पिंपरी-चिंचवड पोलिसांचा गुन्हेगारांविरुद्ध ‘ॲक्शन मोड’! नोव्हेंबरमध्ये परिमंडळ-२ मधील ८ सराईत गुन्हेगार तडीपार

पुणे जिल्हा आणि रायगडच्या खालापूर तालुक्यातून बंदी; टोळीप्रमुखांसह सराईतांना पोलिसांचा दणका

पिंपरी प्रतिनिधी शाम सोनवणे,दि.२० डिसेंबर २०२५, मॅक्स मंथन डेली न्यूज: 

पिंपरी (दि. २० डिसेंबर २०२५): पिंपरी-चिंचवड शहरात सराईत गुन्हेगारांची दहशत मोडीत काढण्यासाठी पोलीस प्रशासनाने कडक पावले उचलली आहेत. पोलीस आयुक्त विनयकुमार चौबे, सह-पोलीस आयुक्त शशिकांत महावरकर आणि अपर पोलीस आयुक्त सारंग आव्हाड यांच्या मार्गदर्शनाखाली नोव्हेंबर २०२५ या महिन्यात परिमंडळ-२ मधील ०८ सराईत गुन्हेगारांना पुणे जिल्हा आणि रायगड जिल्ह्यातील खालापूर तालुक्यातून तडीपार करण्यात आले आहे.

पोलीस उप-आयुक्त (परिमंडळ-२) विशाल गायकवाड यांनी दिलेल्या माहितीनुसार, महाराष्ट्र पोलीस अधिनियम १९५१ च्या कलम ५५, ५६ व ५७ नुसार ही कारवाई करण्यात आली आहे.

परिमंडळ-२ च्या कार्यक्षेत्रातील १०० हून अधिक गुन्हेगारांच्या हालचालींवर पोलीस बारकाईने लक्ष ठेवून आहेत. गुन्हेगारी मोडीत काढण्यासाठी भविष्यातही अशाच प्रकारची ठोस आणि परिणामकारक प्रतिबंधात्मक कारवाई केली जाणार असल्याचे पोलिसांनी स्पष्ट केले आहे.

हद्दपार केलेले वरील गुन्हेगार जर त्यांच्या तडीपारीच्या कालावधीत पुणे जिल्हा किंवा खालापूर तालुक्यात कोठेही दिसून आल्यास, नागरिकांनी तात्काळ पोलीस नियंत्रण कक्ष (११२) किंवा संबंधित पोलीस ठाण्याला माहिती द्यावी, असे आवाहन पोलीस उप-आयुक्त विशाल गायकवाड यांनी केले आहे.

© २०२५ मॅक्स मंथन डेली न्यूज. सर्व हक्क राखीव.