महापालिका निवडणुकीचा ‘बिगुल’ वाजला! पिंपरी-चिंचवड मनपा आरक्षण सोडतीसाठी सर्व तयारी पूर्ण

विभागीय आयुक्त डॉ. चंद्रकांत पुलकुंडवार यांच्या अध्यक्षतेखाली ११ नोव्हेंबरला कार्यक्रम; चार टप्प्यांत होणार आरक्षण निश्चिती

पिंपरी चिंचवड प्रतिनिधी बालाजी नवले, दि. १० नोव्हेंबर २०२५, मॅक्स मंथन डेली न्यूज:

पिंपरी-चिंचवड महापालिकेच्या नियोजित सार्वत्रिक निवडणुकीच्या अनुषंगाने बहुप्रतिक्षित आरक्षण सोडत कार्यक्रम उद्या, ११ नोव्हेंबर २०२५ रोजी सकाळी ११ वाजता चिंचवड येथील प्रा. रामकृष्ण मोरे प्रेक्षागृह येथे होणार आहे. राज्य निवडणूक आयोगाने या महत्त्वपूर्ण कामासाठी पुणे विभागीय आयुक्त डॉ. चंद्रकांत पुलकुंडवार यांची प्राधिकृत अधिकारी म्हणून नियुक्ती केली असून, त्यांच्या अध्यक्षतेखाली ही आरक्षण सोडत पार पडणार आहे.

महापालिकेच्या निवडणूक विभागाने या कार्यक्रमासाठीची सर्व तयारी पूर्ण केली आहे.

आरक्षण सोडतीच्या तयारीच्या पार्श्वभूमीवर आज प्राधिकृत अधिकारी डॉ. चंद्रकांत पुलकुंडवार यांच्या अध्यक्षतेखाली रंगीत तालीम (Rehearsal) देखील पार पडली. डॉ. पुलकुंडवार यांनी निवडणूक विभागाने केलेल्या तयारीचा सविस्तर आढावा घेतला, तसेच सोडतीच्या दिवशी सुरक्षेच्या दृष्टीने आवश्यक त्या उपाययोजना करण्याचे निर्देश दिले.

यावेळी, पोलीस प्रशासन आणि महापालिकेच्या सुरक्षा विभागाने प्रा. रामकृष्ण मोरे प्रेक्षागृह आणि परिसरातील सुरक्षेचा आढावा घेतला.

• उपस्थित प्रमुख अधिकारी: महापालिकेचे अतिरिक्त आयुक्त प्रदीप जांभळे पाटील आणि तृप्ती सांडभोर, पोलीस उपायुक्त श्वेता खेडकर, सहाय्यक पोलीस आयुक्त विठ्ठल कुबडे, स्मार्ट सिटीचे सहायक मुख्य कार्यकारी अधिकारी किरणराज यादव यांच्यासह सह आयुक्त मनोज लोणकर, नगर सचिव मुकेश कोळप, मुख्य अभियंता प्रमोद ओंभासे, सह शहर अभियंता बापू गायकवाड, मुख्य माहिती व तंत्रज्ञान अधिकारी विजय बोरुडे, निवडणूक विभाग उपायुक्त सचिन पवार, अण्णा बोदडे, मुख्य सुरक्षा अधिकारी उदय जरांडे, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक आणि पोलीस निरीक्षक अंकुश बांगर उपस्थित होते.

महापालिकेतील प्रभागांच्या आरक्षणाची सोडत खालील चार महत्त्वाच्या टप्प्यांमध्ये पार पडणार आहे:

१. पिंपरी चिंचवड महानगरपालिका प्रभागांमध्ये राखीव जागा वाटप करून नियम २०२५ नुसार प्रथम अनुसूचित जाती महिला आरक्षण सोडत काढणे.

२. अनुसूचित जमाती महिला आरक्षण सोडत काढणे.

३. नागरिकांचा मागासवर्ग प्रवर्गाची (OBC) सोडत काढणे व नागरिकांचा मागासवर्ग प्रवर्ग महिलांकरीता वाटप करणे.

४. सर्वसाधारण महिलांकरीता जागा नेमून देणे (Open Category for Women).

आरक्षण सोडत कार्यक्रमामुळे, ११ नोव्हेंबर २०२५ रोजी प्रा. रामकृष्ण मोरे प्रेक्षागृह परिसरात शासकीय वाहने वगळता सर्व प्रकारच्या वाहनांना बंदी असणार आहे. त्यामुळे नागरिकांनी आरक्षण सोडतीच्या ठिकाणी खासगी वाहने आणू नयेत, असे आवाहन महापालिकेच्या निवडणूक विभागाने केले आहे.

या आरक्षण सोडतीमुळे पिंपरी-चिंचवडच्या राजकीय पटलावर अनेक बदल घडून येणार असून, इच्छुकांमध्ये मोठी धाकधूक वाढली आहे.

© २०२५ मॅक्स मंथन डेली न्यूज. सर्व हक्क राखीव.