प्रतिनिधी सुनील पोकरे, दि. ०१ ऑक्टोबर २०२६ मॅक्स मंथन डेली न्यूज:

सांगवी: ‘जागतिक ज्येष्ठ नागरिक दिना’चे औचित्य साधून यश ज्येष्ठ नागरिक संघ, चंद्रमणीनगर, सांगवी यांच्या वतीने विविध उपक्रमांचे आयोजन करण्यात आले होते. या कार्यक्रमाला प्रमुख पाहुण्या म्हणून सांगवीच्या नगरसेविका तथा पिंपरी-चिंचवड महानगरपालिकेच्या ‘ह’ प्रभाग अध्यक्षा तृप्तीताई कांबळे आणि माजी नगरसेवक संतोष कांबळे उपस्थित होते. कार्यक्रमात पिंपरी-चिंचवड पोलीस आयुक्तालयाच्या सायबर गुन्हे विभागातील अधिकाऱ्यांनी उपस्थितांना सायबर सुरक्षेबाबत मार्गदर्शन केले, तर प्रा. पद्माकर पुंडे यांनी आनंदी जीवनाची पंचसूत्री मांडली.

कार्यक्रमाच्या पहिल्या सत्रात पिंपरी-चिंचवड पोलीस आयुक्तालयाच्या सायबर गुन्हे विभागातील पोलीस उपनिरीक्षक रोहित डोळस यांनी सायबर धोके, ऑनलाइन फसवणूक, सुरक्षित डिजिटल बँकिंग व्यवहार, वैयक्तिक व आर्थिक माहितीची सुरक्षितता तसेच ऑनलाइन सुरक्षित राहण्यासाठी घ्यावयाची खबरदारी यावर सविस्तर मार्गदर्शन केले.

तसेच पोलीस फौजदार राजाराम शेळके यांनी सांगितले की, “सायबर गुन्हा किंवा आर्थिक फसवणूक झाल्यास नागरिकांनी विलंब न करता तात्काळ १९३० या राष्ट्रीय सायबर क्राईम हेल्पलाइन क्रमांकावर संपर्क साधावा. वेळीच तक्रार नोंदवल्यास फसवणूक झालेली रक्कम ब्लॉक करणे व पुढील कारवाई करणे सुलभ होते.”

कार्यक्रमाच्या दुसऱ्या सत्रात महाराष्ट्र राज्य ज्येष्ठ नागरिक संघाचे माजी अध्यक्ष व प्राचार्य पद्माकर पुंडे यांनी ‘आनंदी जीवनाची पंचसूत्री’ या विषयावर व्याख्यान दिले. सांगवीचे सामाजिक कार्यकर्ते सुनील पोकरे यांनी त्यांचा परिचय करून दिला. प्रा. पुंडे यांनी ज्येष्ठांना तणावमुक्त व आनंदी जगण्यासाठी खालील पाच सूत्रे सांगितली- १. आपल्याला जीवनात जे मिळाले आहे, त्याचा सहज स्वीकार करावा. २. प्रत्येक परिस्थितीत माणसाने समाधानी राहावे. ३. आयुष्यात आवश्यक तिथे तडजोड करायला शिकावे. ४. नात्यांमध्ये व समाजात सहनशीलता बाळगावी. ५. कठीण प्रसंगात जीवनात संयम ठेवण्यास शिकावे.

कार्यक्रमादरम्यान ज्येष्ठ सभासद विष्णू पगारे, टेकाडे, पाटील आणि विजय सोनवणे यांचे केक कापून वाढदिवस उत्साहात साजरे करण्यात आले. त्यांना आठवण म्हणून फाउंटन पेन भेट देण्यात आले. या सोहळ्याला संघाचे अध्यक्ष चंद्रकांत बाराथे, उपाध्यक्ष त्रिंबक देशमुख, कार्याध्यक्ष सूर्यकांत वराडकर, सचिव बाळासाहेब सोनावणे, खजिनदार दयानेश्वर शिंगाडे यांच्यासह ६० ते ७० ज्येष्ठ नागरिक उपस्थित होते. कार्यक्रमाचे सूत्रसंचालन सचिव बाळासाहेब सोनवणे यांनी केले, तर आभारप्रदर्शन प्रकाश भालेराव यांनी मानले. कार्यक्रमानंतर सर्व उपस्थितांना अल्पोपाहार व चहाचे वितरण करण्यात आले.

© २०२६ मॅक्स मंथन डेली न्यूज. सर्व हक्क राखीव.

October 1, 2026 0 comments

पिंपरी चिंचवड मुख्यपृष्ठ

‘इतर ठेकेदारांना अभय, मग तृतीयपंथीयांवरच अन्याय का?’; पिंपरी-चिंचवड महापालिकेत प्रशासकीय अन्यायाविरोधात संतापाची लाट!

by maxmanthannews@gmail.com October 1, 2026

written by maxmanthannews@gmail.com

पिंपरी-चिंचवड महापालिकेत संतापजनक प्रकार; तत्कालीन आयुक्तांनी मुख्य प्रवाहात आणलेल्या १६ तृतीयपंथी ‘ग्रीन मार्शल’ कर्मचाऱ्यांवर प्रशासनाकडून बेरोजगारीची कुऱ्हाड?

पिंपरी चिंचवड प्रतिनिधी बालाजी नवले, दि. ०१ ऑक्टोबर २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेमध्ये सामाजिक समता जोपासत उपेक्षित तृतीयपंथी समाजाला मुख्य प्रवाहात आणण्यासाठी एक अत्यंत कौतुकास्पद व ऐतिहासिक पाऊल उचलण्यात आले होते. महापालिकेचे तत्कालीन आयुक्त राजेश पाटील यांच्या कार्यकाळात आरोग्य विभागांतर्गत सुरक्षा रक्षक व ‘ग्रीन मार्शल’ म्हणून १६ तृतीयपंथी कर्मचाऱ्यांची नियुक्ती करण्यात आली होती. या निर्णयाचे संपूर्ण शहरातून कौतुक झाले होते. मात्र, गेल्या तीन वर्षांपासून महापालिकेत कार्यरत असणारे प्रशासन अधिकारी तथा उपायुक्त डॉ. प्रदीप ठेंगल यांच्या मनमानी व उदासीन कारभारामुळे आज या तृतीयपंथी कर्मचाऱ्यांवर थेट बेरोजगारीची कुऱ्हाड कोसळल्याचा संतापजनक प्रकार समोर आला आहे.

गेल्या तीन वर्षांपासून अत्यंत प्रामाणिकपणे काम करणाऱ्या या १६ कर्मचाऱ्यांना अचानक कामावरून काढून टाकण्याचा घाट घातला जात असल्याने महापालिका मुख्यालयात प्रशासनाविरोधात तीव्र संतापाची लाट उसळली आहे.

पिंपरी-चिंचवड महापालिकेच्या आरोग्य विभागात विविध प्रभागांमध्ये काम करणाऱ्या इतर बड्या ठेकेदारांची मुदत संपल्यानंतर त्यांना कोणतीही अडकाठी न करता वेळोवेळी मुदतवाढ (Extension) दिली जाते. परंतु, अत्यंत हलाखीच्या परिस्थितीतून बाहेर पडून स्वाभिमानाने स्वतःचे पोट भरणाऱ्या या १६ कर्मचाऱ्यांच्या आणि प्रामुख्याने १६ तृतीयपंथी ‘ग्रीन मार्शल’ कर्मचाऱ्यांच्या कामाचा कोणताही योग्य आढावा न घेता किंवा पूर्वसूचना न देता त्यांची मुदतवाढ रोखून धरण्यात आली आहे.

इतर ठेकेदारांना तावातावाने मुदतवाढ देणारे अधिकारी डॉ. प्रदीप ठेंगल हे केवळ या तृतीयपंथी कर्मचाऱ्यांच्या सेवावाढीबाबतच जाणूनबुजून टाळाटाळ करत आहेत. या दुटप्पी भूमिकेमुळे, “इतर ठेकेदारांकडून काही ‘अर्थपूर्ण’ व्यवहार (मलई) उकळले जात आहेत का आणि म्हणूनच या उपेक्षित घटकावर अन्याय केला जात आहे का?” असा थेट आणि संतप्त सवाल आता पालिकेच्या वर्तुळात उपस्थित केला जात आहे.

तृतीयपंथी समाज हा आधीच सामाजिक, आर्थिक आणि मानसिक उपेक्षेचा सामना करत असतो. अशा परिस्थितीत तत्कालीन आयुक्त राजेश पाटील यांनी घेतलेल्या या निर्णयामुळे या कर्मचाऱ्यांना समाजात सन्मानाने जगण्याचा आणि रोजगाराचा मुख्य आधार मिळाला होता. मात्र, प्रशासकीय लालफितीचा कारभार आणि अधिकाऱ्यांच्या संवेदनहीन भूमिकेमुळे माजी आयुक्तांच्या एका चांगल्या आणि लोककल्याणकारी निर्णयाला हरताळ फासण्याचे काम सुरू आहे.

या दुर्दैवी प्रकरणाची महापालिका प्रशासनाने तातडीने दखल घेऊन या तृतीयपंथी कर्मचाऱ्यांना तात्काळ सेवावाढ द्यावी आणि त्यांच्यावर अन्याय करणाऱ्या अधिकाऱ्यांची सखोल चौकशी करावी, अशी मागणी आता जोर धरू लागली आहे.

पिंपरी-चिंचवड महानगरपालिकेचे अतिरिक्त आयुक्त जंगम साहेब आणि आयुक्त डॉ. विजय सूर्यवंशी या गंभीर प्रकरणाकडे किती गांभीर्याने लक्ष देतात, प्रशासकीय पातळीवरील या त्रुटी किती दिवसांत दूर करून या उपेक्षित कर्मचाऱ्यांना न्याय देतात, याकडे संपूर्ण पिंपरी-चिंचवड शहरातील नागरिकांचे लक्ष लागून राहिले आहे.

© २०२६ मॅक्स मंथन डेली न्यूज. सर्व हक्क राखीव.

October 1, 2026 0 comments

पिंपरी चिंचवड मुख्यपृष्ठ

‘वेळेत कर भरा अन् जप्तीची कारवाई टाळा’; पिंपरी-चिंचवड महापालिका प्रशासनाचा थकबाकीदारांना कडक इशारा!

by maxmanthannews@gmail.com September 30, 2026

written by maxmanthannews@gmail.com

ऑनलाइन मालमत्ता कर भरून ४ टक्के सवलत मिळवण्याचा आज शेवटचा दिवस; थकीत करासाठी जप्तीची कारवाई तीव्र होणार!

पिंपरी चिंचवड प्रतिनिधी लक्ष्मण प्रधान , दि. २९ सप्टेंबर २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या कर संकलन व कर आकारणी विभागामार्फत आर्थिक वर्ष २०२६-२७ मधील दुसऱ्या तिमाहीसाठी मालमत्ताधारकांना दिल्या जाणाऱ्या ४ टक्के सवलतीचा लाभ घेण्याचा आज, बुधवार दि. ३० सप्टेंबर २०२६ रोजी शेवटचा दिवस आहे. आज रात्री १२ वाजेपर्यंत ऑनलाइन पद्धतीने मालमत्ता कराचा भरणा करणाऱ्या नागरिकांना सामान्य करात ४ टक्के सवलत मिळणार आहे. त्यामुळे नागरिकांनी अंतिम मुदतीपूर्वी कर भरून सवलतीचा लाभ घ्यावा, असे आवाहन प्रशासनाने केले आहे.

दरम्यान, ३० सप्टेंबरनंतर थकीत मालमत्ता कराच्या वसुलीसाठी महापालिकेकडून जप्तीची मोहीम अत्यंत प्रभावीपणे राबवली जाणार आहे. मोठ्या प्रमाणात कर थकीत असलेल्या औद्योगिक, बिगरनिवासी, मिश्र तसेच इतर मालमत्तांवर नियमानुसार जप्तीची कडक कारवाई केली जाणार असल्याने थकबाकीदारांनी संभाव्य कारवाई टाळण्यासाठी थकीत कर तात्काळ भरावा, असा इशारा महापालिकेने दिला आहे.

१ जुलै २०२६ ते ३० सप्टेंबर २०२६ या कालावधीत ५० हजारांहून अधिक मालमत्ताधारकांनी ४ टक्के ऑनलाइन सवलतीचा यशस्वीरीत्या लाभ घेतला आहे. ऑनलाइन कर भरण्याच्या सुविधेला नागरिकांकडून अभूतपूर्व प्रतिसाद मिळत असून, ही प्रक्रिया अत्यंत सुलभ आणि पारदर्शक करण्यात आली आहे. १ एप्रिल २०२६ ते २९ सप्टेंबर २०२६ दुपारी २ वाजेपर्यंत शहरातील ४ लाखांहून अधिक नागरिकांनी तब्बल ६०१ कोटी रुपयांचा मालमत्ता कर भरून महापालिकेच्या तिजोरीत मोलाचा वाटा उचलला आहे.

“मालमत्ता कर हा शहराच्या सर्वांगीण विकासाचा मुख्य आर्थिक स्रोत आहे. नागरिकांनी ३० सप्टेंबरपूर्वी ऑनलाइन मालमत्ता कराचा भरणा करून ४ टक्के सवलतीचा लाभ घ्यावा. वेळेत कर भरल्यास महापालिकेला पायाभूत सुविधा आणि नागरी सेवा अधिक प्रभावीपणे उपलब्ध करून देणे शक्य होते.”

— डॉ. विजय सूर्यवंशी, आयुक्त, पिंपरी-चिंचवड महानगरपालिका

“थकबाकीदार नागरिकांनी जप्तीच्या कारवाईची प्रतीक्षा न करता ३० सप्टेंबरपूर्वी थकीत कराचा भरणा करावा. ३० सप्टेंबरनंतर थकीत औद्योगिक, बिगरनिवासी, मिश्र आणि इतर मालमत्तांवर कडक जप्तीची कारवाई केली जाईल. तसेच चालू कराचा ऑनलाइन भरणा करून ४ टक्के सवलतीचा लाभ घ्यावा.”

— सचिन पवार, उपायुक्त, पिंपरी-चिंचवड महानगरपालिका

© २०२६ मॅक्स मंथन डेली न्यूज. सर्व हक्क राखीव.

September 30, 2026 0 comments

पिंपरी चिंचवड मुख्यपृष्ठ

‘राष्ट्र प्रथम भावनेने कामगारांच्या हक्कासाठी लढा’; चिंचवडमधील मेळाव्यात युवा नेते अनुप मोरे यांचे आक्रमक प्रतिपादन!

by maxmanthannews@gmail.com September 30, 2026

written by maxmanthannews@gmail.com

माथाडी कामगारांचे सक्षम नेतृत्व: युवा नेते अनुप मोरे यांच्या नेतृत्वाखाली चिंचवडमध्ये राज्यस्तरीय मेळावा संपन्न; भाजपा प्रदेशाध्यक्ष रवींद्र चव्हाण यांच्याकडून कौतुक!

पिंपरी चिंचवड प्रतिनिधी आकाश कांबळे, दि. २९ सप्टेंबर २०२६ मॅक्स मंथन डेली न्यूज:

पिंपरी: आपल्या धडाडीच्या आणि अभ्यासू नेतृत्वाच्या जोरावर संपूर्ण महाराष्ट्रात कार्यकर्त्यांचे भक्कम जाळे निर्माण करणारे युवा नेते अनुप मोरे यांच्या नेतृत्वाखाली चिंचवड येथे ‘भारतीय जनता माथाडी ट्रान्सपोर्ट आणि सुरक्षारक्षक, जनरल कामगार युनियन’ (रजि.) चा भव्य राज्यस्तरीय पदाधिकारी मेळावा अत्यंत उत्साहात संपन्न झाला. अल्पावधीत १५ हजारांहून अधिक सदस्यांची नोंदणी करून कामगार क्षेत्रात स्वतःचा वेगळा ठसा उमटवणाऱ्या अनुप मोरे यांच्या पाठीशी भारतीय जनता पार्टी पूर्ण ताकतीने उभी राहील, असा विश्वास भाजपा प्रदेशाध्यक्ष रवींद्र चव्हाण यांनी व्यक्त केला.

कामगारांच्या हक्कासाठी अहोरात्र धावून जाणारे अनुप मोरे यांच्या या यशस्वी मेळाव्यामुळे महाराष्ट्रभरात आणि पक्ष संघटनेत त्यांच्या नेतृत्वाची पुन्हा एकदा जोरदार चर्चा सुरू झाली आहे.

मेळाव्यात मार्गदर्शन करताना भाजपा प्रदेशाध्यक्ष रवींद्र चव्हाण म्हणाले, “पूर्वीच्या जुन्या कामगार कायद्यांमधील त्रुटींचा फायदा घेऊन कामगारांना अडचणीत आणले जात होते. मात्र, पंतप्रधान नरेंद्र मोदी यांनी कामगार कायद्यांत क्रांतिकारी सुधारणा करून कामगारांना खऱ्या अर्थाने न्याय दिला. आता ई-श्रम, पीएफ आणि आभा कार्डद्वारे संपूर्ण कुटुंबाला आरोग्य विम्याचे कवच मिळत आहे. या सरकारी योजनांचा लाभ तळागाळातील कामगारांपर्यंत पोहोचवण्याचे काम अनुप मोरे अत्यंत सक्षमपणे करत आहेत.”

ते पुढे म्हणाले, “अनुप मोरे यांच्या युनियनच्या लोगोमध्ये राष्ट्रमातेचा समावेश असून, ते ‘राष्ट्र प्रथम’ हीच भावना जपून काम करत आहेत. अल्पावधीत १५ हजार सदस्यांची नोंदणी करणे ही अनुप मोरे यांच्या संघटन कौशल्याची पोचपावती आहे. त्यांच्या ५० हजार सदस्य नोंदणीच्या ध्येयासाठी भाजपा पूर्ण ताकतीने सोबत असेल.”

मेळाव्याचे प्रास्ताविक आणि स्वागत करताना युनियनचे संस्थापक अध्यक्ष अनुप मोरे यांनी अत्यंत भावनिक व आक्रमक विचार मांडले. ते म्हणाले, “पक्षाच्या ध्येय-धोरणांनुसार २०१४ मध्ये स्थापन झालेल्या या संघटनेने आज संपूर्ण महाराष्ट्रात १५ हजार सभासदांचा टप्पा पार केला आहे. २०२९ मध्ये राज्य आणि केंद्रात पुन्हा एकदा पूर्ण बहुमताने भाजपचे सरकार आणण्यासाठी आमची माथाडी युनियन ५० हजार सभासद नोंदणीचे ध्येय पूर्ण करेल, असा शब्द मी प्रदेशाध्यक्षांना देतो.”

आपल्या कार्यकर्त्यांचे जाळे आणि कामगारांच्या पाठिंब्याचा उल्लेख करत मोरे पुढे म्हणाले, “पक्षाने आणि वरिष्ठ नेत्यांनी माझ्यावर प्रदेश पातळीवर काम करण्याची जी जबाबदारी सोपवली आहे, त्याचे सोने करून कामगारांच्या अन्यायाविरुद्ध सातत्याने लढत राहीन. कामगारांनी माझ्यावर दाखवलेला विश्वास मी कधीही तुटू देणार नाही.”

या राज्यस्तरीय मेळाव्याप्रसंगी नवनिर्वाचित पदाधिकाऱ्यांचा सत्कार करण्यात आला. या सोहळ्याला पिंपरी-चिंचवडचे महापौर रवि लांडगे, भाजपा शहराध्यक्ष शत्रुघ्न काटे, आमदार महेश दादा लांडगे, आमदार शंकर जगताप, आमदार उमाताई खापरे, पक्षनेते प्रशांत शितोळे, उपमहापौर शर्मिलाताई बाबर, माजी उपमहापौर तुषार हिंगे, विजय हरगुडे, जयदीप खापरे, नगराध्यक्ष संतोष दाभाडे, अक्षय वरघडे, राकेश सणस, वसीम शेख यांच्यासह संपूर्ण महाराष्ट्रातून आलेले हजारो माथाडी कामगार व कार्यकर्ते मोठ्या संख्येने उपस्थित होते. कार्यक्रमाचे प्रास्ताविक ॲड. विजय हरगुडे यांनी केले, सूत्रसंचालन अक्षय मोरे यांनी तर उपस्थितांचे आभार संतोष कांबळे यांनी मानले.

© २०२६ मॅक्स मंथन डेली न्यूज. सर्व हक्क राखीव.

September 30, 2026 0 comments

पिंपरी चिंचवड मुख्यपृष्ठ

पीसीईटीच्या एसबीपीसीओएडी महाविद्यालयात ४३ गुणवंत अन् माजी विद्यार्थ्यांचा सन्मान; नूतन विद्यार्थी परिषदही जाहीर!

by maxmanthannews@gmail.com September 30, 2026

written by maxmanthannews@gmail.com

एसबीपीसीओएडी महाविद्यालयात विद्यार्थ्यांचा गुणगौरव सोहळा उत्साहात संपन्न; ज्येष्ठ वास्तुविशारद डॉ. महेश नामपूरकर यांचे मार्गदर्शन!

पिंपरी चिंचवड प्रतिनिधी बालाजी नवले, दि. २९ सप्टेंबर २०२६ मॅक्स मंथन डेली न्यूज:

पिंपरी: आंतरराष्ट्रीय स्तरावर वास्तुविशारद (आर्किटेक्चर) क्षेत्रात मोठी स्पर्धा असली, तरी भारतात या क्षेत्रात नवनवीन संधींची मोठी कवाडे उघडी आहेत. जिथे कमतरता असते, तिथेच संधी निर्माण होते. याचा सकारात्मक उपयोग करून विद्यार्थ्यांनी जिद्दीच्या जोरावर आपले करिअर घडवावे, असे प्रेरक मार्गदर्शन ज्येष्ठ वास्तुविशारद व आंतरराष्ट्रीय लँडस्केप डिझायनर डॉ. महेश नामपूरकर यांनी केले.

पिंपरी चिंचवड एज्युकेशन ट्रस्टच्या एस. बी. पाटील कॉलेज ऑफ आर्किटेक्चर अँड डिझाईन (एसबीपीसीओएडी) महाविद्यालयात शैक्षणिक वर्ष २०२५-२६ मधील ‘बॅचलर ऑफ आर्किटेक्ट’च्या यशस्वी विद्यार्थ्यांचा गुणगौरव सोहळा व पारितोषिक वितरण कार्यक्रम आयोजित करण्यात आला होता. त्यावेळी ते प्रमुख पाहुणे म्हणून बोलत होते.

या प्रसंगी इंडियन इन्स्टिट्यूट ऑफ आर्किटेक्ट्स (पुणे सेंटर) चे चेअरमन आर्किटेक्ट शितेश अग्रवाल, एसबीपीसीओएडीच्या प्राचार्या डॉ. स्मिता सूर्यवंशी, यशस्वी विद्यार्थी व प्राध्यापक मोठ्या संख्येने उपस्थित होते.

आपल्या मार्गदर्शनात डॉ. नामपूरकर पुढे म्हणाले की, “वास्तुशास्त्र हा एक अतिशय सुंदर आणि सर्जनशील व्यवसाय आहे. हे क्षेत्र विद्यार्थ्यांना स्वतंत्रपणे काम करण्याचे सामर्थ्य आणि आत्मविश्वास देते. आपल्याला कुठे स्थायिक व्हायचे आहे याची निवड करण्याचे स्वातंत्र्य या क्षेत्रामुळे मिळते. तसेच हे क्षेत्र देशसेवा करण्याचे एक उत्तम माध्यम आहे.” कार्यक्रमादरम्यान विद्यार्थ्यांनी तयार केलेल्या विशेष माहिती पुस्तिकेचे प्रकाशन मान्यवरांच्या हस्ते करण्यात आले.

सर्वोत्तम विद्यार्थी प्रेरणा चषक मध्ये माजी विद्यार्थिनी आर्किटेक्ट हरश्री नखरानी यांना सन २०२५ चा सर्वोत्तम विद्यार्थी प्रेरणा चषक देऊन गौरविण्यात आले. MPSC मध्ये असिस्टंट टाऊन प्लॅनरपदी निवड झाल्याबद्दल काजल थिटे यांचा विशेष सत्कार करण्यात आला. FOAID यंग वुमन अचीव्हर ऑफ द इयर (हॉस्पिटॅलिटी) मध्ये अंकिता पाटील , स्ट्राईड मेक स्पेस डिझाईन स्पर्धेत दिशा प्रधान आणि आदर्श प्रधान, ‘स्कार्स ऑफ इंडिया – द अनटोल्ड बॅटल्स’ या पुस्तकासाठी स्वरा मुसळे आणि ‘कलर्स ऑफ धर्म’ या कलरिंग बुकसाठी गार्गी साठे यांना सन्मानित करण्यात आले. पर्यावरण, शाश्वतता, वादविवाद, पोस्टर डिझाईन, बर्ड हाऊस डिझाईन आणि फोटोग्राफी स्पर्धेत यश मिळवल्याबद्दल ओमकुमार बागले, जानवी भोसले, दिशा प्रधान, सिद्धी सावंत, भार्गवी पोहणे, आदित्य काळे, कृतिका चनी, प्रतिभा काकडे व सानिका काळे यांचा सत्कार झाला. कॅम्प फोटोग्राफी स्पर्धेत प्रथम – राधिका मंत्री, द्वितीय – सानिका सुतार, तृतीय – संदली मेंधळकर; तर विशेष सहभागाबद्दल मृदुल मारळ, मृण्मयी चौधरी व ऐश्वर्या जाधव यांचा गौरव करण्यात आला.

या सोहळ्यात शैक्षणिक वर्ष २०२५-२६ मधील एकूण ४३ गुणवंत विद्यार्थी आणि विविध क्षेत्रात नावलौकिक मिळवलेल्या माजी विद्यार्थ्यांचा यथोचित सन्मान करण्यात आला. कार्यक्रमात शैक्षणिक वर्ष २०२६-२७ च्या नूतन विद्यार्थी परिषदेच्या पदाधिकाऱ्यांचाही सत्कार करण्यात आला. यामध्ये अध्यक्ष अमोद भेगडे, उपाध्यक्ष मृण्मयी चौधरी, सचिव कुशा गोयल, सांस्कृतिक प्रमुख सायली केसकर, क्रीडा प्रमुख मृदुल मारळ यांच्यासह विविध क्लबच्या नवनिर्वाचित पदाधिकाऱ्यांचा सन्मान करण्यात आला.

विद्यार्थ्यांच्या या उज्ज्वल यशाबद्दल पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर आणि कार्यकारी संचालक डॉ. गिरीश देसाई यांनी सर्व यशस्वी विद्यार्थ्यांचे अभिनंदन केले.

कार्यक्रमाच्या यशस्वी आयोजनासाठी अजय हरताळे, अंतर्गत वरिष्ठ पर्यवेक्षक ऋजुता पाठक, लक्ष्मण तोरगळे आणि किसन काळे यांनी विशेष परिश्रम घेतले. सोहळ्याचे सूत्रसंचालन प्रा. शिवा शिशोविया व प्रा. दक्षा देशमुख यांनी केले, तर उपस्थितांचे आभार प्राचार्या डॉ. स्मिता सूर्यवंशी यांनी मानले.

© २०२६ मॅक्स मंथन डेली न्यूज. सर्व हक्क राखीव.

September 30, 2026 0 comments

पिंपरी चिंचवड मुख्यपृष्ठ

‘बोगस उपसूचना घोटाळ्यातील दोषींना पाठीशी घालू नका’; मारुती भापकर यांचे स्थायी समिती सभापती बारणे व आयुक्तांना पत्र!

by maxmanthannews@gmail.com September 29, 2026

written by maxmanthannews@gmail.com

पिंपरी-चिंचवड मनपातील ६० कोटींच्या बोगस उपसूचना घोटाळ्याविरोधात मारुती भापकर आक्रमक; दोषींवर फौजदारी गुन्हे दाखल करण्याची मागणी!

पिंपरी चिंचवड प्रतिनिधी लक्ष्मण प्रधान, दि. २९ सप्टेंबर २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेतील पारदर्शक कारभारासाठी आणि भ्रष्टाचाराविरोधात गेली अनेक वर्षे सातत्याने लढा देणारे ज्येष्ठ सामाजिक कार्यकर्ते तथा माजी नगरसेवक मारुती साहेबराव भापकर यांनी पुन्हा एकदा महापालिकेतील ६० कोटी १८ लाख रुपयांच्या बोगस उपसूचना व वित्तीय गैरव्यवहाराविरोधात आक्रमक भूमिका घेतली आहे. या महाघोटाळ्यातील दोषींवर तात्काळ फौजदारी गुन्हे (FIR) दाखल करण्यात यावेत, अशी ठाम मागणी करत भापकर यांनी स्थायी समिती सभापती अभिषेक बारणे आणि पालिका आयुक्त विजय सूर्यवंशी यांना जाहीर पत्र दिले आहे.

जनसामान्यांच्या आणि करदात्या नागरिकांच्या हक्काच्या पैशांचे होणारे नुकसान रोखण्यासाठी मारुती भापकर यांनी उचललेल्या या पावसामुळे पालिका वर्तुळात आणि नागरिकांमध्ये त्यांच्या लोकहितैषी आणि आक्रमक प्रतिमेची पुन्हा एकदा जोरदार चर्चा सुरू झाली आहे.

मारुती भापकर यांनी पत्रात नमूद केल्यानुसार, पिंपरी-चिंचवड महानगरपालिकेचे सन २०२६-२०२७ चे अधिकृत बजेट २४ मार्च २०२६ रोजी महापालिका सभेत मंजुरी देऊन लॉक करण्यात आले होते. स्थायी समितीने यापूर्वीच सुमारे ४५० कोटींच्या उपसूचना स्वीकारल्या होत्या. असे असतानाही, बजेट मंजूर व लॉक झाल्यानंतर काही अधिकारी, ठेकेदार, सल्लागार आणि नगरसेवकांनी संगनमत करून तब्बल २० वादग्रस्त उपसूचनांवर मागाहून स्वाक्षऱ्या घेतल्या.

उपवर्गीकरण वाढ व घट या नावाखाली नगरसेवकांच्या बोगस उपसूचनांच्या आधारे तब्बल ६० कोटी १८ लाख रुपयांच्या बिलांची बेकायदेशीर अदागी ६० ते ७० ठेकेदारांना करण्यात आली. विशेष म्हणजे, या प्रकरणी स्थापन करण्यात आलेल्या चौकशी समितीच्या अहवालातही एकूण २० पैकी १७ उपसूचना पूर्णपणे अवैध असल्याचे स्पष्ट झाले आहे.

केवळ उपसूचनाच नव्हे, तर मुख्य लेखापाल प्रवीण जैन आणि संबंधित अधिकाऱ्यांनी महापालिकेच्या तब्बल १८०० कोटी रुपयांच्या ठेवी बँकेत ठेवताना कोणतीही स्पर्धा होऊ दिली नाही. बँकेचे लिफाफे उघडताना नियमांची पायमल्ली केली आणि पुनर्गुंतवणुकीत विलंब केला. यामुळे पालिकेचे आणि करदात्यांचे सुमारे ७ कोटी रुपयांपेक्षा जास्त आर्थिक नुकसान झाल्याचा घणाघाती आरोप भापकर यांनी चौकशी अहवालाच्या आधारे केला आहे.

२३ सप्टेंबर २०२६ च्या तहकूब स्थायी समिती सभेतील विषय क्रमांक ४ (वाढ-घट करणे कामी महापालिका सभेकडे शिफारस करणे) या विषयाला मंजुरी देण्यापूर्वी कठोर कारवाया कराव्यात. बोगस उपसूचनांमध्ये सामील असणारे मुख्य लेखापाल प्रवीण जैन, उपलेखापाल, संबंधित विभागाचे कनिष्ठ अभियंता, उपअभियंता, कार्यकारी अभियंता आणि शहर अभियंता यांच्यावर फौजदारी गुन्हे दाखल व्हावेत. संगनमताने बोगस बिले लाटणाऱ्या ६० ते ७० ठेकेदार आणि सल्लागारांवर एफआयआर (FIR) दाखल करावा. बोगस उपसूचनांवर स्वाक्षऱ्या करणाऱ्या आणि संगनमत करणाऱ्या नगरसेवकांवर फौजदारी गुन्हे नोंदवले जावेत. बँक ठेवींच्या गैरव्यवहारात पालिकेचे ७ कोटींहून अधिक नुकसान करणाऱ्या अधिकाऱ्यांच्या वैयक्तिक खाजगी मालमत्ता जप्त करून नुकसानभरपाई वसूल करावी. सर्व ६० ते ७० कामांची निविदेप्रमाणे प्रत्यक्ष पाहणी, दर्जा तपासणी आणि मोजमाप पुस्तिकेची (MB Book) सखोल तांत्रिक चौकशी करण्याचे आदेश दिले जावेत.

पिंपरी-चिंचवड शहरात जेव्हा जेव्हा प्रशासकीय दडपशाही किंवा भ्रष्टाचाराचे प्रकरण समोर येते, तेव्हा माजी नगरसेवक मारुती भापकर हेच सर्वप्रथम सामान्य नागरिकांच्या बाजूने खंबीरपणे उभे राहतात. कोणतीही राजकीय तडजोड न करता, पुराव्यांसह प्रशासनाला धारेवर धरण्याची त्यांची शैली शहरभरात परिचित आहे. ६० कोटींच्या या घोटाळ्यातही भापकर यांनी १० आणि १६ एप्रिल २०२६ रोजीच संत तुकारामनगर पोलीस ठाणे आणि पोलीस आयुक्तांकडे पुराव्यांसह तक्रारी दाखल केल्या होत्या.

त्यांच्या या सातत्यपूर्ण आणि निर्भीड पाठपुराव्यामुळेच महापालिकेतील कोट्यवधींचा भ्रष्टाचार चव्हाट्यावर आला असून, शहरातील नागरिक मारुती भापकर यांच्या या जनहितैषी कामगिरीचे भरभरून कौतुक करत आहेत.

© २०२६ मॅक्स मंथन डेली न्यूज. सर्व हक्क राखीव.

September 29, 2026 0 comments

पिंपरी चिंचवड मुख्यपृष्ठ

पिंपरी-चिंचवडमध्ये राष्ट्रवादी शरदचंद्र पवार पक्षाला नवा चेहरा; देवेंद्र तायडे यांच्याकडे शहराध्यक्षपदाची धुरा!

by maxmanthannews@gmail.com September 29, 2026

written by maxmanthannews@gmail.com

राष्ट्रवादी काँग्रेस शरदचंद्र पवार पक्षाच्या पिंपरी-चिंचवड शहराध्यक्षपदी देवेंद्र तायडे यांची नियुक्ती!

पिंपरी, प्रतिनिधी बालाजी नवले दि. २९ सप्टेंबर २०२६ मॅक्स मंथन डेली न्यूज:

पिंपरी: राष्ट्रवादी काँग्रेस शरदचंद्र पवार पक्षाच्या पिंपरी-चिंचवड शहर (जिल्हा) अध्यक्षपदी देवेंद्र तायडे यांची अधिकृत नियुक्ती करण्यात आली आहे. पक्षाचे राष्ट्रीय अध्यक्ष, पद्मविभूषण खासदार शरद पवार यांच्या मान्यतेने, शिरूर लोकसभेचे खासदार डॉ. अमोल कोल्हे आणि आमदार रोहित पवार यांच्या सूचनेनुसार, प्रदेशाध्यक्ष आमदार शशिकांत शिंदे यांनी देवेंद्र तायडे यांच्या नियुक्तीची घोषणा केली. पक्षाच्या मुंबईतील मुख्यालयात प्रदेश सरचिटणीस रवींद्र पवार यांच्या हस्ते तायडे यांना नियुक्तीचे अधिकृत पत्र प्रदान करण्यात आले.

कर्जत-जामखेडचे लोकप्रिय आमदार तथा सर्व फ्रंटलचे समन्वयक रोहित पवार यांच्या वाढदिवसाच्या दिवशीच देवेंद्र तायडे यांना ही महत्त्वाची जबाबदारी मिळाल्याने कार्यकर्त्यांमध्ये उत्साहाचे वातावरण आहे. पक्षाचे प्रदेश सरचिटणीस व पिंपरी-चिंचवडचे पक्ष निरीक्षक सुनील माने यांनी पत्रकार परिषदेत ही सविस्तर माहिती दिली.

देवेंद्र तायडे यांच्या निवडीमागील संघटनात्मक पार्श्वभूमी आणि पक्षाचा विश्वास व्यक्त करताना सुनील माने म्हणाले की, पिंपरी-चिंचवडच्या राजकीय व सामाजिक क्षेत्रात गेल्या ३५ वर्षांपासून सक्रिय असलेले देवेंद्र तायडे हे शिव-फुले-शाहू-आंबेडकरी चळवळीतील एक नामांकित आणि अभ्यासू चेहरा आहेत. त्यांनी वंचित बहुजन आघाडीचे पिंपरी-चिंचवड शहराध्यक्ष म्हणून तब्बल १० वर्षे धुरा सांभाळली आहे. तसेच गेल्या ३ वर्षांपासून ते राष्ट्रवादी काँग्रेस शरदचंद्र पवार पक्षाचे कार्याध्यक्ष म्हणून सक्रिय भूमिका बजावत आहेत. तायडे हे स्वतः सिव्हिल इंजिनिअरिंग (Civil Engineer) पदवीधर असून, जनसामान्यांपासून ते औद्योगिक क्षेत्रातील उद्योजकांपर्यंत त्यांचा दांडगा जनसंपर्क आहे. पिंपरी विधानसभा मतदारसंघातून राष्ट्रवादी काँग्रेस शरदचंद्र पवार पक्षाकडून ते आमदारकीसाठी इच्छुक होते. मात्र, आदरणीय शरद पवार साहेब, आमदार रोहित पवार आणि जयंत पाटील यांच्या शब्दाचा मान ठेवून त्यांनी स्वतःहून आपली उमेदवारी मागे घेतली होती. त्यांच्या याच निष्ठेची दखल घेत पक्षाने त्यांना शहराध्यक्षपदाचा बहुमान दिला आहे.

पक्षाच्या राष्ट्रीय कार्याध्यक्षा खासदार सुप्रिया सुळे, आमदार रोहित पवार आणि माजी मंत्री हर्षवर्धन पाटील यांच्याशी सविस्तर चर्चा करून पक्ष संघटना वाढीसाठी हा निर्णय घेण्यात आला आहे. देवेंद्र तायडे यांच्यासारख्या अनुभवी आणि आक्रमक नेतृत्वामुळे पिंपरी-चिंचवड शहर आणि परिसरात पक्ष संघटनेला नवी दिशा मिळेल. आगामी काळात शहरातील विविध नागरी समस्यांवर प्रभावीपणे काम करून कार्यकर्त्यांची नवी फळी उभारली जाईल, असा विश्वास पक्षाच्या वरिष्ठ नेत्यांनी व्यक्त केला आहे.

September 29, 2026 0 comments

पिंपरी चिंचवड मुख्यपृष्ठ

‘तुम्ही दाराच्या लायकीचे आहात’; वायसीएम रुग्णालयाच्या लिफ्टसमोरील घटनेप्रकरणी संत तुकारामनगर पोलिसांची मोठी कारवाई!

by maxmanthannews@gmail.com September 29, 2026

written by maxmanthannews@gmail.com

वायसीएम रुग्णालयातील धक्कादायक प्रकार; जातिवाचक शिवीगाळ व मानसिक छळावरून अधिष्ठाता डॉ. राजेंद्र वाबळे यांच्यावर ॲट्रॉसिटीचा गुन्हा दाखल!

पिंपरी चिंचवड प्रतिनिधी बालाजी नवले, दि. २९ सप्टेंबर २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या यशवंतराव चव्हाण स्मृती (वायसीएम) रुग्णालयात प्रशासकीय दडपशाही आणि मागासवर्गीय वैद्यकीय अधिकाऱ्याचा जातिवाचक अपमान केल्याचा अत्यंत गंभीर व धक्कादायक प्रकार उघडकीस आला आहे. रुग्णालयाचे अधिष्ठाता (Dean) डॉ. राजेंद्र नामदेव वाबळे यांनी कौशल्याने आणि निष्ठेने सेवा बजावणाऱ्या हृदयरोगतज्ज्ञाचा मानसिक छळ करत सर्वांसमक्ष जातिवाचक शिवीगाळ केल्याप्रकरणी त्यांच्यावर अनुसूचित जाती व अनुसूचित जमाती (अत्याचार प्रतिबंधक) अधिनियम (ॲट्रॉसिटी) अंतर्गत गंभीर गुन्हा दाखल करण्यात आला आहे.

गुन्हा दाखल झाल्यापासून आरोपी डॉ. राजेंद्र वाबळे हे सध्या फरार असून पोलीस त्यांचा कसून शोध घेत आहेत. या घटनेमुळे महापालिका आणि वैद्यकीय वर्तुळात प्रचंड खळबळ उडाली आहे.

संत तुकारामनगर पोलीस ठाण्यात नोंदवलेल्या फिर्यादीनुसार, तक्रारदार डॉ. ज्ञानेश्वर विश्वनाथ बोराडे हे वायसीएम रुग्णालयात हृदयरोग उपचाराबाबत उत्तम सेवा देत आहेत. मागासवर्गीय प्रवर्गातील असलेले डॉ. बोराडे यांच्या उपचारांमुळे रुग्णालयात रुग्णांची संख्या आणि त्यांची सामाजिक लोकप्रियता झपाट्याने वाढली होती. याच व्यावसायिक यशाचा आणि लोकप्रियतेचा द्वेष मनात धरून डॉ. राजेंद्र वाबळे यांनी आपल्या आर्थिक व प्रशासकीय हितसंबंधांना धोका निर्माण होईल या भीतीपोटी डॉ. बोराडे यांच्याविरोधात जाणीवपूर्वक कट-कारस्थान रचले.

डॉ. बोराडे यांना सेवेतून बडतर्फ करण्यासाठी वारंवार चुकीचे अहवाल तयार करणे, प्रशासकीय अडथळे निर्माण करणे आणि त्यांना प्रचंड मानसिक तणावाखाली ठेवण्याचे काम डॉ. वाबळे यांच्याकडून केले जात होते.

ही गंभीर घटना दि. १० ऑगस्ट २०२६ रोजी सकाळी ११:०० वाजता वायसीएम रुग्णालयाच्या मुख्य इमारतीमधील दुसऱ्या मजल्यावर लिफ्टसमोरील पॅसेजमध्ये घडली. डॉ. ज्ञानेश्वर बोराडे हे आपले अनुभव प्रमाणपत्र घेण्यासाठी गेले असता, तिथे त्यांचे नातेवाईक व इतर नागरिक उपस्थित होते.

त्यावेळी डॉ. राजेंद्र वाबळे यांनी सर्वांसमक्ष डॉ. बोराडे यांना, “महापालिकेच्या सामान्य सभेमध्ये तुला सेवेतून कमी केलेले आहे, तू दाराच्या लायकीचा आहेस आणि तू हॉस्पिटलमध्ये डोरा सारखा फिरतोस का?” असे अत्यंत अपमानास्पद, तुच्छतादर्शक आणि जातिवाचक उद्गार काढून सार्वजनिक ठिकाणी अपमानित केले. या जाहीर मानहानीमुळे डॉ. बोराडे तीव्र मानसिक तणावाखाली आले आणि त्यांनी अन्यायाविरुद्ध तात्काळ पोलिसांत धाव घेतली.

डॉ. ज्ञानेश्वर बोराडे यांनी दिलेल्या अधिकृत फिर्यादीवरून संत तुकारामनगर पोलीस ठाण्यात आरोपी डॉ. राजेंद्र नामदेव वाबळे यांच्याविरुद्ध भारतीय न्याय संहिता (BNS) २०२३ चे कलम ३५२, अनुसूचित जाती व अनुसूचित जमाती (अत्याचार प्रतिबंधक) अधिनियम १९८९ चे कलम ३(१)(r), ३(१)(s) नुसार गुन्हा नोंदवण्यात आला आहे.

या प्रकरणाचा सखोल तपास सहाय्यक पोलीस आयुक्त श्रीमती मनीषा कदम यांच्या मार्गदर्शनाखाली संत तुकारामनगर पोलीस ठाण्याचे वरिष्ठ पोलीस निरीक्षक सुहास आव्हाड करत आहेत. महापालिकेच्या सर्वोच्च वैद्यकीय संस्थेतच डॉक्टरनेच दुसऱ्या डॉक्टरवर अशा प्रकारे जातिवाचक अन्याय केल्यामुळे या प्रकरणातील फरार आरोपीवर कठोर कारवाई करण्याची मागणी जोर धरत आहे.

September 29, 2026 0 comments

पिंपरी चिंचवड मुख्यपृष्ठ

‘डीपी’ चोरट्यांवर पोलीस आयुक्त विनय कुमार चौबे यांचा दणका; चाकणमधील ४ गंभीर गुन्ह्यांचा पर्दाफाश!

by maxmanthannews@gmail.com September 29, 2026

written by maxmanthannews@gmail.com

शेतकऱ्यांचे ‘डीपी’ फोडणारी आंतरराज्यीय टोळी गजाआड; मालमत्ता गुन्हे विरोधी पथकाची १० लाखांच्या मुद्देमालासह मोठी कारवाई!

पिंपरी चिंचवड प्रतिनिधी बालाजी नवले, दि. २९ सप्टेंबर २०२६ मॅक्स मंथन डेली न्यूज:

पिंपरी: पिंपरी-चिंचवड पोलीस आयुक्तालय हद्दीतील ग्रामीण भागामध्ये शेतीपंपासाठी उभारलेल्या महावितरण कंपनीच्या इलेक्ट्रीक ‘डीपी’ (रोहित्र) मधून तांब्याच्या तारांची चोरी करून शेतकऱ्यांचे मोठे नुकसान करणाऱ्या आंतरराज्यीय टोळीचा मालमत्ता गुन्हे विरोधी पथकाने पर्दाफाश केला आहे. या धडक कारवाईत पोलिसांनी तीन अट्टल चोरट्यांना बेड्या ठोकल्या असून २४२ किलो तांब्याच्या तारा आणि एक अर्टिगा कार असा १० लाख ४२ हजार रुपयांचा १०० टक्के मुद्देमाल जप्त केला आहे. या कारवाईमुळे चाकण परिसरातील ४ गंभीर गुन्हे उघडकीस आले आहेत.

पिंपरी-चिंचवड पोलीस आयुक्त विनय कुमार चौबे यांनी शेतीपंपाच्या डीपीमधील तांब्याच्या तारा चोरी करणाऱ्या गुन्हेगारांवर कठोर कारवाई करण्याचे आदेश गुन्हे शाखेला दिले होते. त्या अनुषंगाने मालमत्ता गुन्हे विरोधी पथकाचे वरिष्ठ पोलीस निरीक्षक संजय चव्हाण यांच्या मार्गदर्शनाखाली पथकाने तपास सुरू केला होता.

दरम्यान, श्रेणी पोलीस उपनिरीक्षक महेश खांडे आणि पोलीस हवालदार नितीन लोखंडे यांना गोपनीय बातमीदारांमार्फत माहिती मिळाली की, डीपीमधील तांब्याच्या तारा चोरी करणारी टोळी चोरीचा माल विक्री करण्यासाठी येणार आहे. या माहितीच्या आधारे सहायक पोलीस निरीक्षक पांडुरंग देवकाते आणि पथकाने २६ सप्टेंबर २०२६ रोजी देहूरोड फूड प्लाझा येथे सापळा रचला. तेथे पांढऱ्या रंगाच्या अर्टिगा कारमधून आलेल्या तिघांना पोलिसांनी ताब्यात घेतले.

अटक करण्यात आलेले आरोपी मोहम्मद तय्यब मोहम्मद शफी शहा (वय २८, रा. कुदळवाडी, चिखली, मूळ रा. सिद्धार्थनगर, उत्तर प्रदेश), मैनुद्दीन खलील शहा (वय ३५, रा. कुदळवाडी, चिखली, मूळ रा. सिद्धार्थनगर, उत्तर प्रदेश), सुफियान जमीरउल्ला खान (वय १९, रा. सिद्धार्थनगर, उत्तर प्रदेश)

अटक करण्यात आलेल्या आरोपींकडे सखोल चौकशी केली असता खालील ४ गुन्हे उघडकीस आले असून, चोरीस गेलेला १००% मुद्देमाल हस्तगत करण्यात आला आहे. दक्षिण चाकण पोलीस ठाणे गु.र.क्र. ०४/२०२६ (भारतीय विद्युत कायदा २००३ कलम १३६ व BNS कलम ३२४(४)), उत्तर चाकण पोलीस ठाणे: गु.र.क्र. २६५/२०२६ (भारतीय विद्युत कायदा २००३ कलम १३६), उत्तर चाकण पोलीस ठाणे: गु.र.क्र. ३१०/२०२६ (भारतीय विद्युत कायदा २००३ कलम १३६), उत्तर चाकण पोलीस ठाणे: गु.र.क्र. ४८८/२०२६ (भारतीय विद्युत कायदा २००३ कलम १३६)

ही कामगिरी पोलीस आयुक्त विनय कुमार चौबे, सह पोलीस आयुक्त शशिकांत महावरकर, अप्पर पोलीस आयुक्त सारंग आव्हाड, पोलीस उपआयुक्त (गुन्हे) रोहिदास पवार आणि सहायक पोलीस आयुक्त (गुन्हे १) सुदर्शन राठोड यांच्या मार्गदर्शनाखाली वरिष्ठ पोलीस निरीक्षक संजय चव्हाण, सहायक पोलीस निरीक्षक पांडुरंग देवकाते, गोरक्षनाथ बालवडकर, रावसाहेब मोटे, श्रेणी पोलीस उपनिरीक्षक महेश खांडे, तसेच पोलीस अंमलदार सोमनाथ गोरे, नितीन उमरजकर, गणेश हिंगे, नितीन लोखंडे, प्रविण कांबळे, विशाल गायकवाड, चंद्रकांत गडदे, गणेश कोकणे, पवन बाजे, विनोद वीर, हर्षद कदम, समीर रासकर, अमर कदम, मोहसीन अत्तार, अमोल गोरे, अशोक मरळ, गणेश सावंत व ज्ञानेश्वर कोळगे यांच्या पथकाने केली.

September 29, 2026 0 comments

Newer Posts

Older Posts