बालकांच्या सुरक्षेसाठी पाऊल! मूर्तीजापूरमध्ये अंगणवाडी सेविका आणि पोलीस पाटलांना ‘बाल संरक्षण’ मार्गदर्शन
बाल हक्क, बालविवाह आणि बाललैंगिक अत्याचार प्रतिबंधक कायद्यावर विशेष कार्यशाळा; ‘बालस्नेही ग्रामपंचायत’ निर्मितीवर भर.
अकोला, प्रतिनिधी : विलास सावळे, दि. ऑक्टोबर , मॅक्स मंथन डेली न्यूज:
बालकांच्या हक्कांचे संरक्षण आणि त्यांच्या सुरक्षिततेसाठी समाजात जागरूकता निर्माण करण्याच्या उद्देशाने, महात्मा गांधी प्रशिक्षण संस्था आणि राज्य बाल संरक्षण संस्थेच्या वतीने मूर्तीजापूर येथे बाल संरक्षण मार्गदर्शन कार्यशाळेचे आयोजन करण्यात आले होते. या कार्यशाळेत तालुक्यातील सर्व अंगणवाडी सेविका, आशा सेविका आणि पोलीस पाटील यांचा सहभाग होता.
महत्त्वाच्या कायद्यांवर सोप्या भाषेत मार्गदर्शन
जिल्हा कार्यक्रम अधिकारी राजश्री कौलखेडे यांच्या हस्ते या कार्यशाळेचे उद्घाटन करण्यात आले. यावेळी बाल हक्क संरक्षण आयोगाचे सदस्य ॲड. संजय सेंगर यांनी उपस्थितांना सहज सोप्या भाषेत कायद्यांची माहिती दिली. त्यांनी बाललैंगिक अत्याचार अधिनियम (POCSO Act) आणि बालविवाह अधिनियम यांसारख्या महत्त्वाच्या कायद्यांवर प्रकाश टाकला. तसेच, जे.जे. ॲक्ट आणि बालकांची काळजी व संरक्षण या विषयांवर सखोल मार्गदर्शन केले.
ग्राम बाल संरक्षण समितीवर भर
कार्यशाळेत विविध तज्ज्ञांनी बालकांच्या सुरक्षेच्या दृष्टीने महत्त्वाचे विषय हाताळले:
- सक्षम बालक: प्रशिक्षक संतोष चक्रनारायण यांनी प्रशिक्षणार्थींना बालस्नेही ग्रामपंचायत, बालकांचे हक्क व सुरक्षितता या विषयाची मांडणी केली.
- बाल समस्या: अनिल राऊत यांनी बालभिक्षेकरी, व्यसनमुक्ती आणि बालमजुरी यांसारख्या गंभीर समस्यांवर प्रशिक्षण दिले.
- ग्राम समितीचे कार्य: समुपदेशक शरद तळेगावकर यांनी ग्राम बाल संरक्षण समितीचे कार्य आणि रचना याबद्दल माहिती दिली.
जिल्हा महिला व बालविकास अधिकारी गिरीश पुसदकर यांनी कार्यक्रमाचे प्रास्ताविक केले, तर चाईल्ड लाईन समुपदेशक सौ. शरयू जयंत तळेगावकर यांनी सूत्रसंचालन केले. जिल्हा बाल संरक्षण अधिकारी राजु लाडूलकर यांनी उपस्थितांचे आभार मानले.
या कार्यशाळेच्या यशस्वीतेसाठी जिल्हा बाल संरक्षण कक्ष, चाईल्ड लाईन, ॲसेस टू जस्टीस प्रकल्प अकोला, सुखाय फाउंडेशन, तीक्ष्णगत संस्था आणि विपला फाउंडेशन येथील अधिकारी व कर्मचाऱ्यांनी विशेष परिश्रम घेतले.
© मॅक्स मंथन डेली न्यूज. सर्व हक्क राखीव.
