पिंपरी-चिंचवडचे ‘सखी आंगण’ महिला सक्षमीकरणाचे आदर्श मॉडेल; केंद्र सरकारच्या सचिवांकडून प्रकल्पांचे कौतुक

पिंपरी प्रतिनिधी शाम सोनवणे, २१ जानेवारी २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेच्या वतीने राबविण्यात येणारे ‘सखी आंगण’ आणि निगडी येथील ‘कौशल्यम’ (लाईटहाऊस) हे प्रकल्प केवळ प्रशिक्षण केंद्रापुरते मर्यादित नसून, ते महिला उद्योजकता आणि युवक कौशल्य विकासाचे प्रभावी मॉडेल ठरत आहेत, अशा शब्दांत केंद्र सरकारच्या कौशल्य विकास व उद्योजकता मंत्रालयाच्या सचिव देवाश्री मुखर्जी यांनी महापालिकेच्या उपक्रमांचे कौतुक केले.

पुणे दौऱ्यादरम्यान सचिव देवाश्री मुखर्जी यांनी पिंपरी-चिंचवडमधील या महत्त्वाकांक्षी प्रकल्पांना भेट देऊन प्रत्यक्ष पाहणी केली. यावेळी त्यांच्यासोबत कौशल्य विकास मंत्रालयाच्या अतिरिक्त मुख्य सचिव मनीषा वर्मा, आयुक्त अमित सैनी, व्यवसाय शिक्षण व प्रशिक्षण संचालनालयाच्या संचालक माधवी सरदेशमुख, महापालिकेचे अतिरिक्त आयुक्त तृप्ती सांडभोर, विक्रांत बगाडे आणि इतर वरिष्ठ अधिकारी उपस्थित होते.

निगडी येथील ‘कौशल्यम’ प्रकल्पाला भेट दिली असता, अधिकाऱ्यांनी प्रशिक्षणार्थी युवक व महिलांशी संवाद साधला. उद्योगांच्या गरजांनुसार मिळणाऱ्या प्रशिक्षणामुळे नोकरीच्या संधी सहज उपलब्ध होत असल्याचे विद्यार्थ्यांनी सांगितले. विशेषतः विवाहानंतर करिअरमध्ये ब्रेक घेतलेल्या महिलांना पुन्हा व्यावसायिक प्रवाहात येण्यासाठी या प्रकल्पाने मोठी प्रेरणा दिल्याचे पाहून अधिकाऱ्यांनी समाधान व्यक्त केले.

आकुर्डी रेल्वे स्टेशनजवळील ४९ गाळ्यांच्या ‘सखी आंगण’ प्रकल्पाची पाहणी करताना शिष्टमंडळाने महिला बचत गटांच्या उत्पादनांची माहिती घेतली.

• विविध उत्पादने: या ठिकाणी मसाल्यांपासून ते हस्तकला साहित्य आणि बेकरी उत्पादनांपर्यंतची थेट विक्री केली जाते.

• आर्थिक लाभ: महापालिकेच्या या उपक्रमामुळे मध्यस्थांची साखळी टळली असून, महिलांना थेट ग्राहकांपर्यंत पोहोचता येत आहे. यामुळे महिलांना अधिक आर्थिक नफा मिळत असून त्या आता ‘रोजगार देणाऱ्या’ उद्योजक बनत आहेत.

“समाज विकास विभागाच्या माध्यमातून राबविण्यात येणारे हे उपक्रम रोजगारनिर्मितीसाठी प्रभावी ठरत आहेत. उद्योगांच्या गरजांनुसार कौशल्य विकास आणि थेट बाजारपेठेपर्यंत पोहोच यांचा एकत्रित विचार करून आम्ही हे प्रकल्प राबवत आहोत. केंद्र व राज्य शासनाच्या सहकार्याने अशा उपक्रमांचा विस्तार करून अधिकाधिक युवक व महिलांना सक्षम करण्याचा महापालिकेचा प्रयत्न आहे,” असे मत आयुक्त श्रावण हर्डीकर यांनी व्यक्त केले.

या भेटीमुळे पिंपरी-चिंचवड महापालिकेच्या महिला सक्षमीकरण मॉडेलची दखल आता राष्ट्रीय स्तरावर घेतली जात असल्याचे स्पष्ट झाले आहे.

© २०२६ मॅक्स मंथन डेली न्यूज. सर्व हक्क राखीव.