चिंचवडमध्ये ज्येष्ठ नागरिकाला ‘डिजिटल अटक’ करून १ कोटींचा गंडा; सीबीआय अधिकारी असल्याचे सांगून घातली भुरळ

पिंपरी चिंचवड प्रतिनिधी शाम सोनवणे, २० जानेवारी २०२६ | मॅक्स मंथन डेली न्यूज:

चिंचवड : पिंपरी-चिंचवड शहरात सायबर गुन्हेगारांनी एका ७७ वर्षीय ज्येष्ठ नागरिकाला ‘डिजिटल अरेस्ट’ची भीती घालून चक्क १ कोटी रुपयांना गंडा घातल्याचा प्रकार समोर आला आहे. सीबीआय (CBI) अधिकारी बोलत असल्याचे सांगून या ज्येष्ठ नागरिकाची आर्थिक फसवणूक करण्यात आली असून, याप्रकरणी सायबर पोलीस ठाण्यात गुन्हा दाखल झाला आहे.

अशोक कृष्णा सराफ (वय ७७, रा. चिंचवड) यांनी याप्रकरणी फिर्याद दिली आहे. ३० डिसेंबर २०२५ ते १४ जानेवारी २०२६ या काळात आरोपींनी त्यांना वेगवेगळ्या मोबाईल क्रमांकावरून संपर्क साधला. आरोपींनी स्वतःची ओळख ‘टेलीफोन डिपार्टमेंट’ आणि ‘सीबीआय ऑफिसर’ अशी करून दिली.

आरोपींनी फिर्यादी सराफ यांना सांगितले की, त्यांच्या नावे कॅनरा बँकेत एक खाते असून त्याचा वापर जेट एअरवेजचे माजी प्रमुख नरेश गोयल यांच्यावरील ईडी (ED) कारवाईत आणि मनी लाँड्रिंगसाठी करण्यात आला आहे. तुम्हाला या कारवाईतून वाचायचे असेल, तर तुमच्या बँक खात्यातील आणि म्युच्युअल फंडातील रकमेची ‘लिगेलिटी’ (वैधता) तपासावी लागेल, असे सांगून त्यांना अटकेची भीती घातली.

घाबरलेल्या सराफ यांनी आरोपींच्या शब्दावर विश्वास ठेवला. आरोपींनी त्यांना वेगवेगळ्या बँक खात्यांवर पैसे पाठवण्यास भाग पाडले.

• एकूण रक्कम: १ कोटी रुपये.

• बँक खाती: आयसीआयसीआय (ICICI), इंडसइंड (IndusInd) आणि यूको (UCO) बँकेच्या विविध खात्यांवर ही रक्कम वळवण्यात आली.

  तपासणी झाल्यानंतर ही रक्कम परत केली जाईल, असे आश्वासन आरोपींनी दिले होते. मात्र, पैसे मिळाल्यानंतर आरोपींनी संपर्क तोडला, तेव्हा आपली फसवणूक झाल्याचे सराफ यांच्या लक्षात आले.

सायबर पोलिसांनी याप्रकरणी भारतीय न्याय संहिता (BNS) २०२३ मधील कलम २०५, ३०८(१), ३१६(२), ३१८(४), ३१९(२), ३३६(३), ३(५) आणि माहिती तंत्रज्ञान कायद्याच्या कलम ६६(सी), ६६(डी) नुसार गुन्हा दाखल केला आहे. पोलीस निरीक्षक नाळे या प्रकरणाचा अधिक तपास करत आहेत.

शहरातील ज्येष्ठ नागरिकांनी अशा प्रकारच्या कोणत्याही फोन कॉलला बळी पडू नये आणि संशयास्पद वाटल्यास तातडीने पोलिसांशी संपर्क साधावा, असे आवाहन सायबर सेलतर्फे करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवडच्या सत्तेत शीतल ऊर्फ विजय शिंदेंचा मोठा दावा; ‘त्या’ त्यागाचे फळ मिळणार का? राजकीय वर्तुळात चर्चांना उधाण

पिंपरी चिंचवड प्रतिनिधी बालाजी नवले, २० जानेवारी २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेत भारतीय जनता पक्षाला मिळालेल्या ऐतिहासिक विजयानंतर आता महत्त्वाची पदे कोणाकडे जाणार, याची उत्सुकता शिगेला पोहोचली आहे. यामध्ये सर्वात प्रबळ नाव म्हणून ज्येष्ठ नगरसेवक शीतल ऊर्फ विजय शिंदे यांचे नाव समोर येत आहे. सलग तिसऱ्यांदा नगरसेवक म्हणून निवडून आलेले शिंदे हे महापालिकेतील भाजपच्या मुख्य दावेदारांपैकी एक मानले जात आहेत.

शीतल ऊर्फ विजय शिंदे यांनी या निवडणुकीत आपल्या प्रभागात वर्चस्व गाजवत विजय मिळवला आहे. सलग तीन वेळा नगरसेवक म्हणून निवडून येण्याचा दांडगा अनुभव त्यांच्या पाठीशी आहे. पिंपरी चिंचवड महानगरपालिकेत सुरुवातीला निवडून आलेल्या भारतीय जनता पक्षाच्या नगरसेवकापैकी एक शितल शिंदे हे आहेत.महापालिकेतील प्रशासकीय कामकाजाची खडानखडा माहिती आणि प्रभागातील जनसंपर्क यामुळे त्यांचे नाव सध्या अग्रक्रमाने चर्चेत आहे.

राजकीय सूत्रांनी दिलेल्या माहितीनुसार, २०१७ च्या निवडणुकीनंतर शीतल ऊर्फ विजय शिंदे यांची स्थायी समिती अध्यक्ष म्हणून वर्णी लागणे निश्चित मानले जात होते. मात्र, ऐनवेळी दिवंगत आमदार लक्ष्मणभाऊ जगताप यांच्या शब्दाचा मान ठेवून शिंदे यांनी माघार घेतली होती. त्यांनी स्वतःचे अध्यक्षपद विलास मडगेरी यांना बहाल केले होते. पक्षासाठी आणि नेतृत्वासाठी केलेल्या या मोठ्या त्यागाची आठवण आता कार्यकर्त्यांकडून करून दिली जात आहे.

येत्या काळात भाजपमध्ये महापौर आणि स्थायी समिती अध्यक्षपदासाठी मोठ्या हालचाली सुरू होणार आहेत. चिंचवड विधानसभा मतदारसंघातून येणारे शिंदे हे आमदार शंकर जगताप यांचे विश्वासू मानले जातात. २०१७ मध्ये दाखवलेला संयम आणि निष्ठा पाहता, यावेळी पक्ष त्यांना महत्त्वाच्या पदाची जबाबदारी देऊन न्याय देणार का? याकडे संपूर्ण शहराचे लक्ष लागले आहे.

शिंदे यांच्या दाव्यामुळे त्यांच्या समर्थकांमध्ये मोठा उत्साह असून, शहराच्या नियोजनबद्ध विकासासाठी त्यांच्यासारख्या अनुभवी नेतृत्वाची गरज असल्याचे मत कार्यकर्ते व्यक्त करत आहेत. येत्या आठवड्यात भाजपच्या कोअर कमिटीच्या बैठकीत या नावावर शिक्कामोर्तब होण्याची शक्यता वर्तवण्यात येत आहे.

© २०२६ मॅक्स मंथन डेली न्यूज. सर्व हक्क राखीव.

भाजपच्या विजयानंतर ‘निष्ठावंतांचा’ श्वास कोंडला; स्वीकृत नगरसेवकपदासाठी ‘आयाराम’ की ‘सतरंजी’ उचलणारे?

पिंपरी-चिंचवड, प्रतिनिधी बालाजी नवले, १९ जानेवारी २०२६ | मॅक्स मंथन डेली न्यूज

पिंपरी : पिंपरी-चिंचवड महानगरपालिकेत भारतीय जनता पक्षाने मिळवलेल्या एकहाती सत्तेनंतर आता खऱ्या संघर्षाला सुरुवात झाली आहे. पक्षासाठी अनेक वर्षे आंदोलने, मोर्चे आणि पोलीस केसेस अंगावर घेणाऱ्या जुन्या निष्ठावान कार्यकर्त्यांना न्याय मिळणार की, सत्तेच्या वारीत सहभागी झालेल्या ‘आयाराम-गयारामां’ची चांदी होणार, यावरून शहरात मोठा संभ्रम निर्माण झाला आहे. विशेषतः स्वीकृत नगरसेवकपदाच्या पाच जागांसाठी आता इच्छुकांची भाऊगर्दी झाली आहे.

निवडणुकीच्या काळात अनेक प्रभागांमध्ये राष्ट्रवादीतून आलेल्यांना उमेदवारी देण्यात आली, ज्यामुळे मूळ भाजप कार्यकर्त्यांना आपली इच्छा बाजूला ठेवावी लागली. आता सत्ता आल्यावर तरी प्रशासकीय कामात आणि शहराच्या नियोजनात जुन्या अनुभवी चेहऱ्यांना स्थान मिळेल का, हा मोठा प्रश्न आहे. “फक्त सतरंजी उचलण्यासाठीच जुन्या कार्यकर्त्यांचा वापर होणार का?” असा संतप्त सवाल आता तळागाळातील कार्यकर्त्यांकडून विचारला जात आहे.

भोसरी विधानसभेतील राजकारण आता ‘स्वीकृत’ पदाच्या निमित्ताने पुन्हा एकदा तापले आहे. आमदार महेश लांडगे यांचे कट्टर विरोधक मानले जाणारे सचिन काळभोर यांचा मुद्दा सध्या शहरात चर्चेचा विषय ठरला आहे. काळभोर यांना कार्यकारिणीतून बाजूला ठेवल्यानंतर, प्रभाग क्रमांक १३ मध्ये उमेदवारी मिळण्यापासूनही त्यांना रोखण्यात आल्याची चर्चा आहे. तरीही काळभोर यांनी पक्षनिष्ठा जपत भाजपच्या उमेदवाराचा प्रचार केला. आता आमदार महेश लांडगे काळभोर यांना स्वीकृत पदाच्या शर्यतीत पुन्हा डावलणार की त्यांना न्याय मिळणार, याकडे नागरिकांचे लक्ष लागले आहे.

स्वीकृत नगरसेवकपदासाठी भाजपमधील अनेक ज्येष्ठ आणि निष्ठावान नावांची चर्चा सुरू आहे. यामध्ये:

राज हेमंत तापकीर, महेश कुलकर्णी, अमोल थोरात, राजू दुर्गे, सचिन लांडगे, कुणाल लांडगे, नरेश कदम, ज्योती मलकानी, सचिन काळभोर, जयनाथ काटे, कैलास प्रधान कुंजीर, मधुकर बच्चे, प्रभाकर वाघिरे, कामगार नेते बाबा कांबळे, राजेश पिल्ले, रोहिणी रासकर, आशा काळे, विना सोनलकर, श्रीकांत तापकीर, योगेश तळेकर, विकास बुर्डे, रवींद्र जांभुळकर, ओबीसी नेते भाऊशेठ रासकर आणि शंकर लोंढे यांचा समावेश आहे.

चिंचवडचे आमदार शंकर जगताप आणि भोसरीचे आमदार महेश लांडगे हे आपल्या समर्थकांसाठी आग्रह धरणार की पक्षासाठी झटणाऱ्या कार्यकर्त्यांचा विचार करणार, यावर भाजपच्या अंतर्गत राजकारणाची पुढील दिशा ठरणार आहे. महापौरपदाच्या घोषणेनंतर या पाच नावांवर शिक्कामोर्तब होण्याची शक्यता आहे.

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवडमध्ये भाजपच्या विजयानंतर ‘पॉवर गेम’ सुरू; शंकर जगतापांची सरशी, तर भोसरीत महेश लांडगेंना राहुल भोसलेंचे आव्हान

पिंपरी चिंचवड प्रतिनिधी बालाजी नवले, १९ जानेवारी २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेत भारतीय जनता पक्षाने एकहाती सत्ता मिळवली असली, तरी आता खऱ्या अर्थाने पक्षांतर्गत ‘पॉवर गेम’ला सुरुवात झाली आहे. महापौर आणि शक्तिशाली समजल्या जाणाऱ्या स्थायी समिती अध्यक्षपदासाठी आता शहरात रस्सीखेच सुरू झाली असून, कोणाचे वर्चस्व राहणार, याबाबत राजकीय वर्तुळात मोठी चर्चा रंगली आहे.

या निवडणुकीत चिंचवड विधानसभा मतदारसंघाचे आमदार शंकर जगताप यांनी आपले निर्विवाद वर्चस्व सिद्ध केले आहे. त्यांनी आपल्या मतदारसंघातून तब्बल ३९ नगरसेवक निवडून आणण्यात यश मिळवले आहे. दिवंगत लक्ष्मणभाऊ जगताप यांचा वारसा आणि शंकर जगताप यांचे संघटन कौशल्य यामुळे चिंचवडमध्ये भाजपला मोठे यश मिळाले. परिणामी, आगामी काळात महापालिकेत शंकर जगताप आणि शहराध्यक्ष शत्रुघ्न उर्फ बापू काटे यांचे वर्चस्व राहण्याची दाट शक्यता आहे.

भोसरी विधानसभा मतदारसंघाकडे संपूर्ण महाराष्ट्राचे लक्ष लागून होते. कट्टर हिंदुत्ववादी चेहरा म्हणून ओळखले जाणारे आमदार महेश लांडगे यांनी आपल्या मतदारसंघातून ३४ नगरसेवक निवडून आणण्यासाठी मोठी ताकद लावली होती. मात्र, राष्ट्रवादी काँग्रेसचे (अजित पवार गट) मातब्बर नेते राहुल भोसले यांनी नेहरूनगर प्रभागात भाजपच्या विजयरथाला रोखत मोठे यश मिळवले. राहुल भोसले यांच्या या कामगिरीमुळे महेश लांडगे यांच्या ‘पॅनल टू पॅनल’ विजयाच्या स्वप्नाला तडा गेला आहे. पालकमंत्री अजित पवार आणि महेश लांडगे यांच्यातील राजकीय संघर्षात राहुल भोसले हे महेशदादांसाठी ‘टफ’ फायटर ठरल्याचे या निकालांवरून स्पष्ट होत आहे.

पिंपरी राखीव विधानसभा मतदारसंघात भाजपला म्हणावे तसे यश मिळाले नाही. विधान परिषदेचे आमदार अमित गोरखे आणि आमदार उमाताई खापरे या दोन बड्या नेत्यांची ताकद असूनही, या भागात भाजपला केवळ ११ जागांवर समाधान मानावे लागले. या निकालामुळे पिंपरी विधानसभेतील भाजपच्या स्थानिक नेतृत्वावर प्रश्नचिन्ह उपस्थित केले जात आहे.

निवडून आलेल्या नगरसेवकांच्या संख्येचा विचार करता, ज्या आमदाराच्या गटाचे जास्त नगरसेवक, त्याचेच महापालिकेत अस्तित्व राहणार हे उघड आहे. या गणितात ३९ नगरसेवकांचे बळ पाठीशी असलेले शंकर जगताप यांचे पारडे सध्या जड दिसत आहे. चिंचवड विरुद्ध भोसरी अशा या सत्तासंघर्षात भाजपचे वरिष्ठ नेतृत्व कोणाची वर्णी लावणार, याकडे आता सर्वांचे लक्ष लागले आहे.

संपादकीय मत:

भाजपच्या या विजयामध्ये चिंचवडचा वाटा सिंहाचा आहे. मात्र, भोसरीमध्ये राहुल भोसले यांनी ज्या पद्धतीने भाजपला खिंडार पाडले, ते पाहता आगामी काळात महापालिकेत भाजपला विरोधी पक्षाकडून कडवे आव्हान मिळण्याची चिन्हे आहेत.

© २०२६ मॅक्स मंथन डेली न्यूज. सर्व हक्क राखीव.

महापालिका निवडणुकांनंतर आता ग्रामीण रणधुमाळी; १२ जिल्ह्यांतील ७३१ जागांसाठी ५ फेब्रुवारीला मतदान

पिंपरी चिंचवड प्रतिनिधी बालाजी नवले , १८ जानेवारी २०२६ | मॅक्स मंथन डेली न्यूज

पिंपरी चिंचवड : नुकत्याच पार पडलेल्या महानगरपालिका निवडणुकांनंतर आता राज्याचे लक्ष ग्रामीण भागातील निवडणुकांकडे लागले आहे. राज्यातील १२ जिल्ह्यांमधील जिल्हा परिषद (ZP) आणि पंचायत समितीच्या (PS) प्रलंबित निवडणुकांसाठी ५ फेब्रुवारी २०२६ रोजी मतदान होणार आहे. या निवडणुकीसाठी महापालिका निवडणुकीत वापरलेली इलेक्ट्रॉनिक मतदान यंत्रे (EVMs) पुन्हा तैनात करण्याचे आदेश राज्य निवडणूक आयोगाने दिले आहेत.

राज्य निवडणूक आयुक्त दिनेश वाघमारे यांनी दिलेल्या निर्देशानुसार, महापालिका निवडणुकांमध्ये वापरलेल्या ईव्हीएममधील मेमरी कार्ड काढून ती सुरक्षितपणे सरकारी तिजोरीत जमा केली जाणार आहेत. त्यानंतर ही यंत्रे सोमवार संध्याकाळपर्यंत संबंधित जिल्हाधिकाऱ्यांकडे ग्रामीण निवडणुकांसाठी सुपूर्द केली जातील. निवडणुकीनंतर उद्भवू शकणाऱ्या न्यायालयीन याचिकांच्या पार्श्वभूमीवर जुन्या मेमरी कार्डची सुरक्षा अत्यंत महत्त्वाची मानली जात आहे.

• मतदान तारीख: ५ फेब्रुवारी २०२६ (सकाळी ७:३० ते संध्याकाळी ५:३०)

• मतमोजणी: ७ फेब्रुवारी २०२६

• जागांचा तपशील: ७३१ जिल्हा परिषद जागा आणि १,४६२ पंचायत समिती जागा.

• १२ जिल्हे: पुणे, सातारा, सांगली, सोलापूर, कोल्हापूर (पुणे विभाग), रायगड, रत्नागिरी, सिंधुदुर्ग (कोकण विभाग), छत्रपती संभाजीनगर, परभणी, धाराशिव आणि लातूर (संभाजीनगर विभाग).

सांगली जिल्ह्यातील चिंचली येथील श्री मायाक्का देवीची वार्षिक यात्रा ५ फेब्रुवारी रोजीच येत असल्याने, मतदानाची तारीख बदलण्याची मागणी होत आहे. आमदार विश्वजीत कदम यांनी यासंदर्भात निवडणूक आयोगाला पत्र लिहिले आहे. ही यात्रा महाराष्ट्र, कर्नाटक आणि आंध्र प्रदेशातील लाखो भाविकांचे श्रद्धास्थान असल्याने आणि प्रामुख्याने पश्चिम महाराष्ट्रातील जिल्ह्यांतून भाविक मोठ्या संख्येने उपस्थित राहणार असल्याने प्रशासकीय अहवाल मागवण्यात आला आहे. विभागीय आयुक्त आणि जिल्हाधिकाऱ्यांच्या अहवालानंतरच तारीख बदलाबाबत निर्णय घेतला जाईल, असे दिनेश वाघमारे यांनी स्पष्ट केले.

मुंबई आणि पुण्याच्या महापालिका निकालांनी राजकीय घराण्यांना जमिनीवर आणल्यानंतर, आता ग्रामीण भागात आपली ताकद टिकवून ठेवण्याचे मोठे आव्हान राजकीय पक्षांसमोर आहे. या निवडणुकीसाठी १ जुलै २०२५ ची मतदार यादी ग्राह्य धरण्यात येणार असून, आचारसंहिता आधीच लागू झाली आहे.

© २०२६ मॅक्स मंथन डेली न्यूज. सर्व हक्क राखीव.

प्रभाग ८ मध्ये ‘शिवजन्मभूमी’ची गर्जना; महेंद्र सरोदे आणि माधुरी मुटके यांच्या प्रचारासाठी आमदार शरद सोनवणे मैदानात

दोन्ही उमेदवारांचे ‘संकटमोचक’ म्हणून शरद दादांची एन्ट्री; भोसरी विधानसभा मतदारसंघात शिवसेनेची ताकद वाढली

पिंपरी प्रतिनिधी शाम सोनवणे, दि. ४ जानेवारी २०२६, मॅक्स मंथन डेली न्यूज:

पिंपरी (दि. ४ जानेवारी २०२६): पिंपरी-चिंचवड महानगरपालिका निवडणुकीच्या रणधुमाळीत प्रभाग क्रमांक ८ (भोसरी परिसर) मध्ये आता मोठी राजकीय चुरस निर्माण झाली आहे. शिवसेना पक्षाचे अधिकृत उमेदवार महेंद्र लक्ष्मण सरोदे आणि माधुरी निलेश मुटके यांच्या प्रचारासाठी शिवजन्मभूमी जुन्नरचे आमदार शरद दादा सोनवणे यांनी प्रत्यक्ष मैदानात उडी घेतली आहे. त्यांच्या एन्ट्रीमुळे विरोधकांचे धाबे दणाणले असून प्रभागातील राजकीय समीकरणे वेगाने बदलू लागली आहेत.

आमदार शरद सोनवणे हे त्यांच्या आक्रमक शैलीसाठी आणि दांडग्या जनसंपर्कासाठी ओळखले जातात. प्रभाग ८ मधील शिवसेनेच्या उमेदवारांच्या प्रचाराची धुरा त्यांनी आपल्या खांद्यावर घेतली आहे.

• संकटमोचक भूमिका: दोन्ही उमेदवारांसाठी ‘संकटमोचक’ म्हणून काम करण्याचा निर्धार त्यांनी व्यक्त केला आहे. उमेदवारांसमोर असणाऱ्या अडचणी आणि प्रभागातील प्रलंबित प्रश्न मार्गी लावण्यासाठी त्यांनी ताकद पणाला लावली आहे.

• कार्यकर्त्यांचा मेळावा: शरद दादांच्या उपस्थितीत प्रभागात भव्य रॅली आणि कार्यकर्त्यांच्या मेळाव्याचे आयोजन करण्यात आले. यावेळी कार्यकर्त्यांनी “कोण आला रे कोण आला, शिवसेनेचा वाघ आला” अशा घोषणांनी परिसर दणाणून सोडला.

प्रचारादरम्यान मतदारांशी संवाद साधताना शरद सोनवणे म्हणाले, “महेंद्र सरोदे आणि माधुरी मुटके हे दोघेही अभ्यासू आणि लोकांच्या सुख-दुःखात धावून जाणारे उमेदवार आहेत. पिंपरी-चिंचवडच्या विकासासाठी शिवसेनेची सत्ता महापालिकेत येणे गरजेचे आहे. प्रभाग ८ मधील सुज्ञ मतदार विकासाच्या बाजूने उभे राहून धनुष्यबाणाचे बटन दाबतील, याची मला खात्री आहे.”

महेंद्र सरोदे यांचा सामाजिक कार्याचा प्रदीर्घ अनुभव आणि माधुरी निलेश मुटके यांचा महिला वर्गातील मोठा जनसंपर्क यामुळे शिवसेनेची स्थिती या प्रभागात आधीच मजबूत होती. आता शरद सोनवणे यांच्यासारख्या अनुभवी नेतृत्वाचा पाठिंबा मिळाल्याने प्रचाराला वेग आला आहे. घरोघरी जाऊन मतदारांशी संवाद साधण्यावर आणि १५ जानेवारीच्या मतदानासाठी जागृती करण्यावर उमेदवारांनी भर दिला आहे.

© २०२५ मॅक्स मंथन डेली न्यूज. सर्व हक्क राखीव.

‘मतदान हा आमचा हक्क, लोकशाहीचा अभिमान’; पिंपरी-चिंचवडमध्ये दिव्यांग बांधवांची भव्य रॅली

निगडी ते चिंचवड परिसरात जनजागृतीचा जागर; मतदारांनी घेतला ‘निर्भय’ मतदानाचा संकल्प

पिंपरी चिंचवड प्रतिनिधी बालाजी नवले, दि. ४ जानेवारी २०२६, मॅक्स मंथन डेली न्यूज:

पिंपरी (दि. ४ जानेवारी २०२६): “मतदार राजा जागा हो, लोकशाहीचा धागा हो…” आणि “माझं मत, माझा अधिकार” अशा घोषणांच्या गजरात पिंपरी-चिंचवडमधील दिव्यांग बांधवांनी आज लोकशाहीच्या सशक्ततेचा संदेश दिला. पिंपरी-चिंचवड महापालिकेच्या ‘स्वीप’ (SVEEP) कार्यक्रमांतर्गत आयोजित या मतदान जनजागृती रॅलीमध्ये शेकडो दिव्यांग बांधवांनी उत्स्फूर्त सहभाग नोंदवत नागरिकांचे लक्ष वेधून घेतले.

महापालिका आयुक्त श्रावण हर्डीकर यांच्या मार्गदर्शनाखाली आयोजित ही रॅली निगडी प्राधिकरण येथील ‘अ’ क्षेत्रीय कार्यालयापासून सुरू झाली.

• प्रमुख उपस्थिती: अतिरिक्त आयुक्त तृप्ती सांडभोर आणि जनता संपर्क अधिकारी प्रफुल्ल पुराणिक यांच्या उपस्थितीत रॅलीला प्रारंभ झाला.

• मार्ग: रॅली बिजली नगर, वाल्हेकर वाडी, चापेकर चौक आणि चिंचवड स्टेशनमार्गे प्रा. रामकृष्ण मोरे प्रेक्षागृहापर्यंत काढण्यात आली.

• वैशिष्ट्य: रॅलीदरम्यान रस्त्याच्या दुतर्फा असलेल्या नागरिकांना दिव्यांग बांधवांनी मतदानाचे महत्त्व पटवून दिले.

रॅलीचा समारोप चिंचवड येथील प्रा. रामकृष्ण मोरे प्रेक्षागृहाच्या आवारात झाला. यावेळी कलाकारांनी सादर केलेल्या ‘फ्लॅश मॉब’ ने सर्वांचे लक्ष वेधले. त्यानंतर उपस्थित सर्व दिव्यांग बांधव, महापालिका अधिकारी आणि कर्मचाऱ्यांनी “कोणत्याही प्रलोभनाला बळी न पडता आणि निर्भयपणे मतदान करू,” अशी सामूहिक शपथ घेतली.

“लोकशाही सशक्त करण्यासाठी प्रत्येक मत मौल्यवान आहे. दिव्यांग बांधवांचा हा उत्स्फूर्त सहभाग संपूर्ण समाजासाठी प्रेरणादायी आहे. या रॅलीने लोकशाहीचा संदेश घराघरांत पोहोचवला आहे.”

— तृप्ती सांडभोर, अतिरिक्त आयुक्त

“शहरात दिव्यांग मतदारांची संख्या मोठी आहे. हे बांधव स्वतः मतदान करतातच, पण इतरांनाही प्रोत्साहित करतात. त्यांचा हा आदर्श सर्व नागरिकांनी घ्यावा आणि १५ जानेवारीला मतदान करावे.”

— प्रफुल्ल पुराणिक, जनता संपर्क अधिकारी

या उपक्रमामुळे पिंपरी-चिंचवड शहरात निवडणुकीचे वातावरण अधिकच उत्साही झाले असून, १५ जानेवारीला होणाऱ्या मतदानासाठी प्रशासकीय यंत्रणा सज्ज झाली आहे.

© २०२५ मॅक्स मंथन डेली न्यूज. सर्व हक्क राखीव.

प्रभाग २ मध्ये रंगणार चुरस! रोहित वाल्मीक जगताप यांच्या पाठीशी रिपब्लिकन शक्ती; माणिक पोळ यांचा सक्रिय पाठिंबा

शिवसेना (शिंदे गट) आणि आरपीआयची युती अधिक घट्ट; कार्यकर्त्यांच्या मेळाव्यात विजयाचा निर्धार, जगताप यांच्या प्रचाराला आता नवी गती.

पिंपरी प्रतिनिधी शाम सोनवणे,दि. ४ जानेवारी २०२६, मॅक्स मंथन डेली न्यूज:

पिंपरी (दि. ४ जानेवारी २०२६): पिंपरी-चिंचवड महानगरपालिका निवडणुकीच्या रणधुमाळीत प्रभाग क्रमांक २ मधील राजकीय समीकरणे वेगाने बदलू लागली आहेत. शिवसेनेचे (शिंदे गट) अधिकृत उमेदवार रोहित वाल्मीक जगताप यांना रिपब्लिकन पार्टी ऑफ इंडिया (आठवले गट) या पक्षाने आपला जाहीर पाठिंबा घोषित केला आहे. आरपीआय वाहतूक आघाडीचे प्रदेश उपाध्यक्ष माणिक पोळ यांनी यासंदर्भात अधिकृत घोषणा केल्याने जगताप यांची बाजू आता अधिक भक्कम झाली आहे.

प्रभाग २ मध्ये रोहित जगताप यांनी प्रचारात आघाडी घेतली असतानाच, महायुतीमधील महत्त्वाचा घटक असलेल्या आरपीआयचा पाठिंबा मिळाल्याने कार्यकर्त्यांमध्ये उत्साहाचे वातावरण आहे. माणिक पोळ यांनी स्पष्ट केले की, शहराच्या आणि प्रभागाच्या सर्वांगीण विकासासाठी तसेच सर्वसामान्यांचे प्रश्न सोडवण्यासाठी रोहित जगताप यांच्यासारख्या तरुण आणि अभ्यासू नेतृत्वाची गरज आहे.

पाठिंबा जाहीर करताना माणिक पोळ म्हणाले:

“रिपब्लिकन पार्टी ऑफ इंडिया (आठवले गट) पूर्ण ताकदीने रोहित वाल्मीक जगताप यांच्या पाठीशी उभी आहे. आमचे सर्व कार्यकर्ते, विशेषतः वाहतूक आघाडीचे सदस्य, प्रभागातील प्रत्येक घरापर्यंत पोहोचून जगताप यांना निवडून आणण्यासाठी प्रयत्न करतील. महायुतीचा हा विजय ऐतिहासिक असेल.”

रोहित जगताप यांनी यापूर्वीच प्रभागात विविध जनसंपर्क मोहिमा आणि विकासकामांच्या माध्यमातून मतदारांचे लक्ष वेधले आहे. आता आरपीआयची दलित आणि वंचित बहुजन मते तसेच वाहतूक आघाडीचे नेटवर्क सोबत आल्याने प्रतिस्पर्धी उमेदवारांसमोर मोठे आव्हान निर्माण झाले आहे.

यावेळी आरपीआय आणि शिवसेनेचे अनेक स्थानिक पदाधिकारी आणि मोठ्या संख्येने कार्यकर्ते उपस्थित होते. “प्रभाग २ चा विकास, हाच आमचा ध्यास” अशा घोषणांनी परिसर दणाणून गेला होता. १५ जानेवारीला होणाऱ्या मतदानात या युतीचा प्रभाव किती पडतो, याकडे आता सर्वांचे लक्ष लागले आहे.

© २०२५ मॅक्स मंथन डेली न्यूज. सर्व हक्क राखीव.

सावित्रीबाईंनी शोषित महिलांना मिळवून दिले मानाचे स्थान; पिंपरी-चिंचवडमध्ये कष्टकरी महिलांचा सन्मान

क्रांतीज्योती सावित्रीबाई फुले जयंतीनिमित्त महिला मेळावा; ज्ञान आणि संघर्षाचा वारसा जपण्याचा कामगार नेत्यांचा निर्धार

पिंपरी प्रतिनिधी शाम सोनवणे, दि. ३ जानेवारी २०२६, मॅक्स मंथन डेली न्यूज:

पिंपरी (दि. ३ जानेवारी २०२६): “महात्मा ज्योतिराव फुले आणि सावित्रीबाई फुले यांनी विषमतेने ग्रासलेल्या समाजात स्त्रिया व शोषितांना सन्मानाचे स्थान मिळावे, यासाठी आयुष्यभर संघर्ष केला. सावित्रीबाई केवळ शिक्षिका नव्हत्या, तर त्या क्रांतिकारी विचारांच्या आणि महिला सक्षमीकरणाच्या खऱ्या अग्रदूत होत्या,” असे प्रतिपादन कामगार नेते काशिनाथ नखाते यांनी केले.

क्रांतीज्योती सावित्रीबाई फुले यांच्या जयंतीनिमित्त कष्टकरी संघर्ष महासंघ महाराष्ट्र राज्य, कष्टकरी घरेलू कामगार संघर्ष महासंघ आणि महाराष्ट्र फेरीवाला क्रांती महासंघ यांच्या संयुक्त विद्यमाने आयोजित ‘महिला सन्मान मेळाव्यात’ ते बोलत होते.

या सोहळ्याचे आयोजन पिंपरी-चिंचवडमध्ये करण्यात आले होते. कार्यक्रमाच्या अध्यक्षस्थानी महिला अध्यक्षा माधुरी जलमूलवार होत्या. याप्रसंगी समाजासाठी योगदान देणाऱ्या शिक्षिका सारिका शिंदे व रेखा नायडू यांच्यासह विविध क्षेत्रांतील कष्टकरी महिलांचा शाल, श्रीफळ आणि सन्मानचिन्ह देऊन गौरव करण्यात आला.

काशिनाथ नखाते यांनी आपल्या भाषणात फुले दांपत्याच्या कार्याचा गौरव केला. ते म्हणाले की, “अंधश्रद्धा आणि जुनाट रूढी-परंपरांच्या विळख्यातून समाजाला मुक्त करण्यासाठी ज्ञान हाच एकमेव मार्ग आहे, हे ओळखून सावित्रीबाईंनी मुलींसाठी शिक्षणाची दारे उघडली. त्यांच्या लेखणीने आणि कृतीने सांस्कृतिक वर्चस्ववादाला मोठे आव्हान दिले.”

अध्यक्षीय भाषणात माधुरी जलमूलवार यांनी सावित्रीबाईंच्या सामाजिक कार्याचा आढावा घेतला. “सावित्रीबाईंनी विधवा महिलांना आधार दिला, केशवपनासारख्या अमानवी प्रथेविरोधात नाव्ह्यांचा संप घडवून आणला आणि आपल्या घरातील पाण्याचा हौद अस्पृश्यांसाठी खुला करून समतेचा संदेश दिला. त्यांचे कार्य आजही प्रेरणादायी आहे,” असे त्या म्हणाल्या.

उपस्थित मान्यवर:

या मेळाव्यास बांधकाम विभागाच्या महिला अध्यक्षा अर्चना कांबळे, सुनीता पोतदार, कलावती पाल, वत्सला ठोकळ, सुमित्रा जैस्वाल, मालन चव्हाण, वनमाला कांबळे, सुनंदा साबळे यांसह मोठ्या संख्येने कष्टकरी महिला उपस्थित होत्या.

© २०२५ मॅक्स मंथन डेली न्यूज. सर्व हक्क राखीव.