पिंपरी-चिंचवड महानगरपालिका हॅकेथॉन २०२५ च्या विजेत्यांचा उपमहापौर शर्मिला बाबर यांच्या हस्ते गौरव!

पिंपरी चिंचवड प्रतिनिधी बालाजी नवले, दि. ६ ऑगस्ट २०२६ मॅक्स मंथन डेली न्यूज:

“हॅकेथॉनसारख्या स्पर्धा या तरुणांच्या कल्पकतेला आणि तांत्रिक कौशल्याला योग्य दिशा देणारे एक प्रभावी व्यासपीठ आहे. शहराच्या विविध नागरी समस्यांवर तंत्रज्ञानाच्या माध्यमातून आधुनिक उपाय शोधण्याची अथांग क्षमता आपल्या युवकांमध्ये आहे. अशा स्पर्धांमुळे नवोन्मेषी विचारांना चालना मिळते आणि भविष्यातील अधिक सक्षम, स्मार्ट व नागरिकाभिमुख शहर उभारण्यास निश्चितच मदत होते. पिंपरी-चिंचवड महानगरपालिका भविष्यातही अशा नाविन्यपूर्ण उपक्रमांना सातत्याने पाठबळ देईल.”

पिंपरी-चिंचवड पोलिसांचा अवैध धंद्यांवर सर्जिकल स्ट्राईक! ३ सराईत गुन्हेगारांवर एम.पी.डी.ए. अन्वये कारवाई; १ वर्षासाठी मध्यवर्ती कारागृहात स्थानबद्ध!

पिंपरी चिंचवड प्रतिनिधी आकाश कांबळे, दि. ५ ऑगस्ट २०२६ मॅक्स मंथन डेली न्यूज:

पिंपरी-चिंचवड: पिंपरी-चिंचवड पोलीस आयुक्तालय हद्दीत दहशत माजवणारे, बेकायदेशीर दारू विक्री करणारे आणि वारंवार गुन्हे करणाऱ्या सराईत गुन्हेगारांविरोधात पोलीस प्रशासनाने आक्रमक पवित्रा घेतला आहे. पोलीस आयुक्त विनय कुमार चौबे यांनी एम.पी.डी.ए. (MPDA) कायद्यान्वये धडक कारवाई करत ३ अट्टल गुन्हेगारांना प्रत्येकी १ वर्षासाठी मध्यवर्ती कारागृहात स्थानबद्ध करण्याचे आदेश जारी केले आहेत. शहरातील कायदा व सुव्यवस्था अबाधित राखण्यासाठी आणि अवैध दारू माफ्यांचे जाळे उध्वस्त करण्यासाठी पिंपरी-चिंचवड पोलिसांनी हा मास्टर प्लॅन तयार केला आहे.

१. कोंडीबा आडेप्पा कांबळे (वय ३७ वर्षे, रा. सुदर्शन नगर, पिंपळे गुरव, पुणे) सांगवी पोलीस ठाण्याच्या हद्दीत राहणारा हा अट्टल गुन्हेगार असून त्याच्यावर दारू विक्रीचे तब्बल ०९ गुन्हे दाखल आहेत. त्याची रवानगी हरसुल मध्यवर्ती कारागृह (छत्रपती संभाजीनगर) येथे करण्यात आली आहे.

२. जीवन मारुती राजपूत (वय ४८ वर्षे, रा. गोनवडी, ता. खेड, जि. पुणे) उत्तर महाळुंगे एमआयडीसी पोलीस ठाण्याच्या हद्दीत बेकायदेशीर गावठी हातभट्टी दारू तयार करणे व विकणे यांसारखे १४ गंभीर गुन्हे याच्यावर नोंद आहेत. यालाही हरसुल मध्यवर्ती कारागृह (छत्रपती संभाजीनगर) येथे स्थानबद्ध करण्यात आले आहे.

३. धनराज सोमाजी नट (वय ३५ वर्षे, रा. माणरोड, हिंजवडी, पुणे) हिंजवडी पोलीस ठाण्याच्या हद्दीत बेकायदेशीर गावठी हातभट्टी दारू विक्रीचे ०४ गुन्हे असलेला हा सराईत गुन्हेगार आहे. याची रवानगी येरवडा मध्यवर्ती कारागृह (पुणे) येथे करण्यात आली आहे.

पोलीस आयुक्त विनय कुमार चौबे यांनी स्पष्ट केले की, पिंपरी-चिंचवड पोलीस आयुक्तालय हद्दीत अवैध दारू व्यवसायाला पूर्णपणे ‘झिरो टॉलरन्स’ आहे. समाजातील शांतता आणि नागरिकांच्या आरोग्याशी खेळणाऱ्या गुन्हेगारांची अजिबात गय केली जाणार नाही. पोलिसांनी दिलेल्या माहितीनुसार  सन २०२५ मध्ये एम.पी.डी.ए. कायद्यान्वये ३५ गुन्हेगारांवर स्थानबद्धतेची कारवाई करण्यात आली होती. सन २०२६मध्ये (जानेवारी ते जुलै) आतापर्यंत ११ सराईत गुन्हेगारांना एम.पी.डी.ए. अंतर्गत तुरुंगात पाठवण्यात आले आहे.

ही कारवाई पोलीस आयुक्त विनय कुमार चौबे, सह-आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आव्हाड, अपर पोलीस आयुक्त बसवराज तेली, पोलीस उप-आयुक्त संदीप आटोळे, श्वेता खेडकर, प्रदीप जाधव, रोहिदास पवार (गुन्हे), सहाय्यक पोलीस आयुक्त डॉ. सुदर्शन राठोड, मनीषा कदम, प्रिया डमाळे आणि विठ्ठल कुबडे यांच्या मार्गदर्शनाखाली करण्यात आली. तसेच वरिष्ठ पोलीस निरीक्षक जितेंद्र कोळी (सांगवी), बालाजी पांढरे (हिंजवडी), दिगंबर सूर्यवंशी (उत्तर महाळुंगे) आणि पी.सी.बी. गुन्हे शाखेच्या पथकाने ही कामगिरी फत्ते केली.

© २०२६ मॅक्स मंथन डेली न्यूज. सर्व हक्क राखीव.

ज्येष्ठ नागरिक हे समाजाचे मार्गदर्शक आणि विचारांचे विद्यापीठ; पिंपरी-चिंचवड ज्येष्ठ नागरिक महासंघाच्या अध्यक्षा वृषालीताई मरळ यांचा नागरी सत्कार!

सांगवी/पिंपरी चिंचवड प्रतिनिधी लक्ष्मण प्रधान, दि. ४ ऑगस्ट २०२६ मॅक्स मंथन डेली न्यूज:

पिंपरी चिंचवड: अनुभव, ज्ञान आणि संस्कारांची श्रीमंती जपणारे ज्येष्ठ नागरिक हे समाजाचे खऱ्या अर्थाने मार्गदर्शक आणि विचारांचे विद्यापीठ असतात. याच ज्येष्ठांच्या आनंदी, समृद्ध आणि सन्मानजनक आयुष्यासाठी समर्पित भावनेने कार्य करणाऱ्या पिंपरी-चिंचवड ज्येष्ठ नागरिक महासंघाच्या नवनिर्वाचित अध्यक्षा वृषालीताई मरळ यांचा सांगवी येथे नागरी सत्कार करण्यात आला.

ज्येष्ठ नागरिक संघ (सांगवी परिसर) आणि संत सावतामाळी उद्यान येथे आयोजित जुलै व ऑगस्ट महिन्यातील ज्येष्ठ नागरिकांच्या स्नेहमयी वाढदिवस सोहळ्यात त्या बोलत होत्या. “पिंपरी-चिंचवड शहरातील सर्व ज्येष्ठ नागरिकांचे प्रलंबित प्रश्न, निवृत्ती वेतन, आरोग्यविषयक समस्या आणि सोयी-सुविधा सोडवण्यासाठी महासंघ पूर्ण ताकदीने आणि कटिबद्धतेने कार्य करेल,” अशी ग्वाही वृषालीताई मरळ यांनी दिली.

कार्यक्रमाची सुरुवात श्री गणेश प्रतिमेचे पूजन आणि दीपप्रज्वलनाने झाली. याप्रसंगी सांगवी परिसरातील विविध क्षेत्रांत उल्लेखनीय कार्य करणाऱ्या मान्यवरांचा शाल व श्रीफळ देऊन विशेष सत्कार करण्यात आला. पिंपरी-चिंचवड महानगरपालिकेच्या ‘ह’ विभाग अध्यक्षपदी बिनविरोध निवड झाल्याबद्दल त्यांचा नागरी सत्कार करण्यात आला. तृप्तीताई कांबळे (नगरसेविका)नी सर्व ज्येष्ठ महिलांनी परिधान केलेल्या एकसारख्या पारंपरिक साड्यांचे कौतुक करत त्यांना शुभेच्छा दिल्या. नवी सांगवी येथील श्री गणेश सहकारी बँकेच्या संचालकपदी बिनविरोध निवड झाल्याबद्दल जवाहर ढोरे (स्थानिक पदाधिकारी) यांचा सत्कार करण्यात आला. ३. ह. भ. प. बंडोपंत शेळके (माजी अध्यक्ष): उच्च व तंत्रशिक्षण मंत्री उदयजी सामंत आणि आदेश बांदेकर यांच्या हस्ते “वारकरी भूषण पुरस्कार” मिळाल्याबद्दल संघाच्या वतीने ह. भ. प. बंडोपंत शेळके (माजी अध्यक्ष) यांचा विशेष गौरव करण्यात आला.

आपल्या मनोगतात अध्यक्षा वृषालीताई मरळ म्हणाल्या की, पिंपरी-चिंचवड शहरात एकूण १७५ ज्येष्ठ नागरिक संघ कार्यरत असून तब्बल ४० हजार ज्येष्ठ सभासदांची नोंदणी झाली आहे. ज्येष्ठांच्या कलागुणांना वाव देण्यासाठी महासंघाच्या वतीने लवकरच पिंपरी-चिंचवड मध्यवर्ती ज्येष्ठ महिला भजन स्पर्धा आयोजित करण्यात येणार असून त्यात सांगवीच्या महिला भजनी मंडळाला विशेष निमंत्रित केले जाईल.

संघाचे अध्यक्ष कमलाकर जाधव यांनी प्रास्ताविकात सांगितले की, ९ मे १९९७ रोजी डॉ. श्रीराम पांडे यांनी स्थापन केलेला सांगवीतील हा सर्वात जुना आणि सक्रिय संघ आहे. येथे केवळ वाढदिवस नव्हे तर आरोग्य तपासणी शिबिरे, सांस्कृतिक कार्यक्रम आणि विविध स्पर्धांच्या माध्यमातून ज्येष्ठांमध्ये नवचैतन्य निर्माण केले जाते.

या कार्यक्रमात विशेष आकर्षण ठरलेल्या ज्येष्ठ महिला भजनी मंडळाची सुरुवात केल्याबद्दल ह. भ. प. रामदास कामठे काका व सुभद्राताई कामठे यांचा “गुरुपूजन” करून आदर सत्कार करण्यात आला. त्यानंतर महिला भजनी मंडळाने सादर केलेल्या मंत्रमुग्ध करणाऱ्या भजनाने संपूर्ण परिसर भक्तीमय झाला. या भजनाला हार्मोनियमवर ह. भ. प. कामठे दादा आणि पखवाजवर रोहिदास ठाकर यांनी सुरेल साथ दिली.

जुलै आणि ऑगस्ट महिन्यात जन्मदिवस असलेल्या सर्व ज्येष्ठ सभासदांचा उपरणे व गुलाबपुष्प देऊन सन्मान करण्यात आला. या सोहळ्याला तब्बल १०० हून अधिक स्त्री-पुरुष ज्येष्ठ नागरिक उत्साहाने उपस्थित होते.

या कौटुंबिक व आत्मीय सोहळ्याचे उत्कृष्ट आयोजन संघाचे अध्यक्ष कमलाकर जाधव, सचिव सुरेंद्र शेळके, कोषाध्यक्ष शिवाजी बंडगर, सदस्य गोपाळ गाढवे, स्वीकृत सदस्य सुनील पोकरे तसेच महिला भजनी मंडळाच्या आयोजक अनिता गाढवे, कल्पना देगांवकर व रेखाताई गोरे यांनी केले. कार्यक्रमाचे बहारदार सूत्रसंचालन सुरेंद्र शेळके यांनी केले, तर उपस्थितांचे आभार कार्याध्यक्ष विष्णु झाजुर्डे यांनी मानले.

© २०२६ मॅक्स मंथन डेली न्यूज. सर्व हक्क राखीव.

घरगुती कचरा व्यवस्थापन अधिक प्रभावी करण्यासाठी पिंपरी-चिंचवड महापालिकेचे व्यापक जनजागृती अभियान!

पिंपरी चिंचवड प्रतिनिधी बालाजी नवले, दि. ४ ऑगस्ट २०२६ मॅक्स मंथन डेली न्यूज:

पिंपरी चिंचवड: सर्वोच्च न्यायालयाच्या निर्देशानुसार शहरातील घनकचरा व्यवस्थापन अधिक प्रभावी आणि सक्षम करण्यासाठी पिंपरी-चिंचवड महानगरपालिकेच्या वतीने नागरिकांमध्ये कचरा विलगीकरणाबाबत (Waste Segregation) व्यापक जनजागृती अभियान राबविण्यात येत आहे. घरातून निर्माण होणारा कचरा ओला, सुका, सॅनिटरी आणि विशेष काळजीयोग्य अशा चार स्वतंत्र प्रकारांत वेगळा करूनच महापालिकेच्या घंटागाडीत देण्याचे आवाहन प्रशासनाकडून करण्यात आले आहे.

या विशेष अभियानांतर्गत शहरातील सर्व क्षेत्रीय कार्यालयांच्या कार्यक्षेत्रात महापालिकेची पथके घरोघरी भेटी देऊन नागरिकांना कचरा विलगीकरणाचे महत्त्व प्रत्यक्ष समजावून सांगत आहेत. तसेच विविध सोसायट्या, वस्त्या आणि सार्वजनिक ठिकाणी थेट संवाद साधून मार्गदर्शन केले जात आहे.

घनकचरा व्यवस्थापन नियम २०२६ नुसार प्रत्येक नागरिकाने स्त्रोतस्थळीच (घरातच) कचऱ्याचे विलगीकरण करणे बंधनकारक आहे. ओला कचरा: जैविक प्रक्रियेसाठी आणि खतनिर्मितीसाठी, सुका कचरा पुनर्वापरासाठी (Recycling), सॅनिटरी कचरा आरोग्यविषयक सुरक्षिततेसाठी स्वतंत्र विल्हेवाट, विशेष काळजीयोग्य कचरा घातक व इलेक्ट्रॉनिक कचऱ्याचे सुरक्षित व्यवस्थापन, कचरा असा चार प्रकारांत स्वतंत्रपणे जमा केल्यास त्यावर प्रक्रिया करणे अत्यंत सुलभ होते. यामुळे पुनर्वापराला चालना मिळून लँडफिल (Landfill) वर जाणाऱ्या कचऱ्याचे प्रमाण मोठ्या प्रमाणावर कमी होण्यास मदत होणार आहे.

“स्वच्छ आणि पर्यावरणपूरक पिंपरी-चिंचवड घडविण्यासाठी नागरिकांचा सहभाग अत्यंत महत्त्वाचा आहे. सर्वोच्च न्यायालयाच्या निर्देशानुसार प्रत्येक घरातून कचऱ्याचे चार प्रकारांत योग्य विलगीकरण झाल्यास शहरातील कचरा व्यवस्थापन अधिक सक्षम होईल. नागरिकांनी महापालिकेच्या या उपक्रमाला पूर्ण सहकार्य करावे.”

— रवि लांडगे, महापौर, पिंपरी-चिंचवड महानगरपालिका

“स्रोतस्थळी कचरा विलगीकरण हा शाश्वत कचरा व्यवस्थापनाचा मूलभूत टप्पा आहे. ओला, सुका, सॅनिटरी आणि विशेष काळजीयोग्य कचरा स्वतंत्रपणे दिल्यास कचरा प्रक्रियेला गती मिळते आणि स्वच्छ शहराच्या उद्दिष्टपूर्तीस मदत होते.”

— डॉ. विजय सूर्यवंशी, आयुक्त, पिंपरी-चिंचवड महानगरपालिका

“महापालिकेच्या माध्यमातून प्रत्येक प्रभागात नागरिकांशी थेट संवाद साधून कचरा विलगीकरणाबाबत जनजागृती करण्यात येत आहे. नागरिकांचा सक्रिय सहभाग वाढवून कचरा व्यवस्थापन यंत्रणा अधिक प्रभावी करण्यावर आमचा भर आहे.”

— कुलदीप जंगम, अतिरिक्त आयुक्त, पिंपरी-चिंचवड महानगरपालिका

“घरातूनच कचऱ्याचे योग्य विलगीकरण केल्यास त्यावरील प्रक्रिया अधिक सुलभ आणि परिणामकारक होते. पर्यावरण संरक्षण तसेच सार्वजनिक आरोग्याच्या दृष्टीने प्रत्येक नागरिकाने कचरा चार प्रकारांत वेगळा करून द्यावा.”

— डॉ. प्रदीप ठेंगल, उप-आयुक्त, पिंपरी-चिंचवड महानगरपालिका

महापालिकेच्या या पर्यावरणपूरक मोहिमेला शहरातील नागरिकांकडून उत्स्फूर्त आणि सकारात्मक प्रतिसाद मिळत असून, ‘स्वच्छ, सुंदर आणि हरित पिंपरी-चिंचवड’ घडवण्यासाठी महापालिका प्रशासन सातत्याने कटिबद्ध आहे.

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवड महापालिकेचा कर संकलनात नवा विक्रम; ४ ऑगस्टपर्यंत तब्बल ५५६ कोटींचा मालमत्ता कर वसूल!

पिंपरी चिंचवड प्रतिनिधी आकाश कांबळे, दि. ४ ऑगस्ट २०२६ मॅक्स मंथन डेली न्यूज:

पिंपरी-चिंचवड : पिंपरी-चिंचवड महानगरपालिकेच्या कर आकारणी व कर संकलन विभागाने चालू आर्थिक वर्षात कामगिरीचा नवा उच्चांक गाठला आहे. १ एप्रिल २०२६ ते ४ ऑगस्ट २०२६ (दुपारी १२ वाजेपर्यंत) या अवघ्या चार महिन्यांच्या कालावधीत महापालिकेच्या तिजोरीत तब्बल ५५६ कोटी ८४ लाख ३४ हजार ७२९ रुपयांचा मालमत्ता कर जमा झाला आहे.

विशेष म्हणजे, उपायुक्त सचिन पवार यांनी कर संकलन विभागाचा पदभार स्वीकारल्यापासून विभागाच्या कामकाजात अभूतपूर्व सकारात्मक बदल घडून आले आहेत. त्यांच्या पारदर्शक, नियोजनबद्ध आणि शिस्तबद्ध कारभारामुळेच कर संकलनाच्या गतीला आणि पारदर्शकतेला मोठी चालना मिळाली असल्याचे चित्र प्रशासनात व नागरिकांमध्ये पाहायला मिळत आहे.

यंदा कर भरण्यासाठी नागरिकांनी महापालिकेच्या ऑनलाईन सुविधेला अभूतपूर्व पसंती दिली आहे. एकूण जमा झालेल्या ५५६ कोटी रुपयांच्या करांपैकी ५१२ कोटी ७७ लाख ९८ हजार ७०८ रुपये (तब्बल ९२% पेक्षा जास्त) रक्कम ऑनलाईन माध्यमातून जमा झाली आहे.

तर ऑफलाइन माध्यमातून ४४ कोटी ६ लाख ३६ हजार २१ रुपये जमा झाले आहेत. यामध्ये रोखीद्वारे (Cash) २३ कोटी ८५ लाख ७० हजार १२२ रुपये, धनादेशाद्वारे (Cheque)  १८ कोटी ४३ लाख ६७ हजार ५७२ रुपये, डिमांड ड्राफ्टद्वारे (DD) १ कोटी ७६ लाख ९८ हजार ३२७ रुपये जमा झाले आहेत.

शहरात निवासी, व्यावसायिक, औद्योगिक, मिश्र आणि मोकळ्या जागांसह एकूण ७ लाख ४४ हजार ६३० नोंदणीकृत मालमत्ता आहेत. एवढ्या मोठ्या प्रमाणातील मालमत्ताधारकांपर्यंत वेळेत देयके पोहोचवणे आणि कर सवलतींच्या योजना लोकांपर्यंत पोहोचवणे हे मोठे आव्हान होते. परंतु, उपायुक्त सचिन पवार यांनी पदभार घेतल्यापासून कर संकलन प्रणाली सुटसुटीत केली, अधिकारी व कर्मचाऱ्यांना थेट उद्दिष्टे देऊन उत्तरदायी बनवले, तसेच तंत्रज्ञानाचा जास्तीत जास्त वापर करण्यावर भर दिला. त्यांच्या याच दूरदृष्टीमुळे चार लाखांहून अधिक मिळकतधारकांनी अत्यंत सुलभतेने कर भरणा केला असून महापालिकेच्या महसुलात ऐतिहासिक वाढ झाली आहे.

“पिंपरी-चिंचवड शहराच्या सर्वांगीण विकासासाठी मालमत्ता कराचे वेळेवर संकलन अत्यंत महत्त्वाचे आहे. शहरातील नागरिकांनी मोठ्या प्रमाणावर मालमत्ता कर भरून विकासकामांप्रती आपली जबाबदारी पार पाडली आहे. विशेष म्हणजे, ऑनलाइन माध्यमातून कर भरण्यास नागरिकांनी दिलेला उत्स्फूर्त प्रतिसाद हा डिजिटल सेवांवरील विश्वासाचे द्योतक आहे. ज्या मिळकतधारकांनी अद्याप मालमत्ता कर भरलेला नाही, त्यांनी विलंब न करता कर भरून शहराच्या विकासात आपले योगदान द्यावे.”

— रवि लांडगे, महापौर, पिंपरी-चिंचवड महानगरपालिका

“महापालिकेच्या विकासकामांना आर्थिक बळ देण्यासाठी मालमत्ता कर हा महत्त्वाचा महसुलाचा स्रोत आहे. नागरिकांनी वेळेत कर भरून विकास प्रक्रियेत सहभाग नोंदविला आहे, ही समाधानाची बाब आहे. ज्या मिळकतधारकांनी अद्याप कर भरलेला नाही, त्यांनी विलंब न करता मालमत्ता कर भरून महापालिकेला सहकार्य करावे.”

— डॉ. विजय सूर्यवंशी, आयुक्त, पिंपरी-चिंचवड महानगरपालिका

“चालू आर्थिक वर्ष २०२६-२७ मध्ये ४ ऑगस्टपर्यंत ५५६ कोटी रुपयांहून अधिक मालमत्ता कर संकलित झाला आहे. त्यापैकी ५१२ कोटी रुपयांहून अधिक रक्कम ऑनलाइन माध्यमातून जमा झाली आहे. यावरून नागरिकांचा डिजिटल माध्यमावरील वाढता विश्वास दिसून येतो. ज्या मिळकतधारकांनी अद्याप कर भरला नाही, तो त्यांनी तात्काळ भरावा.”

— सचिन पवार, उपायुक्त, पिंपरी-चिंचवड महानगरपालिका

उपायुक्त सचिन पवार यांच्या कुशल नेतृत्वाखाली कर संकलन विभागाने साध्य केलेल्या या यशाचे महापालिका वर्तुळात व नागरिकांमधून विशेष कौतुक केले जात आहे.

पिंपरी चिंचवड प्रतिनिधी बालाजी नवले

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवड शहराच्या वाहतूक व्यवस्थेला शिस्त लावण्यासाठी महापौर रवि लांडगे यांचा मोठा निर्णय; पार्किंग पॉलिसीची होणार प्रभावी अंमलबजावणी!

पिंपरी चिंचवड प्रतिनिधी लक्ष्मण प्रधान, दि. ४ ऑगस्ट २०२६ मॅक्स मंथन डेली न्यूज:

पिंपरी-चिंचवड: पिंपरी-चिंचवड शहराचा झपाट्याने होणारा विस्तार, वाढती लोकसंख्या आणि वाहनांच्या संख्येमुळे निर्माण होणाऱ्या वाहतूक कोंडीवर कायमस्वरूपी मात करण्यासाठी महापौर रवि लांडगे यांनी अत्यंत दूरदृष्टीपूर्ण पाऊल उचलले आहे. शहरातील वाहतूक व्यवस्था अधिक शिस्तबद्ध, सुरक्षित, आधुनिक आणि नागरिकाभिमुख बनवण्यासाठी पार्किंग पॉलिसीची प्रभावी अंमलबजावणी करण्याचा ठाम निर्धार महापौरांनी व्यक्त केला आहे. यासंदर्भात त्यांच्या अध्यक्षतेखाली पिंपरी-चिंचवड महानगरपालिकेत एक महत्त्वपूर्ण आढावा बैठक पार पडली.

शहरवासीयांना भेडसावणाऱ्या समस्या प्रत्यक्ष समजून घेऊन त्यावर तत्परतेने आणि व्यवहार्य उपाययोजना शोधणारे नेतृत्व म्हणून महापौर रवि लांडगे यांची ओळख निर्माण झाली आहे. या बैठकीत त्यांनी विद्यमान पार्किंग व्यवस्थेचा सर्वंकष आढावा घेत भविष्यातील ५० वर्षांच्या गरजा लक्षात घेऊन सर्वसमावेशक नियोजन करण्याचे स्पष्ट निर्देश दिले.

बैठकीस उपमहापौर शर्मिला बाबर, सभागृह नेते प्रशांत शितोळे, स्थायी समिती सभापती अभिषेक बारणे, विरोधी पक्षनेते भाऊसाहेब भोईर, शहर सुधारणा समिती सभापती संजय काटे, अतिरिक्त आयुक्त कुलदीप जंगम, अतिरिक्त आयुक्त तृप्ती सांडभोर यांच्यासह संबंधित विभागांचे उच्चाधिकारी आणि सल्लागार उपस्थित होते.

बैठकीत यापूर्वीच्या पार्किंग धोरणाच्या अंमलबजावणीत आलेल्या अडचणी, तांत्रिक त्रुटी आणि त्यामागील कारणांवर सखोल चर्चा झाली. प्रमुख रस्त्यांवर होणाऱ्या अनधिकृत पार्किंगमुळे नागरिक आणि पादचाऱ्यांना मोठा त्रास सहन करावा लागतो. यावर तोडगा काढण्यासाठी व्यापारी क्षेत्रे, सार्वजनिक ठिकाणे आणि प्रमुख चौकांत नियोजनबद्ध पार्किंगची उभारणी केली जाईल. आधुनिक डिजिटल तंत्रज्ञानाचा (Smart Parking System) वापर करून नागरिकांना उपलब्ध पार्किंगची माहिती सुलभतेने मिळेल याची व्यवस्था केली जाईल. विविध विभागांच्या अधिकाऱ्यांनी सादरीकरणाद्वारे (Presentation) शहराच्या विविध भागांतील सद्यस्थिती, उपलब्ध मोकळ्या जागा आणि भविष्यातील नियोजनाचा आराखडा महापौरांसमोर मांडला.

“पिंपरी-चिंचवड शहराची लोकसंख्या आणि वाहनांची संख्या वेगाने वाढत आहे. त्यामुळे वाहतूक व्यवस्थेला अधिक शिस्तबद्ध आणि कार्यक्षम बनविण्यासाठी प्रभावी पार्किंग पॉलिसीची अंमलबजावणी ही काळाची गरज आहे. नागरिकांना सोयीस्कर, सुरक्षित आणि सुलभ पार्किंग सुविधा उपलब्ध करून देतानाच वाहतूक कोंडी कमी करणे, रस्त्यांचा कार्यक्षम वापर करणे आणि शहराच्या नियोजनबद्ध विकासाला चालना देणे हे महापालिकेचे प्रमुख उद्दिष्ट आहे. यासाठी सर्व संबंधित विभागांनी समन्वयाने काम करून नागरिकाभिमुख आणि व्यवहार्य पार्किंग व्यवस्था उभारावी.”

— रवि लांडगे, महापौर, पिंपरी-चिंचवड महानगरपालिका

पिंपरी-चिंचवड महापालिकेच्या इतिहासात अत्यंत कार्यक्षम, अभ्यासू आणि लोकाभिमुख कारभाराचा आदर्श वस्तुपाठ महापौर रवि लांडगे यांनी घालून दिला आहे. नागरिकांच्या रोजच्या जगण्याशी निगडित असणाऱ्या वाहतुकीच्या प्रश्नावर त्यांनी दाखवलेली ही सक्रियता व गांभीर्य पिंपरी-चिंचवडकरांना मोठा दिलासा देणारे ठरणार आहे.

© २०२६ मॅक्स मंथन डेली न्यूज. सर्व हक्क राखीव.

चिंचवडगाव पोलीस स्टेशन ग्राम सुरक्षा दलाचा स्तुत्य उपक्रम; बोपेगावच्या रामराव पाटील विद्यालयात सॅनिटरी पॅड व्हेंडिंग मशीनचे वाटप!

पिंपरी चिंचवड प्रतिनिधी बालाजी नवले, दि. ४ ऑगस्ट २०२६ मॅक्स मंथन डेली न्यूज:

पिंपरी चिंचवड: चिंचवडगाव पोलीस स्टेशनच्या ग्राम सुरक्षा दल व शांतता कमिटीच्या सदस्यांनी सामाजिक बांधीलकी जपत सातारा दौऱ्यादरम्यान एका अत्यंत स्तुत्य आणि आरोग्यविषयक उपक्रमाची अंमलबजावणी केली. वाई तालुक्यातील बोपेगाव येथील ‘किसनवीर शैक्षणिक, क्रीडा व सांस्कृतिक प्रतिष्ठान (कवठे)’ संचलित रामराव पाटील माध्यमिक विद्यालयात इयत्ता आठवी ते दहावीच्या विद्यार्थिनींच्या आरोग्याच्या दृष्टीने सॅनिटरी पॅड व्हेंडिंग मशीन भेट देण्यात आले.

ग्रामीण, डोंगराळ भाग आणि शेतकरी-शेतमजुरांच्या मुलींच्या आरोग्य आणि स्वच्छतेचा विचार करून रोटरी क्लब ऑफ वाल्हेकरवाडी यांच्या वतीने ‘निर्मला’ हा बिग प्रोजेक्ट राबवला जात आहे. या प्रकल्पासाठी रोटरी क्लब ऑफ वाल्हेकरवाडीचे संस्थापक सदस्य संतोष वाल्हेकर यांच्या पुढाकाराने मिस्तुबा इंडिया प्रायव्हेट लिमिटेड या कंपनीकडून सीएसआर (CSR) निधी उपलब्ध झाला होता.

या मोहिमेअंतर्गत ग्रामीण भागातील ४० शाळांमध्ये सॅनिटरी पॅड मशिन्स वाटप करण्याचे उद्दिष्ट ठेवण्यात आले होते. वाई येथील शेखर जाधव सर यांच्या विनंतीवरून बोपेगावच्या शाळेचा यात समावेश करण्याची शिफारस करण्यात आली. रोटरी क्लब ऑफ वाल्हेकरवाडीचे संस्थापक अध्यक्ष रोटरियन प्रदीप वाल्हेकर व त्यांच्या टीमने या मागणीला तात्काळ मंजुरी दिली.

चिंचवडगाव पोलीस स्टेशन ग्राम सुरक्षा दलाचे प्रतिनिधी व शांतता कमिटीचे सदस्य सातारच्या दौऱ्यावर जात असताना, त्यांनी स्वतः हे मशीन बोपेगावच्या शाळेत पोहोचवले. शाळेत पोहोचल्यानंतर मुख्याध्यापक गणेश पांडुरंग धाडवे, शिक्षकवृंद व विद्यार्थ्यांनी ग्राम सुरक्षा दलाच्या सदस्यांचे मनापासून स्वागत व आदरसत्कार केला. याप्रसंगी उपस्थित सदस्यांनी शाळेतील विद्यार्थिनींना व शिक्षकांना मशीन वापराबाबत सविस्तर माहिती दिली आणि प्रात्यक्षिक (डेमो) दाखवले.

प्रवासादरम्यान टीमने ‘जानाई हॉटेल’ येथे अल्पोपहार घेतला. प्लास्टिक किंवा कागदाच्या ऐवजी संपूर्ण स्टीलच्या साहित्याचा वापर करणाऱ्या या हॉटेलचे कौतुक करताना सदस्यांना रोटरियन गणेश बोरा यांच्या ‘स्टील प्लेट बँक’ या पर्यावरणपूरक उपक्रमाची आठवण झाली. उपस्थितांनी हॉटेल मालकाचे या पर्यावरणपूरक उपक्रमाबद्दल विशेष अभिनंदन केले.

हा संपूर्ण सामाजिक उपक्रम यशस्वी करण्यासाठी चिंचवड पोलीस स्टेशन ग्राम सुरक्षा दलाचे सहकारी धनंजय कुलकर्णी, प्रकाश मिर्झापुरे, राकेश सायकर, उदय वाडेकर, मधुकर साठे आणि चालक जोतिराम काळे यांनी विशेष सहकार्य आणि अथक परिश्रम घेतले.

© २०२६ मॅक्स मंथन डेली न्यूज. सर्व हक्क राखीव.

निगडी सेक्टर २२ मधील पूरप्रश्न आणि पीसीएमसी कॉलनीच्या दुरुस्तीसाठी मनसे आक्रमक; महापौरांच्या पाहणी दौऱ्यानंतर तातडीने दुरुस्तीचे आश्वासन!

पिंपरी चिंचवड प्रतिनिधी आकाश कांबळे, दि. ४ ऑगस्ट २०२६ मॅक्स मंथन डेली न्यूज

पिंपरी-चिंचवड: पिंपरी-चिंचवड शहरातील प्रभाग क्रमांक १३ मधील निगडी सेक्टर नंबर २२, संग्रामनगर झोपडपट्टी, श्रमिकनगर, राहुलनगर, फातिमा मस्जिद परिसर आणि १ ते १५ बिल्डिंग या भागात दरवर्षी पावसाळ्यात पाणी घुसून नागरिकांचे अतोनात नुकसान होते. या गंभीर समस्येवर कायमस्वरूपी तोडगा काढण्यासाठी आणि पीसीएमसी कॉलनीतील जीर्ण इमारतींच्या दुरुस्तीसाठी महाराष्ट्र नवनिर्माण सेनेच्या (मनसे) पुढाकाराने महापौर रवि लांडगे यांनी संबंधित परिसराचा प्रत्यक्ष पाहणी दौरा केला.

दरवर्षी पावसाळ्यात कॅन्टोन्मेंट आणि मिलिटरीच्या माळरानावरून येणारे पावसाचे पाणी थेट नागरिकांच्या घरात, दुकानांत शिरते. यामुळे अन्नधान्य, कपडे व घरातील साहित्याचे प्रचंड नुकसान होऊन नागरिकांना हाल सोसावे लागतात.

या समस्येवर कायमस्वरूपी उपाययोजना म्हणून राहुलनगर ते निगडी स्मशानभूमीपर्यंत येणारे पावसाचे पाणी थेट स्मशानभूमीमागील नाल्याला जोडण्यासाठी मोठा पावसाळी नाला बांधण्यात यावा, अशी आग्रही मागणी मनसेच्या वतीने महापौरांकडे करण्यात आली.

याचबरोबर, पीसीएमसी कॉलनीतील जीर्ण झालेल्या इमारतींबाबत महापालिकेने दिलेल्या नोटिसांचा विषयही स्थानिक नागरिकांनी आणि मनसे पदाधिकाऱ्यांनी महापौरांसमोर मांडला. या इमारतींची संपूर्ण दुरुस्ती पिंपरी-चिंचवड महानगरपालिकेने स्वतःच्या खर्चाने करावी, अशी मागणी करण्यात आली.

यावर सकारात्मक प्रतिसाद देत महापौरांनी नागरिकांना दिलासा दिला आणि आश्वासन दिले की:

“पीसीएमसी कॉलनीतील सर्व जीर्ण इमारतींची आवश्यक दुरुस्ती पिंपरी-चिंचवड महानगरपालिकेच्या वतीने तातडीने केली जाईल.”

मनसे शहराध्यक्ष सचिन चिखले आणि माजी नगरसेविका अश्विनी सचिन चिखले – मराठे यांच्या मार्गदर्शनाखाली आयोजित या पाहणी दौऱ्यात परिसरातील सामाजिक कार्यकर्ते व नागरिक मोठ्या संख्येने सहभागी झाले होते.

यावेळी राजू केरप्पा गायकवाड, अक्षयजी करंडे, प्रबुद्ध कांबळे, शेहना हाजी शेख, अल्ताफ भाई शेख, नजीर भाई शेख, गणेश वाघमारे, मंगेश जाधव, चनालबाबी अल्ताफ शेख, रेखा सूर्यवंशी, दिपाली जाधव, रेखा भोसले, सुवर्णा सूर्यवंशी यांच्यासह अनेक सामाजिक कार्यकर्ते उपस्थित होते.

नागरिकांच्या समस्या ऐकून घेऊन तात्काळ पाहणी दौरा केल्याबद्दल आणि दुरुस्तीचे आश्वासन दिल्याबद्दल सर्व स्थानिक नागरिकांनी महापौरांचे तसेच मनसे पदाधिकाऱ्यांचे मनःपूर्वक आभार मानले.

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवडमधील मोरवाडीत आर्थिक विवंचनेतून मल्याळी कुटुंबातील तिघांची आत्महत्या; पोलीस तपास सुरू!

पिंपरी चिंचवड प्रतिनिधी लक्ष्मण प्रधान, दि. ३ ऑगस्ट २०२६ मॅक्स मंथन डेली न्यूज:

पिंपरी-चिंचवड: पिंपरी-चिंचवड शहरातील मोरवाडी परिसरामध्ये आर्थिक विवंचनेला कंटाळून एकाच कुटुंबातील तिघांनी आत्महत्या केल्याची अत्यंत दुर्दैवी व खळबळजनक घटना घडली आहे. यामध्ये पती, पत्नी आणि त्यांच्या १९ वर्षांच्या तरुण मुलीचा समावेश आहे. मृतांमध्ये विनोद पिल्लई (वय ५०), त्यांची पत्नी श्रीजा पिल्लई (वय ४५) आणि मुलगी पूर्णिमा पिल्लई (वय १९) यांचा समावेश आहे.

मिळालेल्या माहितीनुसार, हे कुटुंब मूळचे केरळ राज्यातील असून ते गेल्या तीन वर्षांपासून पिंपरी-चिंचवडमधील मोरवाडी परिसरात वास्तव्यास होते. श्रीजा पिल्लई या मोरवाडी येथील एका स्थानिक शाळेत समन्वयक (कोऑर्डिनेटर) म्हणून कार्यरत होत्या.

शनिवारी त्या नेहमीप्रमाणे शाळेत कामावर न आल्याने आणि सहकाऱ्यांनी फोन करूनही त्यांनी कोणताही प्रतिसाद न दिल्याने सहकाऱ्यांना शंका आली. त्यांनी तात्काळ पिल्लई यांच्या नातेवाईकांशी संपर्क साधला. जवळच राहणाऱ्या नातेवाईकांनी पिल्लई यांच्या घरी जाऊन पाहिले असता घराचा मुख्य दरवाजा उघडा होता आणि घरातील तिघेही बेशुद्ध अवस्थेत पडलेले आढळून आले.

घटनेची माहिती मिळताच पोलिसांनी घटनास्थळी धाव घेत तिघांनाही तातडीने उपचारासाठी रुग्णालयात दाखल केले. मात्र, उपचारादरम्यान विनोद पिल्लई यांचा शनिवारीच मृत्यू झाला, तर पत्नी श्रीजा आणि मुलगी पूर्णिमा या दोघांची रविवारी प्राणज्योत मालवली.

घटनास्थळावरून पोलिसांनी सुसाईड नोट हस्तगत केली आहे. या सुसाईड नोटमध्ये आर्थिक अडचणी आणि विवंचनेमुळे हे टोकाचे पाऊल उचलत असल्याचे नमूद करण्यात आले आहे. तसेच आपल्या या निर्णयासाठी कोणालाही जबाबदार धरू नये, असेही पिल्लई यांनी पत्रात लिहिल्याची माहिती पोलीस अधिकाऱ्यांनी दिली आहे.

या संपूर्ण हृदयद्रावक घटनेमुळे मोरवाडी परिसर आणि पिंपरी-चिंचवड शहरात हळहळ व्यक्त केली जात आहे. पोलीस या प्रकरणाचा पुढील सखोल तपास करत आहेत.

© २०२६ मॅक्स मंथन डेली न्यूज. सर्व हक्क राखीव.