डॉ. बाबासाहेब आंबेडकर जयंतीनिमित्त पिंपरी-चिंचवड महापालिका कर्मचाऱ्यांना १५ हजार रुपये ‘सण अग्रिम’; आयुक्त डॉ. विजय सूर्यवंशी यांचे आदेश

पिंपरी चिंचवड प्रतिनिधी आकाश कांबळे , दिनांक: ५ एप्रिल २०२६, मॅक्स मंथन डेली न्यूज:

पिंपरी: भारतरत्न डॉ. बाबासाहेब आंबेडकर जयंतीचे औचित्य साधून पिंपरी चिंचवड महानगरपालिकेने आपल्या अधिकारी व कर्मचाऱ्यांसाठी आनंदाची बातमी दिली आहे. या जयंती उत्सवासाठी महापालिका आस्थापनेवरील पात्र कर्मचाऱ्यांना १५ हजार रुपये ‘सण अग्रिम’ (Festival Advance) देण्याचा निर्णय घेण्यात आला असून, याबाबतचे अधिकृत आदेश आयुक्त डॉ. विजय सूर्यवंशी यांनी जारी केले आहेत.

सहाव्या वेतन आयोगानुसार ज्यांचे ग्रेड वेतन ४८०० रुपयांपेक्षा कमी आहे किंवा सातव्या वेतन आयोगानुसार ज्यांची पे-लेव्हल एस-१७ (वेतन संरचना ४७,६०० – १,५१,१००) पेक्षा कमी आहे, अशा सर्व पात्र अधिकारी आणि कर्मचाऱ्यांना या सण अग्रिमचा लाभ घेता येणार आहे. ही रक्कम ऐच्छिक स्वरूपात दिली जाणार आहे.

सण अग्रिम म्हणून मिळणारी १५ हजार रुपयांची ही रक्कम एकरकमी दिली जाईल. मात्र, या रकमेची परतफेड संबंधित कर्मचाऱ्यांच्या वेतनातून मे २०२६ पासून दरमहा १५०० रुपयांप्रमाणे एकूण १० हप्त्यांमध्ये केली जाणार आहे. ही रक्कम १४ एप्रिल २०२६ पूर्वी कर्मचाऱ्यांच्या खात्यात जमा करण्याचे निर्देश देण्यात आले आहेत.

डॉ. बाबासाहेब आंबेडकर जयंतीनिमित्त कर्मचाऱ्यांना आर्थिक मदत देण्याचा धोरणात्मक निर्णय स्थायी समिती आणि महापालिका सभेने यापूर्वीच मंजूर केला होता. त्यानुसार हा निर्णय अमलात आणला जात आहे.

“भारतीय संविधानाचे शिल्पकार डॉ. बाबासाहेब आंबेडकर यांचे विचार प्रेरणादायी आहेत. महापालिका दरवर्षी ही जयंती उत्साहात साजरी करते. जयंतीनिमित्त सण अग्रिम देऊन कर्मचाऱ्यांचा या उत्सवाचा आनंद द्विगुणित करण्याचा आमचा प्रयत्न आहे.”

— रवि लांडगे, महापौर, पिंपरी चिंचवड महापालिका

“डॉ. बाबासाहेब आंबेडकरांनी दिलेला समता आणि सामाजिक न्यायाचा संदेश आजही आपल्याला दिशा देणारा आहे. त्यांच्या जयंतीनिमित्त कर्मचाऱ्यांना सण अग्रिम देणे, हा त्यांच्या योगदानाचा सन्मान करण्याचा एक प्रयत्न आहे.”

— डॉ. विजय सूर्यवंशी, आयुक्त, पिंपरी चिंचवड महापालिका

© २०२६ मॅक्स मंथन डेली न्यूज. सर्व हक्क राखीव.

सावित्रीबाई फुले पुणे विद्यापीठात विद्यार्थिनीची छेडछाड; आठवडा उलटला तरी चौकशी समितीची पहिली बैठक अद्याप प्रलंबित

पिंपरी चिंचवड प्रतिनिधी बालाजी नवले, दिनांक: ४ एप्रिल २०२६,मॅक्स मंथन डेली न्यूज:

पुणे: सावित्रीबाई फुले पुणे विद्यापीठाच्या (SPPU) वसतिगृहात एका परदेशी विद्यार्थिनीचा डिलिव्हरी बॉयने विनयभंग केल्याची धक्कादायक घटना घडून आठवडा उलटला आहे. मात्र, या प्रकरणातील प्रशासकीय त्रुटींची चौकशी करण्यासाठी स्थापन करण्यात आलेल्या सात सदस्यीय समितीची अद्याप पहिली बैठकही झालेली नाही. यामुळे विद्यापीठ प्रशासनाच्या संथ कारभारावर कडाडून टीका होत आहे.

विद्यापीठाच्या इंटरनॅशनल सेंटरने सुमारे २७ विद्यार्थिनींची सोय एका जुन्या शिक्षक निवासस्थानात (Quarters) केली आहे. धक्कादायक बाब म्हणजे या इमारतीमध्ये पूर्णवेळ सुरक्षा रक्षक किंवा सीसीटीव्ही कॅमेरेही उपलब्ध नव्हते. सिनेट सदस्य कृष्ण भंडाळकर यांनी प्रशासनावर गंभीर आरोप केले आहेत. त्यांच्या म्हणण्यानुसार, सुरक्षा विभागाने सहा महिन्यांपूर्वीच या इमारतीची सुरक्षा वाढवण्याबाबत पत्र दिले होते, मात्र त्याकडे दुर्लक्ष करण्यात आले. इतकेच नव्हे तर, या वसतिगृहात पिण्याच्या पाण्याची सोय नसल्याने विद्यार्थिनींना रात्रीच्या वेळी पाणी आणण्यासाठी दुसऱ्या इमारतीत जावे लागते.

कुलगुरु सुरेश गोसावी यांनी सांगितले की, “संगीता जगताप यांच्या अध्यक्षतेखाली सात सदस्यीय फॅक्ट फाइंडिंग समिती स्थापन करण्यात आली आहे. या समितीची पहिली बैठक सोमवारी होणार असून, इंटरनॅशनल सेंटरच्या कारभारातील त्रुटींची तपासणी केली जाईल.” विद्यापीठाने आता तातडीने पूर्णवेळ सुरक्षा रक्षक आणि सीसीटीव्ही बसवण्याचे काम हाती घेतले असल्याचेही त्यांनी नमूद केले.

इंटरनॅशनल सेंटरचे संचालक विजय खरे यांनी स्पष्ट केले की, नवीन वसतिगृहाचे काम सुरू असल्याने या विद्यार्थिनींची तात्पुरती सोय येथे करण्यात आली होती. “प्रत्येक इमारतीसाठी स्वतंत्र सुरक्षा रक्षक परवडत नसल्याने एक रक्षक केवळ फेऱ्या मारत असे. घटनेच्या वेळी तेथील कर्मचाऱ्यांनी मला माहिती दिली नाही. वसतिगृहाची जबाबदारी असलेल्या कंत्राटी कर्मचाऱ्यांवर आम्ही कठोर कारवाई करणार आहोत,” असे खरे यांनी सांगितले.

एकीकडे विद्यापीठ आंतरराष्ट्रीय स्तरावर नाव कमावण्याचा प्रयत्न करत असताना, दुसरीकडे परदेशी विद्यार्थिनींच्या सुरक्षेकडे होणारे हे दुर्लक्ष विद्यापीठाच्या प्रतिमेला तडा देणारे ठरत आहे. केवळ घटनेनंतर उपाययोजना करण्यापेक्षा, या हलगर्जीपणाला जबाबदार असणाऱ्या अधिकाऱ्यांवर कारवाई कधी होणार? असा प्रश्न आता विद्यार्थी विचारत आहेत.

© २०२६ मॅक्स मंथन डेली न्यूज. सर्व हक्क राखीव.

आळंदीतील दुहेरी हत्याकांड: ६ वर्षांच्या बालिकेसह वृद्धेचा खून करणाऱ्या नराधमास २४ तासांत अटक

पिंपरी चिंचवड प्रतिनिधी आकाश कांबळे, दिनांक: ३ एप्रिल २०२६, मॅक्स मंथन डेली न्यूज:

आळंदी: आळंदी येथील हनुमानवाडी, ठाकरवस्ती भागात गुरुवारी (२ एप्रिल) सकाळी उघडकीस आलेल्या धक्कादायक दुहेरी हत्याकांडाचा छडा लावण्यात पिंपरी-चिंचवड गुन्हे शाखेला यश आले आहे. अवघ्या २४ तासांच्या आत पोलिसांनी आरोपीला आळेफाटा परिसरातून शिताफीने ताब्यात घेतले. कौटुंबिक कलहातून हा निर्घृण खून केल्याची कबुली आरोपीने दिली आहे.

फिर्यादी संगीता दत्तात्रय केदारी या इंद्रायणी हॉस्पिटलमध्ये रात्रीच्या पाळीत साफसफाईचे काम करतात. त्यांची ६ वर्षांची नात धनश्री सोनू केदारी हिची देखभाल शेजारी राहणाऱ्या मंगल चंद्रकांत शिंदे (वय ७०) या करायच्या. १ एप्रिलच्या रात्री फिर्यादी कामावर गेल्या असताना घरात त्यांची नात आणि मंगल शिंदे या दोघीच होत्या. सकाळी ८:३० च्या सुमारास संगीता केदारी घरी परतल्या तेव्हा त्यांना नात आणि मंगल शिंदे या दोघी रक्ताच्या थारोळ्यात मृतावस्थेत आढळल्या. अज्ञात इसमाने कोणत्या तरी हत्याराने डोक्यावर मारहाण करून त्यांची हत्या केली होती.

घटनेचे गांभीर्य ओळखून पोलीस आयुक्त विनय कुमार चौबे यांनी गुन्हे शाखेला तपासाचे आदेश दिले. तपासादरम्यान फिर्यादीने विनायक तुकाराम भवारी (वय ३१) याच्यावर संशय व्यक्त केला होता. गुन्हे शाखा युनिट-३ चे वरिष्ठ पोलीस निरीक्षक संतोष कसबे आणि त्यांच्या पथकाने तांत्रिक विश्लेषण आणि गुप्त बातमीदारांमार्फत आरोपीचा शोध सुरू केला.

आरोपी विनायक भवारी हा पुणे-नाशिक रोडवरील आळेफाटा येथील ‘हॉटेल समाधान’ जवळ असल्याची माहिती मिळताच पोलिसांनी तिथे सापळा रचला आणि त्याला शिताफीने ताब्यात घेतले. सखोल चौकशीत त्याने कौटुंबिक वादातून हे हत्याकांड केल्याची कबुली दिली आहे.

ही कारवाई पोलीस आयुक्त विनय कुमार चौबे, सह-पोलीस आयुक्त डॉ. शशिकांत महावरकर, अपर पोलीस आयुक्त वसंत परदेशी, पोलीस उपायुक्त (गुन्हे) डॉ. शिवाजी पवार, आणि सहायक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली.

या पथकात युनिट-३ चे वरिष्ठ पोलीस निरीक्षक संतोष कसबे, पोलीस उपनिरीक्षक भरत गोसावी, सुनील जावळे आणि पोलीस अंमलदार सोनवणे, बोहाडे, भोसुरे, सूर्यवंशी, भांगले, राळे, दांगट, महाले, थोरात व वराडे यांचा समावेश होता. तांत्रिक विश्लेषणासाठी प्रकाश नानांवरे यांनी मोलाचे सहकार्य केले.

पुढील तपास आळंदी पोलीस ठाणे करत आहे. एका निष्पाप बालिकेसह वृद्धेची हत्या करणाऱ्या आरोपीला तातडीने जेरबंद केल्यामुळे परिसरातून समाधान व्यक्त होत आहे.

© २०२६ मॅक्स मंथन डेली न्यूज. सर्व हक्क राखीव.

“लोकसहभाग हीच शहर विकासाची ताकद” – महापौर रवि लांडगे; निगडीत भव्य ‘ऑक्सिजन पार्क’चे उद्घाटन

पिंपरी चिंचवड प्रतिनिधी बालाजी नवले, दिनांक: ३ एप्रिल २०२६, मॅक्स मंथन डेली न्यूज:

पिंपरी/निगडी: “लोकसहभागातून उभे राहणारे उपक्रम हीच शहर विकासाची खरी ताकद आहे. निगडी परिसरातील नागरिक आणि महानगरपालिका यांच्या संयुक्त प्रयत्नातून साकारलेला ‘ऑक्सिजन पार्क’ हा पर्यावरण संवर्धनाचा एक आदर्श प्रकल्प आहे,” असे प्रतिपादन महापौर रवि लांडगे यांनी केले.

निगडी प्राधिकरण, सेक्टर २६ येथे स्थानिक रहिवासी आणि पिंपरी चिंचवड महानगरपालिका यांच्या सहभागातून विकसित करण्यात आलेल्या या ऑक्सिजन पार्कचे उद्घाटन महापौर लांडगे यांच्या हस्ते उत्साहात पार पडले.

याप्रसंगी बोलताना महापौर म्हणाले की, पर्यावरण संवर्धन ही केवळ प्रशासनाची नव्हे, तर सर्वांची सामूहिक जबाबदारी आहे. अशा हरित प्रकल्पांमुळे शहर अधिक आरोग्यदायी आणि सुंदर बनेल. महानगरपालिकेच्या २०३ उद्यानांपैकी २५ ते ३० उद्यानांमध्ये लोकसहभागाची हीच संकल्पना राबवून शहर प्रदूषणमुक्त करण्याचा मानस त्यांनी व्यक्त केला.

कार्यक्रमास आमदार अमित गोरखे, उपमहापौर शर्मिला बाबर, विरोधी पक्षनेते भाऊसाहेब भोईर, महापालिका आयुक्त डॉ. विजय सूर्यवंशी, नगरसदस्या शैलजा मोरे, अनुराधा गोरखे, नगरसदस्य अमित गावडे यांच्यासह मुख्य उद्यान अधीक्षक महेश गारगोटे, कार्यकारी अभियंता सुनील पवार, दिलीप भोसले, जयकुमार गुजर, जनसंपर्क अधिकारी प्रफुल्ल पुराणिक आणि परिसरातील नागरिक मोठ्या संख्येने उपस्थित होते.

कार्यक्रमादरम्यान मान्यवरांच्या हस्ते वृक्षारोपण करण्यात आले. यावेळी उपस्थितांनी ‘माझी वसुंधरा’ शपथ घेऊन वसुंधरेला स्वच्छ, सुंदर आणि हरित ठेवण्याचा निर्धार केला. शपथेचे वाचन जनसंपर्क अधिकारी प्रफुल्ल पुराणिक यांनी केले.

“शहरातील प्रत्येक प्रभागात हरित क्षेत्र वाढावे, यासाठी प्रशासन आणि नागरिक एकत्र येत आहेत. लोकसहभागातून साकारलेले ऑक्सिजन पार्क हे भावी पिढ्यांसाठी मौल्यवान ठेवा आहे.”

— शर्मिला बाबर, उपमहापौर, पिंपरी चिंचवड महानगरपालिका

“वाढत्या शहरीकरणाच्या पार्श्वभूमीवर हरित क्षेत्रांचे जतन अत्यंत आवश्यक आहे. नागरिकांच्या सहभागातून साकारलेला हा प्रकल्प पर्यावरण संतुलन राखण्यासाठी महत्त्वपूर्ण ठरेल.”

— डॉ. विजय सूर्यवंशी, आयुक्त, पिंपरी चिंचवड महानगरपालिका

© २०२६ मॅक्स मंथन डेली न्यूज. सर्व हक्क राखीव.

पंडित दीनदयाल उपाध्याय प्रशिक्षण महाअभियानाच्या माध्यमातून राष्ट्रसेवेचा संकल्प; आकुर्डीत भाजप कार्यकर्त्यांना मार्गदर्शन

पिंपरी चिंचवड प्रतिनिधी आकाश कांबळे, दिनांक: ३ एप्रिल २०२६, मॅक्स मंथन डेली न्यूज:

आकुर्डी: भारतीय जनता पार्टी, प्राधिकरण चिंचवड मंडलाच्या वतीने पंडित दीनदयाल उपाध्याय प्रशिक्षण महाअभियानाचे भव्य आयोजन आकुर्डी येथील हॉटेल सिल्वर ७ येथे करण्यात आले होते. या प्रशिक्षणाद्वारे कार्यकर्त्यांमध्ये समाज विकास, संघटन कौशल्य आणि राष्ट्रसेवेची भावना अधिक प्रबळ करण्याचा संकल्प करण्यात आला.

याप्रसंगी भाजप शहराध्यक्ष तथा माजी नगरसेवक शत्रुघ्न (बापू) काटे यांनी उपस्थित राहून कार्यकर्त्यांना मोलाचे मार्गदर्शन केले. प्राधिकरण चिंचवड मंडलाचे अध्यक्ष जयदीपभाऊ खापरे यांनी या महाअभियानाचे अत्यंत नेटके आणि शिस्तबद्ध नियोजन केले होते.

प्रशिक्षणादरम्यान प्रामुख्याने ‘समाज विकास’ आणि ‘संघटन कौशल्य’ या विषयांवर तज्ज्ञांनी सखोल मार्गदर्शन केले. भाजपची कार्यपद्धती आणि पंडित दीनदयाल उपाध्याय यांचा ‘अंत्योदय’ विचार (समाजातील शेवटच्या घटकाचा विकास) तळागाळातील नागरिकांपर्यंत प्रभावीपणे कसा पोहोचवता येईल, याचे तांत्रिक व वैचारिक प्रशिक्षण यावेळी कार्यकर्त्यांना देण्यात आले.

यावेळी बोलताना शहराध्यक्ष शत्रुघ्न ऊर्फ बापू काटे म्हणाले की, “पंडित दीनदयाल उपाध्याय यांचा ‘राष्ट्र प्रथम’ हा विचार घेऊनच भाजपचा प्रत्येक कार्यकर्ता अहोरात्र काम करत असतो. अशा प्रशिक्षणातून कार्यकर्त्यांची वैचारिक जडणघडण होते, ज्यामुळे समाजाचे क्लिष्ट प्रश्न सोडवण्यास मोठी मदत होते. जयदीप खापरे आणि त्यांच्या टीमने राबवलेले हे अभियान पक्ष संघटनेच्या मजबुतीसाठी मैलाचा दगड ठरेल.”

या प्रशिक्षण वर्गाला आमदार सौ. उमाताई खापरे, सचिनदादा पटवर्धन, संघटन सरचिटणीस मोरेश्वरभाऊ शेडगे, सरचिटणीस सौ. वैशालीताई खाडे, शितल ऊर्फ विजयदादा शिंदे, अनुपदादा मोरे यांच्यासह भाजपचे विविध पदाधिकारी, शक्तीकेंद्र प्रमुख, बूथ प्रमुख आणि कार्यकर्ते मोठ्या संख्येने उपस्थित होते.

कार्यकर्त्यांनी घेतलेल्या राष्ट्रसेवेच्या प्रतिज्ञेने या महाअभियानाची यशस्वी सांगता झाली. आगामी काळातील निवडणुका आणि पक्ष विस्ताराच्या दृष्टीने हे प्रशिक्षण अत्यंत महत्त्वाचे मानले जात आहे.

© २०२६ मॅक्स मंथन डेली न्यूज. सर्व हक्क राखीव.

थायलंड, म्यानमार कनेक्शन असलेल्या आंतरराष्ट्रीय सायबर टोळीचा पिंपरी-चिंचवड पोलिसांकडून पर्दाफाश; २.०९ कोटींची फसवणूक

पिंपरी चिंचवड प्रतिनिधी बालाजी नवले दिनांक: ३ एप्रिल २०२६ ,मॅक्स मंथन डेली न्यूज:

पिंपरी: शेअर मार्केट आणि आयपीओ (IPO) मध्ये गुंतवणुकीवर जादा परताव्याचे आमिष दाखवून तब्बल २ कोटी ९ लाख ३० हजार ५३७ रुपयांची फसवणूक करणाऱ्या आंतरराष्ट्रीय सायबर टोळीचा पिंपरी-चिंचवड सायबर पोलिसांनी पर्दाफाश केला आहे. या प्रकरणी पोलिसांनी नवी मुंबई आणि पंजाबमधील ३ आरोपींना अटक केली असून, त्यांचे धागेदोरे थायलंड आणि म्यानमारमधील सायबर क्राईम कॉल सेंटर्सशी जोडलेले असल्याचे निष्पन्न झाले आहे.

फिर्यादीला शेअर बाजार आणि आयपीओमध्ये पैसे गुंतवल्यास भरघोस परतावा मिळेल, असे आमिष आरोपींनी दाखवले होते. विश्वास संपादन करून आरोपींनी फिर्यादीकडून वेळोवेळी वेगवेगळ्या बँक खात्यांवर २.०९ कोटी रुपये भरून घेतले. मात्र, कोणताही परतावा न मिळाल्याने आणि गुंतवलेली रक्कमही परत न मिळाल्याने आपली फसवणूक झाल्याचे फिर्यादीच्या लक्षात आले. त्यांनी पिंपरी-चिंचवड सायबर पोलीस ठाण्यात धाव घेऊन तक्रार नोंदवली.

सायबर पोलिसांनी या गुन्ह्याचा तांत्रिक विश्लेषणारे तपास सुरू केला असता, फसवणुकीची रक्कम नवी मुंबईतील ‘Aarshil Industries Private Limited’ नावाच्या कंपनीच्या बँक खात्यात जमा झाल्याचे दिसून आले. या माहितीवरून पोलिसांनी नवी मुंबईत सापळा रचून सुशील भगवान जुवाटकर याला ताब्यात घेतले.

सुशील जुवाटकर याच्याकडे अधिक चौकशी केली असता, त्याचे साथीदार पंकज राज कपूर आणि निश्चल टंकबीर बरेयली हे बँकॉक (थायलंड) आणि म्यानमार येथील सायबर कॉल सेंटर्समध्ये काम करून भारतात परतल्याची माहिती मिळाली. हे आरोपी नवी मुंबईत नवीन सायबर कॉल सेंटर सुरू करण्याच्या तयारीत असतानाच पोलिसांनी त्यांना बेड्या ठोकल्या.

१. सुशील भगवान जुवाटकर (वय ४२, रा. नेरूळ, नवी मुंबई): रिअल इस्टेट व्यावसायिक.

२. पंकज राज कपूर (वय ३८, रा. जालंधर, पंजाब): बँकॉक/म्यानमार कॉल सेंटरमधील माजी कर्मचारी.

३. निश्चल टंकबीर बरेयली (वय २७, रा. दार्जिलिंग, प. बंगाल): बँकॉक/म्यानमार कॉल सेंटरमधील माजी कर्मचारी.

• ०६ मोबाईल फोन, ०३ पासपोर्ट

• ०३ POS मशीन्स, ०२ लॅपटॉप, ०२ हार्ड डिस्क

• ०२ क्यूआर कोड स्कॅनर, १२ विविध कंपन्यांचे शिक्के

• २४ विविध बँकांच्या चेकबुक किट्स आणि ०५ डेबिट कार्ड्स

तसेच, पोलिसांनी तपासादरम्यान फिर्यादीचे ६२ लाख रुपये विविध बँक खात्यांमध्ये गोठवले (Hold) आहेत.

ही कारवाई पोलीस आयुक्त विनय कुमार चौबे, सह-पोलीस आयुक्त डॉ. शशिकांत महावरकर, अपर पोलीस आयुक्त वसंत परदेशी, पोलीस उपायुक्त (गुन्हे) डॉ. शिवाजी पवार, आणि सहायक पोलीस आयुक्त डॉ. विशाल हिरे यांच्या मार्गदर्शनाखाली सायबर पोलीस ठाण्याचे वरिष्ठ पोलीस निरीक्षक रविकिरण नाळे आणि त्यांच्या पथकाने केली. सरकारी अभियोक्ता सूरज मोहिते यांनी न्यायालयात आरोपींची पोलीस कोठडी मिळवून देण्यासाठी सहकार्य केले.

© २०२६ मॅक्स मंथन डेली न्यूज. सर्व हक्क राखीव.

चाकण एमआयडीसीतील अनधिकृत बांधकामे आणि अतिक्रमणांवर एमआयडीसीचा हातोडा; उद्योजकांच्या मागणीला यश

पिंपरी चिंचवड प्रतिनिधी आकाश कांबळे, दिनांक: ३ एप्रिल २०२६, मॅक्स मंथन डेली न्यूज:

चाकण: आशिया खंडातील सर्वात मोठी औद्योगिक वसाहत म्हणून ओळखल्या जाणाऱ्या चाकण एमआयडीसी (MIDC) परिसरातील अनधिकृत बांधकामे आणि वाढत्या अतिक्रमणांविरुद्ध महाराष्ट्र औद्योगिक विकास महामंडळाने (MIDC) मोठी मोहीम उघडली आहे. ‘टाइम्स ऑफ इंडिया’च्या वृत्तानुसार, एमआयडीसीच्या अधिकाऱ्यांनी चाकण फेज २ आणि फेज ३ मधील रस्ते आणि मोकळ्या जागांवर झालेली अतिक्रमणे हटवण्यास सुरुवात केली आहे.

चाकण औद्योगिक वसाहतीतील अनेक कंपन्यांच्या प्रवेशद्वारासमोर आणि अंतर्गत रस्त्यांवर अनधिकृत टपऱ्या, हॉटेल आणि पार्किंगमुळे वाहतुकीची मोठी कोंडी होत होती. यामुळे अवजड वाहनांच्या येण्या-जाण्यास अडथळा निर्माण होऊन उत्पादनावर परिणाम होत असल्याच्या तक्रारी चाकण मॅन्युफॅक्चरर्स असोसिएशनने वारंवार केल्या होत्या. या पार्श्वभूमीवर, एमआयडीसी प्रशासनाने पोलिसांच्या मोठ्या बंदोबस्तात ही कारवाई राबवली.

• फेज २ आणि ३ वर लक्ष: प्रामुख्याने ज्या ठिकाणी मोठ्या ऑटोमोबाईल कंपन्यांचे प्रकल्प आहेत, त्या भागातील फुटपाथ आणि ग्रीन बेल्टवरील अतिक्रमणे जमीनदोस्त करण्यात आली.

• वाहतूक कोंडीतून सुटका: रस्त्याच्या कडेला असलेल्या अनधिकृत पार्किंग आणि खाऊ गल्ल्यांमुळे होणारी कोंडी आता कमी होण्याची शक्यता आहे.

• नोटीस बजावून कारवाई: एमआयडीसीने यापूर्वीच अनेक अनधिकृत बांधकाम धारकांना नोटिसा बजावल्या होत्या, मुदत संपल्यानंतर ही धडक मोहीम हाती घेण्यात आली.

एमआयडीसीच्या प्रादेशिक अधिकाऱ्यांनी स्पष्ट केले आहे की, ही मोहीम केवळ एकदाच राबवून थांबणार नाही. ज्या जागा रिकाम्या करण्यात आल्या आहेत, तिथे पुन्हा अतिक्रमण झाल्यास संबंधित व्यक्तींवर फौजदारी गुन्हे दाखल केले जातील. तसेच, उद्योजकांना सुरक्षित आणि अडथळामुक्त वातावरण मिळावे यासाठी एमआयडीसी कटिबद्ध असल्याचे प्रशासनाने म्हटले आहे.

एमआयडीसीच्या या भूमिकेचे स्थानिक उद्योजकांनी स्वागत केले आहे. रस्ते मोकळे झाल्यामुळे कामगारांची ने-आण करणाऱ्या बसेस आणि कच्च्या मालाची वाहतूक करणाऱ्या ट्रकना आता मोठा दिलासा मिळणार आहे. मात्र, ही स्वच्छता कायम राहावी, अशी मागणीही उद्योजकांनी केली आहे.

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवडमध्ये वारंवार खंडित होणाऱ्या वीजपुरवठ्याने नागरिक हैराण; मेट्रोचे काम आणि पावसाचा ‘शॉक’

पिंपरी चिंचवड प्रतिनिधी बालाजी नवले, दिनांक: ३ एप्रिल २०२६, मॅक्स मंथन डेली न्यूज:

पिंपरी: पिंपरी-चिंचवड शहराच्या मोठ्या भागात गेल्या काही दिवसांपासून वारंवार खंडित होणाऱ्या वीजपुरवठ्यामुळे नागरिक आणि व्यावसायिक प्रचंड संताप व्यक्त करत आहेत. ‘टाइम्स ऑफ इंडिया’च्या ताज्या वृत्तानुसार, अकुर्डी, निगडी, प्राधिकरण आणि वाकड यांसारख्या प्रमुख भागांत वीज संकट अधिक गडद झाले असून, उन्हाच्या वाढत्या तडाख्यात तासनतास वीज नसल्याने जनजीवन विस्कळीत झाले आहे.

महावितरणच्या भोसरी आणि पिंपरी विभागातील अधिकाऱ्यांनी दिलेल्या माहितीनुसार, वीज खंडित होण्यामागे दोन मुख्य कारणे आहेत:

१. मेट्रो कामामुळे केबलचे नुकसान: निगडी, अकुर्डी आणि प्राधिकरण भागात सुरू असलेल्या मेट्रोच्या कामादरम्यान भूमिगत वीज वाहिन्या (Cables) कापल्या गेल्या. यामुळे दोन महत्त्वाच्या सब-स्टेशनवर परिणाम होऊन दीर्घकाळ वीजपुरवठा खंडित झाला.

२. अवकाळी पावसाचा तडाखा: गुरुवारी झालेल्या वादळी पावसामुळे अनेक ठिकाणी तांत्रिक बिघाड झाले, ज्यामुळे काही भागांत रात्रभर वीज गायब होती.

प्राधिकरणातील सेक्टर २४ चे रहिवासी प्रमोद काळे यांनी सांगितले की, गेल्या आठवड्यापासून परिस्थिती अधिक बिकट झाली आहे. रात्री गेलेली वीज थेट दुसऱ्या दिवशी दुपारी येत असल्याने उकाड्याने अतोनात हाल होत आहेत. वाकडमधील रहिवासी किरण वडगामा यांच्या मते, वाकड आणि पिंपळे सौदागर भागातील भूमिगत केबल्स जुन्या झाल्या असून त्या बदलण्याचा १८० कोटींचा प्रस्ताव गेल्या चार वर्षांपासून धूळ खात पडला आहे. जोपर्यंत या केबल्स बदलल्या जात नाहीत, तोपर्यंत ही समस्या सुटणार नाही.

वारंवार होणाऱ्या या अघोषित लोडशेडिंगमुळे वाल्हेकरवाडी आणि चिखली भागातील छोट्या उद्योगांना आर्थिक फटका बसत आहे. तसेच, आयटी क्षेत्रात कार्यरत असलेल्या आणि घरून काम (WFH) करणाऱ्या कर्मचाऱ्यांच्या कामातही मोठे व्यत्यय येत आहेत. अधिकृत संवाद किंवा पूर्वसूचना न देता वीज कापली जात असल्याचा आरोप नागरिकांनी केला आहे.

दरम्यान, महावितरणने जाणीवपूर्वक कोणतेही लोडशेडिंग केले जात नसल्याचे स्पष्ट केले आहे. केवळ तांत्रिक बिघाड आणि पायाभूत सुविधांच्या कामामुळे उद्भवलेल्या परिस्थितीवर नियंत्रण मिळवण्याचे प्रयत्न सुरू असल्याचे प्रशासनाकडून सांगण्यात आले. मात्र, पावसाळा सुरू होण्यापूर्वीच ही अवस्था असेल, तर पावसाळ्यात काय होणार? असा सवाल आता पिंपरी-चिंचवडकर विचारत आहेत.

© २०२६ मॅक्स मंथन डेली न्यूज. सर्व हक्क राखीव.

महावितरणच्या ढिसाळ कारभारामुळे पिंपरी-चिंचवडमध्ये १८ तास अंधार; सरदार रविंद्र सिंह यांची नुकसान भरपाईसह चौकशीची मागणी

पिंपरी चिंचवड प्रतिनिधी आकाश कांबळे, दिनांक: ३ एप्रिल २०२६, मॅक्स मंथन डेली न्यूज:

महसूलवाढीच्या बळावर पिंपरी-चिंचवडला अधिक सक्षम बनवणार; महापौर रवि लांडगे यांचा निर्धार

पिंपरी चिंचवड प्रतिनिधी बालाजी नवले दिनांक: २ एप्रिल २०२६, मॅक्स मंथन डेली न्यूज:

पिंपरी: “पिंपरी-चिंचवड शहरातील सजग करदात्यांमुळेच महापालिका विविध विकास प्रकल्प प्रभावीपणे राबवू शकत आहे. आर्थिक वर्ष २०२५-२६ मध्ये नागरिकांनी दिलेला प्रतिसाद प्रेरणादायी असून, या महसूलवाढीचा उपयोग शहराच्या पायाभूत सुविधा, स्वच्छता आणि सार्वजनिक सेवांचा दर्जा उंचावण्यासाठी केला जाईल,” असा विश्वास महापौर रवि लांडगे यांनी व्यक्त केला.

पिंपरी येथील मुख्य प्रशासकीय इमारतीत आयोजित पत्रकार परिषदेत ते बोलत होते. यावेळी विरोधी पक्षनेते भाऊसाहेब भोईर, क्रीडा व सांस्कृतिक समिती सभापती कैलास कुटे, उपआयुक्त सचिन पवार, अण्णा बोदडे, राजेश आगळे आणि इतर अधिकारी उपस्थित होते.

आर्थिक वर्ष २०२५-२६ मध्ये महापालिकेच्या विविध विभागांनी वसुलीचे नवे उच्चांक प्रस्थापित केले आहेत:

• करसंकलन विभाग: सलग दुसऱ्या वर्षी साडेनऊशे कोटींचा टप्पा पार करत ९६१ कोटी रुपयांचा मालमत्ता कर वसूल केला. सुमारे ७.३२ लाख मालमत्तांपैकी ६.३१ लाख धारकांनी कर भरला.

• अग्निशमन विभाग: मागील वर्षाच्या तुलनेत १६.६४ कोटींची वाढ नोंदवत १७९.६९ कोटींचे विक्रमी उत्पन्न मिळवले.

• पाणीपुरवठा विभाग: इतिहासातील सर्वाधिक ८०.७४ कोटींची वसुली केली. यात सांगवी विभागाने ७.६५ कोटींसह प्रथम क्रमांक पटकावला.

• आकाशचिन्ह व परवाना विभाग: पारदर्शक कार्यपद्धतीमुळे २१.५० कोटींची वसुली केली, जी मागील वर्षापेक्षा १ कोटीने जास्त आहे.

• झोपडपट्टी निर्मूलन विभाग: गेल्या पाच वर्षांतील सर्वाधिक १.१० कोटी रुपयांचा सेवाकर वसूल केला.

शहराच्या औद्योगिक ओळखीसोबतच सांस्कृतिक वारसा जपणा-या ज्येष्ठ कलाकारांचा महापालिकेच्या वतीने विशेष सत्कार करण्यात येणार असल्याची घोषणा महापौर लांडगे यांनी केली. “ज्या कलाकारांनी साहित्य, नाट्य, संगीत आणि नृत्य क्षेत्रात शहराचे नाव उज्ज्वल केले, त्यांच्या कार्याची दखल घेणे ही आमची जबाबदारी आहे,” असे ते म्हणाले.

या सोहळ्यात मधुकर जोशी (पत्रकार व अभिनेता), धोंडीराम सायकर (तबलावादक), पद्मश्री नंदकिशोर कपोते (नर्तक), रमेश वाकनीस (लेखक), सुहास जोशी (दिग्दर्शक), अरुण बोऱ्हाडे (साहित्यिक), कल्पना क्षीरसागर, वंदना घांगुर्डे, पंडित चव्हाण (गायक), शारदा मुंढे (प्रबोधनकार), गीता शर्मा (भरतनाट्यम), डॉ. संजीवकुमार पाटील, प्रफुल्ल भिष्णूकर (चित्रकार), डॉ. मनोज देवळेकर, वैशाली धोंगडे, श्रीकृष्ण कालमित्रा, सीमा गांधी आणि संजय काळभोर या दिग्गजांचा गौरव केला जाणार असल्याची माहिती सभापती कैलास कुटे यांनी दिली.

ऑनलाइन कर भरणा, सवलत योजना आणि पारदर्शक तंत्रज्ञानामुळे नागरिकांचा विश्वास वाढला आहे. आगामी काळात पाणीपुरवठा यंत्रणेचे सक्षमीकरण, आधुनिक अग्निशमन यंत्रणा आणि दर्जेदार रस्ते यावर विशेष भर देऊन शहराला खऱ्या अर्थाने ‘स्मार्ट’ बनवण्याचा संकल्प महापौरांनी यावेळी बोलून दाखवला.

© २०२६ मॅक्स मंथन डेली न्यूज. सर्व हक्क राखीव.