ज्येष्ठांचा सन्मान: ज्येष्ठ नागरिक हे समाजाचे आधारस्तंभ; त्यांच्या अनुभवातून प्रेरणा घ्या – उप आयुक्त ममता शिंदे
जागतिक ज्येष्ठ नागरिक दिनानिमित्त पिंपरी-चिंचवड महापालिकेचा विशेष कार्यक्रम; ‘आनंद मेळावा’ विशेषांकाचे प्रकाशन, पदाधिकाऱ्यांचा सत्कार.
पिंपरी, प्रतिनिधी शाम सोनवणे,दि. ऑक्टोबर , मॅक्स मंथन डेली न्यूज:
ज्येष्ठ नागरिक हे आपल्या समाजाचे आधारस्तंभ असून, त्यांचा अनुभव, ज्ञान आणि जीवनमूल्यांचा वारसा आजच्या पिढीसाठी प्रेरणादायी आहे, असे प्रतिपादन पिंपरी-चिंचवड महापालिका समाज विकास विभागाच्या उप आयुक्त ममता शिंदे यांनी केले. त्यांच्या आनंदी आणि निरोगी जीवनासाठी सर्वांनी प्रयत्न करणे गरजेचे आहे, असे मत त्यांनी व्यक्त केले.
चिंचवड येथील प्रा. रामकृष्ण मोरे प्रेक्षागृहात जागतिक ज्येष्ठ नागरिक दिनानिमित्त आयोजित कार्यक्रमाच्या उद्घाटनप्रसंगी त्या बोलत होत्या.
दैनंदिन आचरणाचा भाग हवा सन्मान
उप आयुक्त ममता शिंदे म्हणाल्या, “आजच्या पिढीने ज्येष्ठांकडून जीवनातील शिस्त, संयम, संघर्षाची ताकद आणि सकारात्मकतेचा वारसा घ्यावा, हीच खरी कृतज्ञता ठरेल. ज्येष्ठांचा सन्मान हा फक्त एका दिवसापुरता मर्यादित नसून, तो आपल्या दैनंदिन आचरणाचा भाग असायला हवा.” महापालिकेच्या माध्यमातून ज्येष्ठ नागरिकांसाठी विविध आरोग्यविषयक उपक्रम, सुविधा आणि मनोरंजनात्मक कार्यक्रम राबवले जात असल्याचे त्यांनी सांगितले.
शहराच्या जडणघडणीत मोलाचे योगदान
याप्रसंगी बोलताना माजी महापौर उषा उर्फ माई ढोरे यांनी शहराच्या जडणघडणीत ज्येष्ठ नागरिकांचे मोलाचे योगदान असल्याचे नमूद केले. ज्येष्ठ नागरिक भवन उभारणीस परवानगी देणारी पिंपरी-चिंचवड महानगरपालिका देशात पहिली असल्याचे त्यांनी सांगितले.
ज्येष्ठ नागरिक महासंघाच्या अध्यक्षा वृषाली मरळ यांनी पालिकेच्या सहकार्याबद्दल आभार मानले. शहरात कार्यरत असलेल्या ज्येष्ठ नागरिक संघांपैकी यावर्षी संघांसाठी समई आणि खुर्च्या उपलब्ध करून देण्यात आल्याची माहिती त्यांनी दिली.
पदाधिकाऱ्यांचा सन्मान आणि ‘आनंद मेळावा’ प्रकाशन
आयुक्त शेखर सिंह यांच्या मार्गदर्शनाखाली समाज विकास विभागामार्फत दरवर्षी ऑक्टोबर हा जागतिक ज्येष्ठ नागरिक दिन साजरा केला जातो. यावर्षीच्या कार्यक्रमात पिंपरी-चिंचवड शहर ज्येष्ठ नागरिक महासंघाच्या पदाधिकाऱ्यांचा सन्मान करण्यात आला. त्याचबरोबर, ‘आनंद मेळावा’ या विशेष अंकाचे प्रकाशनही मान्यवरांच्या हस्ते संपन्न झाले.
कार्यक्रमात ज्येष्ठांसाठी सांस्कृतिक कार्यक्रम आणि आरोग्यविषयक तज्ञांचे व्याख्यान आयोजित केले होते. आरोग्य फाउंडेशनचे श्रीकांत आपटे यांनी अवयवदान विषयावर प्रबोधनपर व्याख्यान दिले.
विशेष उपक्रम: अवयवदान आणि स्वच्छतेची शपथ यावेळी श्रीकांत आपटे यांनी उपस्थित ज्येष्ठांना अवयवदानाचे महत्त्व पटवून सांगत, निधनानंतर आपले चांगले अवयव देशाच्या पुढील पिढीसाठी दान करण्याची प्रतिज्ञा दिली.
जनता संपर्क अधिकारी प्रफुल्ल पुराणिक यांनी उपस्थित सर्व ज्येष्ठांना स्वच्छतेची शपथ दिली. ‘स्वच्छ सर्वेक्षण’ अभियानात शहराला प्रथम स्थान मिळवण्यासाठी नागरिकांचा सहभाग अत्यावश्यक आहे, हे त्यांनी यावेळी स्पष्ट केले.
या कार्यक्रमास सहाय्यक आयुक्त परशुराम वाघमोडे, माजी नगरसदस्य उषा मुंढे, जनता संपर्क अधिकारी प्रफुल्ल पुराणिक, पोलीस अधीक्षक कार्यालयातील ज्येष्ठ नागरिक कक्षाचे पोलीस निरीक्षक दिनकर गावडे, सहाय्यक समाज विकास अधिकारी संतोषी चोरगे, समाजसेवक अनिकेत सातपुते, रेश्मा पाटील, विशाल शेडगे, मनोज मरगडे यांच्यासह शहरातील अनेक ज्येष्ठ नागरिक उपस्थित होते.
© मॅक्स मंथन डेली न्यूज. सर्व हक्क राखीव.
