महापालिका निवडणुकीची तयारी! पिंपरी-चिंचवडची प्रारूप मतदार यादी ६ नोव्हेंबरला प्रसिद्ध

हरकती आणि सूचना नोंदवण्यासाठी १४ नोव्हेंबरपर्यंत मुदत; ४ सहशहर अभियंत्यांची क्षेत्रीय कार्यालयानिहाय प्राधिकृत अधिकारी म्हणून नियुक्ती

पिंपरी चिंचवड, प्रतिनिधी बालाजी नवले, दि. २ नोव्हेंबर २०२५, मॅक्स मंथन डेली न्यूज:

पिंपरी चिंचवड महानगरपालिकेच्या नियोजित सार्वत्रिक निवडणुकीच्या दृष्टीने प्रशासनाने मोठी पाऊले उचलली आहेत. महापालिकेच्या कार्यक्षेत्रातील विधानसभा मतदारसंघांची प्रभागनिहाय विभाजित केलेली प्रारूप मतदार यादी येत्या ६ नोव्हेंबर २०२५ रोजी प्रसिद्ध करण्यात येणार आहे. नागरिकांना या यादीवर हरकती व सूचना नोंदवण्यासाठी ६ नोव्हेंबर ते १४ नोव्हेंबर २०२५ या कालावधीत संधी मिळणार आहे.

प्रारूप मतदार यादीवरील हरकती व सूचनांवर त्वरित छाननी, सुनावणी आणि निर्णय घेण्यासाठी महापालिकेने क्षेत्रीय कार्यालयानिहाय प्राधिकृत अधिकाऱ्यांची नियुक्ती केली आहे. नुकतेच बदली झालेले अतिरिक्त आयुक्त प्रदीप जांभळे पाटील यांच्या स्वाक्षरीने याबाबतचे आदेश जारी करण्यात आले आहेत.

क्षेत्रीय कार्यालयानिहाय प्राधिकृत अधिकारी:

या प्राधिकृत अधिकाऱ्यांच्या मदतीसाठी संबंधित क्षेत्रीय अधिकारी आणि कार्यकारी अभियंता (स्थापत्य) यांची सहायक प्राधिकृत अधिकारी म्हणून नियुक्ती करण्यात आली आहे.

महापालिकेच्या कार्यक्षेत्रातील खालील विधानसभा मतदारसंघांची मतदार यादी प्रभागनिहाय विभाजित करून प्रसिद्ध केली जाणार आहे:

• २०५- चिंचवड विधानसभा
• २०६- पिंपरी विधानसभा
• २०७- भोसरी विधानसभा
• २०३- भोर विधानसभा मतदारसंघ (केवळ ताथवडे गाव समाविष्ट)

या यादीवर नागरिकांना आपल्या हरकती व सूचना महापालिकेच्या मुख्य कार्यालयातील मतदार यादी कक्षात तसेच सर्व ८ क्षेत्रीय कार्यालयांत प्रत्यक्ष दाखल करता येणार आहेत. प्राधिकृत अधिकाऱ्यांना नमुना ‘अ’ व ‘ब’ मध्ये प्राप्त होणाऱ्या सर्व हरकती व सूचनांची तपासणी करून अहवाल सादर करण्याचे निर्देश देण्यात आले आहेत.

© २०२५ मॅक्स मंथन डेली न्यूज. सर्व हक्क राखीव.