महापालिकेचे भांडारपाल विवेक मालशे यांच्या प्रशिक्षणात महाराष्ट्राला राष्ट्रीय विजेतेपद! अतिरिक्त आयुक्त विजयकुमार खोराटे म्हणाले, ‘तुमचे यश शहरासाठी अभिमानास्पद’

मालशे यांच्या मार्गदर्शनाखाली महाराष्ट्र डेफ क्रिकेट संघाने जम्मू-काश्मीरला ८ धावांनी हरवले; दुबईतील विश्वचषकासाठी शुभेच्छा

पिंपरी चिंचवड प्रतिनिधी बालाजी नवले, दि. १३ नोव्हेंबर २०२५, मॅक्स मंथन डेली न्यूज:

पिंपरी-चिंचवड महानगरपालिकेच्या (PCMC) मध्यवर्ती भांडार विभागाचे भांडारपाल आणि मूकबधिर क्रिकेट प्रशिक्षक विवेक मालशे यांनी प्रशिक्षक म्हणून मोठे यश संपादन केले आहे. त्यांच्या मार्गदर्शनाखाली महाराष्ट्र मूकबधिर क्रिकेट संघाने नवी दिल्ली येथे आयोजित करण्यात आलेल्या ९ व्या टी-२० राष्ट्रीय डेफ क्रिकेट चॅम्पियनशीप स्पर्धेचे विजेतेपद पटकावले.

या स्पर्धेत प्रशिक्षक या नात्याने मिळविलेल्या यशाबद्दल विवेक मालशे यांचा अतिरिक्त आयुक्त विजयकुमार खोराटे यांच्या हस्ते पिंपरी येथे सत्कार करण्यात आला.

इंडीयन डेफ क्रिकेट असोसिएशन (आयडीसीए) च्या वतीने दि. ३ नोव्हेंबर ते ९ नोव्हेंबर २०२५ या कालावधीत नवी दिल्ली येथे ९ व्या टी-२० राष्ट्रीय मूकबधिर क्रिकेट चॅम्पियनशीप टुर्नामेंटचे आयोजन करण्यात आले होते. या स्पर्धेत देशभरातील एकूण २० संघांनी सहभाग घेतला होता.

• अंतिम सामना: ७ दिवसांच्या या स्पर्धेच्या अंतिम सामन्यात महाराष्ट्र डेफ क्रिकेट संघाने जम्मू काश्मीर डेफ क्रिकेट संघाचा ८ धावांनी पराभव करून विजेतेपद पटकावले.
• यशाचा वाटा: विवेक मालशे यांच्या तांत्रिक मार्गदर्शन, अथक परिश्रम आणि संघभावनेच्या जोरावर महाराष्ट्र मूकबधिर क्रिकेट संघाने अंतिम सामन्यात हा विजय मिळविला.

सत्कार समारंभात अतिरिक्त आयुक्त विजयकुमार खोराटे यांनी विवेक मालशे यांच्या यशाबद्दल आनंद व्यक्त केला. खोराटे म्हणाले की, “मालशे यांनी यापूर्वी भारतीय मूकबधिर क्रिकेट संघाचे कर्णधार म्हणूनही संघाला विजेतेपद मिळवून दिले आहे. त्यांची ही सातत्यपूर्ण कामगिरी पिंपरी-चिंचवड शहरासाठी अत्यंत अभिमानाची गोष्ट आहे. त्यांच्या या यशातून मूकबधिर खेळाडूंना नक्कीच प्रेरणा मिळेल.”

खोराटे यांनी मालशे यांना पुढील वर्षी दुबई येथे होणाऱ्या मूकबधिर विश्वचषक स्पर्धेसाठी प्रशिक्षकपदासाठी देखील शुभेच्छा दिल्या. प्रशिक्षक म्हणून महाराष्ट्र संघाला विजय मिळवून दिल्याबद्दल विवेक मालशे यांचा महापालिकेचे आयुक्त श्रावण हर्डीकर यांच्यासह अतिरिक्त आयुक्त विजयकुमार खोराटे, तृप्ती सांडभोर, सह आयुक्त मनोज लोणकर, क्रीडा विभागाचे उपायुक्त पंकज पाटील, सामान्य प्रशासन विभागाचे सहाय्यक आयुक्त अजिंक्य येळे तसेच विशेष अधिकारी किरण गायकवाड आदींनी अभिनंदन केले.

यावेळी पिंपरी-चिंचवड महापालिका कर्मचारी संघाचे खेळाडू राहूल चावरिया, सचिन लोणे, महेश कुदळे, ओंकार पवार, विनोद साळूंखे, कृष्णा चव्हाण, योगेश साठे, निखिल आव्हाड, विजय बंडवाल, आकाश नामदे आदी उपस्थित होते.

© २०२५ मॅक्स मंथन डेली न्यूज. सर्व हक्क राखीव.