अक्षय नागलकर खून प्रकरण: ९ आरोपी ४८ तासांत गजाआड! खुनाचा कट रचून प्रेत जाळले, राख नदीत फेकली
अकोला पोलिसांची मोठी कारवाई; मृतदेहाचे हाडाचे तुकडे, २ देशी पिस्तूल आणि गुन्ह्यात वापरलेली वाहने जप्त
अकोला, प्रतिनिधी : विलास सावळे, दि. २ नोव्हेंबर २०२५, मॅक्स मंथन डेली न्यूज:
अकोल्यात बहुचर्चित असलेल्या अक्षय विनायक नागलकर (वय २६) खून प्रकरणाचा ४८ तासांत पोलिसांनी छडा लावला आहे. अत्यंत थंड डोक्याने खुनाचा कट रचून, मृतदेह जाळून पुरावा नष्ट करण्याचा प्रयत्न करणाऱ्या मुख्य सूत्रधार आणि त्याच्या ८ साथीदारांसह एकूण ९ आरोपींना अकोला पोलिसांनी अटक केली आहे. आरोपींकडून मृतदेहाचे हाडाचे तुकडे, दोन देशी पिस्तूल आणि गुन्ह्यात वापरलेली चारचाकी व दुचाकी वाहने जप्त करण्यात आली आहेत.
मा. पोलीस अधीक्षक श्री. अर्जीत चांडक यांच्या मार्गदर्शनाखाली शहर विभाग, स्थानिक गुन्हे शाखा (LCB) आणि डाबकी रोड पोलीस स्टेशनच्या ८ पथकांनी अहोरात्र तपास करून या प्रकरणाचा उलगडा केला.
- मिळवली माहिती: २२/१०/२०२५ रोजी सायंकाळी ५ वाजता घरातून गेलेला अक्षय नागलकर परत न आल्याने डाबकी रोड पोलीस स्टेशनमध्ये (मिसींग क. ४४/२०२५) नोंद झाली होती. नातेवाईकांनी घातपाताचा संशय व्यक्त केला होता. तपास दरम्यान, अक्षयला त्याचा मित्र आशु वानखडे याच्या मोटारसायकलवर जाताना पाहिल्याची माहिती मिळाली.
- खुनाचा कट: मयत अक्षयचा भाऊ शुभम नागलकर याच्या आणि मुख्य आरोपी चंद्रकांत महादेव बोरकर (चंदू बोरकर) यांच्यात वाद झाला होता. या वादामुळे शुभम MPDA कायद्यान्वये १ वर्षासाठी कारागृहात स्थानबद्ध झाला होता. याचा राग मनात धरून अक्षयने चंदू बोरकर याला धमकावले होते. तेव्हापासून चंदू बोरकरने अक्षयला मारण्याचा कट रचला होता.
- हत्येची जागा: चंदू बोरकरने आपल्या साथीदारांच्या मदतीने गायगाव रोडवरील एम.एच. ३० या हॉटेलवर अक्षयला जेवणाच्या बहाण्याने बोलावले.
- हत्या आणि पुरावा नष्ट: हॉटेलचे शटर बंद करून आरोपींनी अक्षयवर गावठी पिस्तूलने गोळीबार केला आणि धारदार शस्त्रांनी वार करून त्याला ठार मारले. त्यानंतर प्रेत जाळून त्याची राख नदीत फेकून पुरावे नष्ट केले. यासाठी त्यांनी मोरगाव भाकरे येथील ब्रम्हा भाकरे यांच्या शेतात टीन पत्र्याचे रूम बांधून आणि लाकडे जमा करून आधीच तयारी केली होती.
गुप्त माहितीदार आणि तांत्रिक विश्लेषणावरून पोलिसांनी ४८ तासांत खालील आरोपींना ताब्यात घेतले आणि नंतर अटक केली.
- चंद्रकांत महादेव बोरकर (वय ४१, रा. जुने शहर, अकोला) – मुख्य सूत्रधार
- आशिष उर्फ आशु शिवकुमार वानखडे (वय ३८, रा. जुने शहर, अकोला)
- श्रीकृष्ण वासुदेव भाकरे (वय ३६, रा. मोठी उमरी, अकोला)
- अशोक उर्फ ब्रम्हा पांडुरंग भाकरे (वय ४४, रा. मोरगाव भाकरे, अकोला)
- रोहित गजानन पराते (वय २८, रा. गायत्री नगर, अकोला) – अहिल्यानगर (अहमदनगर) येथून अटक.
- अमोल अजाबराव उन्हाळे (वय ४४, रा. हरिहर पेठ, अकोला) – अहिल्यानगर (अहमदनगर) येथून अटक.
- आकाश बाबुराव शिंदे (वय २५, रा. भौरद, अकोला) – भुसावळ (जि. जळगाव) येथून अटक.
- नारायण गणेश मेसरे (वय २८, रा. लोटनापूर, अकोला) – बाळापूर येथून अटक.
- शिवहरी उर्फ शिवा रविंद्र माळी (वय २५, रा. बाकराबाद, अकोला) – बैतुल (मध्यप्रदेश) येथून अटक.
- गुन्हे नोंद: सुरुवातीला मिसींगची नोंद असलेल्या या प्रकरणात नंतर डाबकी रोड पोलीस स्टेशनमध्ये अप क. ३३७/२०२५ कलम १०३, (१), ३२८, ६१, (२) ३, (५) भा.न्या.सं. आणि वाढीव कलम ३, ४, २५ आर्म ॲक्ट अन्वये खुनाचा गुन्हा नोंदविण्यात आला आहे.
- जप्ती: आरोपींकडून दोन देशी पिस्तूल, सात जिवंत काडतुसे, मृतदेह नेण्यासाठी वापरलेली टाटा इंडिगो कार आणि तीन मोटारसायकल तसेच सात मोबाईल जप्त करण्यात आले आहेत.
- पोलीस कोठडी: सर्व ९ आरोपींना दिनांक ०१/११/२०२५ रोजी न्यायालयात हजर केले असता, त्यांना ०५/११/२०२५ पर्यंत पोलीस कोठडी सुनावण्यात आली आहे.
मा. पोलीस अधीक्षक श्री. अर्जीत चांडक, अपर पोलीस अधीक्षक श्री. बी. चंद्रकांत रेड्डी यांच्या मार्गदर्शनाखाली उपविभागीय पोलीस अधीकारी श्री. सुदर्शन पाटील तपास करत आहेत. यामध्ये पो.नि. शंकर शेळके, स.पो.नि. अभिषेक अंधारे, स.पो.नि. गोपाल ढोले, स.पो.नि. विजय चव्हाण यांच्यासह इतर अधिकाऱ्यांनी सहकार्य केले.
© २०२५ मॅक्स मंथन डेली न्यूज. सर्व हक्क राखीव.
