‘संविधान हेच पत्रकारांचे खरे कवच!’ पिंपरी-चिंचवड शहरात पत्रकारांकडून संविधान दिनाचा जागर
ज्येष्ठ पत्रकार बापूसाहेब गोरे आणि बाळासाहेब ढसाळ यांची उपस्थिती; ‘संविधानाची तोडमोड करणाऱ्या राज्यकर्त्यांना नागरिकांनी ओळखले पाहिजे’
पिंपरी चिंचवड प्रतिनिधी बालाजी नवले, दि. २७ नोव्हेंबर २०२५, मॅक्स मंथन डेली न्यूज:
केंद्र सरकारने २०१५ पासून साजरा करण्यास सुरुवात केलेल्या संविधान दिनानिमित्त, पिंपरी-चिंचवड शहरातील पत्रकारांनी एक महत्त्वपूर्ण कार्यक्रम आयोजित केला. २६ नोव्हेंबर १९४९ या ऐतिहासिक दिनाचे औचित्य साधून, पिंपरी चिंचवड महानगरपालिकेतील तिसऱ्या मजल्यावरील पत्रकार कक्षामध्ये पत्रकारांनी संविधान प्रास्ताविकेचे वाचन करून ‘संविधान दिन’ उत्साहात साजरा केला.
पिंपरी चिंचवड शहर पत्रकार संघाच्या पुढाकाराने आयोजित या कार्यक्रमास ज्येष्ठ पत्रकार बापूसाहेब गोरे आणि ज्येष्ठ पत्रकार बाळासाहेब ढसाळ हे प्रमुख पाहुणे म्हणून उपस्थित होते.
ज्येष्ठ पत्रकार बापूसाहेब गोरे यांनी यावेळी बोलताना सांगितले की, “संविधानाची ओळख करून घेण्याची खरी गरज प्रसारमाध्यमांमध्ये काम करणाऱ्या प्रत्येक व्यक्तीला जास्त आहे. पत्रकार हे दररोज समाज विघातक कृत्य करणाऱ्या शक्तींशी लढत असतात, अशावेळी त्यांना खरे संरक्षण संविधानाचे असते.” बापूसाहेब गोरे यांनी पुढे नमूद केले की, देशातील अनेक जाती, धर्म, पंथ व भाषा यांना एका धाग्यात बांधून ठेवण्याचे काम संविधान करते आणि लोकशाहीचा खरा आत्मा संविधान असल्यामुळे प्रत्येक नागरिकांनी संविधानाची ओळख करून घेणे गरजेचे आहे.
ज्येष्ठ पत्रकार बाळासाहेब ढसाळ यांनी संविधानाचे महत्त्व स्पष्ट करताना म्हटले की, “भारतीय संविधान असा एक ग्रंथ आहे, ज्यावर मानवी जीवन अवलंबून आहे. नागरिकांची जात व धर्म कोणताही असो, त्याचा खरा धर्म भारतीयत्व असला पाहिजे.” बाळासाहेब ढसाळ यांनी भारतरत्न डॉ. बाबासाहेब आंबेडकर यांनी मसुदा समितीत काम करत असताना दोन वर्ष ११ महिने १८ दिवस अथक परिश्रम करून संविधानाची निर्मिती केल्याचे स्मरण करून दिले.
ते म्हणाले, “संविधानाचे ७५ वे अमृत महोत्सवी वर्ष सुरू आहे आणि नागरिकांनी राज्यकर्ते संविधानाची तोडमोड करत असल्याचे लक्षात घेतले पाहिजे. संविधान प्रत्येक भारतीयांची जगण्याची पद्धती आहे आणि भारतीय नागरिक संविधान वाचवतील अशी खात्री आहे.”
या कार्यक्रमास पत्रकार सुनिल उर्फ बाबू कांबळे, प्रविण शिर्के, सुरज साळवे, विनायक गायकवाड, गणेश शिंदे, देवा भालके, दिनेश दुधाळे, दिलीप देहाडे, संतोष जराड, विकास साळवे, संतलाल यादव, भाई विशाल जाधव, अशोक कोकणे, अर्चना मेंगडे, सीता जगताप, मंदा बनसोड, शहनाज कुरणे, विश्वजित पाटील, अमोल सपकाळ, नारायण भालेराव, भीमराव बरकडे आदी पत्रकार मोठ्या संख्येने उपस्थित होते.
कार्यक्रमाचे सूत्रसंचालन पत्रकार सुरज साळवे यांनी केले, तर आभार पत्रकार मुकेश जाधव यांनी मानले.
© २०२५ मॅक्स मंथन डेली न्यूज. सर्व हक्क राखीव.
