आज (२ डिसेंबर) अमरावती जिल्ह्यात भरपगारी सुट्टी! नगर परिषद/नगरपंचायत निवडणुकीसाठी कामगार, कर्मचाऱ्यांना मतदानाची सवलत
कामगार उप आयुक्त अधीक्षक नि. रा. सरोदे यांचा कठोर कारवाईचा इशारा; तालुक्यातील अपीलीय दिवाणी फौजदारी न्यायालयांनाही स्थानिक सुट्टी
अमरावती, प्रतिनिधी अविनाश वानखेडे, दि. २ डिसेंबर २०२५, मॅक्स मंथन डेली न्यूज:
अमरावती जिल्ह्यामध्ये आज, २ डिसेंबर २०२५ रोजी होणाऱ्या नगर परिषद व नगरपंचायत सार्वत्रिक निवडणूक-२०२५ च्या पार्श्वभूमीवर, राज्य शासनाच्या निर्देशानुसार, मतदारांना मतदानाचा हक्क बजावता यावा यासाठी सर्व कामगार आणि कर्मचाऱ्यांसाठी भरपगारी सुट्टी किंवा कामाच्या वेळेत विशेष सवलत देणे आस्थापनांना बंधनकारक करण्यात आले आहे.
कामगार उप आयुक्त अधीक्षक नि. रा. सरोदे यांनी या संदर्भात आवाहन केले असून, सर्व आस्थापनांनी (उदा. कारखाने, दुकाने, हॉटेल्स, खासगी कंपन्या, आयटी कंपन्या, मॉल्स इत्यादी) या नियमांचे काटेकोरपणे पालन करावे, अन्यथा सुट्टी न मिळाल्यास कठोर कारवाई केली जाईल, असा स्पष्ट इशारा दिला आहे.
लोकशाही प्रक्रियेत नागरिकांचा सहभाग वाढवण्यासाठी हा आदेश देण्यात आला आहे. या नियमांचे पालन उद्योग, ऊर्जा व कामगार विभागांतर्गत येणाऱ्या निवडणूक असलेल्या क्षेत्रातील सर्व आस्थापनांना करणे अनिवार्य आहे. विशेषतः, कामासाठी निवडणूक क्षेत्राबाहेर कार्यरत असलेल्या मतदारांनाही ही भरपगारी सुट्टी लागू असेल.
अपवादात्मक स्थिती: धोकादायक किंवा लोकोपयोगी सेवांमध्ये (उदा. आपत्कालीन सेवा) ज्या आस्थापनांमध्ये पूर्ण दिवस सुट्टी देणे शक्य नाही, तेथे संबंधित कामगारांना मतदानासाठी दोन ते तीन तासांची विशेष सवलत देणे बंधनकारक आहे.
जिल्ह्यातील तालुक्याच्या ठिकाणच्या मतदारांना मतदानाचा हक्क बजावता यावा यासाठी, जिल्ह्यातील न्यायालयांसाठीही स्थानिक सुट्टी जाहीर करण्यात आली आहे.
जिल्हा माहिती कार्यालयाने दिलेल्या माहितीनुसार, अमरावती जिल्ह्यातील खालील तालुक्यांमध्ये निवडणूक निश्चित करण्यात आलेली आहे:
-
नगरपरिषदा: अचलपूर, अंजनगाव सुर्जी, चांदूर बाजार, चांदुर रेल्वे, दर्यापुर, धामणगाव रेल्वे, मोर्शी, तसेच वरूड.
-
नगरपंचायत: नांदगावखंडेश्वर.
यामुळे, उपरोक्त तालुक्यांच्या ठिकाणच्या अपीलीय दिवाणी फौजदारी न्यायालयांना मंगळवार, दिनांक २ डिसेंबर २०२५ रोजी स्थानिक सुट्टी जाहीर करण्यात आली आहे.
© २०२५ मॅक्स मंथन डेली न्यूज. सर्व हक्क राखीव.
